Matyuu 15 - Gooti Toolluro Yogalokwono

Juu tooro kemi kwikweyago tooravuro pasudo tonyu kuumjunyajupo tovinokwono

¹ Toruda'ai Farasi pworogai'aro a'mwo loowo tovino pi'mwo kuudokwe pworogai'aro tooro wagwolago Jeruusalemda'ai wuugollu'mokabo'mno Jisasollu abuuru'maroporogano.

² Toro buuru'ma'no sumaveyokwe aro abuudoganoporogano. “Gumoro a'mwo gumjunyokwe tooro aiyogasuro nemi nellukweyago tooravuro lootuu pasudo tonyu kisuvolo yodupudo tov buro'nyo kavlo tovino'mdeyo? Nevu yamuugojo agudoganmwakuuwo akav aro tovinokwono. Aiyoga nemi nellukweyago tooro wosamujuko nonyo'mo toga kemi ato ton wonyo tovi yal'mo'nodupu anyajuporogano. Toro kuvi kuruv aga'no'gwowi gumoro gumjunyokwe tooro nemi nellukweyago tooravuro pasudo sajupo su tomgu'aro muumjunodupu kisuvolo yodupudorogano. Toro tooro kemi ato ton wonyo miyal'mo'nodupudorogano. Su toro tovino agudoganmwakuuwono.” Kuudoporogano.

³ Toro kuudopo toorai Jisasol aro kuudokaikono. “Kemi tellukweyago tooravuro lootuu pasudo tovi uumjunyo'mo toorekul Gooti toolluro loowo tonyu buro'nyo'mo kisuvolo wiyodupudorekuldeyo?

⁴ Kevu kuudo neya jaullulo. Gooti tool aro adokaikono. “Kevu kemi tellunumiyago telluneyago tonyu kwako tomuu'aro neya duuwiyogaulo.” Aki aro adokaikono. “A'mwo pwol gami ganumiyago ganeyago teyaulluno burolyogalo ado'ji su tool neya abolono.” Gooti tool su toro adokaikono.

⁵ Toro kuvi kuruv kevu toorekulno'gwowi a'mwo abolo tonyu aro wuudodupudorekikono. A'mwo pwol gami ganumiyago ganeyago supto yodo'bule teyaullu gami nuugwiyodeyo togai mwiyo'mwojo'mo tool aro wuudonekono. “Oo nuugwiyo akakwe nokwo aikullo'mwojo'mujuko kwonyu kuruv Gooti toollu wiyo'mo me'no ajesungikokwono.” Toro tool gami ganumiyago ganeyago teyaullu mwiyo'mwojonekono. A'mwo su tool gami ganumiyago ganeyago teyaullu nokwo kwiyo'mwojowo'jujuko kwol kuruv kev toorekulno'gwowi aro wuujokwerekikono. “Oo gumoro sumado tov ilaiyokwono. Guu gumi junumiyago juneyago teyaullu mwiyo'mwojumado tov ilaiyo to'no sadokuuno.” Wuujokwerekikono.

⁶ Toro toorekul kemi tellukweyago tooravuro lootuu pasudo tomgu'aro yodekubwasodopure tonyu uumjunodupudo tov Gooti toolluro yogalo tonyu bwolomorumwogapiyodapudorekikono.” Kuudokaikono.

⁷ Jisasol toro wuujuno sumaiyokwe aki aro kuudokaikono. “Aisaiyal kevu a'mwo kuunanokwe toorekulluno proofet yogalo nebal'no amodomollajukekono. Yogalo su tov aro ajakwollokaikono.

⁸ “Aka tooro numino mago tokwe to'no mollanyudodupudo kworo kuruv kemoro poowokalago tono'gwowi mi manyu toru'aro wo'dupudogano.

