Matyuu 13 - Gooti Toolluro Yogalokwono

Jisasol a'mwo pulollosi womdokwe toolluno yovekurajo adoka tovinokwono

¹ Iruko avalo su tollugwoji Jisasol ago tovida'ai bolokwino sumaiyokwe wonyo buugo tomuuno plavo'no wolo wobo toru kwolomwalokaikono.

² Toro wolomwaloduke toga kwolallo bwotonyago ton abomwodovomaropogano. Toro bomwodovoma'dopure tovino tov Jisasol boot puruv wonyo tovi muunyu toru wo'duke tovi ilomwalno sumaiyokwe sodubwasajukekono. Toro yodubwasoduke toga kwolallo ton wonyo buugo te wolo toru adaiyajupogano.

³ Toro da'mdopure tonyu Jisasol ibwaso'mo tool yovekurajo bwotonyago togai subwasajukekono. Toro toolluro yovekurajo subwasoka puruv arokwono. “Kevu duu'nyulo. A'mwo pwol gami wit sulo ton pulolloso'mo tool gami womdo tomuuno avlavokaikono.

⁴ Toro plaino sumaiyokwe novlollosoduke pun puuto tovi muunyu toru abwolorapogano. Toro abwolorapo tonyu dokato tooro bo'mno abomonopiyopogano.

⁵ Aki ikulwiyo pun kwako sulwomdokwe tomuu abwolorapogano. Kwako yiuno pwekwonodokwe tovino tov yere abilarowiyopogano.

⁶ Yere bilarowiyo'mno kun kuruv puluko nonaguto tovino tov kuujo aboka toga yere abuukuropiyopogano.

⁷ Aki ikulwiyo pun kwako aulewomdokwe tomuu abwolorapogano. Aulolo ton aguto gullo'mno abu'duvolomaropogano.

⁸ Aki ikulwiyo pun kwako ilaiyo tovi abwolorapogano. Toro abwolorapo ton ilaiyo to'no gulluno sumaveyokwe sulo ai'nopogano. Toro ai'nopo tonyuro pun 30-pela pun 60-pela pun 100-pela ai'nopogano.” Kuudokaikono.

⁹ Jisasol toro wuujuno sumaiyokwe aki aro kuudokaikono. “A'mwo pwol kuuguudo akavi youromallo'moneyokwe kwino'ji tool po'dogalo neya wuu'nonekono.” Kuudokaikono.

Jisasol yovekurajo togai subwasajuko kavlo tovinokwono

¹⁰ Aki Jisasolluro uumjunyokwe tooro Jisasollu aro abuudoganoporogano. “Guu a'mwo abolo tonyu yovekurajo togai yodubwasodumdo tov buro'nyo kavlo tovino'mdeyo?” Abuudoganoporogano.

¹¹ Toro toorai Jisasol aro kuudokaikono. “Gooti tool gamoro muunyu kai'muuda'ai aguto kig mido mollomwalo tovino yiulo yogalo tov kemi me'no ikullabodowodekono. Toro ikullabodowodo tonyuno kavlo tov kevu me'no youroma'dupudorekikono. Toro kuvi kuruv Gooti tool a'mwo abolo punyuno'gwowi ku'nono mwiyodowodekono.

¹² Toro te a'mwo pwol moro yogalo tovuro kavlo tovino kuudo souromaro'ji tov Gooti tool a'mwo su toollu kuudo purukwe'aro nuuwiyonekono. Aki kuudo kwiyo'ji su tovi muunyu toru bwotonyago nyulloullubweyonekono. Toro kuvi kuruv a'mwo pwol moro yogalo tovi muu'nyubusuko yowo'ji kavlo tovino kuudo miyouromaro'ji toolluno'gwowi gamoro kuudo pwekwono uubweyodowo'jure su tobuurai Gooti tool nomodukwopiyonekono.

