Matyuu 26 - Gooti Toolluro Yogalokwono

A'mwo Jisasollu romiyoso'mo winodopure tooro adadomgu'aro romiyosanoldukoneyokwe soureya'mgonopo tovinokwono

¹ Jisasol yiuwi'nokai kuuguudo su ton me'no wuujuno sumaiyokwe gami uumjunyokwe toorai aro kuudokaikono.

² “Kevu lubullu doto puruvi yanyo'moneyokwe iruko tov wobo toga'deyo kuudo nyau'mwakovo. Lubullu doto su tov Muunyu Toru'aro Surukuruwolovoka tokwono. Toro tov iruko pullalno me'no uuwolo'nowo'ji toga bai'mowonokwono. Su toro toga A'mwo Kwolaiyo Kuunodo toonyu i'noguropte tovi movoromiyoguroptovanubweyo'moneyokwe ikomago pworavuro ato tovi nomanubwepinonyugono.” Kuudokaikono.

³ Su toro toga pris mido mollomwalokwe toorogai'aro Juu tooravuro mido mollomwalokwe toorogai'aro tooro pris aguto pwolluro agwapto bwotonyo tovi su'bwo'noporogano. Pris aguto su toolluno yovo tov Kaiyafasolekono.

⁴ Toro toolluro ago tovi i'bwo'nyuno sumaveyokwe Jisasollu romiyoso'mo winodopure tooro adadomgu'aro youkuu'nogalomworarowa'ji romiyosanoldukoneyokwe tovino soureya'mgonoporogano.

⁵ Toro soureya'mgonopo kuvi kuruv kevnokwe tooro aro sajunoporogano. “Kwolallo bwotonyago ton lubullu doto su tovi yanodopure toga Jisasollu agalomworara'ji tov molo bwotonyo nonekullupiyo. Toro tovino tov su toro toga miyanokwono.” Kevnokwe tooro sumwoluko puru'mono wosuno'mno su toro adomdukuurosoporogano.

Abolo puruv Jisasolluro mido tovi wobeya sudo kuunyokwe wonyo tov aimowosoka tovinokwono

⁶ Toruda'ai Jisasol wagwolago Betani toru Saimoonolluro ago tovi aulonomwallajukekono. Saimoonol sumdomgu wonawiyo nobollokwe kwol kuruv su toro toga'no'gwowi nobollo nonaguto sumo'nyajukekono.

⁷ Jisasol toro tooke kuulonomwaloduke toga abolo puruv wobeya sudo kuunyokwe wonyo puruv sulo tovida'ai bootool sakwollungiko tovi surosungiko tov amokabokakwono. Wobeya sudo kuunyokwe wonyo su tov kuunodokwono. Toro tovino tov nuugwiyo bwotonyo tokwe abiyoma'nyungikokwono. Toro tokwe mokabino sumaiyokwe bootool mujumollo tovi pwojo'no Jisasol noluuleyo tovi wobo toru mwaloduke toga gamoro mido tovi aimowosokakwono.

⁸ Toro kimowosoduke tovi Jisasolluro uumjunyokwe tooro wonyuno sumaveyokwe surodo'mo yo'mno aro sajunoporogano. “Awi, wobeya sudo kuunyokwe aimowosumoka su tov buro'nyo'mo meko jukiyadopiyo?

⁹ Wobeya sudo kuunyokwe wonyo su tov nemi anekullabowo'jujuko'mno'juki nuugwiyo bwotonyo nokwo amarowa'jujukonogano. Toro marowa'ji nuugwiyo su tokwe a'mwo apoo'nyaiyo pubuurai nokwo kwiyo'mwojowa'jujukokwono. Toro kuvi kuruv meko me'no sumokakwono.” Sajunoporogano.

¹⁰ Toro yajunodopure toorai Jisasol wuu'nyuno sumaiyokwe aro kuudokaikono. “Kevu buro'nyo'mo abolo su tovi burolyogalo wuudodupu jul'nyo duubweyadokwovo? Nokwo wonyapino julo. Abolo su tovuro anyumoka tov sugudokwono.

