Matyuu 18 - Gooti Toolluro Yogalokwono

Ala'mwol aguto kig Gooti toolluro mido mollomwalo tovi anakuuto tomuu uuwolo'mdowodoldukoneyokwe tovinokwono

¹ Su toro toga Jisasolluro uumjunyokwe tooro Jisasollomno bino sumaveyokwe aro abuudoganoporogano. “Muunyu kai'muuda'ai aguto kig toolluro mido mollomwalo tovi anakuuto tomuu nemoro akavida'ai pwol ala'mwol dukuuwolo'mwallo?” Abuudoganoporogano.

² Toro kuudoganopo tovi Jisasol kwoloraiyo puruvi doma'no sumaiyokwe uumjunyokwe su tooravuro sumdollu toru amolludapiyokaikono.

³ Toro molludapino sumaiyokwe toga aro kuudokaikono. “Nuvu nebal'no ikudumo'mokwono. Kevu kemi ma'no ma'no pasudo toorai buulo muugunyumopiyopi kwoloraiyo pubuurobusuko mimo'nupi tov muunyu kai'muuda'ai aguto kig toolluro mido mollomwalo tovi ku'nono maulomwalpinorekikono.

⁴ Toro kuvi kuruv a'mwo pwol kwoloraiyo akabuulbusuko kwako tomuu'aro amorumwalluno'ji su toolno'gwowi muunyu kai'muuda'ai aguto kig toolluro mido mollomwalo tovi anakuuto tomuu aguto kuunodo noullumo'numwalonekono.

⁵ Aki a'mwo pwol mino yovo tovida'ai kwoloraiyo aka'busuko puruvi ilaiyo amollomaro'ji toolno'gwowi nuu kwonyuda'ai ilaiyo mollonumaronekono.” Kuudokaikono.

A'mwo pwol a'mwo abolo punyu ma'no ma'no ipureyokwe ai'nomaro'ji tool tabunyu nomarono tovinokwono

⁶ Jisasol toro wuujuno sumaiyokwe aki aro kuudokaikono. “A'mwo pwol kwoloraiyo mino kuudo anubwemwakopo akabuurai ma'no ma'no ipino'moneyokwe tovino amollubworomokavlawo'ji su toollu jul'nyo bwotonyo nomaronekono.” Su tov yovekurajo aro to'busukokwono. “A'mwo kaiya'no amollubworomokavlawo'ji su toollu a'mwo pworo gamoro boruko tovi sulo bwotonyo pweke galogullosopi wonyo buugo tovi anakuuto tomuu amulegoukuurosoneyokwe wolomogalowopiyapinekono. Su tov jul'nyo bwotonyokwono. Toro kuvi kuruv a'mwo pwol kwoloraiyo tobuurai kaiya'nodo tomgu'aro amollubworomokavlawo'ji su toollu Gooti toolluro jul'nyo kuubweyo'ji to'gwowi bwotonyo kuunodokwono.

⁷ Toro te kwako akavida'ai a'mwo abolo ton a'mwo abolo pubuurai ma'no ma'no pasudo tovi ipureyokwe ai'nomapi tov tabunyu bwotonyo nomapinogano. Nebal'nodokwono. Buro'nyo buro'nyo pasudorodeyo su tooraida'ai a'mwo abolo ton ma'no ma'no ipureyokwe kuvinono ne'noma'mwalonogano. Toro te a'mwo pwol a'mwo abolo pubuurai ai'nomaro'ji su toolno'gwowi tabunyu bwotonyo nomaronekono.”

⁸ Jisasol toro wuujuno sumaiyokwe aki yovekurajo kuuguudo pun aro kuudokaikono. “Guu, du'muudo maduuwiyopiyodowodo tovi novla'miyo, adubi tooku gumoro ato'mdeyo oo suvlo'mdeyo tov ma'no ma'no yo'mo tovino ame'nogumokwo'ji tov neya dovo'mowopiyono. Toro tooku a'nowa'meyokweyo'mdeyo oo suvlo nowa'meyokweyo'mdeyo sumo'nubi kweku kuruv aiyo yiunokuudo mujomwekovlaiyo'moneyokwe tovi mallo'mo tov ilaiyokwono. Guu ato puusalokweyo'mdeyo oo suvlo puruvalokweyo'mdeyo tooku ma'no ma'nodo tov kuuno gwo'dowo'jure tookuno'gwowi duko yiunokuudo nuuwo'nodowodo tovi noolomogaloguwopiyapinekugono.”