¹³ Toro te nuu yovekurajo togai yodubwasodumdo tov aro tovinokwono. A'mwo su tooro aro yokwerogano. Wonyuno wonyuno yopi kworo kuruv mwonyubusuko to'no yodupudo tooraino tov kavlo tovino miyouroma'dupudorogano. Aki wuu'nyuno wuu'nyuno yopi kworo kuruv muu'nyubusuko to'no yodupudo tooraino tov kavlo tovino miyouroma'dupudorogano.

¹⁴ Yogalo su tov proofet Aisaiyalluro yogalo ajakwolloka aro tovi suuwiyo sumwojadopiyo. “Kevu moro yogalo ikudodo'mure tovi kuu'nupi kuvi kuruv kavlo tovino miyouromapinogaikikono. Aki kevu moro ikuduuwallodo'mure tovi kwonpi kuvi kuruv kavlo tovino ku'nono miyouromapinogaikikono.” Sakwollungikokwono.

¹⁵ Aki puruv aro sakwollungikokwono. “A'mwo abolo su tonyuro poowokalago ton lumdo kuulopiyodupudo tovino tov kemoro kaduko togai kavlo tovi ku'nono muu'numwalpinogano. Aki a'mwo abolo su tonyuro sumdo ton busu'na'dupudo tovino tov kemoro sumdo togai ku'nono mwonmwalpinogano. Aki kemoro kaduko togai kavlo tovi ku'nono muu'numwalpinogano. Aki kemoro poowokalago togai kuudo miyouromapinogano. Aki toro ton miyomno ku'nono miyouragunyumo'nupinogano. Aki nuu su to kunyu wikullo'mo nyunodowo'jure kuvi kuruv numjuku'dupudogano.” Sakwollungikokwono.

¹⁶ Toro kuvi kuruv kevno'gwowi kemi sumdo togai Gooti toolluro tonyu me'no wonodupudo tovino tov kemoro poowokalago tokwe ilaiyo yodupudorekikono. Aki kemoro kaduko togai gamoro yogalo tovi me'no wuu'nodupudo tovino tov kemi poowokalago tokwe ilaiyo yodupudorekikono.

¹⁷ Toro te nuu nebal'no ikudumo'mokwono. Aiyoga a'mwo abolo bwotonyago amjomwekelabiyajupo ton moro agasuro ikuduuwallodumdo tonyu wonyo'mo kwingelabiyajupogano. Proofet toorogai'aro a'mwo abolo Gooti toolluro sumdo tovi sugudo kwimo'nyajupo togai'aro ton sumdo wonyo'mo kwingelabiyajupogano. Toro kuvi kuruv ku'nono mwonyajupogano. Aki moro yogalo ikudodore tovi kuu'numwakopo su to kuvi wuu'nyo'mo kwingelabiyajupogano. Toro kun kuruv ku'nono muu'nyajupogano.

Pulollosi womdokwe yovekurajo tovuro kavlo tovinokwono

¹⁸ Aga pulollosi womdokwe yovekurajo tovino kavlo tov ikudumo'mokwono. Toro tovi kevu neya duu'nyulo.

¹⁹ A'mwo pworo wit sulo ton puuto tovi muunyu toru abwolorapo to'busukorogano. A'mwo su tooro aguto kig Gooti toolluro mido mollomwalo tovino kuuguudo tov me'no wuu'nodupudorogano. Toro kworo kuruv kavlo tovino kuudo miyouroma'dupudorogano. Wit sulo to'busuko kuuguudo su tov kemoro poowokalago tovi pulollosodowodokwono. Toro kuvi kuruv kirovanyuvanyu Satanyol yere bowo'ji wit sulo novlollosodowo'jure su tonyu bomodukwopiyodowodekono.

²⁰ Aki a'mwo pworo wit sulo tollovo sulwomdo tomuu abwolorapo to'busukorogano. A'mwo su tooro Gooti toolluro yogalo tovi yere wuu'nopi ilaiyo yokwerogano.