¹¹ Su tov aro tovinokwono. A'mwo abolo apoo'nyaiyo ton kevuge yiuwi'nokai toga nomjomwekovla'mwalpinogano. Toro kuvi kuruv nuu toonyuno'gwowi yiuwi'nokai toga kevuge mamjomwekovla'mwalmonyugono.

¹² Aki nuvu aiyo kuuno mwalodore akaga abolo su tovuro mi nubweyo'mo sumoka tov aro tovinokwono. Nuu lukomgu abolmi toonyu moro kulako tov buuso tovi noolomonuwopiyapinonyugono. Su toro toga'no yovrowoso'moneyokwe tov nuu aiyo kuuno mwalodore akagada'ai abolo tov wobeya sudo kuunyokwe wonyo su tokwe yiuno'no aimovo'dogalanubwemokakwono.

¹³ Toro te nebal'no ikudumo'mokwono. Yiuwi'nokai kwako tomuu mino kuuguudo sugudo tov amodomollupi tomuu abolo su tovuro sumoka tovino kuuguudo tokwe'aro nomodomollupinorogano. Toro modomollodopure tovi wuu'nopi abolo su tovuro sumoka tovino kuudo nyou'movla'mwalpinogano.” Kuudokaikono.

Juudasol Jisasollu Juu tooravuro mido mollomwalokwe tooravuro ato tovi morubweyo'mo subuu'yamju kwiyoka tovinokwono

¹⁴ Toruda'ai 12-pela uumjunyokwe tooraida'ai pwol Jisasollu morubweyo'mo su tool pris mido mollomwalokwe tooraiyomno avlavokaikono. Su toolluno yovo tov Juudas Iskeriyootolekono.

¹⁵ Toro tool plaino sumaiyokwe pris mido mollomwalokwe toorai kuudoganokaikono. “Nuvu Jisasollu amoraikubwemi tov kevu nuugwiyo adadobuul nyabupinorekuldeyo?” Toro kuudoganoka toollu kuudoporogano. “Nevu 30-pela silva nuugwiyo tobuul nogujabwanonogano.” Toro wuujuno sumaveyokwe nuugwiyo su tobuullu jagilo'mno kwiyopekono.

¹⁶ Su toro togada'ai Juudas Iskeriyootol Jisasollu adadomgu'aro morubwemonyudukoneyokwe tovino soureya'mgonyajukekono.

Jisasol gami uumjunyokwe toorogai lubullu doto tovi sonomwalopo tovinokwono

¹⁷ Toruda'ai lubullu doto puruv Bret Mamunopingiko tovi yanyo'moneyokwe iruko tollugwo abai'movokakwono. Lubullu doto su tovuro iruko muudu'nodo su tollugwoji Jisasolluro uumjunyokwe tooro kwollomno bino sumaveyokwe aro kuudoganoporogano. “Nevu Muunyu Toru'aro Surukuruwolovoka lubullu doto tovi yanyo'mo tov gadomuu plavowa'ji yovrowosano'mo dogujunadopiyo?” Kuudoganoporogano.

¹⁸ Toro kuudoganopo tovi Jisasol gami uumjunyokwe su toorai aro kuudokaikono. “Kevu wagwolago Jeruusalem tovi kuulapi a'mwo aikuduuwallumi pwollu noonpinorekikono. Toro toollu aro duujulo. “Ibwasokwe tool agudumokaikono. Moro iruko aguto tollugwo nobai'mowono'mo wobo toru sadopiyo. Toro te nuuge'aro moro uumjunyokwe toorogai'aro toonol Muunyu Toru'aro Surukuruwolovoka lubullu doto tovi yananonogano. Lubullu doto su tovi yanano'mo toonol gumoro ago tovi kuulonomwalanonogano. Ibwasokwe tool toro agudumokaikono.” Duujulo.”

