Matyuu 23 - Gooti Toolluro Yogalokwono

Farasi toorogai'aro loowo tovino pi'mwo kuudokwe toorogai'aro tooravuro kaiya'no pasudo tovinokwono

¹ Toruda'ai Jisasol a'mwo abolo kwolallo togai'aro gami uumjunyokwe toorogai'aro tonyu aro kuudokaikono.

² “Aiyoga Moosesol Gooti toolluro loowo tokwe sodubwasajuko to'busuko kubalno aga kemoro a'mwo loowo tovino pi'mwo kuudokwe toorogai'aro Farasi toorogai'aro tooro Gooti toolluro loowo tokwe kemi aval'no yodekubwasodupudorogano.

³ Toro te kevu a'mwo su tooravuro yekubwasodupure tovi nokwo imwalpinogaikikono. Aki su to kuvi nokwo uumjunmwalpinogaikikono. Toro kuvi kuruv a'mwo su tooravuro pasudo tonyuno'gwowi kevu nuumjunmwalpiyo. Su tov aro tovinokwono. A'mwo su tooro loowo tonyuno yodubwasodupudo kuvi kuruv kevnokwe toorono'gwowi yogalo su tonyu muumjunodupudorogano.

⁴ A'mwo su tooro kevnokweravuro loowo bwotonyago togai kemi jul'nyo bwotonyo to'busuko mollukwo'mwalpino'moneyokwe ikubweyodupudorogano. Toro kuvi kuruv kevu jul'nyo bwotonyo su tovi mollukwo'mdopure tobuurekullu ikullo'mwojo'moneyokwe to'gwowi a'mwo su tooro kevnokweravuro pollo puru'monodo kuruv maikubweyodupudorogano.

⁵ Aki a'mwo su tooro aro kuudo yau'dupudogano. Oo nemoro pasudo yodowa'jure akavi a'mwo abolo pun neya anekwonpuro. Su toro kuudo yau'dupudo tooravuro yiuwi'nokai pasudo ton a'mwo abolo punyu wuuduuwallo'mo to'no yodupudorogano. Aki ilaiyo amollonekumapureyokweyo'mo tooro bookis muugu'mullo pun Gooti toolluro yogalo tokwe sokwollurosungiko ton maropi kemi atodeyo oo yomodeyo tonyu pweyo moweyosodupudorogano. Aki kemoro youro kumi'yago tousavuro do'gwapiyo tomgu sullo kumi'yagokwe tousogai mollosodupudorogano.

⁶ Aki toro tooro lubullu doto yanodupudo toru aulapi toga yiuwi'nokai a'mwo abolo ton anekwonpureyokweyo'mo noluuleyo sumdolluda'ai tonyu kuulomwallo'mo to'no winyokwerogano. Aki Juu tooravuro i'bwo'nyago tonyu aulapi toga a'mwo abolo ton anekwonpureyokweyo'mo yiuno sumdollu toru'no kuulomwallo'mo winyokwerogano.

⁷ Aki maket tomuu yomollodupudo toga a'mwo abolo pun kwako tomuu'aro nekullopi aro adomollupureyokwe winyokwerogano. Oo ibwasokweyoloo, su toro amodonekumollupureyokwe tovino ilaiyo winyokwerogano.

⁸ Toro kuvi kuruv kemino'gwowi a'mwo abolo ton, Ibwasokweyoloo, maikudupinono. Su tov aro tovinokwono. Yiuno pwolnodo toolno kemi ibwasokwe ikullumo'nodowodekono. Toro te kevu yiuwi'nokai toorekul yiuno avalo todorotekulbusuko imo'nodupudorekikono.

⁹ Aki kevu kwako akavida'ai pworaino yovo aguto wiyo'moneyokwe, nellunumiyagoloo, nuudumwalpiyo. Kuudo neya jaullulo. Yiuno muunyu kai'muuda'ai Gooti pwolnodo toolno kemi Tellunumiyago ikullumo'nodowodekono.

¹⁰ Aki kemino a'mwo abolo ton, mido mollonekumwallokweyoravoo, nekudumwalpiyo. Su tov aro tovinokwono. Yiuno Gooti toolluro wiyo'mwojo'moneyokwe ajesoka Krais judo su toolno kemi mido mollekumwallo'mo ikullumo'nodowodekono.

