Matyuu 21 - Gooti Toolluro Yogalokwono

Jisasol a'mwo aguto kig pwolbusuko wagwolago Jeruusalem tovi auloka tovinokwono

¹ Jisaseke'aro gami uumjunyokwe toorogai'aro tooro Jeruusalem'no wobo toru bino sumaveyokwe wagwolago Betifejo tovi ai'movoporogano. Wagwolago Betifejo su tov Muumuudo Oolip toollu do'gwapiyo tomuu wo'dowodokwono. Toro tovi wobo toru ki'mo'mno sumaveyokwe Jisasol gami uumjunyokwe pworallu amorapiyokaikono.

² Toro toorallu aro amodapiyokaikono. “Kevu wagwolago akaijuvi kuulabullunorakikono. Toro kuula'bullu toga doonki ganeyago tokwe'aro gami taiyo tooke'aro tonallu yere wonbullunorakikono. Toro tonallu kevu wuulo tovi ikwolapiyo'bullu miyomno donumokabilo.

³ Kevu su toro yodo'bule toga a'mwo pwol, Buro'nyo'mo jadokuulo? Yamuugojo toro aikullo'ji tov aro duujulo. “Aguto Jisasol womdo yono'mekono. Womdo me'no yopiyowo'ji toga akawai'no aki aiko te yere nomogwopiyabwonekono.” Toro duujulo.” Kuudokaikono.

⁴ Su tov proofet yogalo sakwollungiko puvi suuwiyo imwojo'moneyokwe sumo'nokakwono. Proofet yogalo su tov arokwono.

⁵ “Wagwolago Jeruusalemda'ai tonyu duujulo. Kemi aguto kig abadopiko toollu denomallulo. Su tool gavnokweyol bwolomoropinyokwekono. Aki yovomaiyokwe pwolbusuko imo'nyokwekono. Toro tool doonki taiyo puvi muunyu toru sulomwallo. Toro toollu kemi aguto kig muunyu toru ilomwalodowo abadopiko su toollu denomallulo.” Sakwollungikokwono.

⁶ Jisasolluro uumjunyokwe su tooral gamoro yogalo aduuwiyoka tovi kuvinono kuumjunolorakono.

⁷ Toro tooral doonki tokwe'aro doonki tovuro taiyo tooke'aro tonallu mollukwolomwora'no sumaleyokwe Jisasollomno amokabolorakono. Toro mokabino sumaleyokwe kemoro nobwaiyo tov doonki taiyo toolluro buulo tovi sulosolorakono. Toro sulosolo tovi Jisasol muunyu toru sulomwalokaikono.

⁸ Toro ilomwalno sumaiyokwe a'mwo abolo kwolallo ton kemi nobwaiyo ton puuto kuullo'moneyokwe tovi alobiyosumoulapogano. Aki iko pworaida'ai kuuwopto ton peyoma'no sumaveyokwe alobiyosopogano. Su tov Jisasol nouloduke toollu ilaiyo mollomallo'moneyokwe alobiyosopogano.

⁹ Toro lobiyosuno sumaveyokwe Jisasol puuto tovi nouloduke toga a'mwo abolo pun sumdomgu aki pun lukomgu deko aro aduumjunopogano. “Anekullo'mwojonoo, aguto kig Devitolluro muugunyo tool ilaiyekonoo! Gooti toolluro sugumaluko to'no kwosungiko akallu amonekwopiyabokaikono. Toro tool Aguto toolluro yovo tovida'ai abumokaikono. Ilaiyokwono, muunyu kai'muuda'ai tool anekullo'mwojonoo!” Jisasollu ilaiyo mollomallo'mo ton toro aduumjunopogano.

¹⁰ Jisasol wagwolago Jeruusalem tovi kuuloduke toga yiuwi'nokai wagwolago su tovida'ai a'mwo abolo mwalodupudo ton duka'bwo'no'mno aro ajunopogano. “A'mwo akal ala'mwoldukono?” Ajunopogano.

¹¹ Toro junodopure tovi kwolallo Jisasollu kuumjunopo ton aro kuudopogano. “Su tool Jisasekono. Kwako Galili tomuu wagwolago Nasaretda'ai proofet tookono.” Kuudopogano.

Jisasol a'mwo mubiyo dalo'nyo yodopure toorai abilomodovomjopiyoka tovinokwono

¹² Toruda'ai Jisasol wagwolago Jeruusalemda'ai Gooti toolluro ilomoropiyo'moneyokwe ago tovuro agwapto toru aulokaikono. Toro kuulno sumaiyokwe a'mwo abolo ton mubiyo dalo'nyo inodopure tonyu abilomodovomjopiyokaikono. Yo'no a'mwo nuugwiyo yodalopto yodopure tooravuro noluuleyo togai'aro aki dokato sobuuro toorai yodalopto yodupudo tooravuro noluuleyo kugai'aro tonyu amourotowapiyokaikono.

