Matyuu 7 - Gooti Toolluro Yogalokwono

A'mwo abolo punyuro pasudo tonyu jainyubwollo'moneyokwe tovinokwono

¹ “Gooti tool kemoro pasudo tooraino nojainyubworo'jokweyo'mo tov kevu a'mwo abolo punyuro pasudo tooraino majainyubwopinono.

² Su tov aro tovinokwono. Kevu a'mwo abolo tonyuro pasudo tooraino jainyubworopi adomdukuurosupi tov Gooti tool ikumjunowo'ji yiuno aval'nodo tomgu'aro kemoro pasudo tooraino jainbworowo'ji nodomdukuuraikubweyonekono.

³ Guu gumi avalo tekwojuro sumdo tovida'ai sullukwako wo'dowo'jure tovi wonodumdekugono. Toro kuvi kuruv guvnokwekujuro sumdo tovida'ai i'muujuko bwotonyo wo'dowodo toollu buro'nyo'mo mwonodumdekudeyo?

⁴ Guvnokwekujuro sumdo tovida'ai i'muujuko bwotonyo su tool kuuno wo'dowo'jure toga gumi avalo tekwoji aro nuudoganbiyo, “Oo nuvu gumoro sumdo tovida'ai sullukwako kwosuko su tovi nokwo modukwopimonyudukono?” Nuudoganbiyo.

⁵ Su tov aro to'busukokwono. Guvu a'mwo kuunanokwe imo'nodumdekugono. Toro tooku sumdomgu guvnokwekujuro sumdo tovida'ai i'muujuko bwotonyo wo'dowodo toollu neya domodukwopiyogawono. Me'no amodukwopibi toga lukomgu gumi avalo tekwojuro sumdo tovida'ai sullukwako wo'dowodo tovi kamwoga yo'bi nokwo modukwopibinekugono.

⁶ Kevu kuuguudo pun Gooti toollo'mo me'no ajesungiko ton maropi a'mwo abolo Gooti toollo'mo majesungiko punyu nuuwimwalpiyo. Su tov aro to'busukokwono. Kevu juluko pworai kwipi tov juluko su tooro yadu'mwonyopi kemi tuko nodovaikunpiyo. Aki kevu soolwara tovida'ai sulo sugumaluko tollovo sa'aiyo tooravuro sumdollu toru mabwolmwogapiyapinono. Sa'aiyo su tooro soolwara tovida'ai sulo sugumaluko su tollovai mwonyubusuko yopi suvlo nyulomavekupiyo.

Gooti tool a'mwo abolo wuudoganodopure tonyu kuvinono wiyodowodo tovinokwono

⁷ Kevu Gooti toollu noonyumwonyu punyuno subusu'nyogalo kuudoganpi tov kuvinono nekullabwonekono. Gooti toolluro ilaiyo winodowo'jure kuudo tollovai kevu yo'mgonomallo'mo a'mgono supi tov kuvinono yo'mgonomapinogaikikono. Kevu kudo'aiko tovi iwago aromipi tov Gooti tool kemiyo'mo kudo'aiko kuvinono nousaikubweyonekono.

⁸ Su tov aro tovinokwono. Yiuwi'nokai a'mwo abolo Gooti toollu subusu'nyogalo kuudoganpi ton kuvinono ma'dupudogano. Aki a'mwo pwol Gooti toolluro ilaiyo winodowo'jure kuudo tollovaino a'mgono so'ji tool kuvinono yo'mgonoma'dowodekono. Aki a'mwo pwol kudo'aiko tovi iwago aromiyo'ji tov Gooti tool a'mwo su toollo'mo kudo'aiko tov kuvinono kuusubweyonekono.

⁹ Aki puruv kemida'ai a'mwo pwolluro kwolaiyo tool gami ganumiyago toollu aro kuudogano'ji tov, Oo bret pun donyabono, su toro kuudogano'ji toga gami ganumiyago tool kwolaiyo su toollu sulo pwol nokwo wiyonoldukono? Awiyo.

¹⁰ Aki kwolaiyo su tool gami ganumiyago toollu aro kuudogano'ji tov, Oo domwoga pwol donyabono, su toro kuudogano'ji toga gami ganumiyago tool kwolaiyo toollu gabakuto pwol nokwo wiyonoldukono? Awiyo.