¹¹ Toro te kemida'ai pworo yovo aguto imo'nodupudo su toorekul a'mwo abolo punyuro womdokwe neya imo'numwalpinorekikono.

¹² Toro kuvi kuruv yiuwi'nokai a'mwo kevnokwe tooro ilomoropunyu sapi su toorai Gooti tool kwako tomuu'aro nomorumwogapiyonorogano. Aki yiuwi'nokai a'mwo kevnokwe tekwojo kwako tomuu'aro sunpi su tooraino'gwowi Gooti tool muunyu toru'aro nyulomoropiyawonorogano.”

A'mwo loowo tovino pi'mwo kuudokwe toorogai'aro Farasi toorogai'aro tooravuro kaiya'no pasudo tonyunokwono

^13-14 Aki Jisasol aro kuudokaikono. “Oo kevu a'mwo loowo tovino pi'mwo kuudokwe toorekike'aro Farasi toorekike'aro kuunanokwe su tekwojekul tabunyu nomapinorekikono. Su tov aro tovinokwono. A'mwo abolo pun muunyu kai'muuda'ai aguto kig mido mollomwalo tovi kuullo'mo yodopure toga kevu a'mwo abolo su tobuurai kudo'aiko yere wuulluku'dupudorekikono. Aki kevnokwe tekwojekul muunyu kai'muuda'ai aguto kig mido mollomwalo su tovi maulomwalodupudorekikono. Toro maulomwalodupudo kworekul kuruv a'mwo abolo noullo'mo winodopure tonyu uumjuku'dupudorekikono.

¹⁵ Oo kevu a'mwo loowo tovino pi'mwo kuudokwe toorekike'aro Farasi toorekike'aro kuunanokwe su tekwojekul tabunyu nomapinorekikono. Su tov aro tovinokwono. Kevu yiuwi'nokai kwako tokwe'aro soolwara tokwe'aro tovallu manyu tomuu yomollodupudorekikono. Toro toorekul a'mwo yiuno pwolnodo kwollu kuruv kemi ikumjunyo'moneyokwe duuguunyumwojodupudorekikono. Toro aduuguunyumwojupi su tekwo kemi aikumjuno'ji tov a'mwo du'muudo tomuuno plaiyo'moneyokwe to'no imo'nodowodekono. Aki gamoro du'muudo tomuuda'ai kirumwallo tov kemi kirekumwallono tovi nuuwolowonokwono.

¹⁶ Oo kevu sumnowojokwe toorekulbusuko a'mwo abolo tonyu kaiya'no yomollubworomokavla'mdupudorekikono. Toro toorekul tabunyu bwotonyo nomapinorekikono. Su tov aro tovinokwono. Kevu aro dodupudorekikono. “A'mwo pwol subuu'yamju duuwiyo'mo tool Jeruusalemda'ai Gooti toollu ilomoropiyo'moneyokwe ago tovino yovo dowo'ji subuu'yamju so'ji tov aguto'maiyo. Su tov yiuno yasuwa'no duuwiyonekono. Toro kuvi kuruv a'mwo pwol Jeruusalemda'ai Gooti toollu ilomoropiyo'moneyokwe ago tovuro gool tovino dowo'ji subuu'yamju so'ji to'gwowi agutokwono. Subuu'yamju su toro aduuwiyo'ji tovi kuvinono neya uumjunonekono.” Kevu su toro dodupudorekikono.

¹⁷ Kevu kuudo maiyokwe toorekul a'mwo sumnowojokwe tekwojobusuko imo'nodupudorekikono. Neya duu'nyulo. Jeruusalemda'ai Gooti toollu ilomoropiyo'moneyokwe ago tovida'ai gool tov aguto kuvi kuruv Jeruusalemda'ai Gooti toollu ilomoropiyo'moneyokwe ago to'gwowi aguto kuunodokwono. Gool tov ago tovi kwa'mgu tomuu kworowo'jujuko'mno'juki yasuwa'no to'no sumo'nowo'jujukokwono. Toro kuvi kuruv noonyumwonyu ilomoropiyo'moneyokwe ago tovi anakuuto tomuu kuula'dupudo ton Gooti toolluro kuunodo wimo'nodupudogano. Toro tovino tov ilomoropiyo'moneyokwe ago su tov uuwolo'mdowodokwono.