⁹ Aki puruv aro kuudokaikono. “Guu, du'muudo maduuwiyopiyodowodo tovi novla'miyo, adubi tooku gumoro sumdo puruv ma'no ma'no yo'mo tovino ame'nogumokwo'ji tov neya dogalowojopiyono. Toro tooku sumnowojokwe sumo'nubi kweku kuruv aiyo yiunokuudo mujomwekovlaiyo'moneyokwe tovi mallo'mo tov ilaiyokwono. Guu sumdo puruvalokwe tooku ma'no ma'nodo tov kuuno gwo'dowo'jure tookuno'gwowi du'muudo tovuro duko maduuwiyopiyodowodo tovi novla'biyo.

^10-11 Toro te kevu kwoloraiyo su tobuuraino biyolo noduu'mwojumwalpiyo. Su tovino aro ikudumo'mokwono. Muunyu kai'muuda'ai ensel pworo kwoloraiyo su tobuurai mollomwalodupudorogano. Ensel mollomwalodupudo su tooro moro Nyunumiyago muunyu kai'muuda'ai toolluro sumdomago toru yiuwi'nokai toga kuuloda'mdupudorogano. Toro tovino tov kevu kwoloraiyo su tobuuraino biyolo noduu'mwojumwalpiyo.”

A'mwo pwol gami sipsip sounoso'ji toollu yo'mgonomarono tovino yovekurajokwono

¹² Aki Jisasol aro kuudokaikono. “Kevu buro'nyo kuudo jukiyau'mwakovo? A'mwo pwol wan handret sipsip toorai ki'duvolodowodekono. Toro tool gami sipsip su toorogai mokavlavowo'ji sipsip pwollu younosonekono. A'mwo su tool sipsip sounoso'ji toollu nokwo wonyapino yonoldukono? Awiyo, a'mwo su tool 99-pela sipsip toorai muumuudo tomuu uumwallowo'ji gami sipsip sounoso'ji su toolluno yo'mgonomallo'mo plawonekono.

¹³ Toro tool gami sipsip su toollu so'mgonomaro'ji toga ilaiyo bwotonyo ibwosunonekono. Su toro tovino nuu nebal'no ikudumo'mokwono. A'mwo su tool gami 99-pela sipsip tooraino ilaiyo bwotonyo ibwosunodowodekono. Toro kwol kuruv sipsip so'mgonomaro'ji su toolluno ilaiyo to'gwowi muunyu toru'aro uuwolowo'ji ilaiyo bwotonyo ibwosunonekono.

¹⁴ Su toro to'busuko kubalno moro Nyunumiyago muunyu kai'muuda'ai tool kwoloraiyo su tobuuravuro puru'monodo kuruv du'muudo tomuuno yiunokuudo novlapiyokwe tovino winodowodekono.”

Jisasolluro a'mwo pwol gumi kaiyako yagujugolodowo'jure toollu guu adadomgu'aro mollado'mo'bino'mdukoneyokwe tovinokwono

¹⁵ Aki Jisasol aro kuudokaikono. “Guvu gumi avalo Jisasolluro a'mwo pwekwo kaiyako sagujugolo'ji tov guu yiulo tomuu'aro kwollomno bo'bi gamoro kaiyako sagujugolo'ji su tovino kuu'maiyo toru neya dodolukuurubweyono. Gumoro su toro adodolukuurubwebi tovi a'mwo tool wuu'nowo'ji gami poowokalago kuunodo tokwe adodowiyoku'bworosuno'ji tov a'mwo su tekwo gumi jugwai'yago aki aiko te gujumo'nowo'ji nokwo ibwoto'numwalbullunorakikono.

¹⁶ Toro kuvi kuruv a'mwo su tekwo gumi maguu'nyubusuko so'ji to'gwowi guvu a'mwo pweke'aro'mdeyo oo pworake'aro'mdeyo momworaro'bi a'mwo su toollomno neya domokabono. A'mwo amokabi su tooral a'mwo tekwojuro kaiya'no pasudo tovi me'no wonodubulorakono. Toro amokabi su tooral gumoro sumdomguda'ai yiuwi'nokai yogalo adodolukuurubwebi tonyu jurogudo nokwo duuwimwojubullunorakono.

¹⁷ Toro te kemoro yogalo wuudodopure tovi a'mwo tekwo muu'nyubusuko kuuno so'ji tov guvu jul'nyo su tovi momworaro'bi Jisasolluro mollu'bwoto tonyomno neya mokavla'binekugono. Jisasolluro mollu'bwoto tovida'ai a'mwo abolo ton wuu'nopi a'mwo su toolluno adomdukuurosupi tovi muumjuno'ji tov kevu a'mwo abolo Jisasolluno kuudo muubweyodupudo tonyubusuko'mdeyo oo takis nuugwiyo ma'dupudo tooraibusuko a'mwo su toollu aval'no neya igolmwalpinekono.

