Matyuu 8 - Gooti Toolluro Yogalokwono

Jisasol a'mwo wonawiyo nobollo bwotonyokwe pwollu sukuloka tovinokwono

¹ Toruda'ai Jisasol muumuudo toolluda'ai kwolabokaikono. Toro wolabino sumaiyokwe yomolloduke toga a'mwo abolo kwolallo bwotonyago ton kuumjunyajupekono.

² Aki su toro toga a'mwo wonawiyo nobollo bwotonyokwe pwol bino sumaiyokwe Jisasolluro sumdollu toru abinuguto'nokaikono. Toro binuguto'nyuno sumaiyokwe Jisasollu aro kuudokaikono. “Agutoloo, guu ilaiyo agujuno'ji tov mi nokwo nyukulbinekugono.” Kuudokaikono.

³ Toro kuudoka toollu Jisasol gami ato tov ruuguusapino sumaiyokwe a'mwo su toollu uubogai'no'no aro kuudokaikono. “Nuu ilaiyo anyunumaiyo. Toro te gumi agujukulmono.” Toro kuudoka kuga'gwo kuuno a'mwo su toolluro wonawiyo nobollo bwotonyo tovi kuvinono sukulokaikono.

⁴ Toro ikulno sumaiyokwe Jisasol a'mwo su toollu aro amodapiyokaikono. “Guu moro agujukulmo tovino a'mwo pworai muudubinekugono. Toro kweku kuruv moro agujukulmo su tovino wuuduuwallo'mo tooku aro neya ibinekugono. Guu Moosesolluro puukwollo aro sakwolloka tovi neya duumjunono. A'mwo wonawiyo nobollokwe me'no sukullungiko tool pris toollomno plawo'ji wuuduuwallunonekono. Toro wuuduuwallunowo'ji toga Gooti toollu wiyo'moneyokwe dokato pworallu neya romiroudapiyonekono. Moosesolluro su toro sakwollungiko tov guu kuvinono neya ibinekugono. Toro yodo'bure toga pris tool gwonowo'ji gumino aro kuudo yaguuronekono. Oo a'mwo akal wonawiyo nobollomaiyoldeyo. Kuudo yaguuronekono. Toro te guu su toro tovino'mo dovlavono.” Jisasol a'mwo wonawiyo nobollokwe sukuloka toollu su toro amodapiyokaikono.

Jisasol a'mwo mollubworomokwanyokwe pwolluro ki'nato womdokwe tekwoji sukuloka tovinokwono

⁵ Toruda'ai Jisasol plaino sumaiyokwe wagwolago Kapurniyam tovi aulai'movokaikono. Toro kuulai'mo'mno sumaiyokwe a'mwo mollurogudo pworavuro mollubworomokwanyokwe pwol Jisasollomno abokaikono. Toro tool Roomda'ai Juu miyawosunodupudo pwekono. Toro tool bino sumaiyokwe aro kuudoganokaikono.

⁶ “Agutoloo, moro ki'nato womdokwe pwekwo suvlato amuullugolopingikokwe tool moro ago tovi wologa'bwo'na'dowodekono. Aki toro tool danyu'nyuwuulo bwotonyo ibwosunodowodekono. Toro toollu guu nokwo ikulbinekudeyo?” Kuudoganokaikono.

⁷ Toro kuudoganoka toollu Jisasol aro kuudokaikono. “Nuu guuge plavowosi a'mwo su toollu nyukulmonyugono.” Kuudokaikono.

⁸ Toro kuudoka kuvi kuruv a'mwo mollurogudo tooravuro mollubworomokwanyokwe tool aro kuudokaikono. “Agutoloo, nuvu tekwonyu ilaiyekwonyumaiyo. Toro tekwonyuno tov guu Aguto tooku moro ago tovi noulomwalbiyo. Toro kweku kuruv yiuno yogalo to'no aduuwibi tov moro ki'nato womdokwe su tekwoji nokwo ikulbinekono.

