Matyuu 25 - Gooti Toolluro Yogalokwono

Sujuraiyo atousal tonyuno yovekurajo tovinokwono

¹ “Su toro toga muunyu kai'muuda'ai aguto kig toolluro mido mollomwalo tovi kuulomwallo'mo tov aro to'busuko imo'nonokwono. A'mwo pwol gami abolo tovi mallo'mo toga sujuraiyo atousal pun a'mwo su toollu gami abolo toviyomno mokavlaiyo'mo kwinopogano. Sujuraiyo su ton a'mwo pworogai sumwonyo miyomollodupudogano. Toro ton kemi lamwo togai momwora'no sumaveyokwe a'mwo su toollu wuuru'mallo'mo avlavopogano.

² Sujuraiyo su tonyuda'ai atobuul ton kuudo maiyo sumo'nyajupogano. Toro kuvi kuruv sujuraiyo atobuul puno'gwowi pi'mwo kuudokwe sumo'nyajupogano.

³ Toro te sujuraiyo atobuul kuudo maiyokwe su ton kemi lamwo ton nonebuulopipiyokwe oolip munyupto pugai mamokavlavopogano.

⁴ Toro kuvi kuruv sujuraiyo atobuul pi'mwo kuudokwe puno'gwowi kemi lamwo ton manebuulopipiyokwe oolip munyuptokwe bootool pugai amokavlavopogano.

⁵ Toro ton a'mwo nuumaso'moneyokwe tool yere maboduke tovino tov sa'mo bwotonyo ino sumaveyokwe sa kworopogano.

⁶ Sujuraiyo ton sa wo'dopure su tonyu akuusuduko toga deko puruv aro ajudukuurokakwono. “Kevu doonyuloo, a'mwo nuumaso'moneyokwe tool abadopiyo! Kevu bolokwopi duuru'mallulo.”

⁷ Toro ajudukuuroka tovi yiuwi'nokai sujuraiyo ton dukaino sumaveyokwe kemi lamwo ton widuko nyo'moneyokwe wuulo tovi po'dogalo aidopuurapiyopogano.

⁸ Toro yovo'dogalno sumaveyokwe toga sujuraiyo kuudo maiyokwe atobuul ton sujuraiyo pi'mwo kuudokwe tonyu aro kuudoganopogano. “Oo nemoro lamwo ton nonebuulopiyo'mo sadokwovo. Toro tovino tov kemoro oolip munyupto pun nokwo nekullabupinogaikuldukono?” Kuudoganopogano.

⁹ Toro kuudoganopo kuvi kuruv sujuraiyo pi'mwo kuudokwe ton aro kuudopogano. “Awiyo. Bwotonyago maiyonogano. Nemoro oolip munyupto tov kevuge'aro nev kunogai'aro tonollu ku'nono manekullonekwogano. Toro te kevu mubiyago punyuno plavopi kevnokweyogaikullo'mo oolip munyupto pun neya dobiyomoroulo.” Kuudopogano.

¹⁰ Toro wuujuno sumaveyokwe sujuraiyo kuudo maiyokwe ton oolip munyupto pun biyomallo'moneyokwe avlavopogano. Toro ton kuuno yogalodopure toga a'mwo nuumaso'moneyokwe tool abai'movokaikono. Toro abai'movoka toga a'mwo su tooke'aro yiuwi'nokai sujuraiyo me'no sovrowosunyajupo togai'aro ton kwolabolo yoma'nyo'mo lubullu doto tovi yonomwallo'moneyokwe ago tovino aulapogano. Toro kuulno sumaveyokwe kudo'aiko tov amallukuropokwono.

¹¹ Lukomgu sujuraiyo kuudo maiyokwe atobuul su tobuuro me'no yogalno sumaveyokwe aikomgu abai'movopogano. Toro bai'mo'mno sumaveyokwe kudo'aiko tovi kwa'mgu tomuu davo'mno deko aro aulodopiyapogano. “Agutoloo, Agutoloo, kudo'aiko tovi dousonekumarono.” Aulodopiyapogano.