⁹ Toro tooro kemi mago tokweno mino ilomonuwopiyodapudo toga kuudo yaullokwerogano. Oo Gooti tool nemino ilaiyo mollonekuma'dowodoldeyo. Toro yau'dupudo kuvi kuruv nuu a'mwo su toorai ilaiyo ku'nono mamolloma'dumdonyugono. Yiuno yasuwa'no to'no yokwerogano. Aki toro tooro Gooti toonyuro kuuguudo tonyuno mibwaso'mo tooro yiuno a'mwo pworavuro loowo wosodupudo tonyuno'gwowi ibwasokwerogano.” Ajakwollokaikono.”

Jisasol noonyumwonyu pworo kaiyako mollugolamo'mdupudo tooraino adoka tovinokwono

¹⁰ Jisasol kwolallo tonyu gamiyomno abupureyokweyo'mo amodapiyokaikono. Toro modoma'no sumaiyokwe aro kuudokaikono. “Kevu duu'nyulo. Moro yovekurajo akavi wuu'nopi kavlo tovino neya jouromallulo.” Kuudokaikono.

¹¹ Toro wuujuno sumaiyokwe aro kuudokaikono. “A'mwo pwolluro mago tovi buro'nyo buro'nyo wosamujukodeyo amano'ji su ton a'mwo su toollu Gooti toolluro sumdo tovi kaiyako mamollugolamo'mdupudogano. Toro kuvi kuruv a'mwo su toolluro poowokalago tovida'ai buro'nyo buro'nyo yogalo'mdeyo oo kuudo'mdeyo mago tovi'aro bolokwodopure su tono'gwowi a'mwo toollu kaiyako mollugolamo'mdupudogano.” Kuudokaikono.

¹² Toro kuudoka tovi gamoro uumjunyokwe tooro Jisasollu aro abuudoporogano. “Guu kuudo neya jaurono. Gumoro yogalo duu'gwolodore su tovino Farasi tooro jul'nyo subwosunmwakovo.” Abuudoporogano.

¹³ Toro abuudopo tovi Jisasol yovekurajo aro kuudokaikono. “Mi Nyunumiyago muunyu kai'muuda'ai toolluro yiuwi'nokai maburaujajuko tonyu gavnokwe tool kadomdo nomolo'mowopiyonorogano.

¹⁴ Su toro tooro a'mwo sumnowojokwe toorobusuko imo'nopi a'mwo sumnowojokwe gabovo pworai mollubworomokavla'mdupudorogano. Aki a'mwo sumnowojokwe pwol a'mwo sumnowojokwe gabovo pwollu amollubworomokavlawo'ji tov yiuwi'nokai su tooral buuso tovi wolorabullunorakono. Toro tovino tov a'mwo sumnowojokwe toorobusuko imo'nodupudo su toorai wonyapino to'no jogaulo.” Kuudokaikono.

¹⁵ Toro wuujuno sumaiyokwe Pital Jisasollu aro kuudoganokaikono. “Guu yovekurajo su tovuro kavlo tovino nokwo nekudubinekudukono?” Kuudoganokaikono.

¹⁶ Toro kuudoganoka tovi Jisasol aro kuudokaikono. “Kevu kuudo kuuno miyouromallu jumwakovo?” Kuudokaikono.

¹⁷ Wuudo'no aki aro kuudokaikono. “A'mwo pwollu buro'nyo buro'nyodeyo kwa'mgu tomuuda'ai manodowo'jure su ton a'mwo toolluro sumwoluko tovino kuula'dupu yiuno luko to'no noropiyodowodogano.

¹⁸ Toro kuvi kuruv a'mwo pwolluro poowokalago anakuuto tomuuda'ai gamoro mago tovi'aro bolokwodopure su tono'gwowi a'mwo toollu kaiyako mollugolamo'mdupudogano.

¹⁹ A'mwo toolluro poowokalago anakuuto tomuuda'ai bolokwodopudo su ton aro tonyuno aikudadokwono. Ma'no ma'no kuudo togai'aro romiyosi togai'aro abekuuko togai'aro kwonyalo togai'aro kuuko togai'aro kuunano togai'aro burolyogalo togai'aro yiuwi'nokai su togano.

