Matyuu 27 - Gooti Toolluro Yogalokwono

A'mwo pworo Jisasollu a'mwo aguto Pailatollomno amogaibworomokavlavopo tovinokwono

¹ Toruda'ai lomwo iru'mago toga pris mido mollomwalokwe toorogai'aro Juu tooravuro mido mollomwalokwe toorogai'aro yiuwi'nokai su tooro yajuno'mno Jisasol neya aboloneyokwe tovino'mo adomdukuurosoporogano.

² Toro domdukuurosuno sumaveyokwe Jisasollu wuulo meroso'mno amogaibworomokavlavoporogano. Toro toollu Room tooravuro a'mwo aguto gavona pwol Juu toorai mido mollomwalodowodo toollomno amogaibworomokavlavoporogano. A'mwo aguto gavona su toolluno yovo tov Pailatolekono.

Juudasol wuulo awaroka tovinokwono

³ Juudasol Jisasollu a'mwo pworavuro ato tovi amorubweyoka su tool aro tovi kwonomarokaikono. “Oo kooti yogalo tovida'ai Jisasol neya abolono, me'no adomdukuurosumaporodeyo.” Juudasol su toro tovi me'no kwonomaroka toga'no'gwowi jul'nyo bwotonyo ibwosuno'no kuudo pumgu'aro saurokaikono. Toro tool 30-pela silva nuugwiyo kuubiyopo su tobuuke pris mido mollomwalokwe toorogai'aro Juu tooravuro mido mollomwalokwe toorogai'aro tooro Gooti toollu ilomoropiyo'moneyokwe ago tovi mwalodopure tooraiyomno aikomgu amokavlavokaikono.

⁴ Toro mokavla'mno sumaiyokwe aro kuudokaikono. “Oo nuu ma'no ma'no me'no sugono. Nuu a'mwo ma'no ma'nodo maiyokwe toollu kemoro ato tovi amaikubwemonyugono.” Kuudokaikono. Toro kuudoka kuvi kuruv a'mwo mido mollomwalokwe su tooro burolyogalo aro kuudoporogano. “Gumoro anekudumodo su tov nemi manekwoso. Guvnokwe tookuji aguuwoso.” Kuudoporogano.

⁵ Toro kuudopo tovi Juudasol Gooti toollu ilomoropiyo'moneyokwe ago tovi anakuuto tomuu kuuno daino sumaiyokwe silva nuugwiyo su tobuul gami ato tokwe kwolowopiyokaikono. Toro wolowopino sumaiyokwe wagwolago su tovida'ai kwa'mgu tomuuno abolokwokaikono. Toro bolokwino sumaiyokwe gavnokwe tool wuulo awarokaikono.

⁶ Toruda'ai pris mido mollomwalokwe tooro silva nuugwiyo aulowopiyoka su tobuullu molle'bworoma'no sumaveyokwe aro sajunoporogano. “Nuugwiyo akav a'mwo pwollu romiyoso'moneyokwe kuubingikokwono. Toro te nevu Gooti toollu ilomoropiyo'moneyokwe ago tovida'ai nuugwiyo togai nomolla'mowa'jo.”

⁷ Toro juno sumaveyokwe kuuguudo pwekwo do'mno kwako puvi biyomallo'moneyokwe adomdukuurosoporogano. Kwako su tov a'mwo kwa'bootoollo yakwollodowodo pwollurokwono. Kwako su tovi biyoma'no sumaveyokwe a'mwo abolo bomwallo tobuuro bolodopure tonyu molsoso'moneyokwe ajesopokwono.

⁸ Toro tovino tov kwako su tovino yovo tov Muja'womdoverukono. Sowaropokwono. Aki aga kuga kuruv kwako su tovino yovo tov kuuno dodupudokwono.