¹⁸ Nuvu nebal'no ikudumo'mokwono. Kevu kwako akavi mwalopi a'mwo abolo ma'no ma'no yodopure tonyuno yogalo adomdukuurosupi tov Gooti tool gamoro ago muunyu kai'muu kuruv aval'no domdukuurosonekono. Aki kevu kwako akavi mwalopi a'mwo abolo ma'no ma'no yodopure tonyu surolowapipi to'gwowi Gooti tool gamoro ago muunyu kai'muu kuruv aval'no nyurolowapiyonekono.” Jisasol toro kuudokaikono.

¹⁹ Toro wuujuno sumaiyokwe kuudokaikono. “Aki puruv nuu aro ikudumo'monyugono. Kevu kwako akavi mwalopi buro'nyo buro'nyo yamuugojo punyuno kuudo aval'no wosopi anyudoganpi tov moro Nyunumiyago muunyu kai'muuda'ai tool kemiyo'mo kuvinono yonekono.

²⁰ Neya duu'nyulo. A'mwo pworalo'mdeyo oo pworapwolorodeyo tooro mino yovo tovi su'bwo'nomwalpi tov nuu a'mwo su to kworai akuuto toru mwalodumdonyugono.” Jisasol toro kuudokaikono.

A'mwo ki'nato womdokwe pwol dinau kurukwe toolluno yovekurajokwono

²¹ Toruda'ai Pital Jisasollomno bino sumaiyokwe aro kuudoganokaikono. “Agutoloo, nuuge avalo pwol mi kaiyako sanyugolo'ji tov gamoro ma'no ma'no pasudo su tovino yiunokuudo modukwopiyo'mo tov adadobuul tomgu'aro su toro nokwo imwalmonyudukono? Nuvu yiunokuudo modukwopiyo'mo tov atobuul ato pumguda'ai pworake toga nokwo imwogapimonyudukono?” Kuudoganokaikono.

²² Toro kuudoganoka toollu Jisasol kuudokaikono. “Guvu aro kuudo nyau'biyo. Oo a'mwo kaiyako sanyugolo'ji toolluro ma'no ma'no pasudo tovino yiunokuudo modukwopiyo'mo tov yiuno atobuul ato pumguda'ai pworake toga'no to'no imwalmonyugono. Kuudo nyau'biyo. Toro kuvi kuruv a'mwo pwol gumi kaiyako sagujugolo'ji su toolluro ma'no ma'no pasudo tovino kuudo dukwopiyo'bi miyou'movlaiyo'mo to'gwowi yiuwi'nokai toga neya domjumovlavogawono. Guvu kaiyako sagujugolpi tooravuro ma'no ma'no pasudo tovino yiunokuudo modukwopiyo'mo su tov yiuwi'nokai toga mujo'movlaiyo'moneyokweyokwono.

²³ Su tovino kavlo tov arokwono. Muunyu kai'muuda'ai aguto kig toolluro mido mollomwalo tovi dolago tomuu kuulomwallo'mo tov yovekurajo aro to'busukokwono. A'mwo aguto kig pwol gamoro ki'nato womdokwe toorai kuudokaikono. “Aga kemoro dinau nuugwiyo ton aki aiko te neya donubiyulo.” Kuudokaikono.

²⁴ A'mwo aguto kig su tool dinau nuugwiyo ton kuuno ma'duke toga a'mwo ki'nato womdokwe pwekwo gamoro dinau tov 10 milyan kina tomgu'aro kurukwekono.

²⁵ Toro tekwo gamoro dinau su tovi ku'nono muubiyonekono. Toro tovino tov a'mwo aguto kig tool aro adomdukuurosokaikono. “Nuu a'mwo dinau kurukwe akaike'aro gamoro abolo tokwe'aro gamoro kwoloraiyo togai'aro gamoro yiuwi'nokai kuto ivito togai'aro ton maket woso'mi nuugwiyo anubipi tov ma'monyugono. Su toro ama'mi toga nokwo dumonyugono, Oo gamoro dinau tov me'nodeyo.” A'mwo aguto kig tool toro adomdukuurosokaikono.

²⁶ Toro te a'mwo ki'nato womdo yodowodo dinau bwotonyokwe su tekwo gami a'mwo aguto kig mido mollomwalokwe toolluro dolago tomuu bomuulo'na'no sumaiyokwe kumdo aro ajugunokaikono. “Oo nuu tekwonyuno sogwollo purukwe'aro ainbi tov nuvu moro yiuwi'nokai dinau ton nogubimonyugono.” Ajugunokaikono.

