Matyuu 14 - Gooti Toolluro Yogalokwono

Wonyo Galuvollokwe Joonol aboloka tovinokwono

¹ Su toro toga Jisasolluno kuuguudo bomje'nugouloduke tovi a'mwo aguto Herootol kuu'nokaikono. Herootol kwako bwotonyo aval aval adovarojungiko tonyuda'ai puvi mido mollomwalokwe sumo'nyajukekono.

² Toro tool Jisasolluno kuuguudo tovi wuu'nyuno sumaiyokwe gami ki'nato womdo wiyodupudo toorai aro kuudokaikono. “Oo a'mwo akaigwol Wonyo Galuvollokwe Joonol a'mwo me'no bolodupudo tomuuda'ai aiyo aiko te adukavoka tooldeyo. Toro tool aiyo aiko te adukavoka tovida'ai jurogudo tov a'mwo su toollu kuullo'mowopiyodowodekono. Toro kuullo'mowopiyoduke tovino tov duuwallo jurogudo ton wuuduuwallodowodekono.” Kuudokaikono.

^3-4 Herootolluro su toro kuudoka tov aro tovinokwono. Sumdomgu Herootol gami gagwai'yago Filipolluro abolo tovi amarokaikono. Abolo su tovino yovo tov Heroodiyasovokwono. Toro tovi amaroka su toollu Joonol aro kuujajukekono. “Guu abolo su tovi ama'mwakudo tov Gooti toolluro loowo tovi kisuvolo sadokuuno.” Kuujajukekono. Toro wuudoduke tovino Heroodiyasov ilaiyo mibwosunyajukokwono. Toro te Herootol gami abolo tovi ilaiyo igollo'moneyokwe Joonollu wuulo galerosuno sumaiyokwe wuulo killo'mo ago tovi aulomerosokaikono.

⁵ Herootol Joonollu romiyoso'mo kwinyajuko kuvi kuruv yiuwi'nokai a'mwo abolo ton Joonolluno aro kuudo saullajupogano. Oo a'mwo su tool proofet pwekono. Su toro kuudo yau'dopure tovino tov Herootol kuudo saurokaikono. Nuu Joonollu aromiyosumi tov a'mwo abolo ton molo bwotonyo nyunpiyo. Kuudo saullajukekono.

⁶ Toro kuvi kuruv iruko pullugwoji Herootol gami ganeyago tov somaroka su tollugwoji aki aiko kuudo yaullo'moneyokwe lubullu doto sanokaikono. Su toro toga Heroodiyasovuro taiyo tov a'mwo tooravuro sumdollu toru kuuloda'mno sumaiyokwe lupuro lupuropto sokakwono. Toro yoduke tovi Herootol wonyuno sumaiyokwe ilaiyo ainuwiyokaikono.

⁷ Toro tool sujuraiyo su tovi subuu'yamju aro aduuwiyokaikono. “Guu buro'nyo buro'nyodeyo agujunmwalo'ji tonyuno anyudubi tov nuvu nokwo gujamonyugono.” Subuu'yamju su toro aduuwiyokaikono.

⁸ Toro aduuwiyoka tovi sujuraiyo tov gami ganeyago tovuro jurogudo dumul'mwojoduke tovi uumjunyuno sumaiyokwe aro kuudokakwono. “Guu Wonyo Galuvollokwe Joonolluro mido tov dovolugulomaro'bi plet tovi'aro donumokabono.” Kuudokakwono.

⁹ Toro wuujuno sumaiyokwe a'mwo aguto kig tool Joonolluno kalo winoduke kwol kuruv a'mwo lubullu doto janodopure tooravuro sumdo tovi, subuu'yamju me'no kwimo toonyudeyo, kuudo yau'no sumaiyokwe kuvinono uumjuno'no a'mwo womdokwe pwollu amodapiyokaikono.

¹⁰ Toro amodapiyoka su tool Joonol wuulo killo'mo ago tovi kuule'na'duke toollu kuula'no gamoro mido tov aulodovolugulomarokaikono.

¹¹ Toro kuulodovoluguloma'no sumaiyokwe pleto tovi'aro du'gwolomokabo'no sujuraiyo tovi abwiyokaikono. Sujuraiyo su tov malluno sumaiyokwe gami ganeyago tovi kuumallokakwono.

¹² Su toro soka tovino Joonolluro uumjunyokwe tooro wuu'no'mno Joonolluro kulako tov malluno sumaveyokwe a'mwo buuso tovi amollurosoporogano. Toro mollurosuno sumaveyokwe Jisasollomno bo'mno Joonollu kwimo'noka tovino Jisasollu kuudoporogano.