¹³ Toro ino sumaiyokwe aro kuudokaikono. “Gooti toolluro kuuguudo tovi aro sakwollungikokwono. “Moro ago tov subusu'nyogalo jo'moneyokwe agokwono.” Sakwollungikokwono. Toro kuvi kuruv aga'no'gwowi a'mwo kuukokwe tooravuro yiulo kuupuu'na'dupudo ago to'busuko aikullumo'nadopiyo.” Kuudokaikono.

¹⁴ Jisasol Gooti toollu ilomoropiyo'moneyokwe ago tovuro agwapto toru kuulomwalododuke toga a'mwo abolo sumnowojokwe togai'aro suvlo amuullugolopingiko togai'aro ton kwollomno abopogano. Toro abopo tonyu Jisasol sukulokaikono.

¹⁵ Duuwallo jurogudo wuuduuwalloduke su tonyu pris mido mollomwalokwe toorogai'aro loowo tovino pi'mwo kuudokwe toorogai'aro tooro kwonoporogano. Aki Gooti toollu ilomoropiyo'moneyokwe ago su tovida'ai kwoloraiyo kuulomwalodopure tobuuro deko aro adopo tovi kuu'noporogano. “Ilaiyokwono, aguto kig Devitolluro muugunyo tool anekullo'mwojonoo!” Su toro dodopure tovi me'no kuu'noporogano. Toro kuvi kuruv a'mwo mido mollomwalokwe su toorono'gwowi Jisasolluno surodo'mo to'no soporogano.

¹⁶ Toro tooro Jisasollu aro kuudoganoporogano. “Guu kwoloraiyo akabuuravuro yogalo dodopure tovi duukuu'numwakuno?” Kuudoganoporogano. Toro toorai Jisasol kuudokaikono. “Tade, nuu'numwakono. Toro kuvi kuruv kevno'gwowi Gooti toolluro yogalo sakwollungiko tonyuno jagilodupudorekuldukono? Gooti toolluro yogalo puruv aro sakwollungikokwono. “Kwoloraiyo tobuurogai'aro kwolaiyo muudoga tobuurogai'aro tobuuro gumino yovo tovi ilomogwopiyo'moneyokwe guvnokwe tooku me'no mollovrowosodumdogano.” Sakwollungikokwono.”

¹⁷ Jisasol toro wuujuno sumaiyokwe wagwolago Betani'no aikomgu abolokwokaikono. Toro bolokwino sumaiyokwe surakuuto toga wagwolago su to kuvi sa kworokaikono.

Jisasol iko fik pwollu amojurugoloka tovinokwono

¹⁸ Aikomguda'ai lomwo iru'mago toga Jisasol wagwolago Jeruusalem'no aki aiko te avlavokaikono. Toro plaino sumaiyokwe puuto tomuu mujuko kwinokaikono.

¹⁹ Toro kwinoka tool puuto tomuu iko fik pwol da'mduke toollu kwonokaikono. Toro wonyuno sumaiyokwe iko su toolluro sulo pun yo'mgonomuudanyo'moneyokwe kuuwokaikono. Toro wino sumaiyokwe iko su tool ikulsulo pun mai'nyo'mo tool yiuno kuuwopto tono ina'dopure toollu kwonokaikono. Toro tovi wonyuno sumaiyokwe Jisasol iko su toollu yogalo aro amojurugolokaikono. “Agada'ai sulo mai'nugovla'mwalbinekugono.” Amojurugolokaikono. Toro amojurugoloka kuga'gwo kuuno iko fik su tool yiuno'no aluuropiyokaikono.

²⁰ Toro sumo'noka tovi Jisasolluro uumjunyokwe tooro wonyuno sumaveyokwe morumoukuropiyo'mno aro adoporogano. “Awi, iko fik tool yere aluuropimoka su tov adadomgu'aro sumoka'mdeyo?” Adoporogano.

²¹ Toro dodopure toorai Jisasol aro kuudokaikono. “Nuu nebal'no ikudumo'mokwono. Kevu Gooti toolluno kuudo kuubwepi tov kemi poowokalago tovi kuudo noullo maullo miyaupinono. Toro kworekul kuruv, Oo kuvinono imo'nonokwono, kuudo saupi tov Gooti tool kuvinono yonekono. Kevu Gooti toolluno kuudo kuubwepi toorekul iko fik toollu kwimo'numoka to'busuko kubalno nokwo ipinorekikono. Aki kevu muumuudo pwollu aro kuudupi tov, “Ilojo'mowopiyabo'bi soolwara tovi dooluvollunawonoo,” kuudupi kuruv kuvinono nokwo imo'nonokwono.