²⁰ Yiuwi'nokai ma'no ma'no pasudo su ton Gooti toolluro sumdo tovi a'mwo toollu kaiyako mollugolamo'mdupudekono. A'mwo pwol gami ato tovi miyal'mo'nowo'ji wosamujuko ano'ji su to'gwowi kaiyako ku'nono mamollugolamowonekono.” Kuudokaikono.

Abolo Juu tooravuro miyawosunodupudo puruv Jisasollu kuudo kuubweyoka tovinokwono

²¹ Jisasol su toruda'ai wuugollu'mo'mno sumaiyokwe wagwolago Tairuke Saidoonke toval wo'dubulo tomuuno avlavokaikono.

²² Su tomuu Kenanda'ai abolo Juu miyawosunodupudo puruv mwalodowodokwono. Abolo su tov Jisasollomno bino sumaiyokwe aro abojugonokakwono. “Agutoloo, kuullo ma'no ma'nodo pwol moro taiyo tovi kuulomwalodowodo su tool kaiyako bwotonyo mollugolamo'mdowodekono. Guu a'mwo aguto kig Devitolluro jukweyago kwolaiyo tooku mino kalo gujunowo'ji moro taiyo tovi duuwiyo'mwojono.” Ajugonokakwono.

²³ Toro ajugonoka kuvi kuruv Jisasol abolo su tovi yogalo puru'monodo kuruv aikomgu muudokaikono. Aki gamoro uumjunyokwe tooro Jisasollu guureji aro kuudoporogano. “Abolo akavuro domdo adanekumjunadopiko su tovino nevu burawo anekullunadopiyo. Toro te guu abolo su tovi, “Neya donekugollu'movono,” duudono.” Kuudoporogano.

²⁴ Toro kuudopo tovi Jisasol aro kuudokaikono. “Mi Nyunumiyago tool yiuno Isuraiyolda'ai a'mwo abolo ton sipsip younopiyodupudo toorobusuko imo'nodopure su tobuuraiyomno amonuwopiyabokanyugono.” Kuudokaikono.

²⁵ Toro wuudoduke toga abolo tov Jisasol mwaloduke toru'no bino sumaiyokwe suduko abinuguto'nokakwono. Toro binuguto'no'no aro kuudokakwono. “Agutoloo, donyo'mwojonoo.” Kuudokakwono.

²⁶ Toro kuudoka tovi Jisasol yovekurajo kuuguudo puruv aro kuudokaikono. “Nuu kwoloraiyo tobuuravuro wosamujuko ton juluko toorai amoruudukwopimi tov ilaiyo'maiyo.” Kuudokaikono.

²⁷ Toro kuudoka tovi abolo tov kuudokakwono. “Agutoloo, gumoro yogalo su tov kuvigono. Toro kuvi kuruv juluko toorono'gwowi bret sulmiyo tobuuro kemi jukwo tooravuro noluuleyo tovi dolago tomuu abwolorawo'ji tonyu molle'bworanodupudorogano.” Kuudokakwono.

²⁸ Toro kuudoka tovi Jisasol wuu'no'no aro kuudokaikono. “Abolo to'guujuro kuudo mino anubwemwakudo su tov maluko'nyo'maiyo, bwotonyokwono. Toro te gumoro anyudumodo tov kuvinono nokwo gujumo'nonokwono.” Kuudokaikono. Toro kuudoka kuga'gwo kuuno gamoro taiyo tov sukulnokakwono.

Jisasol a'mwo abolo nobollokwe bwotonyago tonyu sukuloka tovinokwono

²⁹ Jisasol kwako su toru wuugollu'mo'mno sumaiyokwe wonyo buugo Galili'no aikomgu avlavokaikono. Wonyo buugo su tovuro wolo tomuu'aro plaino sumaiyokwe muumuudo pwollu ila'no muunyu toru sulomwalokaikono.

³⁰ Toro ilomwaloduke toollomno a'mwo abolo kwolallo bwotonyago ton kemi a'mwo abolo nobollokwe bwotonyago tobuurai amokailapogano. Su ton a'mwo abolo suvlo abolopingikokwe togai'aro sumnowojokwe togai'aro suvlo nomuullugollokwe togai'aro yogaimajokwe togai'aro aki bwotonyago pugai'aro tobuurai amokailapogano. Toro mokailno sumaveyokwe Jisasolluro suvlo dolago tomuu sulomoga'bworosopogano. Yiuwi'nokai nobollokwe sulomoga'bworosopo su tonyu Jisasol sukulokaikono.

