Matyuu 20 - Gooti Toolluro Yogalokwono

A'mwo wain ikulsul womdo tovi womdokwe tooro mubiyo mapino tovino yovekurajokwono

¹ Aki Jisasol aro kuudokaikono. “A'mwo abolo ton muunyu kai'muuda'ai aguto kig mido mollomwalo tovi dolago tomuu kuulomwallo'mo tov aro to'busukokwono. A'mwo pwol kwako wain womdokwe puvi jukwo sumo'nyajukekono. Kwako su tovi jukwo tool lomwo iru'mago toga bolokwino sumaiyokwe gamoro wain ikulsul womdo su tovi womdo yo'moneyokwe a'mwo pworai so'mgonomarokaikono.

² Toro yo'mgonoma'no sumaiyokwe aro kuudokaikono. “Kevu iruko akallugwoji moro womdo tovi supi tov yiuwi'nokai toorekullu nuugwiyo tov lumdeke pwolno pwolno nekubimonyugono.” Kuudokaikono. Toro kuudoka tovi, “Yowa'nogano,” kuudoporogano. Toro kuudopo toorai kwako tovi jukwo tool gamoro wain ikulsul womdo tovi yo'moneyokwe a'mwo su toorai amodapiyokarogano.

³ Aki 9 kilook lomwo toga kwako tovi jukwo tool bolokwino sumaiyokwe a'mwo pworo maket tomuu yasuwa'no mwalodopure toorai kwonokaikono.

⁴ Toro toorai wonyuno sumaiyokwe kuudokaikono. “Kevu moro womdo tovi supi tov nuu yiuwi'nokai toorekullu nuugwiyo idopto'nodo tov go'no go'no nekubimonyugono.” Kuudokaikono. Toro kuudoka tovi, “Yowa'nogano,” kuudoporogano.

⁵ Toro wuujuno sumaveyokwe a'mwo su toorai womdo yo'moneyokwe amorapiyokarogano. Aki kwako tovi jukwo tool kuujunapto togake'aro 3 kilook sulato togake'aro toga aki aiko te a'mwo womdo yo'moneyokwe pworai yo'mgonomaro'no aval'no amodapiyokaikono.

⁶ Aki 5 kilook sulato toga womdo tovi jukwo su tool aki aiko te bolokwino sumaiyokwe a'mwo pworo yasuwa'no da'mdopure toorai kwonokaikono. Toro toorai aro kuudoganokaikono. “Kevu yiuwi'nokai iruko akallugwoji womdo mimwakopo tov buro'nyo'morekuldeyo?” Kuudoganokaikono.

⁷ Toro toollu aro kuudoporogano. “A'mwo pwol womdo yo'moneyokwe nemi mamobiyonekuma'mwalluko tovino tov nevu womdo mimwakuuwono.” Kuudoporogano. Toro kuudopo toorai kwako tovi jukwo tool kuudokaikono. “Kevu moro wain ikulsul womdo tovino plavopi a'mwo womdo sumwakopo toorogai aval'no nokwo ipinorekikono.” Kuudokaikono.

⁸ Sula'dugumdo toga kwako tovi jukwo tool gami wain ikulsul womdo tovi mido mollomwalokwe toollu doma'no sumaiyokwe aro kuudokaikono. “Guu yiuwi'nokai womdokwe toorai domaro'bi kemi womdo sumapo tovino nuugwiyo tov duubiyono. Nuugwiyo uubiyo'mo tooku aro neya ibinekugono. A'mwo lukomguda'ai abumapo toorai sumdomgu domaro'bi kemi nuugwiyo tov neya uubibinekugono. Wino wino yo'bi aiyowo'mo tov a'mwo sumdomguda'ai abumapo toorai uubibinekugono.” Kuudokaikono.

⁹ Toro kuudoka tovi wain ikulsul womdo tovi mido mollomwalokwe tool a'mwo lukomguda'ai 5 kilook sulato toga abopo toorai domaro'no iruko pullugwonodo tollugwojuro nuugwiyo tovino mubiyo tov kwiyokaikono.

¹⁰ Yo'no aki a'mwo sumdomguda'ai abopo toorai kemi iruko su tollugwojuro womnuugwiyo tov uubiyo'moneyokwe adomarokarogano. Toro adomaroka su tooro kuudo sauroporogano. Oo nevno'gwowi nemoro nuugwiyo tov muunyu toru'aro maranonoldeyo. Kuudo sauroporogano. Toro kuudo sauropo kuvi kuruv a'mwo su to kworo kuruv iruko pullugwonodo tollugwojuro nuugwiyo tov aval'no amaroporogano.

¹¹ Toro tooro kemi womnuugwiyo su tov malluno sumaveyokwe kwako tovi jukwo toollu biyolyogalo aro aduu'mwojoporogano.