²² Toro te kevu Gooti toolluno kuudo kuubwepi toorekul buro'nyo buro'nyodeyo tonyuno subusu'nyogalo kuudoganpi tov kuvinono ikullumo'nonokwono.” Kuudokaikono.

A'mwo aguto pworo Jisasollu, “Gumoro jurogudo tov adadokwe dukomolladokuuno,” kuudoganopo tovinokwono

²³ Toruda'ai Jisasol Jeruusalemda'ai Gooti toollu ilomoropiyo'moneyokwe ago tovuro agwapto tovi kuulno sumaiyokwe sodubwosomollokaikono. Toro yodubwosumolloduke toga pris mido mollomwalokwe toorogai'aro loowo tovino pi'mwo kuudokwe toorogai'aro Juu tooravuro mido mollomwalokwe pworogai'aro tooro kwollomno aboporogano. Toro tooro bino sumaveyokwe Jisasollu aro kuudoganoporogano. “Gumoro jurogudo yodubwosomollodumdo akav adadokwe dukomolladokuuno? Aki ala'mwol, Nokwo mollubinokwono, agudokakwe jodubwosomolladokuuno?” Kuudoganoporogano.

²⁴ Toro kuudoganopo toorai Jisasol kuudokaikono. “Nuu moro jurogudo amolladokwo akavino ikudumo'mo tov kemi yamuugojo puru'mono ikudoganmo'monyugono. Toro aikudoganmi tovi kevu anyudupi tov moro jurogudo mollodumdo ajanubweyoka toolluno nokwo ikudumonyugono.”

²⁵ Toro wuujuno sumaiyokwe aro kuudoganokaikono. “Joonolluro wonyo agaluvollajuko su tov muunyu akai'muuda'aiyo'mdukono oo a'mwo tooraida'aiyo'mdukono? Kevu donyujulo.” Kuudoganokaikono. Toro kuudoganoka tovi kevnokwe tooro aro sajunoporogano. “Nevu, Muunyu kai'muuda'aiyokwono, kuuda'ji tov nekudonekono. Kevu buro'nyo'mo kuudo muubweyajuporekuldeyo? Nonekudonekono.

²⁶ Aki Joonolluro sajuko su tovino, A'mwo tooraida'aiyokwono, kuuda'ji tov a'mwo abolo ton molo nonekullupiyo.” Toro kuudo yau'no sumaveyokwe luko soporogano. Su toro tov aro tovinokwono. Kwolallo ton Joonolluno kuudo saullajupogano. Oo proofet kuunodo pwoldeyo. Su toro kuudo saullajupo tovino tov luko soporogano.

²⁷ Toro tooro Jisasolluro yamuugojo kwiyoka tovino kuudoporogano. “Nevu kuudo miyau'mwakuuwono.” Toro kuudopo toorai Jisasol kuudokaikono. “Kevu manyudumapo tovino tov nuu kwonyu kuruv moro jurogudo mollodumdo akavi ajanubweyoka toolluno maikudumonyugono.” Kuudokaikono.

A'mwo pwolluro muugunyo tooralluno yovekurajokwono

²⁸ Aki Jisasol Juu tooravuro a'mwo mido mollomwalokwe su toorai aro kuudokaikono. “Kevu aro tovino buro'nyo kuudo jukiyau'mwakovo? A'mwo pwol muugunyo pworalokwekono. Toro tool muugunyo sumdomguda'ai toollu kuudokaikono. “Mi muugunyoloo, anuugwo toga guu moro wain womdo tovi plavo'bi womdo jono.” Kuudokaikono.

²⁹ Toro kuudoka tovi muugunyo su tool yere kuudokaikono. “Awiyo, womdo yo'mo mavla'monyugono.” Toro kuudoka kwol kuruv lukomgu kuudo muuduko youragunyumo'no'no womdo yo'moneyokwe kuvinono avlavokaikono.

³⁰ Aki kuunumiyago tool muugunyo lukomguda'ai toollu kuudokaikono. “Guu moro womdo tovi yo'moneyokwe neya dovlavono.” Kuudokaikono. Toro kuudoka tovi muugunyo lukomguda'ai su tool yere kuudokaikono. “Nyunumiyago agutoloo, nuu womdo yo'mo novla'monyugono.” Toro kuudoka kwol kuruv lukomgu womdo yo'mo mavlavokaikono.

