Matyuu 17 - Gooti Toolluro Yogalokwono

Jisasolluro kulako tov judo pumgu'aro amoropiyoka tovinokwono

¹ Toruda'ai iruko atobuul ato pullugwo me'no kuuwolo'noka toga Jisasol gami uumjunyokwe yiuno Pitaike Jemseke aki Jemsollu gagwai'yago Jooneke toorai momwora'no sumaiyokwe judo tooro mwallo'moneyokwe muumuudo kumi'yago pwollu amokailokaikono.

² Toro mokailno sumaiyokwe muugona'dopure toga Jisasolluro kulako tov judo pumgu'aro amoropiyokaikono. Gamoro sumdomago tov kuujo toolbusuko awopiyokakwono. Aki gamoro youro kuruv bako to'busuko wiya'jo to'no moropiyoduke tovi kwonoporogano.

³ Toro tovi muugona'dopure toga Mooseseke Ilaijaike tooral Jisaseke kuuguudo juda'nodopure toorai kwonoporogano.

⁴ Su toro tovi wonyuno sumaveyokwe Pital Jisasollu aro kuudokaikono. “Agutoloo, nevu akawai amwakuuwo tov ilaiyokwono. Toro te guu ilaiyo agujuno'ji tov nuu akawai sel ago puruvapuruv modumonyugono. Puruv gumiyo'mokwono. Puruv Moosesollo'mokwono. Puruv Ilaijallo'mokwono. Su toro amodumo.” Kuudokaikono.

⁵ Pital toro wuudoduke toga sulu'wo bako awopingikokwe puruv Jisasollu abwolobu'duvolomarokakwono. Sulu'wo abwolobu'duvolomaroka su tovi anakuuto tomuuda'ai yogaimaguurai puruv alokabokakwono. Toro tov aro adokakwono. “Akal moro Kwolaiyo kalo buuropino nyunodowodo tookono. Toro toolluno ilaiyo kuunodo anyunumaiyoo. Gamoro yogalo dodowo'jure tonyu kevu neya duu'nogaulo.” Adokakwono.

⁶ Gamoro uumjunyokwe tooro yogaimaguurai su tovi wuu'nyuno sumaveyokwe luko bwotonyo yo'mno kwako tomuu kwolomuulo'naroporogano.

⁷ Toro wolomuulo'na'dopure toorai Jisasol bino sumaiyokwe ato tokwe kuubogai'nokaikono. Toro uubogai'no'no aro kuudokaikono. “Kevu julodaiyulo. Luko mipinono.” Kuudokaikono.

⁸ Toro wuujuno sumaiyokwe Pitaike Jemseke Jooneke tooro sumdo iloonyopiya'mno kwonopo tov a'mwo pwolnodo kwollu kuruv mwonoporogano. Yiuno Jisasol judo toollu kwonoporogano.

⁹ Su toro tovi me'no wonyuno sumaveyokwe muumuudo toolluda'ai aikomgu kwolaboporogano. Toro wolabino sumaveyokwe toga Jisasol gami uumjunyokwe su toorai duudapi aro kwiyokaikono. “Kevu sumdo kwonmapo su tovino a'mwo abolo punyu muudupinorekikono. Yiuno A'mwo Kwolaiyo Kuunodo toonyu bolo'mi aiyo aiko te aduka'mi toga'no nokwo wuudupinorekikono.” Aduuwiyokaikono.

¹⁰ Toro wuujuno sumaiyokwe gami uumjunyokwe tooro Jisasollu aro kuudoganoporogano. “Loowo tovino pi'mwo kuudokwe tooro aro dodupudo tov, “Sumdomgu Ilaijalda'ai bowo'ji lukomgu Krais tool bwonekono.” Su toro dodupudo tov buro'nyo tovino'mdukono?” Kuudoganoporogano.

¹¹ Su toro kuudoganopo toorai Jisasol aro kuudokaikono. “Yogalo ajungiko su tov nebal'nodokwono. Sumdomgu Ilaijal bowo'ji yiuwi'nokai tonyu yovo'dogalosonekono.

