Mollurolovomato 17 - Gooti Toolluro Yogalokwono

Sulo pwolluda'ai wonyo anopo tovinokwono

¹ Toruda'ai yiuwi'nokai Isuraiyolda'ai a'mwo abolo ton Gooti Yawelluro wuudoduke tovi uumjunodupu kwako a'mwomaiyo kuu'maiyo Sen toru kuugollu'movopogano. Toro wuugollu'mo'mno sumaveyokwe kwokado amjo'movlaiyajupogano. Toro ton Gooti Yawel “Dovlaiyulo” wuudoduke toga wuugollu'mo'mdupu muuduko puwai'no avlaiyajupogano. Tono tono mujo'movla'mno sumaveyokwe kwako Refidim toru ki'movo'mno kemi woromollo'mo sel ago ton amodopogano. Kwako amodopo su toru wonyo nonyo'mo tov nonagutorukono.

² Toro tovino tov a'mwo abolo ton Moosesollu yogalo aro kuudopogano. “Nevu wonyo'mo kuuleyaluko sumwakuuwo tobuuronollu wonyo nyo'mo pun donekumallulo.” Toro kuudopo tovi Moosesol kuudokaikono. “Buro'nyo'mo mi yogalo donyudadokwovo? Kevu Gooti Yawel gamoro jurogudo tov anekuduuwalloneyokweyo'mo yamju nuuwiyoganmwalpiyo.” Kuudokaikono.

³ Moosesol toro kuudoka kuvi kuruv a'mwo abolo ton wonyo'mo kuuleyaluko yodupu mebweyogalo aro adomuugonallajupogano. “Guu burowo'nyo tabunyu tov nekubweyo'mo tooku nevuge'aro nemi kwoloraiyo togai'aro nemi ki'duvolodowado toorogai'aro tonollu Ijupda'ai anekumokabadokuudekudeyo? Guu nemi romiyanekubweyo'moneyokwe aro kuudo jukiyanekuu'mwakuno. A'mwo abolo su ton wonyo'mo kuuleyaluko yopi neya abolpuro. Kuudo jukiyanekuu'mwakuno?” Adomuugonallajupogano.

⁴ Toro tovino tov Moosesol Gooti Yawellu subusu'nyogalo guureji aro kuudokaikono. “A'mwo abolo akan mi sulo togai luvoromiyanubweyo'mo sadokwovo. Toro tonyu adado wimonyudeyo?” Kuudokaikono.

⁵ Toro kuudoka tovi Gooti Yawel Moosesollu kuudokaikono. “Guu Isuraiyolda'ai mido mollomwalokwe pworai momworaro'bi aki gumoro yodeko tov wonyo Nailovi aromiyodo tokwe momworaro'bi sumdomgu domollubworomokwanono.

⁶ Toro mollubworomokwano'bi sulo pwol muumuudo Hoorep toollu dolago tomuu wo'dowodo towai'no kuulomwalpinogaikikono. Muumuudo su toolluno yovo puruv muumuudo Sainailo dodupudekono. Toro towai kuulomwalodopure toga nuu kemi sumdollu toru sulo kwosuko su toollu muunyu toru da'mdo'mure toga guu sulo toollu iwago neya romibinekugono. Toro aromibi toga a'mwo abolo su ton wonyo nonyo'moneyokwe tov nyulowilovabwonokwono.” Kuudokaikono. Toro kuudoka tovi Moosesol kuvinono kuumjunokaikono. Toro uumjunoduke toga Isuraiyolda'ai mido mollomwalokwe tooro amuugonallajuporogano.

⁷ Moosesol toro ino sumaiyokwe kwako su towai'no yovo yowallo'moneyokwe Isuraiyolda'ai tonyuro pasudo sajupo tovino aki aiko te kuudo saurokaikono. Isuraiyolda'ai ton mebweyogalo duuwiyodupu aki Gooti Yawellu yamju wiyoganyo'mo aro ajajupogano. “Gooti Yawel nevuge nebal'no dukomwallo?” Toro ajajupo tovino kuudo yauro'no yovo puruval sowarokaikono. Puruv Masavo sowarokaikono. Masavo tovino kavlo tov yamju wiyoganyoveyo'mokwono. Aki puruv Meribavo sowarokaikono. Meribavo tovino kavlo tov mebweyogaloveyo'mokwono. Kwako su towai'no toro sowarokaikono.