⁹ Su tov aiyoga proofet Jeremaiya'wolluro yogalo ajakwolloka tovi suuwiyo sumwojokakwono. Yogalo su tov arokwono. “A'mwo tooro 30-pela silva nuugwiyo tobuul amaroporogano. Nuugwiyo su tobuulluno Isuraiyolda'ai a'mwo abolo pun a'mwo su toollu biyomallo'moneyokwe me'no ajesopo tomgu'aro tovi kuvinono amaropokwono.

¹⁰ Toro malluno sumaveyokwe a'mwo tooro nuugwiyo su togai a'mwo kwa'bootoollo yakwollodowodo pwekwojuro kwako tovi abiyomaropokwono. Aki sumdomgu Aguto tool nuu proofet toonyu me'no adanyoka tovi kuvinono soporogano.” Yogalo tov toro sakwollungikokwono.

A'mwo aguto Pailatol Jisasollu kuudoganoka tovinokwono

¹¹ To'no'gwowi Jisasol a'mwo aguto gavona Pailatolluro sumdollu toru adavokaikono. Toro da'mduke toollu Pailatol aro kuudoganokaikono. “Juu tooravuro a'mwo aguto kig tool guu kwekudeyo?” Toro kuudoganoka toollu Jisasol kuudokaikono. “Guvnokwekujuro toro adumodo tov kuvigono.” Kuudokaikono.

¹² Toro wuujuno sumaiyokwe pris mido mollomwalokwe toorogai'aro Juu tooravuro mido mollomwalokwe toorogai'aro tooro Jisasollu mojokuu'noso'moneyokwe yogalo dodopure kuvi kuruv Jisasolno'gwowi yogalo puru'monodo kuruv madokaikono.

¹³ Aki Pailatol Jisasollu guureji aro kuudoganokaikono. “Gumino tov, ma'no ma'no tono tono yokwekono, anyudadokwopo tovi nuu'nadokuuno. Toro tovino guu yogalo puru'monodo kuruv madubinekudeyo?” Kuudoganokaikono.

¹⁴ Toro kuudoganoka kuvi kuruv Jisasolno'gwowi kemoro yiuwi'nokai mojokuu'noso'moneyokwe yogalo dodopure su tooraino gamoro puruv muudokaikono. Toro yoduke toolluno Pailatol kuudo bwotonyo sourukwapiyokaikono.

Kwolallo ton Jisasolluno, “i'noguropte tovi domovoromiyoguroptowosono,” adelowo'naropo tovinokwono

¹⁵ Toruda'ai yiuwi'nokai kworomo tonyu lubullu doto yanodupudo toga a'mwo aguto gavona Pailatol aro sajukekono. Juu a'mwo abolo ton a'mwo pwol wuulo killo'mo ago tovi kuule'na'dowo'jure toolluno Pailatollu kuujajupogano. “Oo a'mwo su toollu nokwo illurolovonekwopiyabinekudeyo?” Toro wuudoganodopure toga Pailatol a'mwo su toollu kuvinono sullurolowopiyabiyajukekono.

¹⁶ Toro te Jisasollu kooti yogalo aduuwiyoka toga a'mwo pwol wuulo killo'mo ago tovi ai'nallajuko toolluno yovo tov Barabasolekono. A'mwo su toolluno yiuwi'nokai a'mwo abolo ton kuudo me'no souroonyajupekono.

¹⁷ Toro te lomwo toga kwolallo ton Pailatolluro ago toru abi'bwo'nopogano. Toro bi'bwo'nodopure tonyu Pailatol aro kuudoganokaikono. “Juu toorekul, a'mwo Barabasollu mollurolowapiyo'mo dukekullunadopiyo oo Gooti toolluro wiyo'mwojo'moneyokwe ajesoka Kraisolo, dodupudo Jisasollu mollurolowapiyo'mo dukekullunadopiyo?” Kuudoganokaikono.

¹⁸ Toro wuudoganyuno sumaiyokwe Pailatol kwolallo abi'bwo'nopo su tonyuno aro kuudo me'no souromarokaikono. Oo a'mwo kwolallo ton Jisasolluno ilaiyo kuudo yau'dopure kuvi kuruv pris mido mollomwalokwe toorono'gwowi Jisasolluno kwekuullu kuudo yau'dupu mi dobomanubwemavo. Kuudo me'no souromarokaikono.