¹² Toro kuvi kuruv aro ikudumo'mokwono. Gooti toolluro yogalo tovi Ilaijalluno sakwollungiko su tov kuvinono me'no abai'movokaikono. Toro abai'movoka su toollu a'mwo tooro miworovomaro'mno kevnokweravuro kuudo sauropo tovida'ai kaiyako sugolopekono. Kaiyako toro sugolopo to'busuko kubalno nuu A'mwo Kwolaiyo Kuunodo kwonyu kuruv kaiyako nyanyugolpinonyugono. Su toro yanyugolodopure tovida'ai danyu'nyuwuulo ton nyubwosunmonyugono.” Kuudokaikono.

¹³ Toro me'no wuujuno sumaiyokwe toga gami uumjunyokwe tooro kuudo souromaroporogano. Oo Ilaijalluno yogalo anekudumoka su tov Wonyo Galuvollokwe Joonolluno dodadopiyo. Kuudo souromaroporogano.

Jisasol kwolaiyo kuullo ma'no ma'nodokwe pwollu sukuloka tovinokwono

¹⁴ Aki toruda'ai Jisaseke'aro gami uumjunyokwe pworapwol toorogai'aro tooro aikomgu wolabo'mno a'mwo abolo kwolallo tonyu abwolluru'maroporogano. Toro bwolluru'ma'no sumaveyokwe a'mwo pwol Jisasollu dolago tomuu suduko abinuguto'nokaikono. Toro tool aro kuudokaikono.

¹⁵ “Agutoloo, mi kwolaiyo toolluno guu kalo neya agujunono. Moro kwolaiyo su tool gulludubolo yoduke tovida'ai danyu'nyuwuulo bwotonyo ibwosunodowodekono. Toro tool yiuwi'nokai toga dukwagupto toruke'aro wonyo buugo toorogai'aro anakuuto tomuu wolowiye'namo'nodowodekono.

¹⁶ Toro te nuu moro kwolaiyo su toollu gumoro uumjunyokwe tooraiyomno kuumokamo kuvi kuruv ku'nono mikulmaporogano.” Kuudokaikono.

¹⁷ Toro toollu Jisasol kuudokaikono. “Kevu agasuro akagaikul Gooti toolluro jurogudo tovino kuudo muubweyodupudogaikikono. Nuu kevuge manyu toga me'no mujomwekelabodumdonyugono. Aki manyu toga kemoro jul'nyo toorai mollovo'dogalmelabodumdonyugono. Toro kuvi kuruv kevu kuudo po'dogalo miyou'movla'mdupudogaikikono.” Toro wuujuno sumaiyokwe kuudokaikono. “Kwolaiyo toollu donumokabilo.” Kuudokaikono.

¹⁸ Toro wuujuno sumaiyokwe toga Jisasol kwolaiyo amokabopo su toolluro anakuuto tomuuda'ai kuullo ma'no ma'nodo kuulomwalodowodo toollu yogalo amojurugolokaikono. Toro mojurugolno sumaiyokwe kuullo ma'no ma'nodo tool kwolaiyo toolluda'ai abolokwokaikono. Toro abolokwoka kuga'gwo kuuno kwolaiyo su tool sukulnokaikono.

¹⁹ Lukomgu gamoro uumjunyokwe tooro bino sumaveyokwe Jisasollu kwolallo ton mamuugona'dopure tomuu aro kuudoganoporogano. “Nev toonolno'gwowi kuullo ma'no ma'nodo toollu ku'nono mamodovomjapimawo tov buro'nyo kavlo tovino'mdeyo?” Kuudoganoporogano.

^20-21 Jisasol kuudokaikono. “Su tov aro tovinokwono. Kemoro Gooti toolluno kuudo uubweyodupudo tov kula'nyo kuunodokwono.” Toro wuujuno sumaiyokwe kuudokaikono. “Nuvu nebal'no ikudumo'mokwono. Kemoro kuudo uubweyodupudo tov yiuno iko mastet sulo kula'nyo tollovobusuko kuudo kuubwepi kuruv Gooti toolno'gwowi kuvinono yonekono. Toro te kevu Gooti toolluno kuudo uubweyopi muumuudo pwollu aro kuudupi tov, Oo ilojo'mowopiyabo'bi pumuuno dovlavono, su toro kuudupi tov kuvinono imo'nonokwono. Aki kuudo kuubwepi su tovi'aro noonyumwonyu womdo tonyu nokwo imwalpinogaikikono.” Kuudokaikono.

