Matyuu 24 - Gooti Toolluro Yogalokwono

Jeruusalemda'ai Gooti toollu ilomoropiyo'moneyokwe ago tovi nomouropipino tovinokwono

¹ Toruda'ai Jisasol Gooti toollu ilomoropiyo'moneyokwe ago tovuro agwapto towaida'ai wuugollu'mo'mno sumaiyokwe avlavokaikono. Toro pla'mduke toga gamoro uumjunyokwe tooro kuuru'maroporogano. Toro tooro Jeruusalemda'ai Gooti toollu ilomoropiyo'moneyokwe ago su tovuro sugumaluko judo'no judo'no amodumellungiko tonyuno Jisasollu kuuduuwalloporogano.

² Toro kuuduuwallopo toorai Jisasol aro kuudokaikono. “Nebal'no ikudumo'mokwono. Ilomoropiyo'moneyokwe ago su tovuro sugumaluko amodumellungiko kwonmwakopo su tonyu puga a'mwo pumuuda'ai tooro bopi yiuwi'nokai kwonmwakopo su tonyu nomourodukwopipinokwono. Yiuwi'nokai sulo bwaku bwakuto amjomodumellungiko kunyu kuruv mourodukwopiyopi yiuno pwolnodo kwol kuruv mworonokwono.” Kuudokaikono.

Tabunyuwuulo bwotonyo pun nobai'mopino tovinokwono

³ Toruda'ai lukomgu Jisasol Muumuudo Oolip toollomno ilno sumaiyokwe amwalokaikono. Toro mwalno sumaiyokwe toga gamoro uumjunyokwe judo tooro bino sumaveyokwe Jisasollu yamuugojo aro abuudoganoporogano. “Guu donekudono. Gumoro yiuwi'nokai anekudumado su ton adoga kuunodo bai'mopinodeyo? Aki burowo'nyo duuwallo jurogudo tovi wonowa'ji kuudo yauranonoldeyo? Oo aga gumoro aikomgu wolabiyo'mo toga'deyo. Aki aga aiyowo'mo kuunodo tov dobai'mo'mwallo. Su toro tonyuno kuudo youromallo'mo tov burowo'nyo duuwallo jurogudo tovi wonanonoldeyo?” Kuudoganoporogano.

⁴ Toro kuudoganopo toorai Jisasol aro kuudokaikono. “A'mwo pwol kuunano nobiyoukuu'naikudo'jokwe kevu wako neya dou'nogaulo.

⁵ Lukomgu a'mwo kuunano youkuu'najokwe bwotonyago tooro nobupinorogano. Toro tooravuro pwol bowo'ji moro yovo tokwe yowa'nowo'ji aro donekono. Nuu Krais toonyugono. Aki pwol puga bowo'ji aval'no biyoukuu'naikudonekono. Bwotonyago tooro tono tono biyou'kuu'naikudupinorogano.

⁶ Aki puga molo bomjumoulodopure tovino wuu'nupinokwono. Aki molo tovino puu'yogalo bomjodumoulodopure toorai nuu'nupinokwono. Su toro kuu'nupi toga kevu luko mipinono. Su toro tov neya bai'mowonokwono. Toro abai'mowo'ji kuvi kuruv su toro toga aiyowo'mo'maiyo.

⁷ Su toro toga a'mwo kwako pumuuda'ai pworo kwako pumuuda'ai pworogai molo inpinorogano. Aki a'mwo aguto kig pworavuro kantri pun a'mwo aguto kig gabovo tooravuro kantri togai molo inpinorogano. Su toro yodopure toga aki wunyu wunyu pun ago go'no go'nodo tomuu nobai'mopinogano. Aki pumuu muju'wuulo ton nobai'mopinogano.

⁸ Yiuwi'nokai tabunyuwuulo su ton muudu'nodogano. Su toro tovino yovekurajo puruv arokwono. Yiuwi'nokai tabunyuwuulo abai'mopi su ton abolo puruv kwolaiyo sumwolukokwe tov tuko muudu'no doudopiyabodowodo to'busuko kubalno yiuwi'nokai tabunyuwuulo su ton muudu'no bai'mopinogano.

⁹ Su toro toga a'mwo pworo kevu mino kuudo nubweyodopure tobuurekullu galekumworaropi kaiyako yaikullugolopi yiuno'no romiyaikubwepinorogano. Aki kevu mi numjunodupudo tobuurekulluno tov yiuwi'nokai kwako akavida'ai aiyowomno mwalodupudo ton kemino surodo wuunpinogano.