³¹ Toro te muugunyo su todoralluda'ai pwol gami ganumiyago toollu kaduko wiyo'no kuvinono kuumjunoka su tool gadooldukono?” Jisasol toro kuudoganokaikono. Toro kuudoganoka tovi a'mwo mido mollomwalokwe su tooro kuudoporogano. “Muugunyo sumdomguda'ai tool gami ganumiyago toolluro yogalo tovi kuvinono kuumjunokaikono.” Kuudoporogano. Su toro me'no kuudopo toga Jisasol kavlo tovino kuu'maiyo toru po'dogalo aro kuudokaikono. “Nuu nebal'no ikudumo'mokwono. Kevu Juu mido mollomwalokwe toorekul aguto kig Gooti toolluro mido mollomwalo tovi dolago tomuu yere maulai'mopinorekikono. Toro kuvi kuruv takis nuugwiyo mallokwe pworogai'aro kwonyalabolo pugai'aro tono'gwowi kemi ikuuwolovopi sumdomgu noulai'mopinogano.

³² Su tov aro tovinokwono. Wonyo Galuvollokwe Joonol bino sumaiyokwe kevu po'dogalo yomjomwekovla'mwalpino'moneyokwe tovino puuto tov me'no aikuduuwallokaikono. Toro ikuduuwalloduke kuvi kuruv kevu kuudo muubweyajuporekikono. Kevu kuudo muubweyodopure kuvi kuruv takis nuugwiyo mallokwe pworogai'aro kwonyalabolo pugai'aro tono'gwowi kuudo kuubweyopogano. Aki tono tono kuudo uubwemelabodopure tonyu kevu me'no amuugonallajuporekikono. Toro kuvi kuruv kevnokwe toorekulno'gwowi Joonolluro yogalo tovino kuudo uubweyo'moneyokwe tov miyouragunyumo'nyajuporekikono.” Jisasol toro kuudokaikono.

Wain womdo tovida'ai a'mwo womdokwe kirovanyuvanyu kuumwiyo tooraino yovekurajokwono

³³ Aki Jisasol kuudokaikono. “Yovekurajo purukwe'aro ikudodo'mure akavi duu'nyulo. A'mwo pwol kwako puvi jukwo sumo'nyajukekono. Toro tool gami kwako su tovi wain wiyo ton aburoudosokaikono. Toro kuudosuno sumaiyokwe kuurupto killo'mo tool sulo tokwe aluvagilovokaikono. Aki wain ikulsulo tonyu gurojo'moneyokwe buuso purukwe'aro alsosokaikono. Toro ilsosuno sumaiyokwe duuwato'mo agumi'ago puruv amodokaikono. Toro modosuno sumaiyokwe kantri manyu pumuuno plaiyo'mo tool gamoro womdo su tovi mollomwalmwalpino'moneyokwe a'mwo pworai ajesokaikono. Toro ajesoka su toorai aro kuudokaikono. Kevu wain ikulsulo ton domju'bworanekubweyogaulo. Toro muuju'bworanekubweyopi lukomgu gekwono gekwono momuudeyomaranokwono. Toro wuujuno sumaiyokwe wain womdo tovi jukwo tool kantri manyu pumuuno avlavokaikono.

³⁴ Toro tool kantri manyu su tomuu mwalno mwalno sumaiyokwe ikulsulo nomuujo'moneyokwe abai'movoka toga gamiyo'mo ikulsulo tekwo anumokabupureyokwe a'mwo ki'nato womdokwe pworai aikomgu amodapiyokaikono.

³⁵ Toro amodapiyoka kuvi kuruv a'mwo ki'nato womdokwe su tekwojo wain womdo toru ai'movopo toga womdo su tovi amoduvomwallajupo tooro galomwora'no sumaveyokwe kaiyako sugoloporogano. Toro tekwojai pwollu iwago aromiyopekono. Pwollu yiuno'no aromiyosopekono. Aki pwollu sulo togai aluvaromiyopekono.

³⁶ Toruda'ai lukomgu womdo su tovi jukwo tool gami a'mwo ki'nato womdokwe pworai aki aiko te amorapiyokaikono. Toro amorapiyoka su tooro sumdomguda'ai amorapiyoka toorai uuwolovo'mno bwotonyago tooro avlavoporogano. Toro amorapiyoka kuvi kuruv ki'nato womdokwe su tekwojo wain womdo toru ai'movopo toga kaiyako aval'no sugoloporogano.