¹⁹ Toro te Pailatol kooti yogalo duuwiyo'mo sia aguto puvi ilomwaloduke toga gamoro abolo tov yogalo aro adopiyabokakwono. “Guu a'mwo ma'no ma'nodo maiyokwe su toollu kaiya'no migolbinono. Su tov aro tovinokwono. Nuu surakuuto toga a'mwo su toolluno wojo kaiya'nodo puruv me'no suwo'nyugo'migono.” Adopiyabokakwono.

²⁰ Toro adopiyaboka kuvi kuruv pris mido mollomwalokwe toorogai'aro Juu tooravuro mido mollomwalokwe toorogai'aro tooro kwolallo abi'bwo'nopo tonyu aro adupureyokweyo'mo guureji adumuurolovoporogano. “Yiuno Barabasolluno jullurolovonekwopiyabono. Yo'bi Jisasolluno'gwowi aboloneyokwe neya aromiyosupuro.” Su toro wuudupureyokwe tovino guureji adumuurolovoporogano.

²¹ Toro te a'mwo aguto gavona Pailatol kwolallo tonyu aki aiko te aro kuudoganokaikono. “Nuu a'mwo su tooralluda'ai gadoollu kemi ato tovi irolowapiyo'mo dekullunadopiyo?” Kuudoganokaikono. Toro kuudoganoka toollu a'mwo abolo kwolallo ton deko aro adelowo'naropogano. “Guu Barabasollu jullurolowopiyabono.” Adelowo'naropogano.

²² Toro delowo'na'dopure tonyu Pailatol aro kuudoganokaikono. “Gooti toolluro wiyo'mwojo'moneyokwe ajesoka Kraisolo dodupudo Jisasollu adado wimonyudeyo?” Kuudoganokaikono. Toro kuudoganoka toga yiuwi'nokai kwolallo ton aro kuudopogano. “A'mwo su to kwollu i'noguropte tovi domovoromiyoguroptowosono!” Kuudopogano.

²³ Toro kuudopo tonyu Pailatol aro samuugojokaikono. “Burowo'nyo ma'no ma'nodo tov soka toolluno romiyosumonyudeyo?” Samuugojokaikono. Toro samuugojoka kuvi kuruv kwolallo su ton aki aiko te deko muunyu toru'aro guureji aro adelowo'nugoulapogano. “A'mwo su to kwollu i'noguropte tovi domovoromiyoguroptowosono!” Adelowo'nugoulapogano.

²⁴ A'mwo abolo kwolallo su ton molo yojaluviyo'moneyokwe lo'nugoulodopure tonyu Pailatol me'no wonyuno sumaiyokwe aro kuudo saurokaikono. Oo kwolallo su tonyu moju'bwollo'moneyokwe moro yogalo kuudumo tov yasuwa'no dovla'mwallo. Su toro kuudo yau'no sumaiyokwe a'mwo womdokwe pwollu aro kuudokaikono. “Wonyo pun donumokabono,” Toro wuujuno sumaiyokwe womdokwe su tool dis puruv wonyo tokwe surosungiko tov amokabokaikono. Toro amokaboka tovi Pailatol gamoro ato toval sal'mo'nokaikono. Toro yal'mo'nyuno sumaiyokwe kwolallo tonyu aro kuudokaikono. “Kevu a'mwo akallu aromiyosupi tovuro jul'nyo tov mi manuworonokwono. Yiuno kevnokwe togaikulluno ikwo'mwalonokwono.” Kuudokaikono.

²⁵ Toro kuudoka tovi yiuwi'nokai a'mwo abolo ton deko aro adelowo'naropogano. “Kuvigono. A'mwo su toollu aromiyosa'ji tovuro jul'nyo tov nevnokwe tonollu nekwo'mwalonokwono. Aki jul'nyo su tov nemoro kwoloraiyo kubuurai kuruv nokwo uuwo'mwalonokwono.” Adelowo'naropogano.