¹² Toro aulodopiyapo kuvi kuruv a'mwo aguto tool aro abiloduwopiyokaikono. “Oo nebal'no ikudumo'mokwono. Nuu kemino kuudo miyaikuu'mwakono.” Abiloduwopiyokaikono.” Jisasol yovekurajo tov su toro kuudokaikono.

¹³ Toro wuujuno sumaiyokwe aki aro kuudokaikono. “Yovekurajo su to'busuko kubalno moro aikomgu wolabiyo'mo tov burowo'nyo iruko tollugwojudeyo oo burowo'nyo kuujo sumdo tollugwojudeyo toga bai'mo'monyudukoneyokwe tovino kevu kuudo miyau'mwakovo. Toro tovino tov kev kugaikul kuruv wako neya dou'nogaulo.” Kuudokaikono.

A'mwo ki'nato womdokwe pworapwol tooro a'mwo aguto toolluro nuugwiyo amollomwallajupo tovino yovekurajokwono

¹⁴ Aki Jisasol aro kuudokaikono. “Muunyu kai'muuda'ai aguto kig toolluro mido mollomwalo tovi dolago tomuu mujomwekovlaiyo'mo tov aro to'busukokwono. A'mwo pwol manyu tomuuno plaiyo'mo tool kuudo saurokaikono. Oo nuu manyu tomuu mwalodo'mure toga moro kuto ivito tonyu mollomwalmwalpino'moneyokwe a'mwo ki'nato womdokwe toorai neya wimonyugono. Su toro kuudo yau'no sumaiyokwe gami ki'nato womdokwe toorai domaro'no aro sokaikono.

¹⁵ Ki'nato womdokwe pwolno pwolnodo su tooravuro jurogudo tovi wonomaro'no kwiyokaikono. Ki'nato womdokwe pwollu nuugwiyo 5,000 tov kwiyokaikono. Aki ki'nato womdokwe pwollu nuugwiyo 2,000 tov kwiyokaikono. Aki ki'nato womdokwe aiyowo'mo toollu nuugwiyo 1,000 tov kwiyokaikono. Yado me'no uumwodeno sumaiyokwe a'mwo su tool kantri pumuuno avlavokaikono.

¹⁶ Toro avlavoka toga a'mwo nuugwiyo 5,000 amaroka su tool yere plaino sumaiyokwe nuugwiyo amaroka su tokwe mollodolovomato sajukekono. Tono tono ino sumaiyokwe nuugwiyo 5,000 pugai'aro muunyu toru amollu'bworosokaikono.

¹⁷ Aki ki'nato womdokwe 2,000 nuugwiyo amaroka su to kwol kuruv aval'no mollodolovoma'no sumaiyokwe nuugwiyo 2,000 pugai'aro muunyu toru amollu'bworosokaikono.

¹⁸ Toro kuvi kuruv a'mwo ki'nato womdokwe nuugwiyo 1,000 amaroka su toolno'gwowi gami aguto toolluro nuugwiyo su tov malluno sumaiyokwe kwako tovi buuso illusoso'no yiulo apuurosokaikono.

¹⁹ Manyu toga me'no bawino sumaiyokwe ki'nato womdokwe tooravuro a'mwo aguto tool aikomgu abai'movokaikono. Toro bai'mo'mno sumaiyokwe gami nuugwiyo kuubwemovlavoka tonyuno bwo'gado yo'mo tool a'mwo ki'nato womdokwe toorai adomarokaikono.

²⁰ Toro doma'no sumaiyokwe a'mwo ki'nato womdokwe nuugwiyo 5,000 kuubweyoka tool nuugwiyo 5,000 pugai'aro muunyu toru amollu'bworosajuko togai amokabokaikono. Toro mokabino sumaiyokwe aro kuudokaikono. “Agutoloo, doonono. Gumoro nuugwiyo anubwemovlavodo tokwe nuvu mollodolovoma'dumdo toga 5,000 nuugwiyo pugai'aro mollu'bworosodumdonyugono.” Kuudokaikono.