¹⁹ Jisasol toro amodapiyoka tovi gamoro uumjunyokwe tooro plaino sumaveyokwe yiuwi'nokai Jisasolluro kuudoka tonyu kuvinono kuumjunoporogano. Toro tooro Muunyu Toru'aro Surukuruwolovoka lubullu doto tovi yanyo'mo ton sovrowosoporogano.

²⁰ Me'no yovrowosuno sumaveyokwe sula'dugumdo toga Jisasol kuula'no gami 12-pela uumjunyokwe toorogai noluuleyo sovrowosopo toru aulonomwaloporogano.

²¹ Toro kuulonomwalno sumaveyokwe Jisasol aro kuudokaikono. “Nuvu nebal'no ikudumo'mokwono. Kevu toorekulluro pwol a'mwo tooro galonumworapino'moneyokwe mi nomanubweyononyugono.” Kuudokaikono.

²² Jisasol toro kuudoka tovi gamoro uumjunyokwe tooro wuu'nyuno sumaveyokwe kalo'mo soporogano. Toro tooro pwolno pwolnodo tooro yamuugojo aro abuudoganugoulaporogano. “Agutoloo, nuu toro magujumo toonyuno dukonyudadokuuno?” Kuudoporogano.

²³ Toro kuudopo toorai Jisasol aro kuudokaikono. “A'mwo dis aimowosungiko tovi gamoro bret tov nuuge avalo toga kuuvollumwalluko tool kwekono. Su tool a'mwo tooro galonumworapino'moneyokwe mi nomanubweyonekono.

²⁴ Gooti toolluro yogalo tovi aro me'no sakwollungiko tov kuvinono imo'nonokwono. “A'mwo Kwolaiyo Kuunodo tool neya bolonekono.” Sakwollungikokwono. Toro kuvi kuruv a'mwo amoranubweyo'ji su tekwoji sumdomgu miyawosunopujuko'mno'juki tabunyu bwotonyo mamarowo'jujukekono. Toro kuvi kuruv a'mwo amoranubweyo'ji su tekwo tabunyu bwotonyo nomaronekono.”

²⁵ Juudasol nomorubweyono su tool aro kuudoganokaikono. “Ibwasokweyoloo, nuu toro magujumo toonyuno dukonyudadokuuno?” Kuudoganokaikono. Toro kuudoka toollu Jisasol aro kuudokaikono. “Guu, toro magujumonyugono, adumado su tooku kuvinono ibinekugono.” Kuudokaikono.

Jisasol gami uumjunyokwe toorai bret tokwe'aro wain wonyo tokwe'aro tovallu kwiyoka tovinokwono

²⁶ Toruda'ai wosamujuko ton no'mno toga Jisasol bret pun maro'no Gooti toollu, “Nenyoo,” wuujuno sumaiyokwe bret su ton abuudovokaikono. Toro buudeno sumaiyokwe gami uumjunyokwe toorai wiyo'no aro kuudokaikono. “Akav moro kulako tokwono. Kevu maropi donyulo.” Kuudokaikono.

²⁷ Toro nyuno sumaveyokwe Jisasol wain wonyo kapwo puuwa maro'no Gooti toollu, “Nenyoo,” wuujuno sumaiyokwe gami uumjunyokwe toorai kwiyokaikono. Toro wino sumaiyokwe aro kuudokaikono. “Kevu yiuwi'nokai toorekul wain wonyo tov kapwo tovida'ai donyulo.

²⁸ Su tov aro tovinokwono. Kapwo akavi su'nasuko tov moro mujako tovino'busukokwono. Moro mujako su tov subuu'yamju yajunyo'moneyokweyokwono. Aki toro tov a'mwo abolo bwotonyago tonyuro ma'no ma'nodo tovuro kirumwallo tovi modukwopiyo'mo bwolawonokwono.” Kuudokaikono.