²¹ Toro kworo kuruv yogalo tov pulukomaiyo to'busuko kubalno kemoro poowokalago tovi maula'dowodokwono. Toro tovino tov yogalo su to kuvida'ai tabunyuwuulo puruv abwo'ji toga yere wuugollu'mo'mdupudorogano. Yogalo su tov kemoro poowokalago tovi guureji maulallokweyokwono.

²² Aki a'mwo pworo wit sulo tollovo aulewomdo tomuu abwolorapo to'busukorogano. A'mwo su tooro Gooti toolluro yogalo tovi wuu'nodupudorogano. Toro wuu'nodupudo kworo kuruv kwako akavida'ai kuto ivito tonyuno kuudo kwolallo yourukwapiyodupudo tokwe'aro kuto ivito bwotonyagokwe imo'nyo'mo kuudo tokwe'aro yiuwi'nokai kuudo su ton Gooti toolluro yogalo tovi bu'duvoloma'dupudogano. Su toro tovida'ai jurogudo imo'nyo'mo tov ku'nono mimo'nodupu aki sulo kun kuruv mai'nodupudorogano.

²³ Aki a'mwo pworo wit sulo tollovo kwako ilaiyo tovi abwolowoguroka to'busukorogano. A'mwo su tooro Gooti toolluro yogalo tovi wuu'nopi kuudo youroma'dupudorogano. Toro youromaropi toga jurogudo gullopi sulo ton ki'nodupudorogano. Toro tooravuro sulo ai'nupi ton pworo 100-pela pworo 60-pela pworo 30-pela ki'nodupudorogano.”

Jisasol wit toorogai'aro gwo'gwopto kaiya'nodo toorogai'aro tooraino yovekurajo adoka tovinokwono

²⁴ Aki Jisasol yovekurajo puruv aro kuudokaikono. “Muunyu kai'muuda'ai aguto kig toolluro mido mollomwalo tov a'mwo pwol gami womdo tovi wit sulo sugudo tollovo audosoka to'busukokwono.

²⁵ A'mwo su tool toro audosoka kuvi kuruv surakuuto toga gamoro womdokwe tooro sa wo'dopure toga gami ikomago tool bino sumaiyokwe gwo'gwopto kaiya'nodo tooravuro sulo tollovo wit womdokwe akuuto toru auloudosokaikono. Me'no kuudosuno sumaiyokwe kuugollu'movokaikono.

²⁶ Toro te lukomgu wit ton bilarowino sumaveyokwe aguto gullo'mno no ton ai'nopogano. Toro ai'nopo kuvi kuruv gwo'gwopto kaiya'nodo kworo kuruv wit togai ya'mo'nyuno sumaveyokwe abilaropogano.

²⁷ Toro bila'dopure tonyu a'mwo toolluro womdokwe tooro gwo'gwopto kaiya'nodo bila'dopure su toorai wonyuno sumaveyokwe a'mwo toollu aro kuudoporogano. “Oo nemi a'mwo agutoloo, gumoro womdo tovi wit sulo sugudo ton me'no audosodo kuvi kuruv anakuuto tomuu gwo'gwopto kaiya'nodo tooro aiyowomno so'mowopiyadokwovo. Gwo'gwopto kaiya'nodo su tooro gumoro womdo tovi adadomgu'aro dukobila'mwakovo?” Kuudoporogano.

²⁸ Toro kuudopo toorai a'mwo wit sulo sugudo kuudosodowodo su tool aro kuudokaikono. “Oo moro ikomago pwol audosokakwono.” Kuudokaikono. Toro te gamoro womdokwe tooro aro kuudoganoporogano. “Nevu gwo'gwopto kaiya'nodo su toorai kadomdo nokwo lo'movodukwopiyanonoldukono?” Kuudoganoporogano.

²⁹ Toro kuudoganopo kuvi kuruv a'mwo tool aro kuudokaikono. “Awiyo, kevu kadomdo supi tov wit kunyuda'ai nolovodukwopipiyo.