Amalekda'ai tooro Isuraiyolda'ai tonyu molo abuuwiyopo kuvi kuruv Isuraiyolda'ai ton kuuwolovopo tovinokwono

⁸ To'no'gwowi Isuraiyolda'ai ton kwako Refidim toru mwalodopure toga Amalekda'ai tooro bo'mno molo abuuwiyoporogano.

⁹ Toro abuuwiyopo tovino Moosesol Joosuuwallu kuudokaikono. “Bi'ai toga a'mwo Amalekda'ai toorai molo wiyo'moneyokwe guu nemoro a'mwo pworai neya dojesono. Toro ajesubi su tooro bi'ai toga Amalekda'ai toorogai molo inodopure toga nuvno'gwowi muumuudo toollu ilodavo'mi Gooti Yawelluro yodeko tokwe moro ato tovi muunyu toru'aro yomwora'monyugono.” Kuudokaikono.

¹⁰ Moosesol toro wuujuno sumaiyokwe Joosuuwal kuvinono uumjuno'no a'mwo molo'mo ajesoka toorogai'aro momworaro'no Amalekda'ai toorogai molo sunoporogano. Toro inodopure toga Mooseseke Erooneke Huureke tooro muumuudo toollomno ila'mno muunyu toru sulodavoporogano.

¹¹ Toro iloda'mno sumaveyokwe Moosesol gami ato toval bomokailoduke toga Isuraiyolda'ai tooro Amalekda'ai toorai uuwoleyo'mo soporogano. Toro kuvi kuruv Moosesol gamoro ato toval nokwo uumwogapiyoduke toga'no'gwowi Amalekda'ai tooro Isuraiyolda'ai toorai uuwoleyo'mo soporogano.

¹² Toro te Moosesol gamoro ato toval muunyu toru bomokailodawo yoguduko wuudo'mduke tovino tov Erooneke Huureke tooral sulo pwol mogunyugolowosolno Moosesol sulo su toollu sulomwalokaikono. Toro mwaloduke toga Erooneke Huureke tooral Moosesollu imgu amgu daino sumaleyokwe gamoro ato toval muunyu toru'aro amollodavolorakono. Toro molloda'mno molloda'mno sumaleyokwe yiuno kuujo tool kwolomwoloka toga'no kuumwogapiyolorakono.

¹³ Toro te Joosuuwaike tooro Amalekda'ai toorogai molo ino'mno su toro tomgu'aro kuuwolovoporogano.

¹⁴ Me'no uuwolo'mno sumaveyokwe toga Gooti Yawel Moosesollu subuu'yamju aro kwiyokaikono. “Nuu yiuwi'nokai Amalekda'ai toorai yiunokuudo noromiyebuuropimonyugono. Toro aromiyebuuropimi tooraino lukomgu yiuwi'nokai a'mwo abolo kwako akavi mwalodupudo ton kuudo miyou'movlapinogano.” Aduuwiyokaikono. Gooti Yawel toro duuwino sumaiyokwe aki aro kuudokaikono. “Moro subuu'yamju toro adaikullumo akavino kevu kuudo nyallulo'gwonpiyokweyo'mo buukiyo tovi puukwollo neya jakwollono. Toro sakwollubi su tovi Joosuuwallu jodubwasono.” Gooti Yawel Moosesollu toro kuudokaikono.

¹⁵ Gooti Yawel toro wuujuno sumaiyokwe Moosesol Gooti Yawellu wiroudapiyo'moneyokwe dukwagupto puruv sulo togai aluvogilo'melokaikono. Toro luvogilo'melno sumaiyokwe dukwagupto su tovino yovo yowallo'moneyokwe aro kuudo saurokaikono. Oo Gooti Yawel nemi molo'mo mollubworonekumokwanodowodoldeyo. Kuudo yauro'no romiroudapiyo'mo dukwagupto su tovino yovo tov Yawe Nisiyolo sowarokaikono.

¹⁶ Moosesol toro yowa'no sumaiyokwe aki aro adokaikono. “Oo Amalekda'ai tooro Gooti Yawellu kisuvolo wiyodupudo tooraino tov Gooti Yawel molo tov yiunokuudo wimovla'mwalonekono. Aki kemoro lukomguda'ai kwikweyago sawosunpi kworai kuruv molo aval'no wimovla'mwalonekono.” Adokaikono.