¹¹ Toro te kevu kuunumiyago ma'no ma'nodokwe toorekul kemi kwoloraiyo tobuurai yasuwa'wino sugudo ton wiyodupudorekikono. Su toro to'busuko kubalno kemi Tellunumiyago muunyu kai'muu mwalodowodo kwol kuruv yiuwi'nokai a'mwo abolo, donyabonoo, kuudoganpi tonyu sugudo pun kuvinono wiyodowodekono. Aki kwako akavida'ai kuunumiyago toorai uuwolo'mdowodekono. Toro toolluno tov kevu kuudoganpi togaikullu muunyu toru'aro kuvinono nekullamwalonekono.

¹² Toro te kevu pasudo punyuno, Oo a'mwo abolo ton nemi su toro tomgu'aro ilaiyo yanekullugolpureyokwe ikullunodowodo su tov kevnokwe togaikul a'mwo abolo punyuno aval'nodo tomgu'aro neya jugolmovlavogaulo. Kavlo su toro tovino aiyoga Moosesolluro loowo togai'aro proofet tooravuro kuuguudo togai'aro ton me'no ajakwollajupogano.

Noullo kula'nyo tovi'aro neya kuulmwolapino tovinokwono

¹³ Kevu noullo yiuno kula'nyo tovi'aro to'no neya doulogaulo. Su tov aro tovinokwono. Kaiyako i'nopiyo'moneyokwe tomuuda'ai noullo tov bwotonyokwono. Aki a'mwo abolo bwotonyago ton kaiyako i'nopiyo'moneyokwe su tomuuno puuto tovi pla'mdupudogano. Puuto su tovi plaiyo'moneyokwe tov kavenodokwono. Aki a'mwo abolo bwotonyago ton kaiyako i'nopiyo'moneyokwe su tomuu yere kuulai'mo'mdupudogano.

¹⁴ Toro kuvi kuruv aiyo yiunokuudo mujomwekovlaiyo'moneyokwe tovi kuullo'mo noullo to'gwowi yiuno kula'nyo kuunodokwono. Aki a'mwo abolo yiuno pwekwono pwekwonodo tono aiyo yiunokuudo mujomwekovlaiyo'moneyokwe tovuro puuto tovi pla'mdupudogano. Puuto su tovi plaiyo'moneyokwe tov kavenodo'maiyo. Toro te aiyo yiunokuudo mujomwekovlaiyo'moneyokwe su tovi mallo'mo tov a'mwo abolo yiuno pwekwonodo tono yo'mgonoma'dupudokwono.”

Proofet kuunano youkuu'nuudodupudo tooraino wako neya kuu'numwalpino'moneyokwe tovinokwono

¹⁵ Aki Jisasol aro kuudokaikono. Kevu kuunano proofet tooraino wako neya dou'nogaulo. Su tooro sipsip nobemwojo toorobusuko baiki'mo'mdupudo kuvi kuruv kemoro anakuuto tomuuno'gwowi a'mwo abolo tonyu dovanyo'moneyokwe kuullujuluko toorobusuko imo'nodupudorogano.

¹⁶ Su toro tooravuro pasudo ton ikulsulo to'busuko ki'nodopure tonyu agallainyubwopi tov, Akal kuunanoldeyo oo nebaloldeyo, nokwo iworovomapinogaikikono. Su tov aro to'busukokwono. A'mwo pwol wain ikulsulo tov aulolo tovida'ai mamuudonekono. Aki a'mwo pwol ikulsulo fik tov sugurato tovida'ai mamuudonekono.

¹⁷ Su toro tovino kuudo pun jaullulo. Iko sugudo pwol ikulsulo sugudo to'no ki'nyokwekono. Toro kuvi kuruv iko kaiya'nodo toolno'gwowi ikulsulo kaiya'nodo to'no ki'nyokwekono.

¹⁸ Aki iko sugudo pwol ikulsulo kaiya'nodo ton mai'nyokwekono. Aki iko kaiya'nodo pwol ikulsulo sugudo ton mai'nyokwekono.

¹⁹ Toro te yiuwi'nokai iko pwolno pwolnodo tooro ikulsulo sugudo mai'nupi tov a'mwo pwol iko su toorai dovomwogapiyowo'ji duko tovi nyuroudapiyonekono.

