Matyuu 19 - Gooti Toolluro Yogalokwono

Jisasol a'mwo kwolabolo teyaul nyeru'mdowapinmwalbullokwe adoka tovinokwono

¹ Jisasol kuuguudo su ton me'no wuujuno sumaiyokwe distrik Galili tomuu wuugollu'movo'no distrik Juudiya tomuuno avlavokaikono. Toro plaino sumaiyokwe wonyo Joodanovi igo'mgu suloga'movokaikono.

² Toro iloga'mo'mduke toollu a'mwo abolo kwolallo bwotonyago ton kuumjunopekono. Toro kuumjunopo su tonyuda'ai nobollokwe tobuurai Jisasol sukulokaikono.

³ Toruda'ai Farasi pworo Jisasollu buuru'ma'no sumaveyokwe Jisasol abwolorawoneyokwe yamju abwiyoganoporogano. Toro tooro aro kuudoganoporogano. “A'mwo pwol kavlo nonaguto tovida'ai gami abolo tovi yasuwa'no aru'mdowapiyo'ji tov nokwo'mo'mdukono?” Kuudoganoporogano.

⁴ Toro kuudoganopo toorai Jisasol kuudokaikono. “Kevu Gooti toolluro yogalo sakwollungiko tonyu mamojagilodupudorekuldeyo? Yogalo puruv aro sakwollungikokwono. Muudu'nodo toga Gooti tool yiuwi'nokai tonyu yakwollo'no yiuno a'mwo tookeno abolo tokweno sokwollosokaikono. Su toro sakwollungikokwono.

⁵ Gooti tool su toro yokwollosuno sumaiyokwe aro adokaikono. A'mwo pwol gami kuunum kwolabolo teyaullu wuugollu'mowo'ji abolo puruv maronekono. Toro teyaul guro'mwonyo'bullu kulako yiuno puru'mono imo'nubulluneyaukono. Adokaikono.

⁶ Toro te Gooti tool a'mwo kwolabolo su teyaullu me'no amomgurowosoka tovino tov a'mwo kwolabolo teyaul go'no go'no miyoru'mdeyomwalo'bullu kuruv yiuno puru'mono to'no imo'nubulluneyaukono. Toro teyaullu a'mwo pwolnodo kwol kuruv nomolloru'mdowapiyo'jo.” Kuudokaikono.

⁷ Toro kuudoka tovi Farasi tooro kuudoporogano. “Guu toro adumado kuvi kuruv Moosesolno'gwowi aro ajakwollokaikono. A'mwo pwol gami abolo tovi ru'mdowapiyo'mo kwino'ji tool noru'mdowapiyo'moneyokwe puukwollikwiyo tovi me'no yokwollosowo'ji toga aru'mdowapiyo'ji to'gwowi nokwo'mokwono. Toro te Moosesolluro yogalo su tov buro'nyo'mo ajakwollokaldeyo?” Kuudoporogano.

⁸ Toro kuudopo toorai Jisasol aro kuudokaikono. “Kemoro poowokalago ton lumdo kuulopiyodupudo toorekulluno tov Moosesol yogalo su tov sokwollaikubweyokaikono. Toro kuvi kuruv muudu'nodo toga'no'gwowi Gooti tool a'mwo kwolabolo teyaullu nyeru'mdowapinbulluno'moneyokwe sokwollosokalmaiyo.

⁹ Aro ikudumo'mokwono. A'mwo pwol gami abolo tov a'mwo pweke kwonyalo miyodowodo tovi molleru'mdowapiyowo'ji abolo muuduko puruv amaro'ji tov a'mwo su tool kwonyalo yonekono.” Kuudokaikono.

¹⁰ Toro kuudoka tovi gamoro uumjunyokwe tooro Jisasollu aro kuudoporogano. “A'mwo tool yiuno gami abolo tokwe to'no guro'mwonyumwalbulluno tovino anekudumodo su tov nebalo'mno'juki a'mwo abolo ton kwolabolo nyoma'numwalpiyo.” Kuudoporogano.

¹¹ Toro kuudopo tovi Jisasol aro kuudokaikono. “Ibwaso'mo yogalo akavi yiuwi'nokai a'mwo tooro ilaiyo mamollomapinokwono. Toro kuvi kuruv yiuno Gooti tool jurogudo wiyodowodo toorono'gwowi yogalo akavi ilaiyo nokwo mollomapinorogano.