³⁰ Toro tovino tov wit togai'aro gwo'gwopto kaiya'nodo toorogai'aro yiuwi'nokai su ton aval'no nokwo bila'dopure tonyu kevu wonyapino jogaulo.” Toro wonyapiyopi lukomgu wosamujuko mullo'moneyokwe toga a'mwo abolo nomulomallo'mo tonyu aro wuudumonyugono. “Kevu gwo'gwopto kaiya'nodo toorai pumgu momuudeyapiyopi duko tovi iroudapiyo'moneyokwe kureyo dodovaireyulo. Toro kuvi kuruv moro wit tonyuno'gwowi mullu'bworosopi wosa kuto mullu'bworoso'moneyokwe ago tovi anakuuto tomuu neya doulomorosulo.” Wuudumonyugono.”

Ikulwiyo mastet tovino yovekurajokwono

³¹ Aki Jisasol yovekurajo puruv aro kuudokaikono. “Muunyu kai'muuda'ai aguto kig toolluro mido mollomwallo tov iko mastet tovuro ikulwiyo tollugwobusukokwono. Ikulwiyo su tollovo womdo tovi buraudodupudollovogano.

³² Aki iko su tovuro sulo tov yiuno kula'nyokwono. Yiuwi'nokai ikulwiyo buraudodupudo pun bwotonyogano. Toro kuvi kuruv sulo su to'gwowi yiuno kula'nyo kuunodokwono. Toro kuvi kuruv kwako tovi aburaudubi toga sulo su tov bilawogurowo'ji bwotonyo gullonokwono. Yiuwi'nokai kemi womdo tomuu buraudodupudo tonyu nuuwolowonokwono. Toro tovi dokato tooro wolabopi gamoro pilo tonyu kemi ago ton mododupudorogano. Muunyu kai'muuda'ai aguto kig toolluro mido mollomwallo tov iko mastet su tovuro ikulwiyo su to'busukokwono.” Kuudokaikono.

Flauwa munyo'moneyokwe yis tovino yovekurajokwono

³³ Aki Jisasol yovekurajo puruv aro kuudokaikono. “Muunyu kai'muuda'ai aguto kig toolluro mido mollomwalo tov flauwa munyo'moneyokwe yis to'busukokwono. Abolo puruv yis tovi malluno sumaiyokwe bret yakwollo'mo flauwa bwotonyago tonyu anakuuto tomuu aulosokakwono. Toro kuulosuno sumaiyokwe yis su tov pwekwono kworoka kuvi kuruv yis su tov yiuwi'nokai tomuu kuullo'mowopino sumaiyokwe flauwa tov bwotonyo amunopiyokakwono.”

Jisasol yiuno yovekurajo togai to'no subwasajuko tovinokwono

³⁴ Jisasol a'mwo abolo kwolallo tonyu Gooti toolluro yogalo tokwe ibwaso'mo tool yovekurajo su toro togai sodubwasajukekono. Jisasol kuuguudo pun yovekurajomaiyokwe togai mibwasajukekono. Toro kwol kuruv yiuno yovekurajo kuuguudo togai to'no sodubwasajukekono.

³⁵ Su tov proofet pwolluro yogalo ajakwolloka tovi suuwiyo imwojo'moneyokweyokwono. Yogalo ajakwolloka su tov arokwono. “Nuvu yovekurajo kuuguudo tonyu'aro to'no wuudumwalmonyugono. Aki nuvu yiulo yogalo punyuro kavlo pun moruudumwalmonyugono. Yiulo yogalo su ton Gooti tool yiuwi'nokai tonyu sokwollosoka togada'ai yiulo kupuu'nugelabodupudogano. Toro tonyuno to'no moruudumwalmonyugono.”

