Matyuu 16 - Gooti Toolluro Yogalokwono

A'mwo mido mollomwalokwe pworo Jisasolluro duuwallo jurogudo puvi wonyo'mo kwinopo tovinokwono

¹ Toruda'ai aki Farasi pworogai'aro Sajuusi pworogai'aro tooro bolokwino sumaveyokwe Jisasol abwolorawoneyokwe yamju kwiyoganoporogano. Toro tooro aro soukuu'nuudoporogano. “Nevu gumino tov Gooti toolluro amonekwopiyaboka tooldeyo gudano'mo tov guu muunyu kai'muuda'ai duuwallo jurogudo puruv neya donekuduuwallono.” Soukuu'nuudoporogano.

² Toro soukuu'nuudopo toorai Jisasol aro kuudokaikono. “Kevu sula'dugumdo toga sulugumdo tov toulelo kilodowo'jure tovi wonopi aro dodupudorekikono. “Oo bi'ai toga atamdo yonokwono.”

³ Aki lomwo toga sulugumdo tov weya'jo imo'nowo'ji kuruv sulu'wo dugumdo kimwonyodowo'jure tovi wonopi aro dodupudorekikono. “Oo anuugwo toga dole'manollo tov yonokwono.” Kevu atamdo yono'mdukoneyokwe tovino kinodokwopiyomallo'mo toorekul sulugumdo tovida'ai duuwallo tonyu wonopi pi'mwono mollovodo'mwojadodupudorekikono. Toro kworekul kuruv agasuro moro duuwallo ikuduuwallodumdo tonyuno'gwowi ku'nono mamollovodo'mwojadodupudorekikono.

⁴ Kevu agasuro amwakopo ma'no ma'no kuumwiyo toorekul Gooti toollu muumjunodupu numino nebal'no kuunodoldeyokwe tovino duuwallo puruvi wonyo'mo aikullunadopiyo. Toro kuvi kuruv kevu duuwallo puvi mwonpinorekikono. Yiuno proofet Joona'wollu kwimo'noka kubalno imo'nodowo'jure tovino to'no wonmwalpinorekikono.” Jisasol toro wuujuno sumaiyokwe wuugollu'movo'no avlavokaikono.

Farasi toorogai'aro Sajuusi toorogai'aro tooravuro pasudo tovino wako neya kuu'numwalpino tovinokwono

⁵ Toruda'ai Jisasolluro uumjunyokwe tooro wonyo buugo tovi igo'mgu me'no iloga'mo'mno sumaveyokwe aro kuudo sauroporogano. Oo nevu kuudo yallulo'gwonodowa bret ton mamokavla'mwakuuwono. Kuudo sauroporogano.

⁶ Toro yau'dopure toorai Jisasol duudapi wiyo'mo tool yovekurajo tov aro kuudokaikono. “Kevu Farasi toorogai'aro Sajuusi toorogai'aro tooravuro bret munyo'moneyokwe yis tonyuno wako neya dou'nogaulo.” Kuudokaikono.

⁷ Jisasolluro toro kuudoka tovi gamoro uumjunyokwe tooro wuu'nyuno sumaveyokwe aro kuudo sauroporogano. Oo nevu bret mamokavla'mwakuuwo toonolluno tov donekudadopiyo. Su toro kuudo yau'no sumaveyokwe bret mamokavlavopo tovino yogalo aullajunoporogano.

⁸ Toro kuullajunodopure toorai Jisasol youroonyuno sumaiyokwe aro kuudokaikono. “Kemoro mino kuudo anubwemwakopo tov maluko'nyokwono. Toro toorekul bret nonaguto tovino buro'nyo'mo yogalo jajunmwakovo? Nuvu bret tovino maikudumwakono.

⁹ Kevu me'no nuwonodupudo kworekul kuruv kavlo tovino kuudo yere miyouroma'mwakopo tov ilaiyo'maiyo. Nuvu 5,000 a'mwo toorai bret atobuul tekwogai savo tooro nyuno nyuno sumaveyokwe anyugollu'movoporogano. Toro nugollu'mo'mno sumaveyokwe bret nobuudeyokwe basket amollu'bworosopo su tonyuno kevu kuudo nyallulo'gwonmwalpiyo.

¹⁰ Aki puruv nuu 4,000 a'mwo toorai 7-pela bret tekwogai savo tooro nyuno nyuno sumaveyokwe anyugollu'movoporogano. Toro nugollu'mo'mno sumaveyokwe bret nobuudeyokwe basket bwotonyago tonyu amollu'bworosopo su to kunyuno kuruv kuudo nyallulo'gwonmwalpiyo.