²⁶ Toro te a'mwo abolo su tonyomno Pailatol Barabasollu surolowapiyokaikono. Toro irolowapino sumaiyokwe Jisasollu wuulo tokwe agunyukuurumollupureyokwe a'mwo mollurogudo pworai amorubweyokaikono. Toro me'no gunyukuurumolluno sumaveyokwe Jisasollu i'noguropte tovi movoromiyoguroptowoso'moneyokwe amogaibworomokavlavopekono.

A'mwo mollurogudo tooro Jisasollu burolyogalo aduu'mwojopo tovinokwono

²⁷ Toro mogaibworomokavla'mno sumaveyokwe a'mwo mollurogudo tooro a'mwo aguto gavona toolluro agwapto toru'no Jisasollu amogaibworomokaulaporogano. Toro mogaibworomokaulno sumaveyokwe a'mwo mollurogudo pworai deko domaro'mno yiuwi'nokai tooro abomwodovomaroporogano.

²⁸ Toro bomwodovoma'no sumaveyokwe Jisasolluro youro tonyu mollurolopiyo'mno youro kumi'yago kwallujo tokwe subweyopekono.

²⁹ Toro ibweno sumaveyokwe amodu'mago agabaiku'nyungiko tov Jisasolluro mido tovi a'mwo aguto kig pwolluro miguto to'busuko subweyoporogano. Aki aguto kig pwol gamoro jurogudo tovi wuuduuwallo'moneyokwe yodeko sugumaluko puruv mwora'dowodo to'busuko kubalno Jisasol gami anato tokwe momworarono'moneyokwe burano puruv kwiyopekono. Toro wino sumaveyokwe toga gamoro dolago tomuu suduko winuguto'no'mno burolyogalo aro kuudoporogano. “Tarevono, Juu tooravuro a'mwo aguto kigoloo!”

³⁰ Toro wuudo'mno aki ibupto kuupuroporogano. Ibupto uupulluno sumaveyokwe burano tov maro'mno gamoro mido tovi iwago aromiyajupekono.

³¹ Burolyogalo toro daromino sumaveyokwe a'mwo mollurogudo tooro Jisasolluro youro kumi'yago kwallujo tov mogallurulopiyo'mno gami youro tov aki aiko te amollubweyoporogano. Toro ibweno sumaveyokwe i'noguropte tovi movoromiyoguroptowoso'moneyokwe abomogaibworomokalokwoporogano.

Jisasollu i'noguropte tovi amovoromiyoguroptowosopo tovinokwono

³² Toro bomokalokwino sumaveyokwe toga a'mwo wagwolago Sairinida'ai pwollu abilluru'maroporogano. A'mwo su toolluno yovo tov Saimoonolekono. Toro toollu a'mwo mollurogudo tooro Jisasollu movoromiyoguroptowoso'mo i'noguropte tov amokwanoneyokwe adumuurolovoporogano. Toro adumuurolovopo tool momwora'no sumaiyokwe amokwanokaikono.

³³ Jisasollu toro mogaibworomokavla'mno sumaveyokwe muumuudo Goolgoota toru ai'movoporogano. Yovo Goolgoota tovino amovodo'mwojajungiko tov aro'mokwono. Mibodopto to'busukorukoneyo'mokwono.

³⁴ Su toru ki'mo'mno sumaveyokwe toga wain wonyo puruv iru'wuullo tokwe amolla'mo'nyungiko tov Jisasol anoneyokwe kwiyopekono. Toro kwiyopo kuvi kuruv Jisasol wuullo tovi yamju anoka toga mamanokaikono.

³⁵ Toro wino sumaveyokwe a'mwo mollurogudo tooro gamoro youro tov mollurolopiyo'mno Jisasollu i'noguropte tovi amovoromiyoguroptowosoporogano. Me'no movoromiyoguroptowosuno sumaveyokwe toga Jisasolluro youro ton mojuru'bworoso'mno gadool gadool marono'mdukoneyokwe tovino sumwonyo puruv soporogano.

