Matyuu 28 - Gooti Toolluro Yogalokwono

Jisasol aiyo aiko te adukavoka tovinokwono

¹ Iruko Sabat me'no uuwolo'no'no iruko Sande lomwo iru'mago toga Makdalada'ai Mariyakwe'aro aki gabovo Mariya purukwe'aro su toval a'mwo buuso sulpuuto tovi wonyo'mo abolovakono.

² Toro bodole toga wunyu wunyu bwotonyo tov sokakwono. Su toro soka toga Aguto toolluro ensel pwol muunyu kai'muuda'ai wolabino sumaiyokwe a'mwo buuso tovida'ai sulo allukurosopo toollu amousogunyugolowosokaikono. Me'no mousogunyugolowosuno sumaiyokwe toga sulo su toollu muunyu toru sulomwalokaikono.

³ Ensel su tool toro ilomwalno sumaiyokwe gamoro sumdomago tov molamopto to'busuko aluvomdolopiyokakwono. Aki gamoro youro tov kunaikwoljo ais to'busuko amoropiyokakwono.

⁴ Toro toollu wonyuno sumaveyokwe a'mwo duuwatokwe su tooro luko bu'buto polo'mno a'mwo bwiyo toorobusuko sumo'noporogano.

⁵ Toro kuvi kuruv ensel tool abolo tovallu aro kuudokaikono. “Kevu luko mibullunono. Nuu kuudo nyaikuu'mwakono. Kevu i'noguropte tovi amovoguroptowosumwa'jupo Jisasolluno a'mgono sadokuulo.

⁶ Kevu su toolluno a'mgono sadokuulo kuvi kuruv Jisasolno'gwowi akawai mamwallo. Sumdomgu me'no aikujajuko tovi kuvinono uumjunodowo aiyo aiko te me'no aduka'mokaikono. Kevu buuso tovi kuula'bullu Jisasolluro kulako bwiyo amorosumwa'jupo toru douloonyulo. Su toru mamwallo.

⁷ Toro te kevu aikomgu yere plavo'bullu gamoro uumjunyokwe toorai aro neya duujulo. “Jisasol aiyo aiko te me'no adukapsukekono. Toro tool kwako Galili tomuu kemi sumdomgu wanonekono. Toro te kevu su to kumuu ai'mopi toga sumdomgu wanodowo'jure toollu noonpinekono.” Duujulo. Moro kuuguudo tov su toro aikudadokwono.” Ensel tool abolo tovallu toro kuudokaikono.

⁸ Toro wuujuno sumaiyokwe abolo toval luko solo kuvi kuruv kemoro poowokalago to'gwowi ilaiyo bwotonyo subwosunolovakono. Toro ibwosunyuno sumaleyokwe a'mwo buuso sulpuuto tomuuda'ai yere wuugollu'movolno Jisasolluro uumjunyokwe toorai wuujo'moneyokwe kano kano avlavolovakono.

⁹ Puuto tomuu toro pla'mdole toga Jisasol abolo su tovallu kuuru'marokaikono. Toro wuuru'ma'no sumaiyokwe kuudokaikono. “Lomwokwonoo.” Toro kuudoka toollomno abolo su toval bino sumaleyokwe gamoro suvlo tovi bomogudupolopiyolno kwolluno sulomoropiyalovakono.

¹⁰ Toro tovallu Jisasol aro kuudokaikono. “Kevu luko mibullunono. Kevu plavo'bullu mi nyugwai'yago toorobusuko numjunodupudo toorai aro wuudubullunovakikono. Kevu kwako Galili tomuuno neya dovlaiyulo. Toro plavopi mi kumuu nuwonpinonyugono.” Jisasol abolo tovallu toro kuudokaikono.

A'mwo mollurogudo tooravuro kuunano yogalo youkuu'nuujo'moneyokwe tovinokwono

¹¹ Abolo toval kuuno pla'mdole toga a'mwo mollurogudo pworo a'mwo buuso sulpuuto tovi amoduvomwallajupo tooro wagwolago Jeruusalem tovi aulaporogano. Toro kuulno sumaveyokwe pris mido mollomwalokwe toorai yiuwi'nokai kwimo'noka tonyuno sodubwasoporogano.

¹² Toro sodubwasopo tovi pris mido mollomwalokwe tooro Juu tooravuro mido mollomwalokwe toorogai su'bwo'nodomwaloporogano. Toro i'bwo'nodomwalno sumaveyokwe domdukuuroso'mno a'mwo mollurogudo toorai nuugwiyo bwotonyo ton kuubiyoporogano.