²⁹ Jisasol toro wuujuno sumaiyokwe aki aro kuudokaikono. “Nuu aro ikudumo'mokwono. Wain ikulsulo tovida'ai wonyo akav nuu aki aiko te yere manmonyugono. Toro kuvi kuruv yiuno mi Nyunumiyago toolluro aguto kig mido mollomwalo tovi kevuge aulomwalmi toga'no wain wonyo muuduko puruv numonyugono.” Kuudokaikono.

³⁰ Toro wuujuno sumaiyokwe ilomodomoropiyo'mo dato pullugwo adoporogano. Me'no juno sumaveyokwe wagwolago tovida'ai bolokwo'mno Muumuudo Oolip toollomno avlavoporogano.

Jisasol Pitallu, “Guu mi buulo nonyugunyumopibinekugono,” kuudoka tovinokwono

³¹ Toro plaino sumaveyokwe Jisasol gami uumjunyokwe toorai aro kuudokaikono. “Surakuuto akallugwoji kevu yiuwi'nokai toorekul mino buulo nonyugunyumopipinorekikono. Gooti toolluro yogalo tov aro me'no sakwollungikokwono. “Nuu sipsip duuwatokwe toollu aromiyosumi toga yiuwi'nokai sipsip tooro lukado nyounopipinorogano.” Toro me'no sakwollungiko tov nobaiki'mowonokwono.

³² Nuu kuvinono abolmi kuvi kuruv Gooti tool aki aiko te me'no amonyudukawo'ji toga Galili'no sumdomgu kemi kwonyuda'ai wanmonyugono.” Kuudokaikono.

³³ Jisasol toro kuudoka tovi Pital aro kuudokaikono. “Yiuwi'nokai tooro gumino buulo agunyumopipi kuvi kuruv nuu toonyuno'gwowi yiuno puga'nodo kuruv buulo magugunyumopimonyugono.” Kuudokaikono.

³⁴ Toro kuudoka toollu Jisasol aro kuudokaikono. “Nuu nebal'no gudumo'mokwono. Surakuuto akaga kuukuuro kwolo pwol deko tov yere madodowo'jure toga guu tooku mino tov pugasalpuga aro dubinekugono. Awiyo, nuu a'mwo su to kwolluno kuudo maiyonyugono. Mino toro dubinekugono.”

³⁵ Toro kuudoka tovi Pital kuudokaikono. “Yiuwi'nokai toonallu romiyonakubweyo'mo supi kuvi kuruv yiuno puga'nodo kuruv aro madumonyugono. Awiyo, nuu a'mwo su to kwolluno kuudo maiyonyugono.” Pital toro wuujuno sumaiyokwe yiuwi'nokai Jisasolluro uumjunyokwe pworo aval'no toro kuudoporogano.

Jisasol womdo Getsemani toru subusu'nyogalo adoka tovinokwono

³⁶ Toruda'ai Jisaseke'aro gami uumjunyokwe toorogai'aro tooro plaino sumaveyokwe kwako puruv Getsemani dodupudo toru'no avlavoporogano. Toro tooro kwako su toru ki'mo'mno sumaveyokwe Jisasol gami uumjunyokwe toorai aro kuudokaikono. “Nuu kaimuu uuwo'mi subusu'nyogalo dodo'mure toga kevu akawai domwalojulo.”

³⁷ Toro wuujuno sumaiyokwe Jisasol yiuno Pitaike'aro Sebediyolluro muugunyo toorake'aro tooraino mokavla'mno sumaiyokwe jul'nyo bwotonyokwe tool kalo bwotonyo kwinokaikono.

³⁸ Toro tool aro kuudokaikono. “Nuu moro poowokalago tovi kalo bwotonyo nyunoduke tovida'ai bollo'mo sadokwono. Toro te kevu akawai kinomwalopi nuuge doduwa'julo.” Kuudokaikono.

³⁹ Toro wuujuno sumaiyokwe kuru'gwo uuwo'no gamoro sumdomago tov kwako tovi wolomuulo'na'no sumaiyokwe subusu'nyogalo tov aro adokaikono. “Mi Nyunumiyagoloo, nuu dado su tovi mama'miyokwe puuto puruv nokwo youlanubwebinekudukono? Toro kuvi kuruv moro anyunadopiko su tovi muumjunbinono. Yiuno guvnokwekujuro yo'mo agujunadopiko tovino duumjunono.” Kuudokaikono.

