Matyuu 12 - Gooti Toolluro Yogalokwono

Jisasol iruko Sabat tollugwoji uuwolo'mdowodo tovinokwono

¹ Toruda'ai Jisasol iruko Sabat pullugwoji wit womdo punyu akuuto tomuu'aro aulokaikono. Toro kuulno sumaiyokwe gamoro uumjunyokwe tooro mujuko winodopure tovino tov wit tonyuro no pun amuudonugoulaporogano.

² Toro nugoulodopure toga Farasi pworo muugona'no sumaveyokwe Jisasollu aro amojurugoloporogano. “Ai, guu doonono. Gumoro gumjunyokwe tooro Sabat akallugwoji wit no tonyu amuudonugoulmwolapo tov loowo tovi kisuvolo sadokwovo.” Amojurugoloporogano.

³ Toro mojurugolodopure toorai Jisasol aro kuudokaikono. “Kevu Gooti toolluro yogalo sakwollungiko tovida'ai kuuguudo akavi mwonodupudorekuldeyo? Deviteke'aro gami uumjunyokwe toorogai'aro tooro wosamujuko tovino mujuko'mo sopo toga Devitolluro soka tovino kuuguudo su tovi mwonodupudorekuldukono?

⁴ A'mwo su tool Gooti toollu ilomoropiyo'moneyokwe ago tovi kuulno sumaiyokwe bret pun Gooti toollu me'no kwingiko tonyu maro'no gamoro uumjunyokwe toorogai amanoporogano. Bret su ton yiuno pris toorono nyo'moneyokwe tovi Deviteke tooro amanopo tovino tov loowo tovi kisuvolo kwiyoporogano.” Kuudokaikono.

⁵ Jisasol toro wuujuno sumaiyokwe aki aro kuudokaikono. “Moosesolluro loowo puruv aro sakwollungikokwono. Pris tooro Gooti toollu ilomoropiyo'moneyokwe ago tovi iruko Sabat tollugwoji womdo yodupudorogano. Toro tooro Sabat loowo tovi kisuvolo wiyodupudorogano. Toro yodupudo kworo kuruv ma'no ma'no miyokwerogano. Su toro sakwollungiko tovi kevu mwonodupudorekuldukono?

⁶ Nuu aro ikudumo'mokwono. Gooti toollu ilomoropiyo'moneyokwe ago tovi uuwolo'mdumdo toonyu akawai nomwakono.

⁷ Gooti toolluro yogalo puruv aro sakwollungikokwono. “Nuu kemoro yasuwa'no romiroudapiyodupudo tonyuno ilaiyo manyunodowodonyugono. Toro kuvi kuruv kevu a'mwo abolo pubuurai kalo mamwonyo'moneyokwe pasudo to'gwowi nuu ilaiyo nyunodowodonyugono.” Sakwollungikokwono. Su toro sakwollungiko tovino kavlo tov kevu kuudo po'dogalo miyouroma'mwakovo. Kevu kuudo po'dogalo souromaropujuko'mno'juki aro nokwo sopujukorekikono. Moro a'mwo numjunyokwe tooro ma'no ma'no miyodopure tovino tov kevu jul'nyogalo ku'nono maduubweyopujukorekikono.

⁸ Neya duu'nyulo. A'mwo Kwolaiyo Kuunodo toonyu iruko Sabat su to kuvi Agutonyugono.” Kuudokaikono.

Iruko Sabat pullugwoji Jisasol a'mwo pwollu sukuloka tovinokwono

⁹ Toruda'ai Jisasol su toru wuugollu'movo'no uuwino sumaiyokwe Juu tooravuro i'bwo'nyago puvi aulomwalokaikono.

¹⁰ Toro kuulomwalno sumaiyokwe a'mwo ato amuullugolopingikokwe pwollu amuugonarokaikono. Toro muugona'duke toga a'mwo Farasi pworo Jisasollu kooti yogalo youkuu'nuuduwiyo'mo winodupudo su tooro aro abuudoganoporogano. “Iruko Sabat akaga a'mwo akallu ikullo'mo tov loowo tovi kisuvolo wiyo'mo'mdukono oo mwiyo'mo'mdukono?” Abuudoganoporogano.