Jisasol, “Nuu bolo'mi aiyo aiko te noduka'monyugono,” aiko te adoka tovinokwono

²² Toruda'ai Jisaseke'aro gami uumjunyokwe toorogai'aro tooro Galili tomuu su'bwo'noporogano. Toro i'bwo'nyuno sumaveyokwe toga Jisasol aro kuudokaikono. “Nuu A'mwo Kwolaiyo Kuunodo toonyu galonumworaropi ikomago tooravuro ato tovi nomanubwepinonyugono.

²³ Toro manubweyopi noromiyanubwepinonyugono. Toro aromiyanubwepi toonyu iruko pullapullu tollugwo abai'mowo'ji toga aiyo aiko te noduka'monyugono.” Kuudokaikono. Jisasolluro toro kuudoka tovi gamoro uumjunyokwe tooro wuu'no'mno kalo bwotonyo kwinoporogano.

Jisasol takis nuugwiyo tov kuubiyoka tovinokwono

²⁴ Toruda'ai Jisaseke'aro gami uumjunyokwe toorogai'aro tooro wagwolago Kapurniyam toru ai'movoporogano. Toro ki'mo'mno sumaveyokwe a'mwo pworo Pitallu abuuru'maroporogano. A'mwo su tooro wagwolago Jeruusalemda'ai Gooti toollu ilomoropiyo'moneyokwe ago tovino'mo takis nuugwiyo tov mollu'bworosodupudorogano. Toro tooro Pitallu aro abuudoganoporogano. “Kemoro ibwasokwe su tool wagwolago Jeruusalemda'ai Gooti toollu ilomoropiyo'moneyokwe ago tovino'mo takis nuugwiyo tov biyodowodoldukono?” Kuudoganoporogano.

²⁵ Toro toorai Pital aro kuudokaikono. “Tade, kuvinono biyodowodekono.” Toro wuujuno sumaiyokwe Pital ago tovi aulokaikono. Ago su tovi kuulno sumaiyokwe yogalo puruv aki aiko te yere muudoduke toga Jisasol Pitallu aro kuudoganokaikono. “A'mwo aguto kig pworo kemi kantri tovida'ai a'mwo abolo tonyuro takis nuugwiyo tov ma'dupudorodukono oo a'mwo abolo molo tovi me'no bwolo'dapudo tobuuravuro ma'dupudorodukono? Su toro tovalluno guu Saimooneku buro'nyo kuudo jukiyau'mwakuno?” Kuudoganokaikono.

²⁶ Toro kuudoganoka tovi Pital aro kuudokaikono. “A'mwo abolo molo tovi me'no bwolo'dapudo tobuuro molo tovi uuwolo'mdopure toorai takis nuugwiyo tov uubiyodupudogano.” Kuudokaikono. Toro kuudoka toollu Jisasol aro kuudokaikono. “Su tov kuvigono. A'mwo aguto kig uuwolo'mdupudo tooravuro a'mwo abolo ton takis nuugwiyo uubiyo'moneyokwe su tovi dolago tomuu mamwalodupudogano. Aki nuu kwonyu kuruv takis uubiyo'moneyokwe su tovi dolago tomuu mamwalodumdonyugono.

²⁷ Toro kuvi kuruv a'mwo su tooro nemino surodo nuunpiyokwe tov kevu aro neya ipinorekikono. Kevu wonyo buugo tovino plavopi domwoga ki'nomallo'moneyokwe wuulo tov wonyo tovi neya uuvollupinorekikono. Toro uuvollodopure toga domwoga muudu'no aluve'nomapi toolluro mago tovi anakuuto tomuu silva nuugwiyo pullugwo noonpinorekikono. Toro te guu Pitaiku silva nuugwiyo su tollugwo momworaro'bi guvuge'aro nuu kwonyuge'aro toonallo'mo takis nuugwiyo tov mubibinekugono.” Jisasol Pitallu toro kuudokaikono.