Matyuu 2 - Gooti Toolluro Yogalokwono

A'mwo pi'mwo kuudokwe pworo Jisasollu kuuru'maropo tovinokwono

¹ Mariyav Jisasollu wagwolago Betelem toru somarokakwono. Wagwolago su tov kwako Juudiya tomuu wo'dowodokwono. Aki su toro toga a'mwo aguto kig Herootol mido amollomwallajukekono. Toro te Mariyav Jisasollu me'no somaroka toga a'mwo pi'mwo kuudokwe pworo kuujo tool sulopiyamoka tomuuda'ai aboporogano. Toro bino sumaveyokwe wagwolago Jeruusalem toru abai'movoporogano. Toro bai'mo'mno sumaveyokwe aro abuudoganomolloporogano.

² “Muudoga pwol Juu a'mwo abolo tonyu aguto kig wimo'nyo'moneyokwe su tool gadomuu dukomollomwakovo? Nevu su to kwolluro sullugabwo tov sulugumdo tovi imo'noduke tovi wonodowa kwolaiyo su toollu ilomoropiyo'moneyokwe abumwakuuwono.” Su toro abuudoganomolloporogano.

³ A'mwo aguto kig Herootol kwolaiyo muudoga kig imo'nono su toolluno wuu'nyuno sumaiyokwe gamoro sumwoluko tov gwabo kwinokaikono. Aki yiuwi'nokai a'mwo abolo wagwolago Jeruusalem tovi mwalodupudo kun kuruv aval'no sopogano.

⁴ Toro ino sumaveyokwe a'mwo aguto kig Herootol yiuwi'nokai pris mido mollomwalokwe toorogai'aro loowo tovino pi'mwo kuudokwe toorogai'aro toorai ju'bworoma'no sumaiyokwe aro kuudoganokaikono. “Krais toollu gadomuu yomapinoldukono?”

⁵ Su toro kuudoganoka toollu a'mwo su tooro aro kuudoporogano. “Kwako Juudiya tomuuda'ai wagwolago Betelem toru yomapinekono. Su toro tovino aiyoga proofet pworo Gooti toolluro yogalo puruv aro me'no ajakwolloporogano.

⁶ Wagwolago Betelem tov kula'nyo kuvi kuruv moro a'mwo abolo Isuraiyol tonyu mido mollomwallo'moneyokwe pwol wagwolago su to kuvida'ai bwonekono. Toro tovino tov kwako Juuda tomuuda'ai wagwolago aguto go'no go'nodo ton noo'dopure kuvi kuruv wagwolago kula'nyo su to'gwowi yiuwi'nokai su tonyu kwako tomuu'aro miwapiyodowodokwono. Ajakwolloporogano.” A'mwo aguto kig Herootollu su toro kuudoporogano.

⁷ Toro te Herootol yogalo su tovi wuu'nyuno sumaiyokwe a'mwo pi'mwo kuudokwe toorai yiulo tomuu wuuru'mallo'moneyokwe adapiyokaikono. A'mwo pi'mwo kuudokwe su toorai yiulo tomuu me'no doma'no sumaiyokwe abuuru'maropo toorai sullugabwo tovuro muudu'no sumo'noka tovino aro kuudoganokaikono. “Sullugabwo akav adoga sumo'noka'mdeyo?” Kuudoganokaikono.

⁸ Toro kuudoganoka tovi Herootol kuudo me'no youroma'no sumaiyokwe a'mwo pi'mwo kuudokwe su toorai wagwolago Betelem'no amodapiyokaikono. Toro toorai aro amodapiyokaikono. “Kevu plavopi kwolaiyo muudoga su toollu guureji neya jo'mgonomallulo. Toro so'mgonomapi tov mi neya banyujulo. Nuu kwonyu kuruv plavo'mi kwolaiyo muudoga su toolluno nokwo ilomoropiyamonyugono.” Amodapiyokaikono.

⁹ A'mwo aguto kig toolluro amodapiyoka su tovi a'mwo pi'mwo kuudokwe tooro wuu'nyuno sumaveyokwe avlavoporogano. Toro tooro muudu'nodo togasuro sullugabwo sumo'noka su tovi aki aiko te wonyuno sumaveyokwe ainamjoporogano. Toro tooro sullugabwo su tov sumdomgu wanoduke tovi kuuno ainamjoporogano. Toro kinamjuno sumaveyokwe sullugabwo tov kwolaiyo muudoga tool mwaloduke muunyu toru ai'movokakwono.

¹⁰ Toro te a'mwo pi'mwo kuudokwe tooro sullugabwo su tovuro ai'movoka tovi wonyuno sumaveyokwe ilaiyo bwotonyo soporogano.

¹¹ Toro tooro kwolaiyo muudoga tool mwaloduke ago tovino kuulno sumaveyokwe kwolaiyo muudoga su tooke'aro gami ganeyago Mariyakwe'aro tonallu auloonoporogano. Toro wonyuno sumaveyokwe kwolaiyo su toolluno mido wuulugulo'no'mno sulomoropiyaporogano. Toro ilomoropino sumaveyokwe kemi kuto ivito sugumaluko amullosajupo tonyuda'ai pun daluvo'mno kwolaiyo su toollu kwiyoporogano. Gool togai'aro frenkinsens togai'aro mur togai'aro ton daluvo'mno kwiyoporogano.

¹² Toro wino sumaveyokwe Gooti tool a'mwo pi'mwo kuudokwe su toorai wojo tovi'aro wiyalo'no'no Herootollomno aki aiko te novlapiyokwe duudapi kwiyokaikono. Toro kwiyoka tovino tov a'mwo pi'mwo kuudokwe su tooro kemi ago tomuuno aki aiko te plaiyo'mo tooro puuto gabovo puvi'aro avlavoporogano.