¹¹ Toro kuudoganopo toorai Jisasol aro kuudokaikono. “Kemida'ai pweku gumi sipsip pwol iruko Sabat pullugwoji buuso puvi kwolorawo'ji tov guu wonyapino to'no ibinekudukono? Awiyo, Iruko Sabat kuga kuruv gumi sipsip su toollu buuso tovida'ai yere luvoma'binekugono.

¹² Kevu sipsip tekwojai wiyo'mwojo'mo su toro yodupudo kuvi kuruv a'mwo abolo tono'gwowi sipsip toorai uuwolo'mdupudogano. Toro tovino tov a'mwo pwol iruko Sabat toga womdo sugudo yo'mo winodowo'jure toollu loowo tov muumjuku'dowodokwono. A'mwo su tool womdo kuvi kuuno yonekono.” Kuudokaikono.

¹³ Toro wuujuno sumaiyokwe Jisasol a'mwo ato amuullugolopingikokwe toollu aro kuudokaikono. “Gumi ato tov doruuguusapiyono.” Kuudokaikono. Toro kuudoka tovi a'mwo tekwo gami ato tov ruuguusapino sumaiyokwe gamoro ato tov aki aiko te sugudo sumo'nokakwono. Ato sugudo sumo'noka su tov gami ato pumguda'ai sugudo to'busuko aval'no sumo'nokakwono.

¹⁴ Jisasol toro sukuloka kuvi kuruv Farasi toorono'gwowi bolokwo'mno su'bwo'noporogano. Toro i'bwo'nyuno sumaveyokwe Jisasollu adadomgu'aro yoromiyosanoldukoneyokwe tovino adovi'mwojosoporogano.

Gooti toolluro womdokwe ajesoka Jisasollunokwono

¹⁵ Jisasol a'mwo su tooravuro yodopure tovino kuudo me'no souromarokaikono. Toro youroma'no sumaiyokwe ago su toru kuugollu'movokaikono. Toro wuugollu'mo'mno sumaiyokwe pla'mduke toollu a'mwo abolo bwotonyago ton kuumjunopogano. Aki yiuwi'nokai kuumjunopo su tonyuro nobollokwe tonyu sukullajukekono.

¹⁶ Toro ikulodowo aro aduullukullajukekono. “Kevu mino kuu'maiyo toru'no mamodomollupinono,” aduullukullajukekono.

¹⁷ Su toro aduullukullajuko su tov aiyoga proofet Aisaiyalluro puukwollo ajakwolloka puvi suuwiyo sumwojokakwono. Aisaiyalluro yogalo ajakwolloka su tov arokwono.

¹⁸ “Neya duu'nyulo. Moro womdo tovi nyumwalono'moneyokwe toollu me'no ajesekono. Toro toolluno nuu kalo buuropino nyunodowodekono. Aki moro yiuwi'nokai kuullutago tokwe ilaiyo nyunodowodekono. Toro ajeso su toollu moro Kuullo tool nuubwemekono. Aki toro kuubwemi tool a'mwo abolo Juu tooravuro miyawosunodupudo tonyu Gooti toolluro kooti yogalo idopto'nodo tovino nomoruudomollonekono.

¹⁹ Toro te moro womdokwe su tool a'mwo toorogai yogalo miyoullajunowo'ji deko maderounomollumwalonekono. Aki toro tool puuto tomuu plavowo'ji yogaimaguurai tov mamjodumovla'mwalonekono. Toro te a'mwo abolo ton gamoro yogaimaguurai tovi puuto tomuu muu'numwalpinokwono.

²⁰ Aki toro tool a'mwo abolo tonyu kooti yogalo idopto'nodo tokwe yere maduuwiyodowo'jure toga a'mwo abolo tonyu aro to'busuko igolmwalonekono. Su tool a'mwo abolo bevrapto to'busuko wollainyo imo'nodupudo tobuurai kavo uubemwojumwalonekono. Aki a'mwo abolo pun gworeko nebuulopiyo'mo to'busuko imo'nodopure tobuurai ilaiyo to'no igolmwalonekono. Toro igolowo'ji aiyowo'mo toga gamoro kooti yogalo idopto'nodo tov yiuwi'nokai noonyumwonyu tonyu nuuwolowonokwono.

²¹ Aki a'mwo abolo Juu miyawosunodupudo ton gamino yovo tovi kuudo uubweyopi kuvinono wiyo'mwojono'moneyokwe tovino sogwollo to'no kinmwalpinogano.” Proofet Aisaiyalluro kuuguudo ajakwolloka tov su torokwono.