⁹ Moro yogalo agudumo su tov aro tovinokwono. Nuu kwonyu kuruv a'mwo aguto pwollu dolago tomuu mwalodumdonyugono. Aki a'mwo mollurogudo pworo mi dolago tomuu mwalodupudorogano. Toro mwalodupudo tooraida'ai pwollu, “Dovlavono,” kuudumi tov kuvinono novlawonekono. Aki pwollu, “Dobono,” kuudumi tov kuvinono nobwonekono. Aki moro ki'nato womdokwe pwollu, “Guu su toro neya jono,” kuudumi tov kuvinono nuumjunonekono.” Kuudokaikono.

¹⁰ Jisasol a'mwo aguto su toolluro wuudoduke tovi wuu'nyuno sumaiyokwe morumoukuropi yo'no gami uumjunyokwe toorai aro kuudokaikono. “Nebal'no ikudumo'mokwono. Nuu yiuwi'nokai kwako Isuraiyol tomuu yomollodumdo kuvi kuruv a'mwo kuudo pi'mwono nubweyodowodo akalbusuko pwollu mwonodumdonyugono.

¹¹ Toro te aro ikudumo'mokwono. A'mwo abolo pun kuujo tool sulopiyamoka tomuuda'ai togai'aro kuujo tool kwolmoka tomuuda'ai togai'aro yiuwi'nokai tomuuda'ai bwotonyago su ton muunyu kai'muuda'ai aguto kig toolluro mido mollomwalo toru nyullu'bwo'nupinogano. Toro i'bwo'nopi Eburaiyameke'aro Aisakeke'aro Jekoopeke'aro toorogai nyu'bwo'nonomwalpinogano.

¹² Sumdomgu Gooti tool gamoro aguto kig mido mollomwalo tovi kuulomwallo'moneyokwe a'mwo abolo punyu me'no ajesajukekono. Toro kuvi kuruv Gooti tool a'mwo abolo su tonyu kwa'mgu dugumwuulo tomuuno nomodukwopiyonekono. Dugumwuulo su tomuu danyu'nyuwuulo bwotonyo tovi ibwosunmwalpino tovino tov kumdato to'no mujodumovla'mwalpinogano. Aki toro ton kemi mago togai tuko to'no do'nugovla'mwalpinogano.”

¹³ Jisasol toro wuujuno sumaiyokwe aki a'mwo mollurogudo tooravuro mollubworomokwanyokwe toollu aro kuudokaikono. “Guu nokwo pla'binekugono. Gumoro kuudo me'no anubwemwakudo tomgu'aro kuvinono nogujumo'nonokwono.” Kuudokaikono. Toro kuudoka kuga'gwo kuuno a'mwo ki'nato womdokwe tekwo sukulnokaikono.

Jisasol Pitalluro ganyalum tovi sukuloka tovinokwono

¹⁴ Toruda'ai Jisasol Pitalluro ago tovino plaino sumaiyokwe aulomwalokaikono. Toro kuulomwalno sumaiyokwe Jisasol Pitalluro ganyalum tovi kwonokaikono. Abolo su tov kula'du'nobollokwe tobuul wologa'bwo'na'duke tovi kwonokaikono.

¹⁵ Toro wonyuno sumaiyokwe Jisasol abolo su tovuro ato tovi kuubogai'nokaikono. Toro kuubogai'noka toga abolo su tovuro kula'du'nobollo tov kuugollu'movokakwono. Toro wuugollu'mo'mno sumaiyokwe abolo su tobuul ilodukavo'no Jisasollu wosamujuko pun sovi'mwojubweyokakwono.