Wit toorogai'aro gwo'gwopto kaiya'nodo toorogai'aro tooraino yovekurajo tovuro kavlo tovinokwono

³⁶ Jisasol a'mwo abolo kwolallo i'bwo'nodopure tonyu me'no iwapino sumaiyokwe ago puvi aulokaikono. Toro kuuloduke toollu gamoro uumjunyokwe tooro aro kuudoporogano. “Gwo'gwopto kaiya'nodo tooro wit womdo tovi bila'dupudo tooraino yovekurajo tovino kavlo tov donekudono.” Kuudoporogano.

³⁷ Toro kuudopo toorai Jisasol aro kuudokaikono. “Nuu A'mwo Kwolaiyo Kuunodo toonyu a'mwo ikulwiyo sugudo kuudosodowodo toolbusukonyugono.

³⁸ Wit womdo tov kwako akavino'busukokwono. Aki ikulsulo sugudo tollovo Gooti toolluro kwoloraiyo gamoro kig mido mollomwalo tovi dolago tomuu me'no kuulomwalodupudo tonyuno'busukollovogano. Aki gwo'gwopto kaiya'nodo toorono'gwowi a'mwo abolo kirovanyuvanyu toolluro kwoloraiyo wimo'nodupudo tonyuno'busukogano.

³⁹ Aki wit womdo tovi akuuto tomuu ikomago pwol gwo'gwosulo kaiya'nodo auloudosoka su tool Satanyolluno'busukekono. Aki wosamujukuto mulomallo'mo su tov kwako akavuro aiyowo'mo imo'nono toga'no'busukokwono. Aki a'mwo abolo wosa kuto amulomaropo su ton ensel tooraino'busukogano.

⁴⁰ Gwo'gwopto kaiya'nodo toorai momuudeyoso'no duko suroudapiyoka to'busuko kubalno kwako akavuro aiyowo'mo toga yiuno aval'no imo'nonokwono.

⁴¹ A'mwo Kwolaiyo Kuunodo toonyu moro ensel toorai nomorapimonyugono. Toro tooro plavopi aro tonyu momuudeyosupinorogano. Yiuwi'nokai ma'no ma'no yo'mo molleroudapiyodupudo togai'aro a'mwo abolo kirovanyuvanyu mujeroungovla'mdupudo togai'aro tonyu momuudeyapiyopi aguto kig Gooti toolluro mido mollomwalo tovi dolago tomuuda'ai kwa'mgu tomuu bilomollu'bworosupinogano.

⁴² Aki ensel su tooro a'mwo abolo abilomollu'bworosupi su tonyu duko bwotonyo bomjonugelodawodo tomuuno noolomogalowopiyapinogano. Duko bwotonyo bomjonugelodawodo su tomuu danyu'nyuwuulo bwotonyo ibwosunpinomuugono. Toro tovino tov kumdato mujodumovlavopi aki kemi mago togai tuko do'nugovla'mwalpinorukono.

⁴³ Toro kuvi kuruv a'mwo abolo Gooti toolluro sumdo tovi sugudo wimo'nodupudo tono'gwowi kemi Kuunumiyago toolluro kig mido mollomwalo tovi anakuuto tomuu kuulomwalopi kuujo toolbusuko bako pwopimwalpinogano. A'mwo pwol kuuguudo akavi youromallo'moneyokwe tool po'dogalo neya wuu'nono.”

A'mwo pwol sugumaluko kuunodo puvi so'mgonomaroka tovino yovekurajokwono

⁴⁴ Aki Jisasol yovekurajo kuuguudo puruv aro kuudokaikono. “A'mwo abolo ton muunyu kai'muuda'ai aguto kig toolluro mido mollomwalo tovi dolago tomuu kuulomwallo'mo tov yovekurajo aka'busukokwono. Nuugwipweyo bwotonyo puruv kwako pumuu yiulo kupuu'na'dowo yasuwa'no kwollajukokwono. Toro tovi a'mwo pwol me'no yo'mgonoma'no sumaiyokwe aiko te yiulo apuurosokaikono. Toro tool ilaiyo bwotonyo yo'no aro adokaikono. “Nuu nuugwipweyo tov wo'dowodo kwako su tovi neya biyoma'monyugono.” Toro juno sumaiyokwe kwako su tovi biyomallo'moneyokwe gamoro yiuwi'nokai kuto ivito ton a'mwo pworai wiyo'no nuugwiyo kuubiyopekono. Toro kuubiyopo tov malluno sumaiyokwe kwako su tovi abiyomarokaikono.”