³⁷ Lukomgu womdo tovi jukwo tool gamoro kwolaiyo kuunodo toollu amorapiyokaikono. Toro toolluno aro kuudo saurokaikono. Oo moro kwolaiyo kuunodo akallu amorapimi to'gwowi kwollu kwako tomuu'aro wiyopi aki gamoro yogalo tovi neya wuu'nupinekono. Kuudo saurokaikono.

³⁸ Toro kuvi kuruv kwolaiyo su tool wain womdo toru ai'movoka toga womdo tovi amollomwallajupo tooro wono'mno aro sajunoporogano. “Oo kwolaiyo akal ganumiyago toolluro aiko toru marowo'ji yiuwi'nokai tonyu nomaronekono. Toro toollu nevu aromiyosa'ji tov ganumiyago toolluro yiuwi'nokai ton yiuno nevuno maranokwono. Toro te kwolaiyo su toollu aromiyosano.” Sajunoporogano.

³⁹ Toro yajunyuno sumaveyokwe kwolaiyo toollu galomworaro'mno wain womdo tovi kwa'mgu tomuuno bome'nomokalokwino sumaveyokwe aromiyosoporogano.

⁴⁰ Me'no romiyosuno sumaveyokwe lukomgu wain womdo tovi jukwo tool aikomgu nobwonekono. Toro abwo'ji toga a'mwo womdokwe su toorai adado igolonoldukono?” Jisasol toro kuudoganokaikono.

⁴¹ Toro kuudoganoka tovi aro kuudoporogano. “Womdo tovi jukwo tool abwo'ji toga aro yonekono. A'mwo kirovanyuvanyu su toorai kaiyako yiuno'no mollounapiyonekono. Aki gami wain womdo tovi mollomwalmwalpino'moneyokwe womdo tov a'mwo muuduko pworai jesonekono. Toro ajeso'ji su tooro wain womdo su tovida'ai yiuwi'nokai wosamujuko amulomapi ton pun jukwo su toollu kuvinono nuuwimwalpinogano.” Kuudoporogano.

⁴² Toro kuudopo toorai Jisasol aro kuudokaikono. “Kevu Gooti toolluro yogalo sakwollungiko tovi mwonodupudorekuldeyo? Yogalo su tov arokwono. “Sulo pwollu a'mwo sulago mojokwe tooro biyolsumdo ino sumaveyokwe amodukwopiyopekono. Toro amodukwopiyopo kwollu kuruv Gooti tool sulo su toollu ma'dowo ago tov kwollu muunyu toru amodadopiyo. Toro te aga'no'gwowi sulo su tool yiuwi'nokai ago mojo'mo sulo tonyu kuuwolo'mwallo. Su tov yiuno Aguto Gooti toolluro tovida'ai sumo'nadopiko tovi wonodowa nemoro sumdo tovi sugumaluko anekullumo'nadopiyo.” Toro sakwollungikokwono. Toro te kevu Gooti toolluro yogalo su toro sakwollungiko tovi mwonodupudorekuldeyo?

⁴³ Aki nuu aro ikudumo'mokwono. Aguto kig Gooti toolluro mido mollomwalo tovi dolago tomuu kuulomwallo'moneyokwe kuuguudo sugudo tov kemoro ato tovida'ai nomaikudukwopiyonekono. Su toro maikudukwopiyowo'ji a'mwo abolo ikulsulo po'dogalo ki'numwalpino'moneyokwe punyu nuuwiyonekono.

⁴⁴ Aki a'mwo pwol sulo su toollu yello kiboptovomarowo'ji kwollu muunyu toru kwolaro'ji tov kaiyako yiunokuudo nomwimuullu'namowonekono. Aki sulo su tool a'mwo pwollu muunyu toru sularo'ji tov a'mwo su toollu yiuno'no gurojosonekono.” Jisasol toro kuudokaikono.

⁴⁵ Toro kuudoka tovi pris mido mollomwalokwe toorogai'aro Farasi toorogai'aro tooro Jisasolluro yovekurajo kuuguudo su tovi wuu'nyuno sumaveyokwe sajunoporogano. “Oo yogalo su tov nemino dodadopiyo, nevu womdo mollomwalokwe kirovanyuvanyu su toorobusukonoldeyo.” Sajunoporogano.

⁴⁶ Toro yajunyuno sumaveyokwe Jisasollu galomworallo'mo kuudo sauroporogano. Toro kuudo sauropo kworo kuruv a'mwo abolo kwolallo tonyuno luko yo'mno ku'nono magalomworaroporogano. Su tov aro tovinokwono. A'mwo abolo kwolallo ton Jisasolluno tov, Oo proofet pwoldeyo, kuudo saullajupo tovinokwono.