Jisasol a'mwo 5,000 toorai wosamujuko kwiyoka tovinokwono

¹³ Jisasol toro tovi wuu'nyuno sumaiyokwe boot puvi ilomwalo'no a'mwomaiyo judo puru'no avlavokaikono. Boot tovi toro pla'mduke toga a'mwo abolo bwotonyago ton wuu'nyuno sumaveyokwe, “Oo kuumno dovla'mwallo,” do'mno a'mwo abolo wagwolago go'no go'nodo tomuuda'ai ton kwokado kuumjunopogano.

¹⁴ Toro uumjunyuno sumaveyokwe Jisasol boot tovida'ai bwolodukwopiya'no kwolallo bwotonyo ton i'bwo'nodopure kwonokaikono. Toro tonyu wonyuno sumaiyokwe kalo kwinokaikono. Toro tool kemoro a'mwo abolo nobollokwe tobuurai sukulokaikono.

¹⁵ Toro ikulno sumaiyokwe toga surakuuto junyo'mo yoduke tovino tov gamoro uumjunyokwe tooro wono'mno Jisasollu aro abuudoporogano. “Akamuu judo tomuugono. Aki surakuuto junyo'mo sadopiyo. Toro te a'mwo abolo kwolallo su tonyu domodapiyono. Toro amodapibi ton wosamujuko nonyo'mo pun ajumiyo go'no go'nodo tomuu plavopi kevnokwe ton nokwo mubiyanupinogano.” Abuudoporogano.

¹⁶ Toro kuudopo kuvi kuruv Jisasol aro kuudokaikono. “A'mwo abolo su tonyu pumuuno nomodapiya'jokwe kevnokwe toorekul wosamujuko pun neya duuwiyulo.”

¹⁷ Toro kuudoka tovi aro kuudoporogano. “Oo nevu bret tov yiuno atobuul tobuuke'aro aki domwoga tov yiuno pworal toorake'aro to'no amworakuuwono.” Kuudoporogano.

¹⁸ Toro kuudopo toorai Jisasol kuudokaikono. “Wosamujuko su tobuul mi donumokabilo.” Kuudokaikono.

¹⁹ Toro te Jisasol gami uumjunyokwe toorai a'mwo abolo ton kabimwomdo toru wolomwalpureyokwe modapino sumaiyokwe kwolomwalopogano. Jisasol bret atobuul tobuuke'aro domwoga toorake'aro tonyu malluno sumaiyokwe muunyu kai'muuno iloonyopiya'no wosamujuko su tonyuno Gooti toollu, “Nenyoo,” kuudokaikono. Toro wuujuno sumaiyokwe bret tov buudeno buudeno sumaiyokwe gami uumjunyokwe toorai a'mwo abolo tonyu uumallupureyokwe amorapiyokaikono. Toro amorapiyoka tooro a'mwo abolo tonyu yado kuumwodeyoporogano.

²⁰ Yiuwi'nokai kwolallo amwalopo su ton wosamujuko tov nyuno nyuno sumaveyokwe sumwoluko kwitovoka ton nonyugollu'mopto sopogano. Toro anyugollu'movopo tonyu bret nobuudeyo togai'aro domwoga nobuudeyo togai'aro tonyu basket tov 12-pela tobuullu sutowosopogano. Toro tonyu Jisasolluro uumjunyokwe tooro yomollo'mno amollu'bworomaroporogano.

²¹ Kwolallo su tonyuro anopo tonyuda'ai yiuno a'mwo tooro 5,000 toorogano. Aki abolo togai'aro kwoloraiyo togai'aro a'mwo 5,000 su toorai muunyu toru'aro me'no kuuwolovopo ton anopogano.

Jisasol wonyo buugo tovi muunyu toru kado avlavoka tovinokwono

²² Toro anopo kuga'gwo kuuno Jisasol gami uumjunyokwe toorai aro kuudokaikono. “Kevu sumdomgu donekwanogaulo. Toro toorekul boot tovi'aro wanopi wonyo buugo tovi igo'mgu neya iloga'mowopiyapinorekikono.” Kuudokaikono. Toro wuudoduke toga a'mwo abolo kwolallo ton kemi ago tomuuno amodapiyokaikono.

²³ Jisasol a'mwo kwolallo tonyu me'no modapino sumaiyokwe judo tool subusu'nyogalo wuujo'moneyokwe muumuudo puwai'no sulokaikono. Yiuno Jisasolno muumuudo toollu muunyu toru mwaloduke toga surakuuto ajunokakwono.

