Mollurolovomato 14 - Gooti Toolluro Yogalokwono

Soolwara Weyako tovi aga'mokwopo tovinokwono

¹ Toruda'ai Gooti Yawel Moosesollu aro kuudokaikono.

² “Guu Isuraiyolda'ai tonyu aro duudono. “Kevu aikomgu plavopi wagwolago Piyaroot wobo toru kwako puvi ki'mopinogaikikono. Kwako ai'mopi su tov wagwolago Mikdoolke'aro soolwara wolo toruke'aro tovallu akuuto toru wo'dowodokwono. Aki wagwolago Belsefoon imgu tomuu wo'dowodokwono. Toro towai ki'movopi kemi woromollo'mo sel ago ton domojulo.

³ Toro togaikulluno Feroo tool aro kuudo yaikuuronekono, Oo Isuraiyolda'ai ton puuto plaiyo'mo tovino noo'nookwo jomolladokwovo. Toro kuudo yaikuurowo'ji aki aro donekono, “Isuraiyolda'ai su tobuuro kwako a'mwomaiyo kuu'maiyo tomuuda'ai ku'nono mabirolo'nugolokuupinobuurodeyo,” ikudonekono.

⁴ Toro te moro yodo'mure tovida'ai Feroo tool gamoro poowokalago tov lumdo kuulopiyowo'ji kemi movomjaiki'nonekono. Toro amovomjaiki'no'ji tooke'aro gamoro yiuwi'nokai molo'mo a'mwo toorogai'aro toorai uuwolovo'mi yovo agutokwe ma'monyugono. Aki toro toonyuno Ijupda'ai tooro kuudo yanuupinorogano. Oo Gooti Yawel kwoldeyo. Yanuupinorogano.” Duudono.” Kuudokaikono. Toro kuudoka tovi Isuraiyolda'ai ton kuvinono kuumjunopogano.

⁵ Isuraiyolda'ai ton lukado me'no abolokwopo tovino a'mwo pworo Ijupda'ai a'mwo aguto kig Feroo toollu kuudoporogano. Toro kuudopo tovi Feroo tooke'aro gamoro a'mwo womdo tovi mollomwalokwe toorogai'aro tooro wuu'no'mno Isuraiyolda'ai tonyuno aki aiko te kuudo pumgu'aro yau'no sumaveyokwe aro sajunoporogano. “Awi, Isuraiyolda'ai ton nobolokwodopure toga nevu buro'nyo'mo wonyapino sumwa'juwonoldeyo? Aga'no'gwowi nemoro ki'nato womdo ton mimwalpinogano.” Sajunoporogano.

⁶ Toro yajunyuno sumaveyokwe Feroo tool gami molo'mo karis toollu yovrowoso'no gamoro a'mwo mollurogudo toorogai'aro momwora'no sumaiyokwe

⁷ aki 600 molo'mo karis senyubworomaroka toorogai'aro aki yiuwi'nokai Ijupda'ai molo'mo karis kworogai'aro aki karis su toorai mido mollomwalokwe a'mwo toorogai'aro toorai momwora'no sumaiyokwe Isuraiyolda'ai tonyu avomjai'noporogano.

⁸ Gooti Yawelluro yoduke tovida'ai Ijupda'ai a'mwo aguto kig Feroo tool gamoro poowokalago tov lumdo aulopiyoka tovino tov Isuraiyolda'ai tonyu toro avomjai'noporogano. Toro movomjai'nodopure kuvi kuruv Isuraiyolda'ai ton mwono'mno aro amjodumovlaiyajupogano. “Oo nevu Ijupda'ai toorai me'no kuuwolo'mawonogano.” Toro dodupu ilaiyo bwotonyo amjumovlaiyajupogano.

⁹ Toro mujumovla'mdopure toga Ijupda'ai tooro yiuwi'nokai Feroo toolluro hoos toorogai'aro karis toorogai'aro a'mwo karis gunyukullokwe toorogai'aro a'mwo mollurogudo toorogai'aro tooro povomjai'nyuno sumaveyokwe kemi woromollo'mo sel ago towai mwalodopure tonyu wobo toru ai'movoporogano. Woromollo'mo sel ago su towai soolwara wolo tovi wagwolago Piyaroot wobo toru wo'dowodokwono. Aki wagwolago Belsefoon tovi imgu tomuu wo'dowodokwono.