Joosepeke tonumdoto kwako Ijup'no lukado avlavopo tovinokwono

¹³ A'mwo pi'mwo kuudokwe tooro me'no wuugollu'mo'mno sumaveyokwe Aguto toolluro ensel pwol Joosepollu wojo tovi'aro bwiyalo'no'no aro abuudokaikono. “Guvu ilodavo'bi kwolaiyo tooke'aro gami ganeyago tokwe'aro tonallu kwako Ijup'no lukado domokavlavono. Herootol kwolaiyo toollu romiyoso'moneyokwe a'mgono yono'mekono. Toro te guvu kwako Ijup'no mokavlavo'bi yiuno nuu agudumi toga'no aikomgu nokwo bubinekugono.” Kuudokaikono.

¹⁴ Toro te Joosepol dukaino sumaiyokwe surakuuto toga kwolaiyo tooke'aro gami ganeyago tokwe'aro tonalluda'ai momwora'no sumaiyokwe kwako Ijup'no kuugollu'movokaikono.

¹⁵ Toro tonumdoto plaino sumaveyokwe kwako Ijup toru amwalopogano. A'mwo aguto kig Herootol yere maboloduke toga Joosepeke tonumdoto kwako Ijup toru kuuno amwallajupogano. Su toro sumo'noka tovino aiyoga proofet pwol Gooti toolluro yogalo tovi aro me'no ajakwollokaikono. “Moro kwolaiyo toollu Ijupda'ai doma'mekono.” Su toro ajakwolloka tov akaro toga suuwiyo kuvinono imwojo'moneyokwe sumo'nokakwono.

A'mwo aguto kig Herootol kwolaiyo muudoga toorai romiyoso'moneyokwe aduuwiyoka tovinokwono

¹⁶ Toruda'ai a'mwo aguto kig Herootol aro kuudo souromarokaikono. Oo a'mwo pi'mwo kuudokwe tooro miyomno aikomgu mabumaporodeyo. Toro tooro mi kuunano yogalo joukuu'nanyudumavo. Su toro kuudo yau'no sumaiyokwe surodo bwotonyo kuunokaikono. Toro wuunyuno sumaiyokwe a'mwo pi'mwo kuudokwe tooravuro yogalo me'no kuudopo tovino aki aiko te kuudo saurokaikono. Yogalo su tov sullugabwo muudu'no sumo'noka tovinokwono. Toro tovino kuudo yau'no sumaiyokwe a'mwo pworai aro amodapiyokaikono. “Kevu wagwolago Betelem'no plavopi yiuwi'nokai kwolaiyo muudoga tooro kworomo pullal muuwolo'nyungopo toorai doromiyosulo. Aki wagwolago Betelem tovi wobo toru mwalodupudo tooravuro kwolaiyo muudoga kworogai'aro doromiyosulo.” Amodapiyokaikono.

¹⁷ Su toro sumo'noka tovino aiyoga proofet Jeremaiya'wolluro yogalo ajakwolloka puvi suuwiyo sumwojokakwono. Yogalo su tov arokwono.

¹⁸ “Wagwolago Rama towai deko bwotonyo puruv kalo'mo yopi kumdato jodopure tovi kuu'nopokwono. Su tov Reselovida'ai abolo imo'nugelabodupudo ton kemi kwoloraiyo tonyuno kumdato adopogano. Kemoro kwoloraiyo su tobuuro me'no abolopiyopo tovino tov kalo dugoga wileyo'moneyokwe kuruv ku'nono mwilovopogano.” Aiyoga proofet Jeremaiya'wol su toro me'no ajakwollokakwono.

Joosepeke tonumdoto kwako Ijupda'ai aikomgu abopo tovinokwono

¹⁹ Joosepol kwako Ijup toru kuuno amwallajukekono. Mwalno sumaiyokwe lukomgu Herootol abolokaikono. Toro aboloka toga Aguto toolluro ensel pwol wojo tovi'aro biyalo'nyuno sumaiyokwe aro abuudokaikono.

²⁰ “Muugunyo toollu romiyoso'mo kuudo yau'dupudo tooro me'no aboloporogano. Toro tovino tov aga guvu ilodavo'bi kwolaiyo tooke'aro gami ganeyago tokwe'aro tonalluda'ai momworaro'bi kwako Isuraiyol tomuuno aikomgu domokavlavono.” Kuudokaikono.

²¹ Toro te Joosepol kwolaiyo tooke'aro gami ganeyago tokwe'aro tonallu momwora'no sumaiyokwe kwako Isuraiyol tomuuno aikomgu amokavlavokaikono.

²² Toro kuvi kuruv su toro toga a'mwo aguto Herootolluro muugunyo pwol gami ganumiyago toolluro aiko toru'no malluno sumaiyokwe a'mwo aguto kig sumo'nokaikono. Toro toolluno yovo tov Arkelausolekono. Toro tool kwako Juudiya tomuu mido amollomwallajukekono. Su toro tovino Joosepol wuu'nyuno sumaiyokwe Isuraiyol tomuuno plaiyo'mo luko sokaikono. Luko yoduke toollu Gooti tool wojo tovi'aro duudapi kwiyokaikono. Toro te Joosepol a'mwo aguto su toolluro mwaloduke toru irukuruwolovo'no Galili tomuuno avlavokaikono.

²³ Toro tool plaino sumaiyokwe wagwolago Nasaret toru ki'movo'no amjomwekovlaiyajukekono. Su toro tovino aiyoga proofet pworo Jisasolluno aro me'no adoporogano. “Su tool Nasaretda'aiyekono, dupinekono.” Su toro adopo tov kuvino sumo'nokakwono.