Jisasol a'mwo abolo nobollokwe bwotonyago tobuurai sukullajuko tovinokwono

¹⁶ Toruda'ai sula'dugumdo kimwonyoduke toga ajumiyo su toruda'ai a'mwo abolo ton kuullo ma'no ma'nodo tooro kuulomwalodupudo a'mwo abolo bwotonyago tobuurai Jisasollomno amokabopogano. Toro mokabodopure tobuurai Jisasol gamoro yogalo tovuro jurogudo tokwe kuullo ma'no ma'nodo toorai amodovomjapiyajukekono. Aki yiuwi'nokai nobollokwe tobuurai sukullajukekono.

¹⁷ Jisasolluro su toro sajuko tov aiyoga proofet Aisaiyalluro kuuguudo me'no ajakwolloka puvi suuwiyo sumwojokakwono. Yogalo su tov arokwono. “Gavnokwe tool nemoro nobolluwuulo judo'no judo'nodo toorai amodukwopiyokaikono.” Sakwollungikokwono.

Jisaseke'aro a'mwo gami uumjunyo'mo winoduke tooke'aro tooral adolo tovinokwono

¹⁸ Toruda'ai Jisasol a'mwo abolo kwolallo ton gami bomwodovoma'dopure tonyu wonyuno sumaiyokwe gamoro uumjunyokwe toorai aro aduuwiyokaikono. “Nevu wonyo buugo tovi igo'mguuno neya iloga'mowopiyowano.” Aduuwiyokaikono.

¹⁹ Jisasol toro duuwiyoduke toga a'mwo loowo tovino pi'mwo kuudokwe pwol aro abuudokaikono. “Ibwasokweyoloo, guu buro'nyo buro'nyomuudeyo tomuu somollubi tov nuu nogumjunmonyugono.” Abuudokaikono.

²⁰ Toro abuudoka toollu Jisasol aro kuudokaikono. “Kuullujuluko fooks tooro noulomwallo'moneyokwe buuso ton kurukwerogano. Aki sulugumdo tovida'ai dokato tooro noulomwallo'moneyokwe kemi podo'ago ton kurukwerogano. Toro kuvi kuruv nuu A'mwo Kwolaiyo Kuunodo toonyuno'gwowi sa wollo'moneyokwe pumuu nonagutonyugono.” Jisasol toro kuudokaikono.

²¹ Aki Jisasolluro uumjunyokwe pwol aro kuudokaikono. “Agutoloo, nuu gumi gumjunyo'mo nyunodowodo kuvi kuruv sumdomgu mi nyunumiyago tool abolo'ji toollu neya molsosumonyugono. Toro tovino tov guu neya donuwonyapiyono.”

²² Toro kuudoka kuvi kuruv Jisasol aro kuudokaikono. “A'mwo abollungopo tooro kevnokwero abolpi toorai nokwo molsosunumwalpinorogano. Guvno'gwowi mi neya donumjunono.” Kuudokaikono.

Jisasol dole'manollo tovi aduullukuroka tovinokwono

²³ Jisasol toro wuujuno sumaiyokwe boot puruvi sulomwalokaikono. Toro ilomwaloduke toollu gamoro uumjunyokwe tooro uumjuno'mno yiuwi'nokai tooro sulomwaloporogano.

²⁴ Toro tooro wonyo buugo tovi igo'mguuno avlavoporogano. Toro pla'mdopure toga dole'manollo bwotonyo puruv sokakwono. Toro soka tovida'ai wonyo luwagu luwaguto bwotonyo yo'no boot toollu aullo'mowopiyokakwono. Su toro imo'noduke kuvi kuruv Jisasolno'gwowi boot toollu sa to'no kwollajukekono.

²⁵ Toro wo'duke toollu gamoro uumjunyokwe tooro bino sumaveyokwe abojudukuuroporogano. Toro judukuu'no sumaveyokwe aro kuudoporogano. “Agutoloo, nevu nobollo'mo sumwakuuwo tekwojonollu neya donekullo'mwojonoo.” Kuudoporogano.