⁴⁰ Toruda'ai Jisasol aikomgu bo'no gamoro uumjunyokwe pworapwol tooro sa wo'dopure toorai abwonokaikono. Toro bwonyuno sumaiyokwe Pitallu wuudukuuro'no aro kuudokaikono. “Guu kuujo sumdo yiuno pullugwonodo tollugwoji nuuge sumdo mainomwalmwakudo tov ilaiyo'maiyo.

⁴¹ Yamju puruv kemi ikulloganodowo'jure toga nobwolorapiyokwe tovino neya kinomwalopi subusu'nyogalo dodogaulo. Su tov aro tovino'mokwono. Kemoro poowokalago tovida'ai kuudo tokwe numi numjunyo'mo ikullunodowo'jure kuvi kuruv kemoro kulako to'gwowi su toro yo'moneyokwe jurogudo tov nonagutokwono.”

⁴² Jisasol toro wuujuno sumaiyokwe aikomgu uuwo'no sumdomguda'ai subusu'nyogalo kuudoka to'busuko kubalno aki aiko te aro kuudokaikono. “Mi Nyunumiyagoloo, moro dado mallo'mo sadokwo tovi amanyudukwopiyoneyokwe anyunadopiyo. Toro kuvi kuruv moro anyunadopiko su tovi muumjunbinono. Yiuno guvnokwekujuro yo'mo agujunadopiko tovino duumjunono.”

⁴³ Jisasol subusu'nyogalo su toro wuudoduke toga gami uumjunyokwe pworapwol tooro sa'mo bwotonyo winodopure tooro aki aiko te sa kwollajuporogano. Toro wo'dopure toorai Jisasol aikomgu bo'no wonyuno sumaiyokwe ajudukuurokarogano.

⁴⁴ Jisasol pugasalpuga aikomgu uuwino sumaiyokwe sumdomguda'ai subusu'nyogalo kuudoka to'busuko kubalno aki aiko te aval'no kuudokaikono.

⁴⁵ Jisasol subusu'nyogalo tov pugasalpuga me'no domollajuno sumaiyokwe gami uumjunyokwe pworapwol su toorai aro kuudokaikono. “Kevu iruko mwallo'moneyokwe sa kuuno kwo'mwakopo tov ilaiyo'maiyo. Mekono. Kevu denomallulo. A'mwo Kwolaiyo Kuunodo toonyu ma'no ma'no yokwe tooro galonumworapino'moneyokwe tov nomoranubweyono'mo togakono.

⁴⁶ Kevu doonyulo. A'mwo mi moranubweyo'mo tool me'no abai'mo'mokaikono. Kevu dukavopi avlawano.” Kuudokaikono.

Juudasol Jisasollu ikomago toorai morubweyo'no agalomworaropo tovinokwono

⁴⁷ Jisasol toro wuudoduke kuga'gwo kuuno Juudasol a'mwo 12-pela uumjunyokwe tooraida'ai su tool Jisasollu galomworallo'moneyokwe a'mwo kwolallo bwotonyago toorogai sulabokaikono. A'mwo kwolallo su tooro pris mido mollomwalokwe toorogai'aro Juu tooravuro mido mollomwalokwe toorogai'aro tooravuro amoropiyaboporogano. Toro amoropiyabopo su tooro kemi kwallu'mopto togai gado togai momwora'no sumaveyokwe amokailaboporogano.

⁴⁸ Toro mokailabino sumaveyokwe a'mwo Jisasollu morubweyo'mo tool nogalomworapino'moneyokwe toorai sumdomgu aro me'no kuudokaikono. “A'mwo nogalomworapino toollu nuu molluduuduulo kwimi tool kwekono. Toro toollu dogalomworallulo.” Juudasol su toro me'no kuudokaikono.

