Mollurolovomato 1 - Gooti Toolluro Yogalokwono

Ijupda'ai tooro Jekoopolluro muugunyo toorai kaiya'no sugollajupo tovinokwono

¹ To'no'gwowi Jekoopeke'aro gami muugunyo toorogai'aro kemoro julkwolaiyo togai'aro yiuwi'nokai ton Ijup'no avlavopogano. Jekoopolluro muugunyo su tooraino yovo tov arorogano.

² Ruubenol kuuno Simiyoonol kuuno Livaiyol kuuno Juuda'wol kuuno

³ Isakarol kuuno Sebuulonol kuuno Bejamenol kuuno

⁴ Danol kuuno Naftalaiyol kuuno Gatol kuuno Aserol kuuno todorotogano.

⁵ Toro te yiuwi'nokai Jekoopolluro muugunyo toorogai'aro jukweyago kwolaiyo toorogai'aro towa 70-pela sawosunokarogano. Toro towa Ijup'no yere mavla'mdopure toga Joosepol sumdomgu kwolda'ai uuwo'no me'no amwallajukekono.

⁶ Joosepeke todoroto mwalno sumaveyokwe lukomgu yiuwi'nokai Joosepeke'aro gami ganyokwo kwolo towake'aro tooro aboloporogano.

⁷ Toro abolopo kuvi kuruv Isuraiyol tonyuro kwolaiyo taiyo tono'gwowi kwolallo bwotonyago kuuno sowosungovlaiyajuporogano. Toro yowosungovla'mno sumaveyokwe kwolallo bwotonyo imo'no'mno kwako Ijup toru aiyowomno amwollutowopiyopogano. Aki toro ton jurogudo kuunodo sumo'nyajupogano.

⁸ Toruda'ai lukomgu kwako Ijup toru mollomwallo'mo a'mwo aguto kig Feroo muuduko pwol abillumo'nokaikono. Feroo muuduko abillumo'noka su tool Joosepolluno kuuguudo tovi muu'nyajukekono.

⁹ Toro tool gamoro Ijupda'ai a'mwo pworai aro kuudokaikono. “Kevu duu'nyulo. Isuraiyol tooravuro kwolallo ton bwotonyago imo'nodupu kemoro jurogudo kuruv nemi anekuuwolo'mwakovo.

¹⁰ Toro ton bwotonyago kuuno nyumo'nugovla'mwalpiyokwe nevu uumjukullo'mo puuto puruv po'dogalo neya ajourosano. Toro tonyu nevu muumjukura'ji tov puga nevu nemi ikomago toorogai molo suna'ji toga kwolallo akan ikomago toorai molluulopi nemi nonekuuwolopinogano. Toro nekuuwolovopi nemoro kwako akavida'ai nobirolo'nugolokuupinogano.” Kuudokaikono.

¹¹ Toro te Ijupda'ai tooro Isuraiyolda'ai tonyu womdo guureji dumuurolo'mwalpino'moneyokwe a'mwo mido mollomwalokwe pworai ajesoporogano. A'mwo su tooro Isuraiyolda'ai tonyu jul'nyo bwotonyo uubweyo'moneyokwe womdo bwotonyago ton soullubweyajuporogano. Toro te Isuraiyolda'ai tobuuro wagwolago bwotonyo puruval amodubweyopogano. Wagwolago su toval Feroo toolluro kuto ivito ton i'bworoso'moneyokweyovakono. Aki wagwolago su tovalluno yovo tov Pitoomke Rameseseke tovakono.

¹² Toro te Ijupda'ai tooro Isuraiyolda'ai tonyu kaiyako igollo'moneyokwe jul'nyo pugai'aro kuuno kuubwemovlaiyajuporogano. Toro kuvi kuruv Isuraiyolda'ai ton kwolallo kuuno yowosungovla'mdupu Ijup toru aiyowomno amoollutowopiyajupogano. Toro moollutowopimovla'mdopure tonyu Ijupda'ai tooro wono'mno luko soporogano.