²⁴ Su toro toga Jisasollu uumjunyokwe toorono'gwowi kwako tovi manyu toru me'no wuugollu'movo'mno wonyo buunakuuto toru boot tovi amwaloporogano. Toro tooro boot tovi mwalodopure toga dolo bwotonyo puruv ino sumaiyokwe wonyo luwagu luwaguto tov sokakwono. Toro yoduke tovi novraibwollo'mo tooro yogudo guureji ino ino soporogano.

²⁵ Toro ino sumaveyokwe lomwo iru'mago illouroso'mo yoduke toga Jisasol gami uumjunyokwe tooraiyomno wonyo buugo te muunyu toru kwokado kuuwokaikono.

²⁶ Jisasol wonyo buugo te muunyu toru kwokado uuwoduke tovi gamoro uumjunyokwe tooro wonyuno sumaveyokwe luko bwotonyo yo'mno kuro'kuro'deko aro adoporogano. “Awi, kumamdekonoo!” Adoporogano.

²⁷ Luko yo'mno deko toro dodopure kuvi kuruv Jisasol yere aro kuudokaikono. “Kemi poowokalago ton jurogudo nokwo jumo'nyulo. Nuu toonyu abadokwono. Toro te kavo domwallulo.” Kuudokaikono.

²⁸ Toro kuudoka toollu Pital aro kuudokaikono. “Agutoloo, guu tookuno'juki aro donyudono. Guu miyomno tooku wonyo buugo tovi muunyu toru kwokado dobono. Guu tookuno'juki su toro donyudono.” Kuudokaikono.

²⁹ Toro kuudoka toollu Jisasol, “Dobonoo,” kuudokaikono. Toro te Pital boot tovida'ai bwolodukwopino sumaiyokwe wonyo buugo tovi muunyu toru Jisasollomno kwokado kuuwokaikono.

³⁰ Toro uuwoduke kuvi kuruv dole'manollo tokwe'aro wonyo luwagu luwaguto togai'aro tonyu kwonoka toga luko bwotonyo sokaikono. Luko ino sumaiyokwe wonyo tovi anakuuto tomuu wollo'mo sokaikono. Pital toro ino sumaiyokwe Jisasollu guureji aro kuudokaikono. “Agutoloo, guu donyo'mwojono!” Kuudokaikono.

³¹ Toro kuudoka kuga'gwo kuuno Jisasol Pitallu ato tokwe amogalapiyokaikono. Toro mogalapino sumaiyokwe aro kuudokaikono. “Guu mino kuudo anubwemwakudo tov bwotonyo'maiyo. Yiuno kula'nyokwono. Guu mino kuudo noullo maullo anubwemwakudo tov buro'nyo kavlo tovino'mdeyo?” Kuudokaikono.

³² Toro wuujuno sumaiyokwe yiuwi'nokai tooral boot tovi muunyu toru sulomwalolorakono. Toro sulomwalolo toga dolo tov sumwogapiyokakwono.

³³ Toro sumwogapiyoka toga boot tovi sulomwallajupo su tooro Jisasollu ilomoropiyo'moneyokwe aro kuudoporogano. “Guu Gooti toolluro Kwolaiyo nebal'no kuunodekugonoo.” Kuudoporogano.

Jisasol kwako Genesaret tomuu a'mwo nobollokwe bwotonyago tonyu sukullajuko tovinokwono

³⁴ Toro tooro boot tovi purebwo'melno sumaveyokwe wonyo buugo tovi igo'mgu suloga'movaporogano. Toro iloga'mo'mno sumaveyokwe kwako Genesaret towai sule'movaporogano.

³⁵ Toro sule'movapo toga a'mwo abolo kuwaida'ai ton wono'mno Jisasolluno me'no suworovomaropogano. Toro iworovoma'no sumaveyokwe yiuwi'nokai su tomuu kuuguudo adapiyopogano. Toro ton yiuwi'nokai a'mwo abolo nobollokwe tobuurai Jisasollomno mollumovomokabino sumaveyokwe abomorosopogano.

³⁶ Toro abomorosopo su tekwojo Jisasollu guureji aro kuudoganyajuporogano. “Nevu tekwojonol gumoro youro do'gwapiyo tovino to'no nokwo uubogai'nanonoldukono?” Kuudoganyajuporogano. Toro tekwojo Jisasolluro youro do'gwapiyo tovino uubogai'nodopure tekwojai sukullajukekono.