¹⁸ Aki kevu a'mwo subuu'yamju duuwiyodupudo tooraino aro dodupudorekikono. “A'mwo pwol Jeruusalemda'ai Gooti toollu wiroudapiyo'moneyokwe dukwagupto tovino yovo dowo'ji subuu'yamju so'ji tov aguto'maiyo. Su tov yasuwa'no duuwiyonekono. Toro kuvi kuruv a'mwo pwol Jeruusalemda'ai Gooti toollu wiroudapiyo'moneyokwe dukwagupto tovi muunyu toru kwingiko toolluno dowo'ji subuu'yamju so'ji to'gwowi agutokwono. Subuu'yamju toro aduuwiyo'ji su tovi kuvinono neya uumjunonekono.” Kevu su toro dodupudorekikono.

¹⁹ Kevu a'mwo sumnowojokwe tekwojekulbusuko imo'nodupudorekikono. Neya duu'nyulo. Jeruusalemda'ai Gooti toollu wiroudapiyo'moneyokwe dukwagupto tovi muunyu toru me'no kwingiko tool agutolmaiyo. Toro kuvi kuruv wiroudapiyo'moneyokwe dukwagupto su tovino'gwowi aguto kuunodokwono. Su tov aro tovinokwono. Noonyumwonyu Gooti toollu wiyo'moneyokwe pun dukwagupto su tovi manyu tomuu kwopi ton yasuwa'no to'no imo'nupinogano. Toro kuvi kuruv dukwagupto su tovi muunyu toru me'no sulapi tono'gwowi Gooti toolluro kuunodo wimo'nodupudogano. Toro tovino tov wiroudapiyo'moneyokwe dukwagupto su tov aguto kuunodo imo'nodowodokwono.

²⁰ Toro te a'mwo pwol Jeruusalemda'ai Gooti toollu wiroudapiyo'moneyokwe dukwagupto tovino yovo tovi'aro subuu'yamju aduuwiyo'ji tov yiuwi'nokai dukwagupto tovi muunyu toru kwiroudapingiko kworaida'ai subuu'yamju duuwiyodowodekono.

²¹ Aki a'mwo pwol Jeruusalemda'ai Gooti toollu ilomoropiyo'moneyokwe ago tovino yovo tovida'ai subuu'yamju aduuwiyo'ji tov ago su tovi anakuuto tomuu kuulomwalodowodo kwolluda'ai subuu'yamju duuwiyodowodekono.

²² Aki a'mwo pwol Gooti toolluro ago muunyu kai'muuno yovo tovi'aro subuu'yamju aduuwiyo'ji tov aguto kig Gooti toolluro sia toruke'aro aki sia su tovi muunyu toru ilomwalodowodo kwolluda'ai kuruv subuu'yamju duuwiyodowodekono.

²³ Oo kevu a'mwo loowo tovino pi'mwo kuudokwe toorekike'aro Farasi toorekike'aro kuunanokwe su tekwojekul tabunyu nomapinorekikono. Su tov aro tovinokwono. Kevu Gooti toollu wiyo'moneyokwe inomdo wuullokwe pun wosamujuko togai molla'movopi atousal momuudeyosodupudorekikono. Toro amomuudeyosupi tonyuda'ai puruv Gooti toollu wiyodupudorekikono. Toro kworekul kuruv loowo aguto puruvapuruv tonyuno'gwowi me'no yuu'dapiyodupudorekikono. Loowo aguto su ton arogano. Kevu a'mwo abolo tonyu po'dogalo jugologaulo. Aki a'mwo abolo tonyuno kalo domamwonyogaulo. Aki Gooti toollu kuudo po'dogalo duubweyogaulo. Kevu loowo puruvapuruv su tonyu me'no yuu'dapiyodupudorekikono. Toro kworekul kuruv loowo puruvapuruv su tonyu kuuno nyuu'dapimwalpiyo. Aki Gooti toollu inomdo wuullokwe wiyo'mo kuruv nyuu'dapimwalpiyo.