³⁶ Jisasol i'noguropte tovi ilejuku'na'duke toga a'mwo mollurogudo su tooro kuwai kwako tomuu wolomwalo'mno aduvomwallajuporogano.

³⁷ Aki toro tooro ipaiyo puusi aro sakwolloporogano. “A'mwo akal Juu tooravuro a'mwo aguto kig tookono.” Yogalo su tov sumdomgu Jisasollu kooti yogalo duuwiyo'mno adomdukuurosopo tovida'aiyokwono. Toro tovi yakwolluno sumaveyokwe ipaiyo su toul Jisasolluro mido tovi muunyu toru aromiyouguru'mwojosoporogano.

³⁸ Toro tooro Jisasollu me'no movoromiyoguroptowosuno sumaveyokwe toga a'mwo kuukokwe pworake'aro avalo toru amovoromiyoguroptowosoporakono. Kuukokwe su tooralluro pwollu Jisasolluro anatomgu aki pwollu kwonamomgu amovoromiyoguroptowosoporakono.

³⁹ Toro movoromiyoguroptowosuno sumaveyokwe a'mwo abolo pun puuto tovi plavo'mno Jisasollu nuuwoleyo'mo ton burolyogalo wuudodupu milgulgulo ajuwoleyajupogano.

⁴⁰ Toro ton aro ajuwoleyajupogano. “Aiyoo, Gooti toollu ilomoropiyo'moneyokwe ago tovi mouropiyo'bi iruko pullapullu guuwolo'nowo'ji toga aki aiko te mojokwe tookugono. Toro tookujuno tov guvnokwe tooku neya duuwiyo'mwoju'nono! Aki guu Gooti toolluro Kwolaiyo tookuno'juki i'noguropte tovida'ai doolabono!” Ajuwoleyajupogano.

⁴¹ Aki pris mido mollomwalokwe toorogai'aro loowo tovino pi'mwo kuudokwe toorogai'aro Juu tooravuro mido mollomwalokwe toorogai'aro kworo kuruv Jisasolluno burolyogalo aro ajunoporogano.

⁴² “A'mwo abolo punyu kwiyo'mwojajuko kwol kuruv gavnokwe tekwo wiyo'mwoju'nyo'mo to'gwowi ku'nono mwiyo'mwoju'nonekono. Toro te Isuraiyol tooravuro a'mwo aguto Kig akal i'noguropte tovida'ai aga neya wolabwono. Toro kwolabwo'ji toollu kwona'ji toga kuudo nokwo uubweyanekono.

⁴³ Aki toro tool Gooti toollu kuudo kuubweyajuko tovino tov Gooti tool a'mwo su toolluno ilaiyo kwino'ji tov aga toga nokwo wiyo'mwojonekono. Su tov aro tovinokwono. A'mwo su tool aro me'no ajajukekono. Oo nuu Gooti toolluro Kwolaiyo toonyugono. Su toro ajajuko tovinokwono.” A'mwo mido mollomwalokwe tooro burolyogalo toro ajunoporogano.

⁴⁴ Aki a'mwo kuukokwe tooral Jisaseke amovoromiyoguroptowosopo su to kworal kuruv Jisasolluno burolyogalo adolorakono.

Jisasolluro aboloka tovinokwono

⁴⁵ Kuujunapto kuunodo toga yiuwi'nokai kwako tomuu dugumdo kimwonyopiyo'no kuujo sumdo tov pullapullu kuuwolo'nokakwono.

⁴⁶ Toro uuwolo'nyuno sumaiyokwe 3 kilook toga Jisasol deko guureji aro adokaikono. “Eli Eli lama sabaktani?” Yogalo su tovi amovodo'mwojajungiko tov aro'mokwono. “Mi Gootoloo, Mi Gootoloo, guu buro'nyo'mo donyugollu'mo'mwakuneyo'mokwono.”