²¹ Toro kuudoka tovi a'mwo aguto tool kuudokaikono. “Oo guu ki'nato womdokwe ilaiyekugono. Moro womdo tovi pi'mwono mollodumdekugono. Toro tooku moro womdo kula'nyo tekwoji pi'mwono yodumdo tovino tov aga'no'gwowi nuvu womdo aguto pugai'aro bwotonyago ton nogubwemonyugono. Toro te guu moro ilaiyo tovi anakuuto tomuu kuulabo'bi nuuge boulomwalogawono.” Kuudokaikono.

²² Aki a'mwo ki'nato womdokwe nuugwiyo 2,000 kuubwemovlavoka su tool gami nuugwiyo 2,000 pugai'aro muunyu toru amollu'bworosajuko togai amokabokaikono. Toro mokabino sumaiyokwe aro kuudokaikono. “Agutoloo, gumoro nuugwiyo anubwemovlavodo tokwe nuvu mollodolovoma'dum 2,000 pugai'aro muunyu toru me'no mollu'bworosodumdonyugono.” Kuudokaikono.

²³ Toro kuudoka toollu a'mwo aguto tool kuudokaikono. “Ilaiyokwono. Guu moro womdokwe ilaiyekugono. Toro tooku moro womdo kula'nyo tovi pi'mwono yodumdo tovino tov aga'no'gwowi nuu womdo aguto bwotonyago pugai'aro ton nogubwemonyugono. Toro te guu moro ilaiyo tovi anakuuto tomuu kuulabo'bi nuuge boulomwalogawono.” Kuudokaikono.

²⁴ Aki a'mwo ki'nato womdokwe nuugwiyo 1,000 kuubwemovlavoka su tool bino sumaiyokwe aro kuudokaikono. “Agutoloo, nuvu gumino aro kuudo me'no yaguu'dumdonyugono. Mi aguto tool womdo guureji mujumovlaiyo'moneyokwe dumuurolo'mdowodoldeyo. Aki toro tool womdo pun gavnokwe tool miyoburaudodowodo tonyuda'ai wosamujuko tov muloma'dowodoldeyo. Aki womdo pun gavnokwe tool ikulwiyo mavlollosodowodo tonyuda'ai muloma'dowodoldeyo.

²⁵ Gumino su toro kuudo me'no youroguma'dumdo toonyu gumoro nuugwiyo anubwemovlavodo tov yasuwa'no nomollounapimiyokwe tovino luko sonyugono. Toro toonyu gumoro nuugwiyo su tov kwako tovi yiulo apuurosonyugono. Toro te gumi nuugwiyo anubwemovlavodo su tov aga guu aiko te nokwo domarono.” Kuudokaikono.

²⁶ Toro kuudoka kuvi kuruv a'mwo aguto tool aro kuudokaikono. “Guu ki'nato womdokwe kaiya'nodekugono. Aki toro tooku womdo yo'mo tovino burawekugono. Guu mino tov aro me'no yanuu'dumdekugono. Oo mi aguto tool womdo pun gavnokwe tool maburaudodowodo tonyuda'ai wosamujuko muloma'dowodoldeyo. Aki womdo pun gavnokwe tool ikulwiyo mavlollosodowodo tonyuda'ai muloma'dowodoldeyo. Su toro kuudo me'no youronuma'dumdekugono.

²⁷ Toro tooku moro nuugwiyo agujabo tov benk tovi buro'nyo'mo mamorosodumdekudeyo? Guu benk tovi kwoso'bujuko'mno'juki nuvu nuugwiyo pugai'aro nokwo amaro'mujukonyugono.” Kuudokaikono.