¹² “Ai, a'mwo lukomguda'ai abumapo su tooro kuujo sumdo tov yiuno pullugwonodo tollugwoji womdo sumaporogano. Toro kuvi kuruv nevu toonolno'gwowi iruko akallugwoji womdo tov ino ino yodowa kuujo toollu dukwogulo bwotonyo sumo'nakuuwonogano. Toro sumo'nakuuwo kuvi kuruv nuugwiyo to'gwowi aval'no ama'mawo tov ilaiyo'maiyo.” Biyolyogalo toro aduu'mwojoporogano.

¹³ Toro aduu'mwojopo toorai kwako tovi jukwo tool aro kuudokaikono. “Mi ibwoto'nyoravoo, nuu kaiyako miyaikullugolmwakono. Nuvu sumdomgu aro me'no aikudumorekikono. “Kevu womdo sopipi tov iruko pullugwonodo tollugwojuda'ai nuugwiyo tov nekubimonyugono.” Su toro aikudumo tovino kevnokwe toorekul, “Yowa'nogano,” me'no anyudumaporekikono.

¹⁴ Toro te kevu kemi nuugwiyo su ton momworaropi neya dovlaiyulo. Nuvu kemi womnuugwiyo aikubimo to'busuko kubalno a'mwo lukomguda'ai abumapo kworai kuruv aval'no uubiyo'mo nyunodowodonyugono.

¹⁵ Nuvu moro nuugwiyo tokwe buro'nyo buro'nyo yo'mo kuudo sau'mi tov nuvnokwe toonyu anuwoso. Toro tovino tov nuu a'mwo abolo punyu yanyago wiyo'mo yodo'mure tovino kevu kwekuullu kuudo nyaupiyo.” Jukwo tool kuudokaikono.”

¹⁶ Toro te Jisasol aro kuudokaikono. “Yovekurajo su to'busuko kubalno agasuro a'mwo aiyowo'mo abwollumo'napi tooro lukomgu sumdomguda'ai nyumo'nupinorogano. Aki agasuro a'mwo sumdomguda'ai sumo'nupi tooro lukomgu toga'no'gwowi aiyowo'mo nobwollumo'napinorogano.” Kuudokaikono.

Jisasol gamoro nobollo'mo tokwe'aro nodukaiyo'mo tokwe'aro tovalluno aki aiko te adoka tovinokwono

¹⁷ Toruda'ai Jisaseke'aro gami uumjunyokwe toorogai'aro tooro Jeruusalem'no avlavoporogano. Toro plaino sumaveyokwe toga Jisasol gami 12-pela uumjunyokwe toorai aki aiko te judo tomuu magulkuuro'no aro kuudokaikono.

¹⁸ “Kevu donuu'nyuloo. Nevu Jeruusalem'no avla'mwakuuwono. Jeruusalem toru me'no ai'mowa'ji toga a'mwo pwol A'mwo Kwolaiyo Kuunodo toonyu galonumworarowo'ji pris mido mollomwalokwe toorogai'aro loowo tovino pi'mwo kuudokwe toorogai'aro toorai nomanubweyononyugono. Toro toonyu kooti yogalo danyopi nyudupinorogano. “Neya abolono.”

¹⁹ Toro dopi a'mwo Juu tooravuro miyawosunodupudo pworai manubwepinonyugono. Toro manubweyopi toga Juu tooravuro miyawosunodupudo tooro burolyogalo nyudopi wuulo tokwe galogunyukuuronumollupinonyugono. Yopi i'noguropte tovi movoromiyoguroptovanubwepinonyugono. Toro amovoromiyoguroptovanubwepi kuvi kuruv iruko pullapullu me'no nuwolo'nowo'ji toga aki aiko te noduka'monyugono.” Kuudokaikono.

A'mwo pwol a'mwo aguto imo'nyo'mo kwino'ji su tool womdokwe pwekwobusuko neya imo'numwalono tovinokwono

²⁰ Toruda'ai Sebediyolluro muugunyo Jemseke Jooneke todorallu kemi kuuneyago tov momwora'no sumaiyokwe Jisasollomno amokabokakwono. Toro mokabino sumaiyokwe yamuugojo wuudoganyo'mo tov Jisasollu wobo toru suduko abinuguto'nokakwono.

²¹ Toro binuguto'noduke tovi Jisasol aro kuudoganokaikono. “Guu buro'nyo tovino nyudoganbino'mo'guudeyo?” Kuudoganokaikono. Toro toollu abolo tov kuudokakwono. “Guu aguto kig mido mollomwalo sumo'nubi toga moro muugunyo akadoral gumi wobo toru mwalo'bullu yogwapi ibullunorakono. Toro imo'no'bullu guuge yiuwi'nokai a'mwo abolo tonyu mido mollomwalpinorekikono. Toro todoralluro pwol gumoro anato tomgu mwalonekono. Pwol gumoro kwonamo tomgu mwalonekono. Toro te agada'ai moro muugunyo su todorallu nokwo jesubinekudeyo?” Kuudoganokakwono.