¹⁰ Toro towai Ijupda'ai a'mwo aguto kig Feroo tooke'aro gami a'mwo mollurogudo toorogai'aro tooro wobo toru ai'movoporogano. Toro ki'mo'mdopure toorai Isuraiyolda'ai ton gunyubwosumdo yo'mno kwonopogano. Toro wonyuno sumaveyokwe luko bwotonyo yo'mno Gooti Yawellu deko aro kuudopogano. “Guu donekullo'mwojonoo.” Kuudopogano.

¹¹ Toro wuujuno sumaveyokwe Moosesollu yogalo aro kuudopogano. “Guu burowo'nyo tabunyu tov nekubweyo'mo tooku Ijupda'ai anekumokabadokuudekudeyo? Aki Ijup toru nemi mollusonekubweyo'moneyokwe kwako tovino nonagutomuudukono? Guu su toro kuudo yaurono nemino tov abolpureyokweyo'mo kwako a'mwomaiyo kuu'maiyo akawai'no anekumokabadokuudekudeyo?

¹² Toro tobuuronol Ijup toru yere muugollu'mo'mdowore toga nemi abaneki'mo'mwalluko akavino me'no agudowonogano. Toro te aga nevu kwako a'mwomaiyo kuu'maiyo akaru abola'ji tov ilaiyo'maiyo. Toro tovino tov guu muudu'nodo toga nekwonyapino so'bujuko'mno'juki nevu Ijupda'ai toorai ki'nato womdo tov ilaiyo kuuno kwimovlavowa'jujukonogano.” Moosesollu yogalo toro kuudopogano.

¹³ Toro kuudopo tovi Moosesol aro kuudokaikono. “Kevu guureji davopi luko mipinono. Anuugwo toga Gooti Yawel kemi nomollurolovekwapiyodowo'jure tovi noonpinogaikikono. Aki Ijupda'ai kwonmwakopo su toorai aki aiko te yiunokuudo mwonpinorogano.

¹⁴ Toro te kevnokwe togaikul logaibwoto puru'monodo kuruv miyopi Gooti Yawel kemi ikullo'mwojo'mo ikomago su toorai molo wiyodowo'jure tovi domuugonallulo.” Kuudokaikono.

¹⁵ Aki Gooti Yawel Moosesollu kuudokaikono. “Guu mi deko anyudadokuudo tov buro'nyo'mo'mdeyo? Guu Isuraiyolda'ai a'mwo abolo tonyu neya wanpureyokwe tovino duudono.

¹⁶ Aki toro tooku gumoro yodeko tov soolwara tovi muunyu toru'aro idowoso'bi soolwara tov imgu amgu jo'bworosonokwono. Toro ajo'bworoso'ji tovi akuuto toru'aro kevu Isuraiyolda'ai togaikul noga'meyo'moneyokwe kwako yalukullo tovi'aro kuulapinogaikikono.

¹⁷ Aki su toro toga moro yodo'mure su tovi'aro Ijupda'ai tooravuro poowokalago ton lumdo kuulopiyopi kemi movomjaiki'nupinorogano. Toro yodopure kworai kuruv nuu Feroo tooke'aro gamoro a'mwo mollurogudo toorogai'aro gamoro karis toorogai'aro a'mwo karis gunyukullokwe toorogai'aro toorai nuuwolo'monyugono. Toro kuuwolo'mi toonyu yovo aguto ma'monyugono.

¹⁸ Aki yiuwi'nokai Feroo tooke'aro su toorai kuuwolo'mi toga yiuwi'nokai Ijupda'ai a'mwo abolo su ton mino aro kuudo yanuupinorogano. Oo Gooti Yawel kwoldeyo. Kuudo yanuupinorogano.” Kuudokaikono.

¹⁹ Toro wuujuno sumaiyokwe Gooti toolluro ensel tool Isuraiyolda'ai kwolallo tonyu sumdomgu amollubworomokwanyajukekono. Toro kwol kuruv su toro toga buulo tomgu abwolodavokaikono. Aki sulu'wo sumdomgu kwanyajuko kuruv buulo tomgu abwololluku'norokakwono.

²⁰ Sulu'wo su tov Ijupda'ai toorogai'aro Isuraiyolda'ai togai'aro tonyu akuuto toru abwololluku'norokakwono. Toro abwololluku'noroka toga Ijupda'ai toorai dugumdo kimwonyopiyodowodo kuvi kuruv Isuraiyolda'ai tonyuno'gwowi bako awopiyajukokwono. Surakuuto su tollugwoji toro imo'noduke tovino tov Ijupda'ai tooro Isuraiyolda'ai tonyu wobo toru mabiyajuporogano.