²⁸ Toro wuujuno sumaiyokwe a'mwo aguto su tool gami a'mwo womdokwe pworai aro aduuwiyokaikono. “Kevu a'mwo ki'nato womdokwe su toolluro nuugwiyo tov domodukwopilo. Yopi nuugwiyo su tov a'mwo ki'nato womdokwe pwol 10,000 nuugwiyo amworasuko su toollu duuwiyulo.” Aduuwiyokaikono.

²⁹ Toro duuwino sumaiyokwe aro kuudokaikono. “A'mwo pwol moro yogalo tovuro kavlo tovino kuudo souromaro'ji tov Gooti tool a'mwo su toollu kuudo purukwe'aro nuuwiyonekono. Aki kuudo kwiyo'ji su tovi muunyu toru bwotonyago nyulloullubweyonekono. Toro kuvi kuruv a'mwo pwol moro yogalo tovi muu'nyubusuko yowo'ji kavlo tovino kuudo miyouromaro'ji toolluno'gwowi gamoro kuudo pwekwono uubweyodowo'jure su tobuurai Gooti tool nomodukwopiyonekono.

³⁰ Toro te aga kevu a'mwo ki'nato womdokwe su toollu kwa'mgu dugumwuulo tomuuno bilomodukwopilo. Dugumwuulo su tomuu danyu'nyuwuulo bwotonyo ibwosunopi kumdato mujode'movla'mdupudomuugono. Aki kemi mago ton duguropiyopi tuko to'no do'nugovla'mdupudomuugono.” Kuudokaikono.”

A'mwo Kwolaiyo Kuunodo tool aiyowo'mo toga a'mwo abolo tonyu momuudeyapiyono tovinokwono

³¹ “Nuu A'mwo Kwolaiyo Kuunodo toonyu moro jurogudo kuunodo tokwe aikomgu kwolami toga ensel toorogai mokwolamonyugono. Su toro amokwolami toga moro sia kig sugumaluko toru nyulomwalmonyugono.

³² Toro toonyu noolabodo'mure toga yiuwi'nokai kantri tonyuda'ai a'mwo abolo ton i'bwo'nopi moro sumdollu toru nobodapinogano. Toro boda'mdopure tonyu a'mwo sipsip moduvomwallokwe tool sipsip toorogai'aro meme toorogai'aro toorai go'no go'no momuudeyapiyodowodo to'busuko kubalno nuu a'mwo abolo abodapi su tonyu gomno gomno nomomuudeyapimonyugono.

³³ A'mwo abolo sipsip tobuurobusuko imo'nodupudo tonyu anato tomgu momuudeyomwallumogano. Aki a'mwo abolo meme toorobusuko imo'nodupudo su tonyuno'gwowi kwonamo tomgu momuudeyapimogano.

³⁴ Su toro toga aguto kig toonyu a'mwo abolo anato tomgu amwalpi tonyu aro wuudumonyugono. “Oo moro Nyunumiyago toolluro sugudo pun ikubweyodowodogaikikono. Toro togaikul aguto kig mido mollomwalo tovida'ai sugudo ton kuvinono mapino'moneyokwe dobiloo.” Wuudumonyugono. Sugudo mapino su ton aiyoga kwako akavi muudu'no sokwollosoka togada'ai kemiyo'mo me'no sovrovaikubweyokagano.

³⁵ Su toro tonyu kevu mapino tov aro tovinokwono. Nuvu mujuko yodore toga kevu wosamujuko anyabiyajupogaikikono. Aki nuvu kuuleyaluko nyunoduke toga kevu wonyo anyabiyajupogaikikono. Aki nuvu bomwallo imo'nodore toga kemoro ago tonyu kuulomwallo'moneyokwe ilaiyo amollonumallajupogaikikono.

³⁶ Aki nuvu youro nonaguto imo'nodore toga kevu youro anyabiyajupogaikikono. Aki nuvu nobollo yodore toga kevu amollonumwallajupogaikikono. Aki nuvu wuulo killo'mo ago tovi kuulomeranubweyodopure toga kevu iru'mato anyajupogaikikono.