⁴⁹ Toro te Juudasol Jisasollomno ilabino sumaiyokwe kuga'gwo kuuno Jisasollu wono'no aro kuudokaikono. “Ibwasokweyoloo, surakuutokwono,” wuudo'no molluduuduulo amollokaikono.

⁵⁰ Toro molloduke toollu Jisasol aro kuudokaikono. “Ibwoto'nyoloo, gumi yo'mo abumodo su tov kuvinono neya jono.” Su toro kuudoka toga kwolallo tooro ilabino sumaveyokwe Jisasollu agalomworaroporogano.

⁵¹ Toro galomwora'dopure toga uumjunyokwe pwol Jisaseke amwallajuko su tool gami ato tov ruuguusapino sumaiyokwe kwallu'mopto puul bwololobwokuromora'no pris aguto toolluro womdokwe pwolluro kaduko tovi amodovodokuurapiyokaikono.

⁵² Toro amodovodokuurapiyoka toga Jisasol aro kuudokaikono. “Guu kwallu'mopto toul gami wo'dowodo toru aiko te neya domullosono. Su tov aro tovinokwono. Yiuwi'nokai a'mwo kwallu'mopto togai molo sunpi tooro kwallu'mopto su tonyu muunyu toru nyulapinorogano.

⁵³ Kuudo neya jaurono. Nuu mi Nyunumiyago toollu guureji aro kuudumi tov, “Guu tausen tausen ensel tooro numi mollonumwalmwalpino'moneyokwe doulomonuwopiyabono,” toro kuudumi kuga'gwo kuuno kuvinono nokwo wolomonuwopiyabwonekono.

⁵⁴ Toro kuvi kuruv nuu su toro sumi tov aga toga mi nonyumo'nono tonyuno Gooti toolluro yogalo sakwollungiko tovi suuwiyo ku'nono mimwojonokwono. Toro te nuu nokwo wonyapino to'no imonyugono.” Kuudokaikono.

⁵⁵ Jisasol toro wuujuno sumaiyokwe toga kwolallo agalomworaropo su toorai aro kuudokaikono. “Kevu kuukokwe pwollu galomwora'dupudo to'busuko kubalno mi galonumworallo'mo toorekul mino tov, Kuuko pwekono, kuudo jukiyanuu'mwakovo? Aki toro toorekul kemi kwallu'mopto togai gado togai miyomno buro'nyo'mo domokailabadokwovo? Nuu kevuge Gooti toollu ilomoropiyo'moneyokwe ago tovuro agwapto toru yiuwi'nokai iruko toga yodekubwasodumdonyugono. Toro yodekubwasodore toga nokwo agalonumworaropujuko kworekul kuruv magalonumwora'mwa'juporekikono.

⁵⁶ Toro kuvi kuruv Gooti toolluro yogalo tov proofet tooravuro me'no sakwollungiko tovi kuvinono imo'nyo'moneyokwe tov aga kuvi kuuno sadokwovo.” Kuudokaikono. Su toro kuudoka toga gamoro yiuwi'nokai uumjunyokwe tooro wuugollu'mo'mno sumaveyokwe lukado avlavoporogano.

Kaunsel tooro Jisasollu kooti yogalo aduuwiyopo tovinokwono

⁵⁷ Jisasollu me'no galomwora'no sumaveyokwe pris aguto toolluro agwapto tomuuno amogaibworomokavlavopekono. Pris aguto su toolluno yovo tov Kaiyafasolekono. Toro toolluro ago toru pris mido mollomwalokwe pworogai'aro yiuwi'nokai Juu tooravuro mido mollomwalokwe toorogai'aro loowo tovino pi'mwo kuudokwe toorogai'aro tooro su'bwo'noporogano. Toro i'bwo'nodopure toru'no Jisasollu amogaibworomokavlavoporogano.