²¹ Toruda'ai Moosesol gami yodeko tokwe momwora'no sumaiyokwe soolwara tovi muunyu toru'aro idovomwora'duke toga Gooti Yawel dolo bwotonyo puruv amoropiyabokaikono. Dolo su tov kuujo tool sulopiyamoka tomuuda'ai bino sumaiyokwe yiuwi'nokai surakuuto su tollugwoji ino ino yodowo soolwara tovi jo'bworapiyo'no akuuto toru kwako yalukullo tov sumo'nokakwono.

²² Toro te soolwara tov imgu amgu jo'bworapiyo'no wonyo tov imgu amgu kuurupto to'busuko adavolovakono. Toro adavolo tovallu akuuto toru kwako yalukullo imo'noduke tovi'aro Isuraiyolda'ai ton aulapogano.

²³ Toro kuulodopure tonyu Ijupda'ai tooro amovomje'nomokaulaporogano. Feroo toolluro hoos toorogai'aro karis toorogai'aro a'mwo karis gunyukullokwe toorogai'aro yiuwi'nokai su tooro povomje'nomokaulno sumaveyokwe soolwaravuro akuuto toro aulai'movoporogano.

²⁴ Toro kuulai'mo'mdopure toorai Gooti Yawel sulu'wo tokwe'aro du'wiyo tokwe'aro tovallu kuulomwalodowodo tool lomwo iru'mago toga kwoloonyopiyabokaikono. Toro woloonyopiyabino sumaiyokwe toga Ijupda'ai a'mwo mollurogudo tooro luko bwotonyo ino sumaveyokwe lukado plaiyo'mo noo'nookwo soporogano.

²⁵ Toro ino sumaveyokwe Gooti Yawelluro yoduke tovida'ai kemoro karis tooravuro suvlo ton kwako tovi lukumowopiyo'mno ku'nono mavlavoporogano. Ijupda'ai tooro toro tovi wonyuno sumaveyokwe sajunoporogano. “Awi, Gooti Yawel Isuraiyolda'ai tonyu wiyo'mwojodowo nemi molo anekulladopiyo. Toro tekwojonol lukado yere avlawano.” Sajunoporogano.

²⁶ Toruda'ai Gooti Yawel Moosesollu kuudokaikono. “Ijupda'ai mollurogudo toorogai'aro kemoro karis toorogai'aro a'mwo karis gunyukullokwe toorogai'aro toorai wonyo tov bu'duvolomarono'moneyokwe gumi yodeko tokwe soolwaravi muunyu toru'aro judovomworarono.” Kuudokaikono.

²⁷ Toro wuujuno sumaiyokwe Moosesol gami yodeko tov soolwaravi muunyu toru'aro sudowosokaikono. Toro idowosuno sumaiyokwe kuujo tool aiyo doduke toga soolwara tov gami sumdomguda'ai kwollajuko aiko toru wollo'mo abokakwono. Toro boduke toga Ijupda'ai tooro lukado plaiyo'mo sopo kworo kuruv Gooti Yawel yiuwi'nokai toorai amobwokuruvollokarogano.

²⁸ Toro te wonyo tov gami aiko toru kworoka toga Ijupda'ai a'mwo aguto kig Feroo toolluro a'mwo mollurogudo toorogai'aro karis toorogai'aro a'mwo karis gunyukullokwe toorogai'aro yiuwi'nokai avomjai'nyajupo su toorai wonyo tov lobiyomaro'no amulegoukuurosokarogano. Aki toro tooravuro pwolnodo kwollu kuruv migullokakwono.

²⁹ Toro kuvi kuruv Isuraiyolda'ai a'mwo abolo tono'gwowi kwako yalukullo tovi'aro aulapogano. Toro aulapo toga soolwara tov imgu amgu kuurupto to'busuko adavolo tovallu akuuto toru'aro kuula'mno igo'mgu ai'movopogano.

³⁰ Toro te iruko su tollugwoji Gooti Yawel Isuraiyolda'ai a'mwo abolo tonyu Ijup tooravuro ato tovida'ai amollurolowapiyokaikono. Toro mollurolowapino sumaiyokwe Ijupda'ai me'no abolopo tooravuro kulako ton soolwaravuro weko toru wo'dopure toorai Isuraiyolda'ai ton kwonopogano.

³¹ Aki Gooti Yawel Ijupda'ai toorai gamoro jurogudo kuunodo tokwe uuwolo'mduke tovi Isuraiyolda'ai kevnokwe ton wonyuno sumaveyokwe Gooti Yawelluno luko yo'mno kuudo kuubweyopogano. Aki Gooti Yawelluro a'mwo womdokwe Moosesolluno kuruv kuudo kuubweyopogano.