¹³ Nuugwiyo kuubiyopo su toorai kuuguudo aro aduuwiyoporogano. “Kevu kuunano yogalo aro youkuu'nuudupinorekikono. “Oo nevu sa wo'dowore toga Jisasolluro uumjunyokwe tooro bodupu gamoro kulako bwiyo tov boma'dupu amokavla'maporogano.” Kevu su toro youkuu'nuudupinorekikono.” Aduuwiyoporogano.

¹⁴ Toro duuwino sumaveyokwe aki aro kuudoporogano. “Kevu kuunano youkuu'nuujo'moneyokwe tovino kuudo kwolallo miyaupinono. Gavman a'mwo aguto tool kevu su toro youkuu'nuudodopure toorekullu aikuu'no'ji tov kemi nerekumwallo'jokwe tovino nevu gavman a'mwo aguto su tooke kuuguudo nokwo jovo'dogalanonogano.” Kuudoporogano.

¹⁵ Toro wuujuno sumaveyokwe a'mwo mollurogudo tooro nuugwiyo ton maro'mno yogalo aduuwiyopo tovi kuvinono kuumjunoporogano. Toro te a'mwo mollurogudo su tooravuro kuunano kuuguudo tovi Juu a'mwo abolo ton me'no kuu'nopiyopokwono. Toro wuu'nopiyo'mno kevnokwe ton abiyojunugoulapogano. Tono tono biyojunugoulodapudo su tov aga kuga kuruv kuuguudo aval'nodo su tovi kuuno dodupudogano.

Jisasol gamoro womdo tovi momjumovla'mwalpino'moneyokwe gami uumjunyokwe toorai kuubweyoka tovinokwono

¹⁶ To'no'gwowi Jisasolluro 11-pela uumjunyokwe tooro plaino sumaveyokwe Galili toru ai'movoporogano. Toro tooro sumdomguda'ai Jisasolluro aro me'no kuudoka tovi, “Kevu muumuudo su to kwollomno dovlaiyulo,” su toro kuudoka tovi kuvinono uumjunyuno sumaveyokwe muumuudo toollu ai'movoporogano.

¹⁷ Toro ki'mo'mno sumaveyokwe toga Jisasollu wono'mno kuuru'maroporogano. Toro wuuru'ma'no sumaveyokwe kwolluno sulomoropiyaporogano. Toro kuvi kuruv gamoro uumjunyokwe pworono'gwowi Jisasoldukono oo a'mwo gabovo pwoldukoneyokwe tovino kuudo noullo maullo sauroporogano.

¹⁸ Toro tooraiyomno Jisasol wobo toru bino sumaiyokwe aro kuudokaikono. “Yiuwi'nokai muunyu kai'muuda'ai mwalodupudo togai'aro kwako akavida'ai mwalodupudo togai'aro tonyu mido mollomwekovlaiyo'moneyokwe jurogudo tov Gooti tool mi me'no anyabokaikono.

¹⁹ Toro te kevu plavopi yiuwi'nokai kwako akavuro go'no go'nodo tomuuda'ai a'mwo abolo tonyu moro numjunyokwe imo'numwalpino'moneyokwe jodubwosomollogaulo. Toro yodubwosomollodopure tovida'ai moro numjunyokwe sumo'nupi tonyu kevu wonyo domogaluvollogaulo. Toro toorekul Gooti Nyunumiyago toolluno yovo tokwe'aro gamoro Kwolaiyo toonyuno yovo tokwe'aro gamoro Kuullo toolluno yovo tokwe'aro tonyuda'ai wonyo domogaluvollogaulo.

²⁰ Aki a'mwo abolo su ton moro yiuwi'nokai kuuguudo daikullodumdo ton kunyuda'aiyo'mogano. Toro te kevu moro yiuwi'nokai kuuguudo daikullodumdo su tonyu a'mwo abolo ton neya uumjunpino'moneyokwe jodubwasogaulo. Aki aro tovino kuudo nyallulo'gwonmwalpiyo. Nuvu yiuwi'nokai toga kevuge nomwalmwalanonyugono. Kevuge mwalno mwalno yo'mi aki kwako akavuro aiyowo'mo abai'mowo'ji kuga kuruv kevuge kuuno mujomwekovla'mwalanonyugono.” Kuudokaikono.