Soolwara tovida'ai sulo pullovo nuugwiyo bwotonyo biyoma'dupudo tollovaino yovekurajokwono

⁴⁵ “Aki puruv a'mwo abolo ton muunyu kai'muuda'ai aguto kig toolluro mido mollomwalo tovi dolago tomuu kuulomwallo'moneyokwe tov aro to'busukokwono. A'mwo nuugwiyo bwotonyagokwe pwol soolwara tovida'ai sulo pullovo nuugwiyo bwotonyo biyoma'dupudo tollovaino ya'mgonodowodekono.

⁴⁶ A'mwo su tool soolwara tovida'ai sulo sugumaluko pullugwo so'mgonomarokaikono. Sulo sugumaluko su tollugwo sulo pullovai uuwolo'mdowodokwono. Toro tovino tov a'mwo pworo kuubipi tov nuugwiyo bwotonyago mallo'moneyokweyollugwogano. Toro te a'mwo su tool aro adokaikono. Nuu sulo su tollugwo neya biyoma'monyugono. Toro juno sumaiyokwe soolwara tovida'ai sulo su tollugwoji biyomallo'mo tool gami yiuwi'nokai kuto ivito tonyu a'mwo pworai wiyo'no nuugwiyo kuubiyopekono. Toro kuubiyopo tov malluno sumaiyokwe soolwara tovida'ai sulo sugumaluko su tollugwoji abiyomarokaikono.” Su toro to'busukokwono.

Domwoga kuurowabwollo'moneyokwe kuto tovino yovekurajokwono

⁴⁷ Aki Jisasol yovekurajo puruv aro kuudokaikono. “A'mwo abolo ton muunyu kai'muuda'ai aguto kig toolluro mido mollomwalo tovi dolago tomuu kuulomwallo'mo tov domwoga kuurowabwollo'moneyokwe kuto to'busukokwono. A'mwo pworo domwoga kuurowabwollo'moneyokwe kuto tov wonyo buugo tovi kwolowopiyaporogano. Toro wolowopino sumaveyokwe yiuwi'nokai domwoga judo'no judo'nodo tooro kuto su tovi bowaro'mno yiuno muju tovino abilowakuu'noporogano.

⁴⁸ Toro bilowakuu'nyuno sumaveyokwe a'mwo tooro domwogakwe kuto su tovi wonyo buugo tovida'ai weko toru'no aluve'nomaroporogano. Toro luve'noma'no sumaveyokwe wolomwalo'mno domwoga toorai amomuudeyapiyoporogano. Domwoga sugudo toorai bookis tonyu anakuuto tomuu aulomollurosoporogano. Toro kuvi kuruv domwoga kaiya'nodo tooraino'gwowi adukwopiyoporogano.

⁴⁹ Toro te kwako akavuro aiyowo'mo toga su toro to'busuko kubalno imo'nonokwono. Su toro toga ensel tooro wolabopi a'mwo abolo Gooti toolluro sumdo tovi sugudo wimo'nodupudo tonyuro akuuto tomuuda'ai a'mwo abolo kirovanyuvanyu tonyu nomomuudeyapipinorogano.

⁵⁰ Toro momuudeyapiyopi a'mwo abolo kirovanyuvanyu su tonyu duko bwotonyo bomjonugelodawodo tomuuno wolomogalowopiyapinorogano. Duko bomjonugelodawodo su tomuu danyu'nyuwuulo bwotonyo ibwosunmwalpino tovino tov kumdato mujode'movlavopi aki kemi mago tonyu tuko do'numwalpinorukono.” Kuudokaikono.