²⁷ Toro ajugonoka toolluno a'mwo aguto kig tool kalo winyuno sumaiyokwe dinau tovuro jul'nyo tovida'ai amollurolowapiyokaikono. Yo'no aki a'mwo ki'nato womdokwe su tekwojuro yiuwi'nokai dinau tonyu amodukwopiyokaikono.

²⁸ Toro kuvi kuruv a'mwo ki'nato womdokwe su tool aguto kig mido mollomwalokwe toolluda'ai buugollu'mokalokwino sumaiyokwe gavuge avalo ki'nato womdokwe gabovo pwollu abilluru'marokaikono. Toro billuru'ma'no sumaiyokwe gamoro boruko tovi'aro agalomworarokaikono. Ki'nato womdokwe gabovo su tekwo atousal silva nuugwiyo tomgu'aro dinau tov kurukwekono. Toro toollu galomwora'no sumaiyokwe aro adumuurolovokaikono. “Guvu dinau su tov yere manubibi tov mirolovogwapimekugono.” Adumuurolovokaikono.

²⁹ Toro te lukomguda'ai ki'nato womdokwe su tekwo gavuge ki'nato womdokwe avalo toollu dolago tomuu bomuulo'na'no sumaiyokwe kumdo aro ajugunokaikono. “Oo nuu tekwonyuno sogwollo pwekwo ainyunbi tov moro yiuwi'nokai dinau tov nogubimekwonyugono.” Ajugonokaikono.

³⁰ Toro ajugonoka kuvi kuruv sumdomguda'ai a'mwo ki'nato womdokwe su tool sogwollo kinyo'mo mwinokaikono. Toro tool a'mwo dinaukwe lukomguda'ai su tekwoji galomwora'no sumaiyokwe wuulo killo'mo ago puvi aulomerosokaikono. Toro kuulomerosuno sumaiyokwe aro kuudokaikono. “Guvu gumi yiuwi'nokai dinau ton me'no anubibi toga'no nokwo irolo'nubinekugono.” Kuudokaikono.

³¹ A'mwo ki'nato womdokwe pworo su toro yoduke tovi wonyuno sumaveyokwe a'mwo ki'nato womdokwe lukomguda'ai tekwojuno kalo bwotonyo kwinoporogano. Toro tooro aguto kig toollomno plaino sumaveyokwe yiuwi'nokai a'mwo ki'nato womdokwe sumdomguda'ai toolluro soka tovino kuudoporogano.

³² Toro wuudodopure tovi a'mwo aguto kig tool wuu'nyuno sumaiyokwe a'mwo ki'nato womdokwe su toollu adomarokaikono. Toro doma'no sumaiyokwe aro kuudokaikono. Guu ki'nato womdokwe tooku kaiya'no kuumwiyekugono. Guvu kumdo adanyugonmodo toga nuu gumoro dinau bwotonyo tovi amagudukwopimonyugono.

³³ Nuvu gumino kalo amagumwonyumwa'jonyugono. Toro amagumwonyumwa'jo toonyubusuko kubalno guu kweku kuruv guvuge avalo ki'nato womdokwe tekwoji aval'no kalo nokwo amamwonyo'bujukekugono. Kuudokaikono.

³⁴ Toro wuujuno sumaiyokwe a'mwo aguto kig surodo wuunodowodo su tool a'mwo ki'nato womdokwe toollu wuulo killo'mo ago tovi kuulomerosupino'moneyokwe a'mwo pworai amorubweyokaikono. Toro morubweno sumaiyokwe aro kuudokaikono. A'mwo akal gamoro yiuwi'nokai dinau ton yere mabiyodowo'jure toga danyu'nyuwuulo bwotonyo tov neya wikullumwalpinekono. A'mwo aguto kig tool toro amodapiyokaikono. Yovekurajo tov torokwono.

³⁵ Toro te moro Nyunumiyago muunyu kai'muuda'ai tool kemi su toro tomgu'aro aval'no nyaikullugolo'jo. Toro tovino tov kevu kemi avalo tellugwai'yago ikullumo'nodupudo tekwojavuro kaiyako saikullugolpi tov kevu su to kworavuro ma'no ma'no pasudo tovi kemi poowokalago kuunodo togai yiunokuudo neya domodukwopiyogaulo. Toro kuvi kuruv kevu su toro mipi to'gwowi moro Nyunumiyago muunyu kai'muuda'ai tool yovekurajo to'busuko tomgu'aro aval'no nyaikullugolmwalonekono.” Jisasol su toro kuudokaikono.