Matyuu 4 - Gooti Toolluro Yogalokwono

Satanyol Jisasollu yamju kwiyoganoka tovinokwono

¹ Toruda'ai Gooti toolluro Kuullo tool Jisasollu kwako a'mwomaiyo kuu'maiyo tomuuno amollubworomokavlavokaikono. Su tov Satanyol Jisasollu yamju wiyoganoneyokwe tovino Kuullo tool toro amollubworomokavlavokaikono.

² Toro mollubworomokavla'mno sumaiyokwe Jisasol kwako a'mwomaiyo kuu'maiyo tomuu 40-pela iruko tobuuke'aro 40-pela surakuuto tobuuke'aro tobuullu wosamujuko puru'monodo kuruv manokaikono. Iruko su tobuul me'no abawoka toga mujuko bwotonyo kwinokaikono.

³ Toro winoduke toga yamju wiyoganyokwe tool Jisasollomno abokaikono. Toro bino sumaiyokwe aro kuudokaikono. “Guvu Gooti toolluro kwolaiyo tookuno'juki sulo akarai bret mollumo'noso'moneyokwe neya duudono.” Kuudokaikono.

⁴ Satanyol toro kuudoka kuvi kuruv Jisasol aro kuudokaikono. “Gooti toolluro yogalo tov aro sakwollungikokwono. A'mwo abolo ton aiyo mujomwekovlaiyo'mo jurogudo tov yiuno bret tovida'ai to'no mamapinogano. Toro kun kuruv Gooti toolluro mago tovida'ai yiuwi'nokai yogalo lokabodowo'jure su tovida'ai to'gwowi aiyo su tov nokwo mapinogano.” Kuudokaikono.

⁵ Toruda'ai Satanyol Jisasollu wagwolago Jeruusalem'no amollubworomokavlavokaikono. Wagwolago su tov sugumaluko kuunodokwono. Toro tovino mollubworomokavla'mno sumaiyokwe Gooti toollu ilomoropiyo'moneyokwe ago tovi muunyu aiyowo'mo mwopto toru sulomorumwallokaikono.

⁶ Toro ilomorumwalluno sumaiyokwe Jisasollu aro kuudokaikono. “Guvu Gooti toolluro kwolaiyo tookuno'juki doolodukwopiyawono. Gooti toolluro yogalo tov aro sakwollungikokwono. Gamoro ensel tooro gumi po'dogalo yellukuromollogumwallo'moneyokwe nomodapiyonorogano. Ensel su tooro gumoro suvlo tovi sulo ton kaiyako nyapiyo'jokwe nokwo galogumworapinekugono. Sakwollungikokwono.” Kuudokaikono.

⁷ Satanyol su toro kuudoka kuvi kuruv Jisasol aro kuudokaikono. “Gooti toolluro yogalo sakwollungiko to'gwowi aro dodowodokwono. “Guvu gumi Gooti Aguto toollu yamju mwiyoganbinono,” dodowodokwono.” Kuudokaikono.

⁸ Toruda'ai Satanyol Jisasollu muumuudo bwotonyo kumi'yago pwollu muunyu toru'no amollubworomokailokaikono. Toro mollubworomokailno sumaiyokwe kwako akavida'ai yiuwi'nokai a'mwo aguto kig tooravuro kantri togai'aro aki kantri su tonyuda'ai noonyumwonyu sugudo kuula'dupudo togai'aro tonyu kuuduuwallokaikono.

⁹ Toro wuuduuwalluno sumaiyokwe Jisasollu aro kuudokaikono. “Guvu mino suduko sunuguto'nubi tov yiuwi'nokai noonyumwonyu su ton gumiyo'mo nogujamonyugono.” Kuudokaikono.

¹⁰ Toro kuudoka kuvi kuruv Jisasol aro kuudokaikono. “Gooti toolluro yogalo tov aro sakwollungikokwono. “Yiuno gumi Aguto Gooti toolluno to'no neya ilomoropiyabinekugono. Aki yiuno kwolluno to'no neya uumjunmwalbinekugono.” Sakwollungikokwono. Toro tovino tov, Satanyol guu dovlavono.” Kuudokaikono.

¹¹ Toro kuudoka toga Satanyol Jisasollu kuugollu'movokaikono. Toro wuugollu'mo'mno sumaiyokwe ensel pworo bo'mno Jisasollu abomollomwaloporogano.

¹² To'no'gwowi Jisasol a'mwo abolo pun aro dodopure tovi kuu'nokaikono. “Oo Joonollu wuulo me'no amerosopekono.” Toro dodopure tovi wuu'nyuno sumaiyokwe Jisasol wuugollu'movo'no distrik Galili tomuuno avlavokaikono.

¹³ Toro plaino sumaiyokwe ki'movo'no wagwolago Nasaret toru mamwalokaikono. Toro kwol kuruv wagwolago Kapurniyam'no plavo'no su towai amwalokaikono. Wagwolago su tov kwako puruvallu anakuuto tomuu wo'dowodokwono. Kwako su tovalluno yovo tov Sebuulonoruke Naftalaike tovakono. Aki wagwolago Kapurniyam su tov wonyo buugo Galiliyovi wobo toru wo'dowodokwono.

¹⁴ Toro te Jisasol su toru amwaloka tov aiyoga proofet Aisaiyalluro yogalo ajakwolloka puruvi suuwiyo sumwojokaikono. Yogalo su tov arokwono.