¹³ Toro te Isuraiyolda'ai ton ki'nato womdo bwotonyo ipureyokweyo'mo Ijupda'ai tooro guureji adumuuroleyajuporogano.

¹⁴ Toro dumuurolo'mdopure toga Isuraiyolda'ai ton womdo go'no go'nodo tonyu sajupogano. A'mwo abolo su tonyuro pun kunaikwako tovida'ai ago mojo'mo simen to'busuko tonyu sakwollajupogano. Aki pun ago ton amojajupogano. Aki pun wosamuju'womdo tonyu sajupogano. Isuraiyolda'ai tobuuro womdo su tonyu ino ino yodupu kemoro nomwallo tov kaiya'no bwotonyo somjomwekovlaiyajupogano.

^15-16 Toruda'ai kwako Ijupda'ai a'mwo aguto kig Feroo tool Hibruu abolo puruvallu adomarokaikono. Abolo su toval kwolaiyo yoma'dupudo tonyu do'nuwiyo womdokweyovakono. Toro tovallu doma'no sumaiyokwe aro aduuwiyokaikono. “Kevuge avalo Hibruuda'ai abolo ton kwolaiyo nyomallo'mo yodopure toga kevu do'nuwiyo'bullu kwolaiyorodeyokwe adubullo tov muloruvaku'no jogaulo. Toro kuvi kuruv taiyodeyo adubullo to'gwowi nokwo wonyapino jogaulo.” Aduuwiyokaikono. Abolo su tovalluno yovo tov puruv Sifraveyokwono. Puruv Puuwaveyokwono. Abolo do'nuwiyokwe su tovake'aro abolo kwolaiyo yoma'dupudo togai'aro su ton Isuraiyolda'aiyogano.

¹⁷ Toro te abolo do'nuwiyokwe su toval Ijupda'ai a'mwo aguto kig Feroo toolluro aduuwiyoka su tovi me'no kuu'nolo kuvi kuruv Gooti toolluno'gwowi luko yolno Feroo toollu muumjunyajulovakono. Toro toval kwolaiyo toorai mamuloruvakullo'mo toval nokwo wonyapino sajulovakono.

¹⁸ Abolo su tovallu Ijupda'ai a'mwo aguto kig Feroo tool doma'no sumaiyokwe aro samuugojokaikono. “Kevu kwolaiyo toorai mamuloruvakullo'mo tov buro'nyo'mo nokwo wonyapino yodubulovakuldeyo?”

¹⁹ Toro samuugojoka tovi kuudolovakono. “Navuge avalo Hibruuda'ai abolo ton jurogudo kuunodogano. Kemoro Ijupda'ai abolo tonbusukonmaiyo. Hibruuda'ai abolo su ton kwolaiyo toorai yere yomallokweyogano. Toro te navu do'nuwiyo'mo yere mabai'mo'mdowosure toga me'no yoma'dopure tonyu bwonodowolo'makono.” Feroo toollu toro kuudolovakono.

^20-21 Toro toval Gooti toolluno luko sajulo tovino tov Gooti tool ilaiyo amollokavakono. Toro amolloka tovida'ai abolo su to kuval kuruv kwolaiyo sumwoluko imo'nolno kwolaiyo somarolovakono. Toro yoma'no sumaleyokwe Isuraiyolda'ai kun kuruv kwolaiyo bwotonyago yawosunodupu a'mwo abolo jurogudo sumo'nugovlaiyajupogano.

²² Toro te Feroo tool yiuwi'nokai Ijupda'ai a'mwo abolo tonyu aro aduuwiyokaikono. “Isuraiyolda'ai tonyuro kwolaiyo muudogarodeyo adupi tov wonyo Nailovi domorumikapiyogaulo. Toro kuvi kuruv taiyodeyo adupi to'gwowi nokwo wonyapino jogaulo.” Aduuwiyokaikono.