A'mwo pworo Jisasolluno, “Belsebuulolluro jurogudo tokwe womdo amolladopiyo,” adopo tovinokwono

²² Su toro toga a'mwo abolo pun a'mwo pwollu Jisasollomno amokabopogano. A'mwo su toollu kuullo ma'no ma'nodo pwol kuulomwaloduke tovino tov sumnowojokwe imo'nodowo aki yogaimajokwe sumo'nyajukekono. Toro toollu mokabino sumaveyokwe Jisasol kuullo ma'no ma'nodo toollu modovomjapiyo'no a'mwo su toollu sukulokaikono. Toro ikulno sumaiyokwe a'mwo su tool yogalo do'no aki sumdo ainokaikono.

²³ Jisasolluro toro ikuloduke tovino a'mwo abolo kwolallo ton morumoukuropiyo'mno aro ajunopogano. “Aiyoo, Aguto Kig Devitolluro muugunyo Gooti toolluro ajesoka tool Jisasol kwoldukono?” Ajunopogano.

²⁴ Toro junodopure tovino Farasi tooro wuu'no'mno aro adoporogano. “A'mwo su tool kuullo ma'no ma'nodo tooravuro aguto kuunodo Belsebuulolluro jurogudo tovida'ai yodowodekono. Toro tool jurogudo su tokwe to'no kuullo ma'no ma'nodo toorai modovomjapiyodowodekono.” Adoporogano.

²⁵ Farasi tooravuro kuudo yau'dopure su tovino Jisasol kuudo me'no souromarokaikono. Toro toorai Jisasol aro kuudokaikono. “Kantri puru'monodo tov jopolosunowo'ji molo suno'ji tov ku'nono mamjomwekovlawonokwono. Aki ajumiyo'mdeyo oo ago puusuda'ai tonumdotodeyo ton jopolosunopi molo sunpi tov ku'nono mamjomwekovlapinonumdotogano.

²⁶ Aki su to'busuko kubalno Satanyolluro kworo kuruv imgu amgu jopolosunopi molo sunpi tov manyu toga mamjomwekovlapinorogano. Toro kworo kuruv yere younopipinorogano.

²⁷ Aki nuu toonyu kuullo ma'no ma'nodo Belsebuulolluro jurogudo tokwe kuullo ma'no ma'nodo toorai mamodovomjapiyodumdonyugono. Toro kuvi kuruv kevu mino yogalo aro nyudodupudorekikono. “Oo Belsebuulolluro jurogudo tokwe kuullo ma'no ma'nodo toorai modovomjapiyodowodekono.” Kevu mino su toro anyudupi to'gwowi kemi ikumjunyokwe kworai kuruv yogalo su tov nobu'duvolomaronokwono. Toro te kemoro ikumjunyokwe su tooro kooti yogalokwe toga kemi nomojokuu'naikubwepinorogano. Su tov aro tovinokwono. Kemoro ikumjunyokwe kworo kuruv kuullo ma'no ma'nodo toorai modovomjapiyodupudorogano.

²⁸ Toro kuvi kuruv nuu kuullo ma'no ma'nodo toorai Gooti toolluro jurogudo tokwe amodovomjapimi to'gwowi kevu aro kuudo nyouronumapinorekikono. Oo aguto kig Gooti toolluro mido mollomwalo tov nemi akuuto toru me'no abai'mo'mwalluko'mdeyo. Kuudo nyouronumapinorekikono.

²⁹ Kuudo pun jaullulo. Kuuko pwol a'mwo jurogudo toolluro kuto ivito punyu kuulomallo'mo tool a'mwo jurogudo su tool ago tovi kuuno mwalodowo'jure toga nokwo kuulomaronoldukono? Awiyo. Toro kuvi kuruv a'mwo jurogudo su toollu wuulo me'no agalogulloso'ji toga'no'gwowi ago tovi nokwo kuulawo'ji kuulomaronekono. Su toro aulomaro'ji toolluno kuudo yaupinekono, Oo akal jurogudo kuunodoldeyo.

³⁰ A'mwo pwol moro avalo manyumo'nodowodo tool mi ikomago nyumo'nodowodekono. Aki a'mwo pwol nuuge avaiwomdo miyodowodo su to kwol kuruv moro ikomago tooke avaiwomdo yodubulekono.