¹⁵ “Kwako Sebuulonoruke kwako Naftalaike toval soolwaravuro wolo tomuuno plaiyo'moneyokwe puuto wobo toru wo'dubulovakono. Aki kwako su toval wonyo Joodanovi igo'mgu distrik Galili tomuu wo'dubulovakono. Distrik Galili su tov a'mwo abolo Juu miyawosunodupudo tonyuro mwalodupudorukono.

¹⁶ A'mwo abolo dugumwuulo tomuu kuulomwalodupudo su ton bako bwotonyo pwopiyodowo'jure tovi noonpinogano. Aki a'mwo abolo pun bolnodo tovuro dugumwuulo bu'duvoloma'dowodo tomuu mwalodupudogano. Su toro tonyo'mo bako bwotonyo tov nuuwonokwono.” Aisaiyalluro yogalo ajakwolloka tov su torokwono.

¹⁷ Su toro togada'ai Jisasol a'mwo abolo tonyu kuuguudo aro amoruudomollajukekono. “Muunyu kai'muuda'ai aguto kig toolluro mido mollomwalo tov wobo toga nobai'mowono'mokwono. Toro tovino tov kevu Gooti toollomno kuudo neya jouragunyumo'nyulo.” Amoruudomollajukekono.

Jisasol a'mwo aral aral toorai adomaroka tovinokwono

¹⁸ Toruda'ai Jisasol wonyo buugo Galiliyovuro wolo tomuu'aro kado avlavokaikono. Toro plaino sumaiyokwe a'mwo pudorallu kwonokaikono. A'mwo su todoralluno yovo tov pwol Saimoonolekono. Su toolluno yovo puruv Pitalo dodupudekono. Aki pwolluno yovo tov Adruu'wolekono. A'mwo su todoral domwoga kuurowabwollo'mo kuto ton wonyo buugo tovi wolowopiyodole todorallu kwonokaikono. Su todoral domwoga ki'noma'dubulorakono.

¹⁹ Toro todorallu Jisasol aro kuudokaikono. “Kevu mi donumjunyulo. Nuvu me'no sekubwasumi toga kevu domwoga toorai ai'noma'mwakulo to'busuko kubalno a'mwo abolo tonyu de'noma'mwalbullunorakikono.” Kuudokaikono.

²⁰ Toro kuudoka kuga'gwo kuuno a'mwo su todoral kemi domwoga kuurowabwollo'mo kuto tonyu yogallu'mo'mno sumaleyokwe Jisasollu kuumjunolorakono.

²¹ Jisasol a'mwo su todorallu doma'no sumaiyokwe kado kuuno avlavokaikono. Toro plaino sumaiyokwe a'mwo pudorallu kwonokaikono. A'mwo su todoral Sebediyolluro muugunyo Jemseke gagwai'yago Jooneke todorallu kwonokaikono. Su todoral kemi kuunumiyago tooke boot tovi muunyu toru ilomwalno sumaleyokwe kemi domwoga kuurowabwollo'mo kuto adobiyopingiko tonyu meyaguunodole todorallu Jisasol deko adomarokaikono.

²² Toro adomaroka kuga'gwo kuuno a'mwo su todoral boot tovida'ai bwolodukwopino sumaleyokwe kemi kuunumiyago toollu wuugollu'movolno Jisasollu kuumjunolorakono.

Jisasol a'mwo abolo nobollokwe bwotonyago tobuurai kuuguudo sugudo tokwe moruudodowo sukullajuko tovinokwono

²³ Jisasol yiuwi'nokai distrik Galili tomuu somollokaikono. Toro tomuu yomolluno yomolluno sumaiyokwe Juu tooravuro i'bwo'nyago tonyu kuulodawo kuuguudo sugudo tokwe amoruujajukekono. Kuuguudo sugudo su tov Gooti toolluro kig mido mollomwalo tovi dolago tomuu neya aulomwalpureyokwe tovino amoruujajukekono. Toro moruudomolluno sumaiyokwe a'mwo abolo tonyuro yiuwi'nokai judo'no judo'no nobollokweyodeyo oo suvlato nomuullugollokweyodeyo tonyu sukullajukekono.

²⁴ Toro ikuloduke toolluno ilomodomoropiyo'moneyokwe kuuguudo tov yiuwi'nokai kwako Siriya tomuu abomje'nugoulokakwono. Kuuguudo abomje'nugouloka su tovi a'mwo abolo ton wuu'nyuno sumaveyokwe kemi yiuwi'nokai judo'no judo'no nobollokwe tobuurai Jisasol ikulono'moneyokwe amokabopogano. Su toro amokabopo tobuuravuro pun danyu'nyuwuulo subwosunyajupogano. Aki pun kuullo ma'no ma'nodo tooro aulomwallajupogano. Aki pun gulludubolo sajupogano. Aki pun suvlato nomuullugollokwe sumo'nyajupogano. Yiuwi'nokai judo'no judo'no nobollokwe amokabiyajupo su tonyu Jisasol sukullajukekono.

²⁵ Toro ikuloduke toollu a'mwo abolo kwolallo bwotonyago ton kuumjunyajupogano. A'mwo abolo kwolallo kuumjunyajupo su tonyuro pun Galilida'aiyogano. Pun Dikapoolesda'aiyogano. Pun Jeruusalemda'aiyogano. Pun Juudiyada'ai wonyo Joodanovi igo'mgu tomuuda'aiyogano. Yiuwi'nokai go'no go'nodo su tomuuda'ai a'mwo abolo ton bodupu Jisasollu kuumjunyajupogano.