¹⁰ Aki su toro toga mi numjunodupudo bwotonyago tooro mi buulo nonyugunyumopipinorogano. Toro nonyugunyumopiyopi kevnokwe tooro imgu amgu surodo kuullunopi kemi ikomago tooravuro ato tonyu nomorubwenupinorogano.

¹¹ Aki kuunano proofet bwotonyago pworo nobillalo'nupinorogano. Yopi a'mwo abolo bwotonyago tonyu kuunano youkuu'nuudupinorogano.

¹² Aki yiuwi'nokai kwako tomuu a'mwo abolo bwotonyago ton ma'no ma'no bwotonyo kiroungovlapinogano. Su toro toga a'mwo abolo bwotonyago tonyuro kalo buuropino winyo'moneyokwe pasudo tov lukuuto bolonokwono.

¹³ Toro kuvi kuruv a'mwo pwol mi buulo manyugunyumopiyo'mo tool guureji numjunyuno numjunyuno yowo'ji yiuno abolo'ji toga'no so'ji su toollu lukomgu Gooti tool aiyo yiunokuudo mujomwekovlaiyo'moneyokwe tov nuuwiyo'mwojonekono.

¹⁴ Aki aguto kig Gooti toolluro mido mollomwalo tovi dolago tomuu kuulomwallo'moneyokwe tovino kuuguudo sugudo tov yiuwi'nokai kwako akavi aiyowomno nomodomollumwalpinokwono. Toro modomollodopure tovi yiuwi'nokai kantri tonyuda'ai a'mwo abolo ton nuu'nupinokwono. Me'no wuu'nopiyopi aiyowo'mo kuunodo toga bai'mowonokwono.” Jisasol toro kuudokaikono.

Kirovanyuvanyu kuumwiyo pwol nyumo'nono tovinokwono

¹⁵ To'no'gwowi Jisasol aro kuudokaikono. “Kuuguudo akavi amojagilo'ji tool kavlo tovino neya youromaronekono. Kuuguudo tov arokwono. A'mwo kirovanyuvanyu kuumwiyo pwol Gooti toollu ilomoropiyo'moneyokwe ago tovida'ai pwekwapto toru kuulodawonekono. Toro kuuloda'mdowo'jure toollu kevu noonpinekono. Toro toolluno Gooti tool surodo wuunodowodekono. Aki toro toolluno aiyoga proofet Danyelol puukwollo puruv me'no ajakwollokaikono. Kirovanyuvanyu kuumwiyo su toolluno kuuguudo akavi a'mwo pweku amojagilbi tov duudapi yogalo su tonyu kaduko neya ibinekugono.

¹⁶ Kirovanyuvanyu kuumwiyo su tool kuuloda'mdowo'jure toollu kwonpi toga yiuwi'nokai Juudiyada'ai mwalodupudo ton muumuudo tooraiyomno lukado neya avlapuro.

¹⁷ Aki a'mwo pwol ago puvi muunyu tomuu aluulowosungiko towai sulomwalodo'ji tool kirovanyuvanyu kuumwiyo su toolluno kuu'no'ji toga aki aiko te wolabowo'ji ago tovi gami kuto ivito ton kuullomallo'mo kuudo nyauro'jo. Toro kwol kuruv yiuno lukado to'no neya avlawono.

¹⁸ Aki a'mwo pwol gami wosamju'womdo tomuu amwalodo'ji tool kirovanyuvanyu kuumwiyo su toolluno kuu'no'ji toga gami nobwaiyo tov mallo'mo aikomgu nyagunyumo'no'jo. Yiuno lukado to'no neya avlawono.

¹⁹ Aki su toro toga abolo sumwolukokweyodeyo oo abolo ton kwoloraiyo amdo manarukuu'nyokweyodeyo tobuuro lukado plaiyo'mo tov tabunyu kuunodo wimo'nupinobuurogano.

²⁰ Toro te lukado tov modoga toga'deyo oo iruko Sabat toga'deyo toga novlapiyokwe tovino Gooti toollu subusu'nyogalo neya duudogaulo.

²¹ Toro te kirovanyuvanyu kuumwiyo su tool abai'mowo'ji toga tabunyuwuulo bwotonyo tov nyumo'nonokwono. Aiyoga kwako akav muudu'no sumo'noka togada'ai yiuno aga'no tabunyuwuulo su to'busuko puruv mimo'nodowodokwono. Aki lukomgu kuga kuruv tabunyuwuulo su to'busuko puruv mimo'nonokwono.