⁵⁸ Toro mogaibworomokavla'mdopure toga Pital manyu toru'aro kuumjunyajukekono. Pris aguto toolluro agwapto toru'no mogaibworomokavla'mdopure kuga kuruv kumuu kuumjunugoulokaikono. Toro tool a'mwo duuwatokwe toorogai wolomwalno sumaiyokwe Jisasollu buro'nyo wimo'nonoldukoneyokwe tovino wonomallo'mo sogwollo to'no ainyajukekono.

⁵⁹ Su toro toga pris mido mollomwalokwe toorogai'aro Juu tooravuro yiuwi'nokai kaunsel toorogai'aro tooro Jisasollu kooti yogalo duuwiyopi romiyoso'mo tooro a'mwo pwol, “Jisasol ma'no ma'no yoduke kwononyugono,” anekudoneyokweyo'mo sa'mgonoporogano. Toro sa'mgonopo kuvi kuruv a'mwo pwolnodo kwollu kuruv miyo'mgonomaroporogano.

⁶⁰ Kooti yogalo toro duuwiyodopure toga a'mwo bwotonyago tooro Jisasolluno kuunano yogalo youkuu'nuujo'mo aboporogano. Toro abopo kuvi kuruv kemoro kuuguudo su togai kooti yogalo ku'nono maduuwiyoporogano. Aiyowo'mo toga a'mwo pworal abolorakono.

⁶¹ Toro bino sumaleyokwe Jisasolluno aro soukuu'nuudolorakono. “Oo a'mwo akal aro adokaikono. Nuu Jeruusalemda'ai Gooti toollu ilomoropiyo'moneyokwe ago tovi mouropiyo'mi iruko pullapullu nuwolo'nowo'ji toga aki aiko te modumonyugono. Jisasol toro doduke toollu kuu'nowekono.” Kuudolorakono.

⁶² Toro wuujuno sumaleyokwe pris aguto tool a'mwo abi'bwo'nopo tooravuro akuuto toru ilodavo'no Jisasollu aro samuugojokaikono. “A'mwo su tooralluro gumino tov, Toro yokwekono, adumalo tovino gumoro puruv madubinekudeyo?”

⁶³ Toro samuugojoka kwol kuruv Jisasolluro wuujo'mo tov mwinoduke tool yogalo puru'monodo kuruv maravokaikono. Toro toollu pris aguto tool aki aiko te guureji aro adumuurolovokaikono. “Gooti aiyo mujomwekovla'mdowodo toolluno yovo tovida'ai donyudono. Guu Gooti toolluro nekullo'mwojo'moneyokwe Krais ajesoka tool kwekudukono? Aki Gooti toolluro Kwolaiyo su tool guu kwekudukono?” Guureji toro adumuurolovokaikono.

⁶⁴ Toro toollu Jisasol aro kuudokaikono. “Guvnokwe tooku me'no adumodo tov kuvigono. Nuu A'mwo Kwolaiyo Kuunodo toonyuno'gwowi aro gudumo'monyugono. Nuu Gooti jurogudo toolluro anato tomgu mwalodo'mure toonyu nonuwonpinonyugono. Aki toro toonyu muunyu kai'muuda'ai sulu'wo tovi wolabodo'mure toga nonuwonpinonyugono.” Kuudokaikono.

⁶⁵ Su toro kuudoka tovi wuu'nyuno sumaiyokwe pris aguto tool, “Oo Gooti toolluno kaiya'no yogalo dodumaiyo,” do'no kalo'mo ino sumaiyokwe gavnokweyolluro youro tov aroju'nokaikono. Toro tool kuudokaikono. “Kevu a'mwo akalluro Gooti toolluno kaiya'no yogalo doduke tovi me'no kuu'numaporekikono. Toro tovino tov aga'no'gwowi a'mwo pworavuro kuuguudo pugai'aro mallo'mo tovino supto mimwakuuwono.

⁶⁶ A'mwo akalluro kaiya'no yogalo adumoka tovino kevu buro'nyo kuudo jau'mwakovo?” Toro kuudoganoka tovi yiuwi'nokai tooro aro kuudoporogano. “A'mwo su tool ma'no ma'nodokwe toolluno tov neya abolono.” Kuudoporogano.