⁴⁷ Jisasol toro doduke toga a'mwo abolo pun wobo toru adaiyajupo ton wuu'no'mno aro adopogano. “A'mwo akal Ilaijallu deko adoma'mwallo.”

⁴⁸ Toro juno sumaveyokwe kuga'gwo kuuno a'mwo pwol kano kano uuwo'no wonoweyo julo to'busuko puruv malluno sumaiyokwe wain wonyo puruv wuullomaiyo tovi juulovomaro'no iko tovi'aro ikollutowosuno sumaiyokwe Jisasol amwojanoneyokwe suluwopiyokaikono.

⁴⁹ Toro ilopiyoduke toga a'mwo abolo pun aro adopogano. “I'noguropte tovi wo'dowo'jure toollu wiyo'mwojono'moneyokwe Ilaijal nobwonoldukono? Nevu amuugonarano.” Adopogano.

⁵⁰ Toro juno sumaveyokwe Jisasol deko guureji do'no gamoro kuullo toollu ikuurapino sumaiyokwe yiuno'no abolokaikono.

⁵¹ Toro aboloka kuga'gwo kuuno Gooti toollu ilomoropiyo'moneyokwe ago tovi anakuuto tomuuda'ai Gooti toolluro pwekwapto kuunodo toru'no youro kudo'aiko allukurosungiko tov akuuto toru'aro rojomokwolabino sumaiyokwe imgu amgu kworokakwono. Aki kwako tov wunyu wunyu bwotonyo ino sumaiyokwe sulo bwotonyo tooro aworeyopiyoporogano.

⁵² Aki su toro toga a'mwo buuso pun kuusoda'mno sumaveyokwe Gooti toolluro a'mwo abolo bwotonyago me'no abollajupo tonyu Gooti tool aiyo aiko te amodukavokaikono.

⁵³ Aki Jisasol aiyo aiko te me'no adukavoka toga a'mwo abolo amodukavoka su ton a'mwo buuso tomuuda'ai bolokwino sumaveyokwe Gooti toolluro wagwolago Jeruusalem'no aulapogano. Toro kuulno sumaveyokwe Jeruusalemda'ai a'mwo abolo bwotonyago tonyu kevnokwe tonyuno kuuduuwallunopogano.

⁵⁴ Toruda'ai Jisasol nyaboloduke toollu mollurogudo pworogai'aro kemi mollubworomokwanyokwe tooke'aro tooro wobo toru amuugonodaiyajuporogano. Toro tooro wunyu wunyu tokwe'aro yiuwi'nokai imo'nodopure togai'aro tonyu me'no kwonopo tovino tov luko morumoukuropiyo'mno aro adoporogano. “Oo a'mwo akal Gooti toolluro Kwolaiyo kuunodo tookono.” Adoporogano.

⁵⁵ Aki avalo toga abolo bwotonyago pun manyu toruda'ai amuugonodaiyajupogano. Abolo su ton sumdomgu Jisasol Galili toru yomolloduke toollu uumjunodupu gami wosamujukodeyo ton yovrowoso'mo ado'nuwiyajupogano.

⁵⁶ Abolo su tonyuno yovo tov Makdalada'ai Mariyakwe'aro aki Jemseke Joosepeke todorallu kuuneyago Mariyakwe'aro aki Sebediyolluro muugunyo Jemseke Jooneke todorallu kuuneyago tokwe'aro ton amuugonodaiyajupogano.

Jisasol me'no aboloka toga gamoro kulako bwiyo tov a'mwo buuso puvi aulosopo tovinokwono

⁵⁷ Toruda'ai Jisasol me'no aboloka sulato tollugwoji Arimatiyada'ai a'mwo nuugwiyo bwotonyagokwe pwol abokaikono. A'mwo su toolluno yovo tov Joosepolekono. Aki toro tool Jisasolluro uumjunyokwe me'no sumo'nyajukekono.