²² Su toro imo'nono tonyuno Gooti tool aro kuudo me'no saurokaikono. Yiuwi'nokai kwako akavida'ai a'mwo abolo ton yiunokuudo nyemnopipiyo. Aki moro a'mwo abolo me'no ajesungiko ton nobolopipiyo. Toro tovino tov tabunyuwuulo su tovuro iruko tobuullu nuvu pubuul nomodovomokwolamonyugono. Kuudo saurokaikono. Su toro kuudo sauroka tovino tov tabunyuwuulo abai'mowo'ji tovuro iruko tobuullu Gooti tool pubuul nomodovomokwolabwonekono.

²³ Su toro toga a'mwo pwol aro aikudo'ji tov, “Doonyuloo, a'mwo akal Krais tookono,” su toro aikudo'ji tovi kevu kuudo muubwepinono. Aki a'mwo pwol aro aikudo'ji tov, “Krais tool akaigwol abwolomwallo,” su toro aikudo'ji tovi kevu kuudo muubwepinono.

²⁴ Su tov aro tovinokwono. A'mwo kuunano yogalo youkuu'najokwe pworo bopi ikudupinorogano. “Nuu Krais toonyugono.” Aki pworo ikudupinorogano. “Nuu proofet toonyugono.” Toro tooro kemi kaiya'nodo tomuuno mollubworomokavlaiyo'mo tooro duuwallo jurogudo pun ikuduuwallupinorogano. Aki Gooti toolluro a'mwo abolo me'no ajesungiko kunyu ki'nomallo'mo puuto puruv kurukweyo'mno'juki nokwo ki'nomapinorogano. Toro kworo kuruv ku'nono mai'nomapinorogano.

²⁵ Neya duu'nyulo. Yiuwi'nokai nyumo'nono su ton yere mimo'nyodopure kunyuno kuruv nuu duudapi me'no aikullumonyugono. Toro tovino tov kevu wako neya dou'nogaulo.

²⁶ Toro te a'mwo pworo kemi aro abaikudupi tov, “Oo Gooti toolluro ajesoka Krais tool kwako a'mwomaiyo yalukullo tomuu amwalluko toollu neya doonyogaloulo.” Su toro aikudupi kuvi kuruv kevu ku'nono mavlapinono. Aki pworo aro aikudupi tov, “Oo Gooti toolluro ajesoka Krais tool ago akavi anakuuto tomuu yiulo aulopuu'nasuko toollu kevu sumdo douloonyulo,” su toro aikudupi kuvi kuruv kevu, Oo nebalo'mdeyo, kuudo muubwepinono.

²⁷ Su tov aro tovinokwono. A'mwo Kwolaiyo Kuunodo toonyu aikomgu kwolami toga molamopto tov mdolopiyodowodo to'busuko imo'nonokwono. Su tov kuujo sulopiyamoka is tomguda'ai yiuno kuujo tool kwolmoka wes tomguno to'no molamopto tov mdolopiyodowodo to'busuko kubalno aval'no nyumo'nonokwono.

²⁸ Aki aiyowo'mo toga'no yovekurajo akavi duu'nyulo. Bwajo pworo ibesa'aiyo me'no abollungopo toorai wobo tomuuno to'no i'bwo'nomollodupudorogano. Yovekurajo su to'busuko imo'nodowo'jure tovi kevu kuu'maiyo toru noonpinorekikono” Kuudokaikono.

A'mwo Kwolaiyo Kuunodo toolluro lukomgu wolabwono tovinokwono

²⁹ Toruda'ai aki Jisasol aro kuudokaikono. “Tabunyuwuulo su ton me'no abawo'ji kuga'gwo kuuno kuujo tool dugumdo kimwonyopiyowo'ji lobako tool mawonekono. Aki muunyu kai'muuda'ai sullugabwo ton nobwolomwekuupinogano. Aki muunyu kai'muuda'ai jurogudokwe kwokopo kun kuruv yaudo yaudo nyunuuguupinogano.

³⁰ Su toro toga sulugumdo muunyu akai'muu duuwallo aro tovi wonpinogano. A'mwo Kwolaiyo Kuunodo toonyu moro jurogudo kuunodo tokwe'aro bako bwotonyo tokwe'aro sulu'wo tovi wolabodo'mure toga nonuwonpinonyugono. Duuwallo su tovi kwonpi toga yiuwi'nokai kwako akavida'ai yovodolobunyo ton kumdaillo mujumoulapinogano.