¹¹ Toro te moro yogalo aikudumwako tov bret tovino maikudumwakono. Kevu yogalo su tovino kavlo tov po'dogalo miyouroma'mwakopo tovino aki aiko te ikudumo'mokwono. Farasi toorogai'aro Sajuusi toorogai'aro tooravuro bret munyo'moneyokwe yis to'busuko pasudo su tooraino kevu wako neya dou'nogaulo.” Kuudokaikono.

¹² Jisasolluro toro kuudoka tovi gamoro uumjunyokwe tooro wuu'nyuno sumaveyokwe aro kuudo souromaroporogano. Oo Jisasolluro yogalo su tov bret munyo'moneyokwe yis nebal'nodo tovino duudapi yogalo manekudadopiyo. Toro kuvi kuruv Farasi toorogai'aro Sajuusi toorogai'aro tooravuro youkuu'najo'moneyokwe yogalo yodubwasodupudo su tooraino'gwowi nevu wako neya kuu'numwalano'moneyokwe donekudadopiyo. Kuudo souromaroporogano.

Pital Jisasollu, “Gooti toolluro amonekwopiyaboka tool guu kwekugono,” kuudoka tovinokwono

¹³ Toruda'ai Jisaseke'aro gamoro uumjunyokwe toorogai'aro tooro distrik pumuuno aulaporogano. Distrik su tomuu wagwolago Sisariya Filipai tov wo'dowodomuugono. Toro tomuu kuulno sumaveyokwe Jisasol gamoro uumjunyokwe toorai aro samuugojokaikono. “A'mwo abolo ton nuu A'mwo Kwolaiyo Kuunodo toonyuno, Ala'mwekono, nyudodupudonyudeyo?” Kuudoganokaikono.

¹⁴ Su toro kuudoganoka tovi gamoro uumjunyokwe tooro aro kuudoporogano. “Oo a'mwo pworo gumino tov, Wonyo Galuvollokwe Joonekono, gudodupudorogano. Aki pworo, Ilaijaikono, gudodupudorogano. Aki pworo, Jeremaiya'wekono, gudodupudorogano. Aki pworo, proofet tooravuro pwekono, gudodupudorogano.” Kuudoporogano.

¹⁵ Toro kuudopo toorai Jisasol aro kuudokaikono. “A'mwo pworo mino tov su toro nyudodupudo kuvi kuruv kevu toorekulno'gwowi mino tov, Ala'mwekono, kuudo jukiyanuu'mwakovo?” Kuudoganokaikono.

¹⁶ Toro kuudoganoka toga Saimoon Pital aro kuudokaikono. “Guu Gooti toolluro amonekwopiyaboka Krais tookugono. Toro tooku aiyo mujomwekovla'mdowodo Gooti toolluro Kwolaiyekugono.” Kuudokaikono.

¹⁷ Toro kuudoka toollu Jisasol aro kuudokaikono. “Joona'wolluro kwolaiyo Saimoonoloo, gumoro anyudumodo su tovino kwako akavida'ai a'mwo pwol miyodogubwasokaikugono. Toro kuvi kuruv moro Nyunumiyago muunyu kai'muuda'ai toolno'gwowi gumoro sumdo tovi kuu'maiyo toru abomollolupto'nagubwemokaikugono. Toro tovino guu ilaiyo nokwo ibinekugono.

¹⁸ Aki toro tookuji nuvu aro gudumo'mokwono. Gumino yovo tov Pitalekugono. Yovo su tovino kavlo tov suloleyo'mokwono. Toro te nuvu sulo su tookuji muunyu toru moro mollu'bwoto tov modumelamonyugono. Aki toro amodumelami toga yiuwi'nokai bolnodo tovuro jurogudo kuruv moro mollu'bwoto su tovi ku'nono muuwolowonokwono.

¹⁹ Aki nuvu muunyu kai'muuda'ai aguto kig mido mollomwalo tovuro ki ton gumi nogujamonyugono. Toro te guu jurogudo su tokwe kwako akavi mwalo'bi a'mwo abolo ma'no ma'no yodopure tonyuno yogalo adomdukuurosubi tov Gooti tool gamoro ago muunyu kai'muu kuruv aval'no domdukuurosonekono. Aki guu kwako akavi mwalo'bi a'mwo abolo ma'no ma'no yodopure tonyu surolowapibi to'gwowi Gooti tool gamoro ago muunyu kai'muu kuruv aval'no nyurolowapiyonekono.” Jisasol toro kuudokaikono.

²⁰ Toro me'no wuujuno sumaiyokwe gamoro uumjunyokwe toorai duudapi guureji aro aduuwiyokaikono. “Kevu mino aro madupinorekikono. Oo a'mwo akaigwol Gooti toolluro nekullo'mwojo'moneyokwe Krais amonekwopiyaboka tool kwekono. Madupinorekikono.” Duudapi toro kwiyokaikono.