³¹ Toro sukuloka su tonyu a'mwo abolo ton aro kwonopo tov, Oo yogaimajokwe sumo'nyajupo ton kuuguudo nokwo domwalodopure tonyu kwonopogano. Aki suvlo nomuullugollokwe sumo'nyajupo ton ilaiyo sukulnopogano. Aki suvlo abolopingikokwe sumo'nyajupo ton kado avlavopogano. Aki sumnowojokwe sumo'nyajupo ton aki aiko te sumdo ainopogano. Su toro tonyu wonyuno sumaveyokwe Isuraiyolda'ai tonyuro Gooti toolluno sulomoropiyapogano.

Jisasol a'mwo 4,000 toorai wosamujuko kwiyoka tovinokwono

³² Su toro toga Jisasol gami uumjunyokwe toorai doma'no sumaiyokwe aro kuudokaikono. “A'mwo abolo ton nuuge iruko pullapullu me'no amwalmwakopo ton wosamujuko maiyo tonyuno kalo anyunadopiyo. A'mwo abolo su ton mujuko'mo yodopure tonyu nuu pumuuno amodapimi tov puuto tomuu kuruwiyo nomjobolmovlapiyo.” Kuudokaikono.

³³ Toro kuudoka tovi gamoro uumjunyokwe tooro aro kuudoporogano. “Nevu a'mwomaiyo kuu'maiyo akaru mwalodowa a'mwo abolo kwolallo bwotonyo akanyu bret nyuto'nupino'moneyokwe tov gadomuuda'ai marowa'ji wiyanonoldeyo?” Kuudoporogano.

³⁴ Toro kuudopo tovi Jisasol aro kuudoganokaikono. “Kevu bret adadobuul domworakovo?” Kuudoganokaikono. Toro tooro aro kuudoporogano. “Nevu bret atobuul ato pworal tobuuke'aro aki domwoga pwekwono pwekwonodo tekwojogai'aro to'no amworakuuwono.” Kuudoporogano.

³⁵ Toro wuujuno sumaveyokwe Jisasol a'mwo abolo kwolallo su ton kwako tovi wolomwalpino'moneyokwe amodumwallokaikono.

³⁶ Me'no modumwalluno sumaiyokwe bret atobuul ato pworal tobuuke'aro domwoga tobuurogai'aro malluno sumaiyokwe Gooti toollu, “Nenyoo,” wuudo'no abuudovokaikono. Toro buudeno buudeno sumaiyokwe gami uumjunyokwe tooro a'mwo abolo tonyu yado uumwodepureyokwe amorapiyokaikono. Toro te gamoro uumjunyokwe su tooro a'mwo abolo kwolallo tonyu yado abwimoulaporogano.

³⁷ Toro te a'mwo abolo ton wosamujuko su tov nyuno nyuno sumaveyokwe sumwoluko kwitovoka ton anogallu'movopogano. Toro anogallu'movopo su ton basket bwotonyo tonyu surosopogano. Basket surosopo su ton atobuul ato pworal tobuullu amollu'bworosoporogano.

³⁸ Kwolallo su tonyuro anopo tonyuda'ai yiuno a'mwo tooro 4,000 toorogano. Toro kuvi kuruv abolo togai'aro kwoloraiyo togai'aro to'gwowi 4,000 su tovi muunyu toru'aro kuuwolo'nyungiko ton anomwalopogano.

³⁹ Toro nyuno sumaveyokwe Jisasol a'mwo abolo tonyu kemi ago tomuuno amodapiyokaikono. Me'no modapino sumaiyokwe boot tovi ilomwalo'no wonyo buugo tovi muunyu toru avlavokaikono. Toro plaino sumaiyokwe igo'mgu kwako Magadan towai sulai'movokaikono.