Mollurolovomato 10 - Gooti Toolluro Yogalokwono

Tomabore'bore pwekwalo tooro sumo'nopo tovinokwono

¹ Toruda'ai Gooti Yawel Moosesollu kuudokaikono. “Guu Feroo toollomno plavo'bi duuru'marono. Nuu Feroo tooke'aro gamoro a'mwo womdo tovi mollomwalokwe toorogai'aro toorai moro duuwallo jurogudo ton wuuduuwallumo'monyugono. Toro wuuduuwallo'mi kemoro poowokalago tonyu lumdo kuulopiyo'moneyokwe nuvnokwe toonyu nuubwemonyugono.

² Aki Ijupda'ai toorai wogulo iwo'gallo'moneyokwe moro duuwallo jurogudo ton wuuduuwallumonyugono. Toro tovi kevu wonopi lukomgu kemi kwolaiyo taiyo togai'aro aki kemi kellukweyago kugai'aro tonyu nokwo yodubwosumovlapinogaikikono. Yiuwi'nokai togaikul mino tov, Oo Gooti Yawel kwoldeyo, kuudo yanuu'mwalpino'moneyokwe moro duuwallo jurogudo ton toro uubwemonyugono.” Kuudokaikono.

³ Toruda'ai Mooseseke Erooneke todoral Feroo toollu wuuru'ma'no sumaleyokwe aro kuudolorakono. “Nevu Hibruu tonolluro Gooti Yawel aro agudadopiyo. “Guu mi dolago tomuu mabwolomoropinodamdo tooku kisuvolo kuuno mujumovla'binekudukono? Awiyo. Toro kweku kuruv moro a'mwo abolo ton mi ilomonuwopiyo'moneyokwe pla'mdopure tonyu guu wonyapino neya jono.

⁴ Guu moro a'mwo abolo su tonyu wonyapino mibi to'gwowi bi'ai toga tomabore'bore pwekwalo toorai gumoro kantri Ijup toru nomekwopiyamonyugono.

⁵ Toro amekwopiyami tooro kwako tovi aiyowomno bu'duvolomaropi a'mwo abolo ton kwako tovi sumdo ku'nono mwonpinogano. Aki toro bu'duvolomaropi toga noonyumwonyu kuuno aujunakwopo tonyu mulonopipinorogano. Sumdomguda'ai sullumiyo buuruko bwotonyo tov kaiyako migolosoka tonyu mulonopiyopi aki yiuwi'nokai iko adakwopo kworogai'aro toorai mulonopipinorogano.

⁶ Tomabore'bore pwekwalo su tooro guuge'aro gumoro a'mwo womdo tovi mollomwalokwe toorogai'aro yiuwi'nokai Ijupda'ai a'mwo abolo togai'aro togaikulluro ago tonyu noullo'mowopipinorogano. Tabunyu nyumo'nono aka'busuko puruv kemi tellunum kwolabolo kugai'aro kellukweyago kugai'aro ton mwonyajupogano. Aiyoga amjomwekobiyajupo togada'ai yiuno aga'no tabunyuwuulo su to'busuko puruv mwonyajupogano. Tabunyuwuulo su tovi noonpinorekikono.” Gooti Yawel toro agudadopiyo.” Moosesol toro wuujuno sumaiyokwe Feroo toollu buulo uugunyumopiyo'no kwa'mgu tomuuno abolokwokaikono.

⁷ Toro bolokwino sumaiyokwe a'mwo womdo tovi mollomwalokwe tooro Feroo toollu aro kuudoporogano. “Oo a'mwo su tool kwako Ijup toru jul'nyo nekubweyodowodo tool kwekono. Aki nemoro kwako Ijup akaru kaiyako su'nadopiyo. Toro te Isuraiyolda'ai a'mwo tooro kemi Gooti Yawellu ilomoropiyo'mo pla'mdopure toorai guu wonyapino neya jono.” Kuudoporogano.

⁸ Toro wuujuno sumaveyokwe Mooseseke Erooneke todoral Feroo toollomno aki aiko te adomokaulaporakono. Toro adomokaulapo toorallu Feroo tool kuudokaikono. “Kevu Isuraiyol togaikul kemi Gooti Yawellu ilomoropiyo'moneyokwe nokwo plapinogaikikono. Toro kugaikul kuruv sumdomgu ala'mworuvo plapino'mdukoneyokwe tovino neya donyujulo.” Kuudokaikono.