²⁰ Toro te kevu kuunano proofet su tooravuro pasudo ton ikulsulo to'busuko ki'nodopure tonyu agallainyubwopi tov, Akal kuunanoldeyo oo nebaloldeyo, nokwo iworovoma'mwalpinogaikikono.

²¹ A'mwo abolo bwotonyago ton mi aro nyudodupudogano. “Mi Agutoloo, Mi Agutoloo,” nyudodupudo kuvi kuruv yiuwi'nokai su ton muunyu kai'muuda'ai aguto kig mido mollomwalo tovi ku'nono maulomwalpinogano. Yiuno moro Nyunumiyago muunyu kai'muu mwalodowodo toolluro ilaiyo winodowo'jure kuudo tonyu kuumjuno'ji su toolno'gwowi kuvinono nokwo kuulomwalonekono.

²² Gooti tool a'mwo abolo tonyu kooti yogalo duuwiyo'moneyokwe iruko tollugwo abai'mowo'ji toga bwotonyago ton aro nyudupinogano. “Mi Agutoloo, Mi Agutoloo, nevu gumoro yovo tovida'ai proofet yogalo amoruudomollajuwonogano. Aki gumoro yovo tovida'ai kuullo ma'no ma'nodo pworai amodovomjapiyajuwonogano. Aki gumoro yovo tovida'ai duuwallo jurogudo ton kuuduuwallunyajuwonogano.” Nyudupinogano.

²³ Toro anyudupi kuvi kuruv nuu aro dodowiyoku'bworosumonyugono. “Nuu kemino kuudo miyaikuu'dumdonyugono. Kevu kirovanyuvanyu kiroungovla'mdupudo togaikul mi manyu tomuu'aro neya dovlaiyulo.” Dodowiyoku'bworubwemonyugono.”

A'mwo pwol Jisasollu kuumjuno'ji tool a'mwo ago jurogudo mododowodo toolbusuko imo'nono tovinokwono

²⁴ Aki Jisasol aro kuudokaikono. “A'mwo pwol moro yogalo akanyu wuu'nowo'ji kuvinono kuumjuno'ji tool a'mwo pi'mwo kuudokwe pwolbusuko imo'nonekono. Pi'mwo kuudokwe su tool gamoro ago tov sulo toollu muunyu toru mododowodekono.

²⁵ A'mwo tool ago su tovi me'no mojuno sumaiyokwe buuruko tov avokakwono. Toro pino sumaiyokwe wonyo tov allako alokabokakwono. Wonyo tov allako lokabino sumaiyokwe dole'manollo tov abokakwono. Dole'manollo su tov bino sumaiyokwe ago tovi kuumnagutovokakwono. Toro kuumnagutovoka kuvi kuruv ago su toul sulo toollu muunyu toru me'no amojudapingiko tovino tov mawo'dolopiyokakwono.

²⁶ Toro kuvi kuruv a'mwo pwol moro yogalo akanyu wuu'nowo'ji muumjuno'ji su toolno'gwowi a'mwo junorukuudokwe pwolbusuko imo'nonekono. Junorukuudokwe su tool gamoro ago tov weko tovi muunyu toru mododowodekono.

²⁷ A'mwo tool ago su tovi me'no mojuno sumaiyokwe buuruko tov avokakwono. Aki wonyo tov allako alokabokakwono. Aki dole'manollo tov abokakwono. Dole'manollo su tov bino sumaiyokwe ago tovi kuumnagutovoka toga ago su tov yere abwolorokakwono. Toro bwolo'no sumaiyokwe kaiyako yiunokuudo awo'dolopiyokakwono.”

²⁸ Jisasol kuuguudo su ton me'no yodubwasuno sumaiyokwe toga a'mwo abolo kwolallo ton gamoro ibwasoduke tonyuno morumoukuropi sopogano.

²⁹ Su tov aro tovinokwono. Jisasol a'mwo abolo su tonyuro a'mwo loowo tovino pi'mwo kuudokwe toorobusuko miyodubwasajukekono. Toro kwol kuruv a'mwo aguto jurogudokwe pwolbusuko yodubwasoduke tovino morumoukuropi sopogano.