²⁴ Oo kevu sumnowojokwe toorekulbusuko a'mwo abolo tonyu kaiya'no yomogaibworomokavla'mdupudorekikono. Toro toorekul wonyo nonyo'mo toga namdo ananyo kula'nyo tekwo wonyo tovi wo'dowo'jure tekwoji wonopi nome'nyudapiya'jokwe tovino kuudo kwolallo yourukwapiyopi luvodukwopiyodupudorekikono. Toro kuvi kuruv kevu sa'ai kemel bwotonyo toolluno'gwowi mwonyubusuko to'no yodupudorekikono. Toro toorekul kemel bwotonyo su toollu nokwo me'nyudapiyodupudorekikono.

²⁵ Oo kevu a'mwo loowo tovino pi'mwo kuudokwe toorekike'aro Farasi toorekike'aro kuunanokwe su tekwojekul tabunyu nomapinorekikono. Su tov aro tovinokwono. Kevu kapwo tokwe'aro dis tokwe'aro tovallu kwa'mgu tomguno to'no wonyo yal'mo'mdupudo kuvi kuruv anakuuto tomuuno'gwowi sullukwako tov kuuno kuullo'mowopiyodowodokwono. Kevu su to'busuko kubalno ipolomallo'mo pasudo toorogai'aro kemi kulako togai ilaiyo igollunyo'mo pasudo toorogai'aro su tooro kemoro poowokalago tonyu kuullo'movaikwopiyodupudorekikono.

²⁶ Oo Farasi toorekul sumnowojokwe toorekulbusuko imo'nodupudorekikono. Toro toorekul sumdomgu kapwo tokwe'aro dis tokwe'aro tovallu anakuuto tomuu wonyo neya jal'movogaulo. Toro sal'mopi toga'no kwa'mgu kumuu kuruv yal'movopi ilaiyo nokwo imo'nubullunovakono.

²⁷ Oo kevu a'mwo loowo tovino pi'mwo kuudokwe toorekike'aro Farasi toorekike'aro kuunanokwe su tekwojekul tabunyu nomapinorekikono. Su tov aro tovinokwono. Kevu aro to'busukorekikono. A'mwo buuso punyu kwa'mgu tomuu ilaiyo sumdo kinuwipino'moneyokwe pent togai luviyourosodupudogano. A'mwo buuso su tonyuro kwa'mgu tomgu sugumaluko kunyu kuruv anakuuto tomuuno'gwowi a'mwo bwiyo tooravuro yogudo togai kuullo'mowopiyodupudogano. Aki kaiya'no judo'no judo'nodo kworogai'aro kuullo'mowopiyodupudogano.

²⁸ Su toro to'busuko kubalno a'mwo abolo pun kemi kwa'mgu tomgu aikwonpi toga kuudo yaikuu'dupudogano. Oo a'mwo akaro sugudorodeyo, kuudo yaikuu'dupudorogano. Toro kuvi kuruv kemoro poowokalago anakuuto tomuuno'gwowi youkuu'najo'mo toorogai'aro kirovanyuvanyu kiroungovlaiyo'mo pasudo toorogai'aro tooro kuullo'movaikwopiyodupudorekikono.

²⁹ Oo kevu a'mwo loowo tovino pi'mwo kuudokwe toorekike'aro Farasi toorekike'aro kuunanokwe su tekwojekul tabunyu nomapinorekikono. Su tov aro tovinokwono. Kevu kemi tellukweyago ton proofet toorai aromiyosumelabiyajupo tooravuro a'mwo buuso tonyu kuuno modumelabodupudorekikono. Aiyoga kemi tellukweyago su ton a'mwo abolo idopto'nodo aromiyosajupo tonyuro a'mwo buuso tonyu kevu yovaisodupudorekikono.

³⁰ Aki toro toorekul aro dodupudorekikono. “Oo nevu aiyoga nemi nellukweyago amwallajupo tooro proofet toorai romiyosodopure su toga nevu amwalowa'jujuko'mno'juki noromiyosodopure su tonyu muuguro'mwonyowa'jujukonogano.” Dodupudorekikono.

³¹ Kevu su toro dodupudo tovino tov kevnokwe toorekulluno kuu'maiyo aro dodoluwosunodupudorekikono. Oo nevu a'mwo proofet toorai aromiyosajupo tonyuro kwikweyago kwolaiyonogano. Kuu'maiyo toru'no su toro dodoluwosunodupudorekikono.