¹² Su tov aro tovinokwono. A'mwo pworo abolo mama'dupudorogano. Su toro tooravuro pworo kemi kuuneyago ton somaropo tovida'ai kwola'mwolo to'no imo'nugovla'mdupudorogano. Aki pworo kemoro nyopto tov me'no amovlosopingoporogano. Aki pworo muunyu kai'muuda'ai aguto kig toolluro mido mollomwalo tovi womdo wimovlaiyo'moneyokwe to'no kuudo yovo'dogallau'dupudorogano. Toro te a'mwo pwol moro kuuguudo aikudumo akavi kuvinono uumjunyo'mo tool ilaiyo nokwo mollomaronekono.” Kuudokaikono.

Kwoloraiyo ton Jisasollomno bodopure tonyu nuumjuku'mwalpiyokwe tovinokwono

¹³ Toruda'ai a'mwo abolo pun kemi kwoloraiyo tobuuraida'ai Jisasol ato uubogai'nowo'ji subusu'nyogalo madono'moneyokwe amokabopogano. Toro mokabodopure tonyu Jisasolluro uumjunyokwe tooro wono'mno yogalo amojurugoloporogano.

¹⁴ Toro kuvi kuruv Jisasol kuudokaikono. “Kwolaiyo taiyo numiyomno bodopure tonyu kevu uumjukuto mipinono. Nokwo wonyapino julo. Su tov aro tovinokwono. Muunyu kai'muuda'ai aguto kig toolluro mido mollomwalo tovi dolago tomuu kuulomwallo'mo tov a'mwo abolo ton yiuno kwoloraiyo akanbusuko sumo'nupi tono nokwo kuulomwalpinogano. Su toro tovinokwono.”

¹⁵ Jisasol toro wuujuno sumaiyokwe kwoloraiyo amokabopo tobuurai pwolda'ai pwolda'ai kemi mido tonyu ato tokwe uubogai'no'no subusu'nyogalo amadokaikono. Me'no majuno sumaiyokwe Jisasol su tomuu kuugollu'movokaikono.

A'mwo kuto ivito bwotonyagokwe pwol Jisaseke kuuguudo adolo tovinokwono

¹⁶ Toruda'ai a'mwo pwol Jisasollomno bino sumaiyokwe aro kuudoganokaikono. “Ibwasokweyoloo, nuu aiyo yiunokuudo mujomwekovlaiyo'moneyokwe tovi mallo'mo tov buro'nyo sugupasudo sumi tovida'ai ma'monyudukono?” Kuudoganokaikono.

¹⁷ Toro kuudoganoka toollu Jisasol kuudokaikono. “Sugudo tool yiuno Gooti pwolnodo toolnodokwono. Toro tovino tov guu sugupasudo tonyuno buro'nyo'mo donyudoganmwakuno? Gumoro anyudoganmodo tovino aro gudumo'mokwono. Guu aiyo yiunokuudo mujomwekovlaiyo'moneyokwe tovi mallo'mo agujuno'ji tov Gooti toolluro loowo tonyu neya duumjunogawono.” Kuudokaikono.

¹⁸ Toro kuudoka tovi a'mwo tool kuudoganokaikono. “Buro'nyo buro'nyo loowo tonyu uumjunmonyudukono?” Kuudoganokaikono. Toro toollu Jisasol kuudokaikono. “Guvu loowo aro tonyuno kuudo nyau'mwakuno. Romiyosi mibinono. A'mwo pworavuro abolo togai kwonyalo mibinono. Kuuko mibinono. A'mwo pworaino kuunano mamollouruudubinono.

¹⁹ Guu junumiyago juneyago tovallu kwako tomuu'aro duuwiyogawono. Aki yiuwi'nokai a'mwo abolo pwolno puru'mono kuuru'ma'bi su tonyuno kalo buuropino neya domollono. Guvnokwekujuno gujunodowodo to'busuko kubalno a'mwo abolo su tonyuno aval'no neya domollono.” Kuudokaikono.

²⁰ Toro wuujuno sumaiyokwe a'mwo muugunyunodo su tool Jisasollu aro kuudokaikono. “Nuu yiuwi'nokai loowo akanyu uumjungelabodumdonyugono.” Kuudokaikono.

²¹ Toro kuudoka toollu Jisasol aro kuudokaikono. “Guu puvino supto kuuno sadokuuno. Guu plavo'bi gumoro yiuwi'nokai kuto ivito su tonyu a'mwo pworo neya agubipuro. Su toro agubipi tonyuda'ai nuugwiyo tov momworaro'bi a'mwo abolo apoo'nyaiyo tobuurai neya duuwiyono. Guu su toro subi tooku lukomgu Gooti toolluro ago toru sulomwalbi toga sugumaluko kuunodo punyu noma'binekugono. Aki guu mi neya donumjunono.” Kuudokaikono.