⁹ Toro kuudoka tovi Moosesol aro kuudokaikono. “Nevu yiuwi'nokai tonol plawanonogano. Nemi Gooti Yawellu ilomoropiyo'moneyokwe lubullu doto bwotonyo yo'mo tovino tov nemoro muugunyo kwolabolo togai'aro yadaiyo togai'aro nemoro kwolaiyo taiyo togai'aro aki nemoro sipsip meme buulmokau toorogai'aro toorai momworarowa'ji plawanonogano.” Kuudokaikono.

¹⁰ Toro kuudoka kuvi kuruv Feroo tool aro kuudokaikono. “Tarevono, akarekul mi kisuvolo nyupino'morodeyo tov kuu'maiyo toru'no me'no sourekumakono. Toro te kevu kemi julkwolaiyo togai mokavla'mdopure togaikullu ikwonyapino mimonyugono. Toro ikumjuku'do'mure togaikullu yiuno kemi Gooti Yawelno ikullo'mwojonogaikikono. Toro kwol kuruv ku'nono maikullo'mwojonogaikikono.

¹¹ Toro tovino tov kemi julkwolaiyo togai ku'nono mamokavlapinorekikono. Toro kuvi kuruv kemi Gooti Yawellu ilomoropiyo'mo aikulluno'ji tov kevu yiuno a'mwo toorekulno nokwo plapinorekikono.” Feroo tool toro wuujuno sumaiyokwe kuga'gwo kuuno gamoro womdokwe pworai wuudo'no Mooseseke Erooneke todorallu kwa'mgu tomuu abilomovomjopiyoporogano.

¹² Toruda'ai Gooti Yawel Moosesollu aro kuudokaikono. “Gumoro ato tov muunyu kai'muu'aro bomokaila'bi kwako Ijup toru tomabore'bore pwekwalo tooro aiyowomno yo'mowopipinorogano. Toro yo'mowopiyopi toga yiuwi'nokai kuuno aujunakopo ton sumdomguda'ai sullumiyo buuruko bwotonyo tov kaiyako migolosoka su tonyu mulonopipinorogano.” Kuudokaikono.

¹³ Toro kuudoka tovi Moosesol gamoro yodeko tokwe bomokailno sumaiyokwe kwako Ijup toru muunyu tomuu'aro sudowosokaikono. Toro sudowosoka toga Gooti Yawel dolo puruv kuujo tool sulopiyamoka tomuuda'ai amoropiyabokaikono. Dolo amoropiyaboka su tov iruko su tollugwogai'aro surakuuto tollugwogai'aro tovallu ino ino sumaiyokwe lomwo toga tomabore'bore pwekwalo tooro dolo su to kuvi'aro aboporogano.

¹⁴ Toro abopo tooro pwekwalo imo'no'mno yiuwi'nokai kantri Ijup toru aiyowomno abu'duvolomaroporogano. Tomabore'bore pwekwalo sumo'nopo su toorobusuko pworai aiyoga mwonyajuporogano. Aki lukomgu kuga kuruv su toorobusuko pworo aki aiko te mimo'nupinorogano.

¹⁵ Pwekwalo toro sumo'nopo tooro yiuwi'nokai kwako tovi bu'duvoloma'dopure toga kwako tov yiuno dugubunyo kula'noka to'no kwollajukokwono. Aki toro tooro yiuwi'nokai ikulsulo togai'aro yiuwi'nokai aujunallajupo ton sumdomguda'ai sullumiyo buuruko bwotonyo tov kaiyako migolosoka togai'aro tonyu amulonopiyoporogano. Toro mulonopino sumaveyokwe ikoulokwe ikorodeyo mekwakodeyo wosamujukodeyo tonyu yiunokuudo amulebuuronopiyoporogano. Toro amulebuuronopiyopo toga ikouljokwe pwolnodo kwol kuruv yiuwi'nokai kwako Ijup toru mwollajukokwono.

¹⁶ Toruda'ai Feroo tool Mooseseke Erooneke todorallu yere doma'no sumaiyokwe Moosesollu aro kuudokaikono. “Nuu kemoro Gooti Yaweke'aro kev kworakike'aro toorekullu ma'no ma'nodo tov me'no aikullumonyugono.

¹⁷ Moro ma'no ma'no aikullumo su tovino guu domodukwopiyono. Toro te guu kemi Gooti Yawellu subusu'nyogalo wuudo'bi tabunyuwuulo aromiyanubweyadopiko akavi neya amanyudukwopiyono.” Kuudokaikono.

¹⁸ Toro wuujuno sumaiyokwe toga Moosesol Feroo toollu buugollu'mokalokwino sumaiyokwe Gooti Yawellu subusu'nyogalo kuudokaikono.