³² Toro te kevu kemi tellukweyago tooravuro aiyogasuro womdo airoungovlaiyajupo su tov aga kemi me'no kuulaikwo'dowodokwono. Toro toorekul womdo su tovi neya yopipinorekikono.

³³ Kevu gabakuto yaunanyo tooravuro kwolaiyoravoo, Gooti tool kemi kooti yogalo daikullowo'ji kirekumwallo'moneyokwe du'muudo tomuuno amekwapiyo'ji toga kevu ku'nono mabirolo'nugolokuupinorekikono.

³⁴ Toro te neya duu'nyulo. Nuu kevu toorekullomno proofet pworogai'aro a'mwo pi'mwo kuudokwe pworogai'aro loowo tovino pi'mwo kuudokwe pworogai'aro tooro nomekwopiyamonyugono. Toro amekwopiyami kuvi kuruv kevu a'mwo su tooravuro pworai i'noguropte tovi nomovoromiyoguroptowosupinorekikono. Aki pworai Juu toorekulluro i'bwo'nyago tonyu anakuuto tomuu wuulo togai gunyukuurumollupinorekikono. Kevu su toro toorai wagwolago tonyuda'ai kwa'mgu tomuuno movomjapiyopi wagwolago go'no go'nodo tonyomno nomovomjomokaulapinorekikono.

³⁵ Kevu su toro ipino tovino tov yiuwi'nokai buro'nyo buro'nyo a'mwo abolo idopto'nodo me'no aromiyosajupo tonyuro mujako tov kemi nekwo'mwalonokwono. Aiyoga kwako akavi muudu'no a'mwo idopto'nodo Ebelolluda'ai romiyosumelabino romiyosumelabino yo'mno yiuno Berekaiya'wolluro muugunyo Sekoraiya'wolluno yiuwi'nokai aromiyosumelabiyajupo su tooraino jul'nyo tov kemi ikubwemonyugono. A'mwo Sekoraiya'wol su toollu kevu Gooti toollu ilomoropiyo'moneyokwe ago tokwe'aro wiroudapiyo'moneyokwe dukwagupto tokwe'aro tovallu akuuto toru aromiyosopo su tool kwekono.

³⁶ Toro te nuu nebal'no ikudumo'mokwono. Yiuwi'nokai kirumwallo'moneyokwe jul'nyo su ton kevu agasuro a'mwo abolo amwakopo togaikullu kuvinono nekullumo'nonokwono.” Jisasol toro kuudokaikono.

Jisasol yiuwi'nokai a'mwo abolo wagwolago Jeruusalem tovi mwalodupudo tonyuno kalo kwinoka tovinokwono

³⁷ “Oo Jeruusalemda'aiyonoo, Jeruusalemda'aiyonoo. Kevu wagwolago akavi mwalodupudo togaikul proofet toorai romiyosumelabodupudogaikikono. Aki Gooti toolluro a'mwo kuurotokwe toorai sulo togai luvoromiyosumelabodupudogaikikono. Kevu toro kiroungovla'mdupudo kuvi kuruv nuvno'gwowi aro nyunodowodonyugono. Kuukuuro puruv gami taiyo tobuurai puviyo tonyu dolago tomuu pi'mwono mollomwalodowodo to'busuko kubalno nuu wagwolago akavida'ai mwalodupudo togaikulluro kwoloraiyo tobuurai miyomno mollu'bworoso'mo nyunodowodonyugono. Toro kuvi kuruv kevno'gwowi mi manuwonyapiyodupudogaikikono.

³⁸ Neya duu'nyulo. Kemoro ago tov uujakumovopi yasuwa'no woronokwono.

³⁹ Nuu aro tovino ikudumo'mokwono. Kevu numi aki aiko te yere manuwonpinogaikikono. Iruko pullugwoji mino tov aro nodupinogaikikono. “Ilaiyokwonoo, Gooti toolluro sugumaluko to'no kwosungiko akallu amonekwopiyamoka su tool Aguto toolluro yovo tovida'ai abadopiyo. Ilaiyokwonoo!” Kevu su toro adupi toga'no numi aki aiko te nonuwonpinogaikikono.”