Jisasol, “Nuu bolo'mi aiyo aiko te noduka'monyugono,” adoka tovinokwono

²¹ Su toro togada'ai Jisasol gami uumjunyokwe toorai aro tonyuno sodubwasajukekono. “Nuu Jeruusalem'no plavo'mi dado go'no go'no bwotonyago pun nonuunononyugono. Toro toonyu Juu tooravuro mido mollomwalokwe toorogai'aro pris mido mollomwalokwe toorogai'aro loowo tovino pi'mwo kuudokwe toorogai'aro tooro kaiyako yanyugolopi noromiyanubwepinonyugono. Su toro aromiyanubwepi kwonyu kuruv iruko pullapullu nuwolo'nowo'ji toga aki aiko te noduka'monyugono.” Kuudokaikono.

²² Toro kuudoka tovi Pital Jisasollu bomokalokwino sumaiyokwe judo tomuu davolno yogalo aro amojurugolokaikono. “Agutoloo, guu su toro madubinono. Gumi su toro tov nogujumo'no'jo.” Amojurugolokaikono.

²³ Toro mojurugoloduke toga Jisasol yadu'mwonyuno sumaiyokwe Pitallu moroono'no aro kuudokaikono. “Satanyoloo, guu moro buulo tomgu'aro dovlavono! Gumoro kuudo sau'mwakudo su tov Gooti toolluro kuudo yau'dowodo tomgu'aro'maiyo. Toro kuvi kuruv kwako akavida'ai a'mwo pworavuro kuudo yau'dupudo tomgu'aro sau'mwakuno.” Jisasol Pitallu yogalo su toro amojurugolokaikono.

²⁴ Toruda'ai Jisasol gami uumjunyokwe toorai aro kuudokaikono. “A'mwo pwol mi numjunyo'mo kwino'ji su tool gavnokweyolluro noonyumwonyu kuudo yau'dowodo tonyu neya yogallu'mowonekono. Yowo'ji gami i'noguropte tokwe momworarowo'ji mi neya numjunonekono. A'mwo su tool, Oo nobolmonyudeyo, kuudo yaurowo'ji kwol kuruv neya anumjunono.

²⁵ Aki a'mwo pwol gavnokweyolluro kulako tovida'ai aiyo mwallo'mo tovino to'no wiyo'mwoju'nonekono. Toro kwiyo'mwoju'no'ji su tool aiyo yiunokuudo mujomwekovlaiyo'moneyokwe to'gwowi ku'nono mwiyo'mwoju'nonekono. Toro kuvi kuruv a'mwo pwolno'gwowi mino kuudo nubweyodowo'jure tovida'ai gavnokweyolluro kulako tovida'ai aiyo tov nokwo yovlawonokwono. Toro sovlawo'ji kuvi kuruv aiyo yiunokuudo mujomwekovlaiyo'moneyokwe to'gwowi nomaronekono.

²⁶ Aki a'mwo pwol yiuwi'nokai kwako akavida'ai ton marowo'ji abolo'ji toga yiuwi'nokai me'no amaro'ji su ton a'mwo su tekwoji aiyo yiunokuudo mujomwekovlaiyo'moneyokwe tov nokwo wiyo'mwojupinoldukono? Awiyo. Yiuwi'nokai amaro'ji su ton ku'nono mwiyo'mwojupinogano. Aki a'mwo pwol yiunokuudo nobolmiyo kuudo yaurowo'ji aiyo yiunokuudo mujomwekovlaiyo'moneyokwe tovi mallo'mo kwino'ji tool Gooti toollu noonyumwonyu pugai nokwo biyomaronoldukono? Awiyo. A'mwo aiyo yiunokuudo mujomwekovlaiyo'moneyokwe tovi mallo'mo kwino'ji su tool Gooti toollu noonyumwonyu pugai ku'nono mabiyomaronekono.

²⁷ Nuu A'mwo Kwolaiyo Kuunodo toonyu moro ensel toorogai mi Nyunumiyago toolluro jurogudo tokwe noolamonyugono. Su toro kwolami toga yiuwi'nokai a'mwo abolo tonyuro pasudo tonyu gallainyubworo'mi kemi pasudo mujumovla'mdupudo tonyuro mubiyo tov nuuwimonyugono.

²⁸ Nebal'no ikudumo'mokwono. Su toro tov kuvinono bai'mo'mdowo'jure tovi kevu akaru adakwopo pworekul yere mabolodopure toga noonpinorekikono. Aro tovi wonpinorekikono. A'mwo Kwolaiyo Kuunodo toonyu nuvnokwenyuro aguto kig mido mollomwalo tokwe abiyalo'numi tovi sugwonyu toru'no noonpinorekikono.” Kuudokaikono.