³⁷ Su toro toga a'mwo abolo idopto'nodo ton aro dupinogano. “Agutoloo, guu mujuko bolodore tookuji nevu wosamujuko tov adoga agujabowekudeyo? Oo guu wonyo'mo kuuleyaluko yodore tookuji wonyo tov adoga agujabowekudeyo?

³⁸ Oo aki guu pumuuda'ai bomwalodore tookuji nemoro ago tonyu kuulomwallo'moneyokwe tov adoga ilaiyo amollogumarowekudeyo? Oo aki guu youro nonaguto imo'nodore tookuji nevu youro tov adoga agujabowekudeyo?

³⁹ Aki guu nobollo yodore tookujudeyo oo wuulo killo'mo ago tovi kuule'na'dore tookujudeyo nevu iru'mato tov adoga agujowekudeyo?” Nyudupinogano.

⁴⁰ Toro anyudupi tonyu nuu aguto Kig toonyu aro wuudumonyugono. “Nuu nebal'no ikudumo'mokwono. A'mwo abolo yovomaiyokwe pubuuro moro nyo'mwodeyo oo nyugwai'yagorovodeyo tonbusuko nyumo'nodupudo su tobuurai mollodupudo tov nuu kwonyuda'ai yanyugolodupudogaikikono.” Su toro wuudumonyugono.

⁴¹ Toro wuudo'mi toga aguto Kig toonyu a'mwo abolo kwonamo tomgu mwalodopure tonyu morouno'mi aro wuudumonyugono. “Oo kevu nerekumwallo'moneyokweyogaikikono. Toro togaikul du'muudo maduuwiyopiyodowodo tomuuno dovlaiyulo. Su tomuu Satanyeke'aro gamoro kuullo ma'no ma'nodo toorogai'aro tooraiyo'mo me'no sovroubwengikokwono.

⁴² Nuu mujuko bolodore toonyu kevu wosamujuko manyabiyajupogaikikono. Aki kuuleyaluko nyunoduke toonyu wonyo manyabiyajupogaikikono.

⁴³ Aki nuvu pumuuda'ai bomwalodore toonyu kemoro ago tovi kuulomwallo'moneyokwe ilaiyo mamollonumallajupogaikikono. Aki youro nonaguto imo'nodore toonyu kevu youro pun manyabiyajupogaikikono. Aki nuvu nobollo yodoreyo'mdeyo oo wuulo killo'mo ago tovi kuule'na'doreyo'mdeyo toga kevu iru'mato manyajupogaikikono.” Wuudumonyugono.

⁴⁴ Su toro kuudumi toga aro nyudupinogano. “Agutoloo, guu mujuko'mo'mdeyo, oo kuuleyaluko'mo'mdeyo, oo bomwallo'mdeyo, oo youro nonaguto'mdeyo, oo nobollo'mdeyo, oo wuulo killo'mo ago tovi kuule'na'doreyo'mdeyo tookuji gujo'mwojo'moneyokwe nevu maguuwonyajuuwo tov burowo'nyo toga'deyo?” Nyudupinogano.

⁴⁵ Su toro anyudupi tonyu aguto kig toonyu aro wuudumonyugono. “Nuu nebal'no ikudumo'mokwono. A'mwo abolo yovomaiyokwe tobuurai kevu mwiyo'mwojajupo tov nuu kwonyuda'ai manyo'mwojajupogaikikono.” Wuudumonyugono.

⁴⁶ Toro wuudo'mi a'mwo abolo su tonyu yiunokuudo kirumwallo'moneyokwe tomuuno wuugollu'mokavlapinogano. Toro kuvi kuruv a'mwo abolo idopto'nodo tono'gwowi aiyo yiunokuudo mujomwekovlaiyo'moneyokwe toru'no plapinogano.”