⁵¹ Jisasol toro wuujuno sumaiyokwe aki aro kuudoganokaikono. “Kevu yiuwi'nokai su tonyuno kavlo ton kuudo jukiyouroma'mwakovo?” Toro kuudoganoka tooro aro kuudoporogano. “Tade, nyouroma'mwakuuwono.” Kuudoporogano.

⁵² Toro wuujuno sumaveyokwe Jisasol aro kuudokaikono. “Loowo tovino pi'mwo kuudokwe pworo muunyu kai'muuda'ai aguto kig mido mollomwalokwe tovuro kavlo tovino kuudo youroma'dupudorogano. Yiuwi'nokai pwolno pwolnodo su tooro ago tovida'ai mollomwalokwe toorobusuko imo'nodupudorogano. A'mwo mollomwalokwe su tooraida'ai pwol noonyumwonyu sugumaluko nuugwiyo bwotonyo biyoma'dupudo pun ago tovida'ai bomokalokwodowodekono. Su toro to'busuko kubalno a'mwo su tool kavlo youroma'dowodo aiyo tokwe'aro uumdo tokwe'aro yiuwi'nokai su toval bomokalokwowo'ji a'mwo abolo tonyu nokwo yodubwasumwalonekono.”

Nasaretda'ai a'mwo abolo ton Jisasollu yovo aguto mwiyajupo tovinokwono

⁵³ Jisasol yovekurajo ton me'no wuujuno sumaiyokwe kwako su toru kuugollu'movokaikono.

⁵⁴ Toro wuugollu'mo'mno sumaiyokwe gami wagwolago kuunodo Nasaret'no avlavokaikono. Toro plaino sumaiyokwe wagwolago su tovi ai'movokaikono. Toro ki'mo'mno sumaiyokwe Juu tooravuro i'bwo'nyago tovi kuula'no kuuguudo sodubwasajukekono. Toro yodubwasoduke tovi a'mwo abolo ton wuu'nyuno sumaveyokwe mollolokurosi sopogano. Toro ton aro sajunopogano. “A'mwo akalluro pi'mwo kuudo tokwe'aro duuwallo jurogudo wuuduuwallo'moneyokwe jurogudo tokwe'aro su toval gadomuuda'ai ma'dowodoldeyo?” Sajunopogano.

⁵⁵ Toro yajuno'mno biyolyogalo aro aduu'mwojopogano. “Oo nevu kuudo nyau'mwakuuwono. Su tool yiuno a'mwo ago mojokwe toolluro muugunyo tekwogano. Aki gami ganeyago tov Mariyavurekono. Aki gami gagwai'yago tooro Jemseke'aro Joosepeke'aro Saimooneke'aro Juudaseke'aro todorotogano.

⁵⁶ Aki gamoro yiuwi'nokai jo'mwo ton nevuge akawai mwalodopudogano. Toro tekwo yiuwi'nokai su tonyuno pi'mwo kuudo tov gadomuuda'ai youroma'dowodoldeyo?” Aduu'mwojopogano.

⁵⁷ Toro juno sumaveyokwe Jisasolluno biyolo to'no kuu'mwojopogano. Toro tonyu Jisasol aro kuudokaikono. “Proofet toollu yiuwi'nokai tomuu yovo aguto wiyodupudekono. Toro kuvi kuruv gami wagwolago'mdeyo oo ago'mdeyo tomuuno'gwowi yovo aguto mwiyodupudekono.” Kuudokaikono.

⁵⁸ Su tomuu Jisasolluno kuudo muubweyajupo tovino tov Jisasol kemi akuuto toru duuwallo jurogudo bwotonyago ton muuduuwallajukekono. Yiuno pwekwono pwekwono to'no kuuduuwallajukekono.