¹⁹ Toro kuudoka toga Gooti Yawel dolo sumdomguda'ai amoropiyaboka tov pumgu'aro moruugunyumwojo'no kuujo tool kwolmoka tomuuda'ai dolo jurogudo tov amoropiyabokaikono. Dolo jurogudo amoropiyaboka su tov yiuwi'nokai tomabore'bore pwekwalo sopiyajupo toorai mobwokuromwora'no sumaiyokwe Soolwara Weyako tovi amobwokuruvollokarogano. Toro amobwokuruvolloka toga tomabore'bore pwolnodo kwol kuruv kantri Ijup toru mwollajuporogano.

²⁰ Toro sumo'noka kuvi kuruv Gooti Yawelluro yoduke tovida'ai Feroo tool gamoro poowokalago tov lumdo kuulopiyo'no Isuraiyolda'ai a'mwo abolo tonyu mirolowapiyokaikono.

Surakuu'wuulo bwotonyo ajunoka tovinokwono

²¹ Toruda'ai Gooti Yawel Moosesollu kuudokaikono. “Gumoro ato tov muunyu kai'muu'aro bomokaila'bi surakuu'wuulo bwotonyo tov kwako Ijup toru aiyowomno bu'duvolomaronokwono. Surakuu'wuulo bwotonyo su tov judo pumgu'aro ibwosunpino'moneyokweyokwono.” Kuudokaikono.

²² Toro kuudoka tovi Moosesol gamoro ato tov muunyu kai'muu'aro bomokailno sumaiyokwe surakuu'wuulo tov kwako Ijup toru aiyowomno abu'duvolomarokakwono. Toro bu'duvoloma'no sumaiyokwe iruko pullapullu kuuwolo'nokakwono.

²³ Iruko pullapullu su tobuullu Ijupda'ai a'mwo abolo ton kevuge togai ku'nono miyainyunodupu kemi ago tonyuda'ai mabolokwopogano. Toro kuvi kuruv Isuraiyolda'ai ton amwallajupo towai'no'gwowi surakuu'wuulo su tov mabu'duvoloma'dowo bako kurukwe amwallajupogano.

²⁴ Toruda'ai Feroo tool Moosesollu doma'no sumaiyokwe aro kuudokaikono. “Kevu kemi Gooti Yawellu ilomoropiyo'moneyokwe kemi julkwolaiyo togai nokwo mokavlapinogaikikono. Toro kugaikul kuruv kemoro sipsip meme buulmokau tooraino'gwowi mamokavlapinogaikikono.” Kuudokaikono.

²⁵ Toro kuudoka kuvi kuruv Moosesol kuudokaikono. “Awiyo, su toro tov ku'nono miyanonogano. Nevu nemi Gooti Yawellu wiroudapiyo'moneyokwe toorai neya mokavlawanonogano.

²⁶ Toro tovino tov nemoro sipsip meme buulmokau tooro pwolnodo kwol kuruv mworowo'ji yiuwi'nokai toorai neya mokavlawanonogano. Toro tov aro tovinokwono. Nevu Gooti Yawellu ilomoropiyo'moneyokwe toru yere mai'mo'mdowa'jure toga Gooti Yawellu wiroudapiyo'moneyokwe pworai ku'nono majesanonogano. Toro kuvi kuruv nevu me'no ai'mowa'ji toga'no'gwowi wiroudapiyo'moneyokwe pworai nokwo jesanonogano. Toro tovino tov nevu yiuwi'nokai toorai neya mokavlawanonogano.” Kuudokaikono.

²⁷ Toro kuudoka kuvi kuruv Gooti Yawelluro yoduke tovida'ai Feroo toolluro poowokalago tov lumdo aulopiyokaikono. Aki toro tool Isuraiyolda'ai tonyu irolowapiyo'mo mwinokaikono.

²⁸ Feroo tool toro kuudo yau'no sumaiyokwe Moosesollu kuudokaikono. “Guu domelptovomokwanono. Nuu gumi sumdo aki aiko te gwonyo'mo manyunadopiyo. Nuu gumi aki aiko te agwonmi tov kuga yiuno'no romiyagubwemekugono.” Kuudokaikono.

²⁹ Toro kuudoka tovi Moosesol kaduko wino sumaiyokwe kuudokaikono. “Yowa'nogano, gumoro anyudumado kuvinono imonyugono. Nuu gumi gwonyo'mo aki aiko te mabumonyugono.” Moosesol toro kuudokaikono.