³¹ Nuu su toro wolabodo'mure toga moro yiuwi'nokai a'mwo abolo ajesungiko tonyu bomollu'bwollo'mo tov moro ensel toorai biugel tovuro deko bwotonyo tokwe morapimonyugono. Su toro amorapimi toga moro a'mwo abolo ajesungiko ton yiuwi'nokai kwako tokwe sulugumdo tokwe tovalluro aiyowo'mo do'gwapiyo tovida'ai yiuno aiyowo'mo do'gwapiyo tomuuno amjomwekwingopo su tonyu miyomno bomollu'bwo'mogano.” Jisasol toro kuudokaikono.

Jisasol iko fik pwolluno yovekurajo adoka tovinokwono

³² Toruda'ai aki Jisasol aro kuudokaikono. “Kevu tabunyuwuulo su ton nobai'mowono'mo toga'deyo kuudo youromallo'mo tov yovekurajo aka'busuko imo'nodowo'jure tovi noonpinogaikikono. Toro tovino duu'nyulo. Kevu iko fik toollu kwonpi toga gamoro pilo ton muudorolluko worowo'ji kuuwopto ton inowiyoku'bworosonekono. Toro so'ji toga kuudo yaupinokwono. Oo aga kuujo atamdo tov nobai'mowono'mo wobo toga'deyo.

³³ Yovekurajo su to'busuko kubalno moro nyumo'nupino aikudumo su ton kuvinono bai'mo'mdopure tonyu kwonpi toga kuudo youromapinogaikikono. Oo A'mwo Kwolaiyo Kuunodo tool nobai'mowono'mo wobo toga'deyo. Kuudo youromapinogaikikono.”

³⁴ Jisasol toro wuujuno sumaiyokwe aki aro kuudokaikono. “Nebal'no ikudumo'mokwono. Su toro togasuro a'mwo tooro yiunokuudo miyemnopiyodopure toga yiuwi'nokai aikudumo su ton kuvinono nobai'mopinogano.

³⁵ Sulugumdo tokwe'aro kwako tokwe'aro toval nyovla'bullunovakono. Toro kuvi kuruv moro yogalo tono'gwowi yiunokuudo mujo'movla'mwalpinogano.” Jisasol toro kuudokaikono.

A'mwo Kwolaiyo Kuunodo toolluro aikomgu bwono toga'no a'mwo pwolnodo kwol kuruv kuudo miyau'dowodo tovinokwono

³⁶ “Moro yiuwi'nokai aikudumo su ton burowo'nyo irukollugwojudeyo oo burowo'nyo kuujo sumdollugwojudeyo toga bai'mowono'mdukoneyokwe tovino a'mwo pwolnodo kwol kuruv kuudo miyau'mwallo. Aki muunyu kai'muuda'ai ensel kworo kuruv kuudo miyau'mwakovo. Aki Gooti toolluro Kwolaiyo Kuunodo kwonyu kuruv kuudo miyau'mwakono. Yiuno mi Nyunumiyago judo toolno kuudo sau'mwallo.

³⁷ Toro te nuu A'mwo Kwolaiyo Kuunodo toonyu aikomgu kwolami tov aiyoga Noowalluro toga'busuko imo'nonokwono.

³⁸ Noowalluro toga buuru'allako bwotonyo tov yere mabai'mo'mduke toga a'mwo abolo ton lubullu doto yanodupu, wain wonyo nodupu, kwolabolo yoma'nodupu abomjumoullajupogano. Aki Noowal sip toollu kuullo'mo yoduke kuga kuruv a'mwo abolo ton kuuno abomjumoullajupogano.

³⁹ Toro ton buuru'allako tov yere mabai'mo'mduke toga, Oo lukomgu toro tov bai'mowono'mdeyo, tovino kuudo miyouromallajupogano. Toro kun kuruv yiuno buuru'allako tov bai'movo'no a'mwo abolo su tonyu me'no amobwokuruvolloka toga'no kuudo souromaropogano. Su toro to'busuko kubalno nuu A'mwo Kwolaiyo Kuunodo toonyu aikomgu kwolami toga a'mwo abolo tonyu aval'no wimo'nonokwono.

⁴⁰ Su toro toga a'mwo pworal kemi wosamuju'womdo anakuuto tomuu womdo yodo'bule toga Gooti tool pwollu molluduvolowo'ji pwollu nomokailawonekono.