²² Toro kuudoganoka kuvi kuruv Jisasol abolo tovuro muugunyo toorallu aro kuudokaikono. “Kemoro anyudoganmapo su tovino kevu kuudomaiyogaikikono. A'mwo toorakul nuvu dado subwosunmi to'busuko kubalno kev kworakul kuruv puga nokwo ibwosunbullunorakuldukono?” Kuudoganokaikono. Toro kuudoganoka todoral kuudolorakono. “Tade, navu nokwo'monakono.” Kuudolorakono.

²³ Toro kuudolo todorallu Jisasol aro kuudokaikono. “Kuvinono ikullumo'nonorakikono. Kevu moro dado tov subwosunmi to'busuko kubalno puga kev kworakul kuruv aval'no nyubwosunbullunorakikono. Toro kuvi kuruv aga moro kwonamo tomge'aro anato tomge'aro mwallo'mo tovino jeso'mo tov moro'maiyo. Mi Nyunumiyago toollurokwono. Toro tool moro kwonamo anato tomgu mwallo'mo tov me'no sovo'dogalubweyongiko toorono'gwowi kuvinono mwalpinorukono.” Kuudokaikono.

²⁴ Toro yajunodopure tovi gamoro uumjunyokwe atousal tooro wuu'nyuno sumaveyokwe a'mwo su todoralluno surodo'mo soporogano.

²⁵ Toro yodopure kuvi kuruv Jisasol yiuwi'nokai toorai doma'no sumaiyokwe aro kuudokaikono. “Kevu kuudo nyau'mwakovo. A'mwo Juu miyawosunodupudo tooravuro midokwe pworo kevnokwero ilomoropunyo'mo tooro a'mwo pworai womdo jurogudo ipureyokweyo'mo dumuurolo'mdupudorogano. Su toro duuwiyodupudo toorai bwolomorumwogapi yodapudorogano.

²⁶ Toro kuvi kuruv kevno'gwowi su toorobusuko nyumo'numwalpiyo. Kemoro tovida'ai pwol a'mwo aguto imo'nyo'mo kwino'ji su tool kemi womdokwe pwolbusuko neya aikullumo'nono.

²⁷ Aki kemoro tovida'ai pwol sumdomgu ikullumo'nyo'mo kwino'ji su tool yiuwi'nokai toorekulluro a'mwo ki'nato womdokwe pwekwobusuko neya aikullumo'nono.

²⁸ Kevu kuudo neya jaullulo. Nuu A'mwo Kwolaiyo Kuunodo kwonyu kuruv mino womdo anyupureyokweyo'mo abonyumaiyo. Toro kuvi kuruv nuu a'mwo abolo tonyu womdo wiyo'moneyokwe abonyugono. Toro toonyu a'mwo abolo bwotonyago tonyu mubiyo biyomallo'moneyokwe bolmonyugono.” Kuudokaikono.

Jisasol a'mwo sumnowojokwe pworallu sukuloka tovinokwono

²⁹ Toruda'ai Jisaseke'aro gamoro uumjunyokwe toorogai'aro tooro wagwolago Jerikooda'ai bolokwino sumaveyokwe a'mwo kwolallo bwotonyago ton kuumjunopogano.

³⁰ Toro uumjunodopure toga a'mwo sumnowojokwe pworal puuto tovi wobo toru amwallajulorakono. Toro tooral Jisasol nuuwolo'mduke toolluno wuu'nyuno sumaleyokwe deko aro kuudolorakono. “Aguto kig Devitolluro jukweyago kwolaiyoloo, namino kalo neya agujunono!” Kuudolorakono.

³¹ Deko toro wuudodole toga a'mwo kwolallo ton muudubullokwe tovino aduullukuropogano. Toro duulluku'dopure kworal kuruv guureji wuujuno wuujuno solorakono. “Agutoloo, guu aguto kig Devitolluro jukweyago kwolaiyo tooku namino kalo agujunono!” Kuudolorakono.

³² Deko toro wuudodole toorallu Jisasol wuu'nyuno sumaiyokwe kuwai adavokaikono. Toro da'mno sumaiyokwe aro kuudoganokaikono. “Nuu kemi buro'nyo ikullumo'mo dekullunadopiyo?” Kuudoganokaikono.

³³ Toro kuudoganoka tekwojal aro kuudolorakono. “Agutoloo, navu sumdo kinosuno'mo anakullunadopiyo.” Kuudolorakono.

³⁴ Toro kuudolo tooralluno Jisasol kalo winyuno sumaiyokwe kemoro sumdo tonyu kuubogai'nokaikono. Toro kuubogai'noka kuga'gwo kuuno a'mwo sumnowojokwe su tekwojal sumdo kinyuno sumaleyokwe Jisasollu kuumjunolorakono.