⁶⁷ Toro wuujuno sumaveyokwe a'mwo pworo Jisasolluro sumdomago tovi ibupto kuupuroporogano. Toro uupulluno sumaveyokwe iwago aromiyopekono. Aki pworo kemi akwoka tokwe alpuurumollopekono.

⁶⁸ Toro romino sumaveyokwe kuudoporogano. “Guu Krais tookuno'juki proofet yogalo donekudono. Ala'mwol dukoguromiyadopiyo?” Toro wuudo'mno adaromiyoporogano.

Pital Jisasolluno tov, “Nuu a'mwo su toolluno kuudo maiyonyugono,” soukuu'nuudoka tovinokwono

⁶⁹ Jisasollu ago tovi kooti yogalo toro kuuloduuwiyodopure toga imomgu kwa'mgu agwapto toru Pital kuuno amwallajukekono. Toro mwaloduke toollomno sujuraiyo womdokwe puruv abokakwono. Toro bino sumaiyokwe Pitallu wono'no aro kuudokakwono. “Guu kweku kuruv Galilida'ai Jisaseke amwallajulo pwekugono.” Kuudokakwono.

⁷⁰ Toro kuudoka kuvi kuruv Pital yiuwi'nokai a'mwo abolo tonyuro muugona'dopure toru kuunano aro soukuu'nuudokaikono. “Nuu gumoro anyudumodo su tovino kuudo miyouroguma'mwakono.” Soukuu'nuudokaikono.

⁷¹ Toro youkuu'nuujuno sumaiyokwe lukomgu Pital agwapto tovuro noullo toru adaiyajukekono. Toro da'mduke toga sujuraiyo womdokwe puruv Pitallu wono'no a'mwo abolo wobo toru adaiyajupo tonyu aro kuudokakwono. “A'mwo akal Nasaretda'ai Jisasollu kuumjunyajupo tooravuro pwekono.” Kuudokakwono.

⁷² Toro kuudoka tovi Pital aki aiko te aro soukuu'nuudokaikono. “Awiyo, subuu'yamju aro adaikullumwakono. Nuu kwonyumaiyo. Aki a'mwo su toolluno kuudo maiyonyugono.” Soukuu'nuudokaikono.

⁷³ Toro youkuu'nuujuno sumaiyokwe mwaloduke toga kuujo sumdo pwekwo kuuwolo'nokakwono. Toro uuwolo'nyuno sumaiyokwe a'mwo abolo adaiyajupo pun Pitallu aro abuudopogano. “Guu Galilida'ai tooravuro yogaljo dodumdo tookujuno tov Jisasolluro a'mwo tooraida'ai pwol guu kwekugono.” Kuudopogano.

⁷⁴ Toro kuudopo tovi Pital guurejuno aro soukuu'nuudokaikono. “Awiyo, a'mwo adadokwopo su toolluno kuudo maiyonyugono. Gooti toolluro sumdo tovi nuu nebal'no aikudadokwono. Nuu kuunano aikudumi tov kaiya'nodo puruv nokwo nyumo'nononyugono.” Soukuu'nuudokaikono. Pital toro youkuu'nuudoduke kuga'gwo kuuno kuukuuro pwol deko adokaikono.

⁷⁵ Toro adoka toga Pital wuu'nyuno sumaiyokwe Jisasolluro yogalo aro kuudoka tovino aiko te kuudo saurokaikono. “Guu kuukuuro tool deko yere madodowo'jure toga mino pugasalpuga kuunano aro wuudubinekugono. “Awiyo, nuu a'mwo su to kwolluno kuudo maiyonyugono.” Wuudubinekugono.” Pital Jisasolluro yogalo kuudoka su tovino aki aiko te kuudo yau'no sumaiyokwe wuugollu'movo'no kumdato bwotonyo amjodumovlavokaikono.