⁴¹ Aki abolo puruval wit no tonyu mwimuullodo'bule toga Gooti tool puruvi molluduvolowo'ji puruvi nomokailawonekono.

⁴² Su toro to'busuko kubalno nuu kemi Aguto toonyuro aikomgu biyo'mo iruko tollugwojuno kevu kuudo miyau'mwakovo. Toro togaikul wako neya dou'nogaulo.

⁴³ Neya duu'nyulo. Ago puvi jukwo pwol aro kuudo miyaullajukekono. Oo surakuuto su toga kuuko tool nobowo'dalonoldeyo, kuudo miyaullajukekono. Jukwo su tool toro kuudo saurowo'jujuko'mno'juki sa mworowo'jujukekono. Aki gami ago tovi duuwarowo'ji kuuko toollu nokwo kuumjukurowo'jujukekono.

⁴⁴ Su toro to'busuko kubalno kevu kworekul kuruv yiuwi'nokai toga neya jovrovomwalnogaulo. Su tov aro tovinokwono. Kevu A'mwo Kwolaiyo Kuunodo toonyuno sogwollo mainodopure toga aikomgu nomonyugono.”

A'mwo ki'nato womdokwe sugudo tooke'aro a'mwo ki'nato womdokwe kaiya'nodo tooke'aro tooralluno yovekurajokwono

⁴⁵ Aki Jisasol aro kuudokaikono. “A'mwo aguto pwol gami a'mwo ki'nato womdokwe pwolluno aro kuudo yauronekono. Oo moro ki'nato womdokwe akal mi pi'mwono numjunodowo aki pi'mwo kuudokweyoldeyo. Su toro kuudo sauro'ji toollu a'mwo aguto tool gamoro womdo muuduko aro tov uubweyonekono. Yiuwi'nokai a'mwo abolo ki'nato womdokwe pun gamoro ago tovi anakuuto tomuu womdo kuullodupudo su tonyu mido mollomwallo'moneyokwe womdo tov wiyonekono. Aki wosamujuko togai yado uumwodeyo'moneyokwe womdo tov wiyonekono. A'mwo aguto tool womdo su toro tovallu gami ki'nato womdokwe toollu uubweyowo'ji ago pumuuno yagwoto yogallo'moneyokwe plawonekono.

⁴⁶ A'mwo aguto su tool yagwoto me'no yogalawo'ji toga aro abwono'ji tov, gamoro ki'nato womdokwe su tekwo womdo ilaiyo to'no yodowodoldeyo, ado'ji tov a'mwo ki'nato womdokwe tekwo ilaiyo nokwo yonekono.

⁴⁷ Su toro tovino nuu nebal'no ikudumo'mokwono. A'mwo aguto tool gamoro yiuwi'nokai kuto ivito tonyu mido mollomwalmwalono'moneyokwe womdo tov a'mwo ki'nato womdokwe su tekwoji nuubweyonekono.

⁴⁸ Toro kuvi kuruv a'mwo ki'nato womdokwe kirovanyuvanyu pwolno'gwowi gavnokweyolluno aro yajunonekono, Oo moro aguto tool aikomgu yere mabwonekono.

⁴⁹ Su toro yajunowo'ji gami dolago tomuuda'ai a'mwo abolo ki'nato womdokwe su tobuurai iwago romiyowo'ji kaiyako igolmwalonekono. Aki a'mwo pworo wain wonyo bwotonyo nopi amomo yodopure toorai uuguro'mwonyowo'ji wosamujuko togai'aro wain wonyo togai'aro mujonomwekovla'mwalonekono.

⁵⁰ Toro te ki'nato womdokwe tekwo iruko pullugwoji kuudo miyaurowo'ji sogwollo mainodowo'jure toga a'mwo aguto tool aikomgu nobai'mowonekono.

⁵¹ Su toro abai'mowo'ji toga aguto tool a'mwo ki'nato womdokwe kirovanyuvanyu su toollu yiunokuudo nodowapiyonekono. Aki a'mwo kuunanokwe toorogai tomuu kirumwallo'mo morapiyonekono. Su tomuu danyu'nyuwuulo bwotonyo ibwosunopi kumdato mujode'movla'mwalpinomuugono. Aki kemoro mago ton duguropiyopi tuko to'no do'nugovla'mwalpinomuugono.” Jisasol toro kuudokaikono.