⁵⁸ Toro te a'mwo su tool Pailatollomno plaino sumaiyokwe, “Jisasolluro kulako bwiyo tov nokwo nyabwonoldukoneyokwe” tovino auluudoganokaikono. Toro kuudoganoka tovi Pailatol gamoro a'mwo womdokwe pworai doma'no sumaiyokwe Joosepollomno aro amodapiyokaikono. “Yowa'nogano, a'mwo bwiyo su toollu nokwo mokavlawonekono.” Amodapiyokaikono.

⁵⁹ Toro amodapiyoka tovi Joosepol plaino sumaiyokwe a'mwo bwiyo i'noguropte tovi wo'duke toollu molovomwogapiyo'no laplap sugumaluko kumi'yago puuke amoweyomgurosokaikono.

⁶⁰ Toro moweyomgurosuno sumaiyokwe gavnokweyolluro a'mwo buuso muuduko puvi aulomorosokaikono. A'mwo buuso su tov a'mwo tooro sulo tovi adovoloumjosungikokwono. Toro tovi kuulomorosuno sumaiyokwe toga noullo tovi sulo bwotonyo pweke mogunyugolowoso'no amollukurosokaikono. Toro mollukurosuno sumaiyokwe kuugollu'movokaikono.

⁶¹ Toro yoduke toga Makdalada'ai Mariyakwe'aro aki gabovo Mariyakwe'aro toval a'mwo buuso tovi igo'mguda'ai mwalodubul amuugonallajulovakono.

A'mwo mollurogudo pworai a'mwo buuso toru duuwato'moneyokwe amolludapiyopo tovinokwono

⁶² Iruko aikomguda'ai Sabat toga pris mido mollomwalokwe toorogai'aro Farasi toorogai'aro tooro Pailatollomno aulaporogano.

⁶³ Toro kuulno sumaveyokwe Pailatollu aro kuudoporogano. “A'mwo agutoloo, a'mwo kuunano youkuu'najokwe su tool aiyo kuuno mwalodowodo toga gamoro yogalo puruv aro doduke kuu'nowekono. “Nuu iruko pullapullu me'no abawo'ji toga aiyo aiko te noduka'monyugono,” doduke toollu kuu'nowekono.

⁶⁴ Toro tovino tov iruko pullapullu su tobuul a'mwo buuso tovi duuwato guureji moduvomwalmwalpino'moneyokwe guu a'mwo mollurogudo pworai neya domodapiyono. A'mwo buuso su tovi toro amoduvomwalpi tov gamoro uumjunyokwe tooro a'mwo su toolluro kulako tovi kuuko ku'nono mamapinorogano. Kuuko kuvinono amapi to'gwowi yiuwi'nokai a'mwo abolo tonyu aro youkuu'nuudupinorogano. “Oo su tool aiyo aiko te me'no aduka'mokaikono.” Youkuu'nuudupinorogano. Su toro soukuu'nuudupi tov sumdomguda'ai kuunano yogalo me'no soukuu'najajuko tovi uuwolowo'ji kaiya'no bwotonyo imo'nonokwono.” Kuudoporogano.

⁶⁵ Toro kuudopo toorai Pailatol aro kuudokaikono. “Kevu moro a'mwo mollurogudo pworai mokavlavopi a'mwo buuso towai duuwato'moneyokwe nokwo molludapipinorekikono. Kevnokwe toorekulluro kuudo sau'mwakopo tomgu'aro uumjunopi duuwatokwe su toorai nokwo molludapipinorekikono.” Kuudokaikono.

⁶⁶ Toro kuudoka tovi a'mwo buuso tovuro mujumollo tovida'ai sulo bwotonyo toollu nomogunyugolowosupiyokwe tovino po'dogalo aluvomuugutowopiyoporogano. Toro luvomuugutowopino sumaveyokwe Farasi toorogai'aro pris mido mollomwalokwe toorogai'aro tooro a'mwo mollurogudo toorai a'mwo buuso su tovi moduvomwalmwalpino'moneyokwe amolludapiyoporogano.