²² A'mwo muugunyunodo su tool kuto ivito bwotonyagokwe toolluno tov Jisasolluro yogalo su tovi wuu'nyuno sumaiyokwe kumjujo kulako moropiyo'no jul'nyo subwosunokaikono. Toro tool Jisasollu wuugollu'mo'mno sumaiyokwe avlavokaikono.

²³ Toro te Jisasol gami uumjunyokwe toorai kuudokaikono. “Nebal'no ikudumo'mokwono. A'mwo kuto ivito bwotonyagokwe pwekwo muunyu kai'muuda'ai aguto kig toolluro mido mollomwalo tovi kuulomwallo'mo tov kaveno mwimo'nonekwogano.

²⁴ Toro te aki aiko te ikudumo'mokwono. Sa'ai kemel pwol lodo tovi wuulo kuulopiyodapudo nodobuullo tovi'aro kuullo'mo tov kavenodo'maiyo. Su toro to'busuko kubalno a'mwo kuto ivito bwotonyagokwe tekwo aguto kig Gooti toolluro mido mollomwallo tovi kuullo'moneyokwe to'gwowi kaveno mwimo'nonekwogano.” Kuudokaikono.

²⁵ Jisasolluro yogalo su tovi gamoro uumjunyokwe tooro wuu'nyuno sumaveyokwe mollolokurosi bwotonyo soporogano. Toro yo'mno aro kuudoporogano. “Yogalo anekudumodo su tovino tov aiyo yiunokuudo mujomwekovlaiyo'moneyokwe tovi ala'mworuvo nokwo mapino'mdukono?” Kuudoporogano.

²⁶ Toro toorai Jisasol moroonyuno sumaiyokwe aro kuudokaikono. “Su tovi yo'mo tov a'mwo tooro ku'nono mipinokwono. Toro kuvi kuruv Gooti toolno'gwowi su tovi yo'mo tov nokwo'mekono. Gooti tool yiuwi'nokai noonyumwonyu pun yo'mo kuudo sauro'ji kuruv kaveno yonekono.” Kuudokaikono.

²⁷ Toro kuudoka tovi Pital aro kuudokaikono. “Guu dukonekwonadokuuno? Nevu nemi yiuwi'nokai tonyu yogallu'mowono gumi agumjunmwakuuwono. Toro toonolluno tov nevu buro'nyo buro'nyo ton maranonoldukono?” Kuudoganokaikono.

²⁸ Jisasol aro kuudokaikono. “Nuu nebal'no ikudumo'mokwono. Gooti tool yiuwi'nokai tonyu aiyo me'no amollovo'dogaloso'ji toga nuu A'mwo Kwolaiyo Kuunodo toonyu moro sia kig jurogudo bwotonyokwe toru nyulomwalmonyugono. Su toro sulomwalmi toga kevu numjunodupudo kworekul kuruv 12-pela sia kig go'no go'nodo toru nyulomwalpinorekikono. Toro ilomwalopi Isuraiyolda'ai 12-pela yovodolobunyo tonyu mido nomollomwalmwalpinorekikono.

²⁹ Aki a'mwo abolo mino kuudo anubwepi ton kwako akavi kuuno mwalopi toga kemi agodeyo oo kuugwai'yagorodeyo oo jo'mwodeyo oo kuuneyagodeyo oo kuunumiyagorodeyo oo kwoloraiyodeyo oo womdodeyo tonyu nuugollu'mopinogano. Yiuwi'nokai kuugollu'mopi su tonyuno lukomgu muuduko pun nomapinogano. Yiuwi'nokai noonyumwonyu kuugollu'mopi su ton muuduko amapi toga Gooti tool 100-pela pugai'aro muunyu toru nuuwiyonekono. Aki a'mwo abolo su ton aiyo yiunokuudo mujomwekovlaiyo'moneyokwe tovi maropi yiunokuudo nomjomwekovla'mwalpinogano.

³⁰ Lukomgu su toro toga, agasuro aguto billumo'nodapudo bwotonyago tooro aiyowo'mo nobwollumo'napinorogano. Aki agasuro aiyowo'mo bwollumo'nodapudo su tobuurono'gwowi su toro toga aguto nobillumo'napinogano.” Jisasol toro kuudokaikono.