²⁶ Su toro kuudopo toorai Jisasol aro kuudokaikono. “Oo kevu buro'nyo'mo luko jadokwovo? Kemoro kuudo nubweyodupudo tov yiuno kula'nyokwono.” Toro wuujuno sumaiyokwe dole'manollo tokwe'aro wonyo luwagu luwaguto tokwe'aro tovallu aduullukurokaikono. Su toro aduullukuroka toga dole'manollo tov imwogapiyo'no aki wonyo buugo tov kaveno boroollo to'no amjo'mawokakwono.

²⁷ Su toro imo'noduke tovino a'mwo tooro morumoukuropiyo'mno aro ajunoporogano. “Aiyoo, dole'manollo tokwe'aro wonyo luwagu luwaguto tokwe'aro toval a'mwo akallu uumjunodubulovakono. A'mwo judo pumgu'aro akal ala'mwoldukono?” Ajunoporogano.

Jisasol a'mwo kuullo ma'no ma'nodokwe pworallu sukuloka tovinokwono

²⁸ Jisasol wonyo buugo tovi me'no iloga'mo'mno sumaiyokwe igo'mgu sulai'movokaikono. Kwako sulai'movoka su tov Gadarada'ai tooro mwalodupudorukono. Toro tomuu ilai'mo'mno sumaiyokwe a'mwo kuullo ma'no ma'nodokwe pworal a'mwo buuso molsosodupudo tomuuda'ai lokabolno Jisasollu abilluru'marolorakono. A'mwo su tooral guureji surugolapiyajulorakono. Aki toro tooral mwalodubulo su tomuu a'mwo pwolnodo kwol kuruv puuto su tovi'aro ku'nono muuwolokaullajukekono.

²⁹ Toro te a'mwo su tooral lokabino sumaleyokwe Jisasollu aro kuudolorakono. “Gooti toolluro Kwolaiyo Kuunodoloo, guu nami adado nakullubino'mekudeyo? Guu Gooti toolluro kironakumwallo'moneyokwe me'no ajesungiko toga yere mabai'mo'mduke kuvi kuruv aga nami neronakumwallubino'mekudukono?” Kuudolorakono.

³⁰ Toro kuudolo toga sa'aiyo bwotonyago ki'duvolodupudo pworo wobonyunodo toru amulanyajuporogano.

³¹ Toro te kuullo ma'no ma'nodo tooro Jisasollu aro ajugonoporogano. “Guu nemi amodovomjonekwapibi tov sa'aiyo akaigworai neya kuulomwalpino'moneyokwe domodonekwapiyono.” Ajugonoporogano.

³² Toro ajugonopo toorai Jisasol kuudokaikono. “Kevu su to kworai kuulomwallo'mo dovlaiyulo.” Toro wuujuno sumaiyokwe kuullo ma'no ma'nodo tooro a'mwo kuulomwalodupudo toorallu wuugollu'mo'mno sumaveyokwe sa'aiyo su toorai aulaporogano. Toro kuulno sumaveyokwe yiuwi'nokai sa'aiyo su tooro kwako kuukuulo tomuu yere wola'mno wonyo buugo tovi kwoloraporogano. Toro wolo'no sumaveyokwe wonyo tov amulegoukuurosokarogano.

³³ Toro te a'mwo pworo sa'aiyo su toorai ai'duvollajupo tooro lukado plaino sumaveyokwe wagwolago tovi kuula'mno a'mwo abolo tonyu yiuwi'nokai sumo'noka tonyuno kuudoporogano. Aki a'mwo kuullo ma'no ma'nodokwe kworallu kwimo'noka kuvino kuruv kuudoporogano.

³⁴ Toro wuujuno sumaveyokwe yiuwi'nokai wagwolago su tovida'ai mwalodupudo ton lokabo'mno Jisasollu abilluru'maropogano. Toro billuru'ma'no sumaveyokwe guureji aro wuudoganyuno wuudoganyuno sopogano. “Guu nemoro kwako akaru nokwo wuugollu'mo'binekudeyo?” Kuudoganopogano.