³¹ Toro te nuu aro ikudumo'mokwono. A'mwo tooravuro yiuwi'nokai ma'no ma'no pasudo togai'aro Gooti toolluno burolyogalo adupi togai'aro yiuwi'nokai su tonyuro kirumwallo tov Gooti tool nokwo modukwopiyonekono. Toro kuvi kuruv a'mwo pwol Gooti toolluro Kuullo toolluno burolyogalo ado'ji to'gwowi ma'no ma'nodo su tovuro kirumwallo tovi Gooti tool mamodukwopiyowo'ji yiunokuudo mujo'movla'mwalonokwono.

³² Aki a'mwo pwol nuu A'mwo Kwolaiyo Kuunodo toonyuno kaiya'no yogalo abwolomonumwogapiyawo'ji tov gamoro ma'no ma'nodo su tovuro kirumwallo tovi Gooti tool nokwo modukwopiyonekono. Toro kuvi kuruv a'mwo pwol Gooti toolluro Kuullo toolluno kaiya'no yogalo abwolomorumwogapiyawo'ji to'gwowi a'mwo su toolluro ma'no ma'nodo tovuro kirumwallo tovi Gooti tool mamodukwopiyowo'ji yiunokuudo mujo'movla'mwalonokwono. Agake'aro yiuwi'nokai lukomgu nobai'mowono kugake'aro toga kirumwallo su tov yiunokuudo mujo'movla'mwalonokwono.

Iko kaiya'nodo pwol ikulsulo kaiya'nodo tonyuno to'no ki'nodowodo tovinokwono

³³ Guu iko pwolluno iworovomallo'moneyokwe tooku gamoro ikulsulo ki'nodowo'jure tonyu kamwoga yomuugona'binekugono. Iko pwol sugudoldeyokwe gamoro ikulsulo kun kuruv sugudo tonyu ki'nugovla'mwalonekono. Aki iko pwol kaiya'nodoldeyokwe gamoro ikulsulo kun kuruv kaiya'nodo tonyu ki'nugovla'mwalonekono.

³⁴ Kevu Farasi toorekul gabakuto yaunanyo tooravuro mulojai'nodupudo toorekulbusuko imo'nodupudorekikono. Toro toorekul a'mwo kirovanyuvanyu imo'nodupudo tovino tov yiuno kaiya'no yogalo to'no dodupudorekikono. Su tov aro tovinokwono. Kemoro poowokalago tonyu buro'nyo buro'nyo kuudo tooro kuulaikwo'dopure tovida'ai kemoro mago tokwe jokwerekikono.

³⁵ Toro te a'mwo sugudo pwol gamoro poowokalago kuudo tovi yiuno sugudo to'no kuulloulluna'dowo'jure tovida'ai sugupasudo mujumovla'mdowodekono. Toro kuvi kuruv a'mwo kirovanyuvanyu pwolno'gwowi gamoro poowokalago kuudo tovi yiuno kirovanyuvanyu kuudo toorono kuulloulluna'dopure tovida'ai kirovanyuvanyu pasudo tooro mujumovla'mdowodekono.

³⁶ Toro kuvi kuruv kevu moro yogalo ikudumo'mo akavino wako neya dou'nogaulo. Iruko pullugwoji Gooti tool a'mwo abolo tonyu kooti yogalo noduuwiyonekono. Su toro aduuwiyo'ji toga kemoro yiuwi'nokai yogalo judo'no judo'no yasuwa'no bomjodumoulodapudo tooraino kevnokwe toorekul Gooti toollu kuu'maiyo toru'no nododowiyoku'bworubwepinorekikono.

³⁷ Toro adodowiyoku'bworosupi toga Gooti tool kemoro yogalo dodupudo tovi'aro gallainyubworowo'ji gamoro sumdo tovi sugudo nokwo wimo'nupinorekikono. Aki kemoro yogalo dodupudo punyuno'gwowi gallainyubworowo'ji nerekumwallonorekikono.”

Joona'wolluno duuwallo tovinokwono

³⁸ Toruda'ai a'mwo loowo tovino pi'mwo kuudokwe pworogai'aro Farasi pworogai'aro tooro Jisasollu aro kuudoporogano. “Ibwasokweyoloo, guu duuwallo jurogudo puruv anekuduuwallubi tovi wonowa'ji gumino kuudo yaguuranonogano. Oo akal Gooti toolluro kuunodoldeyo. Kuudo yaguuranonogano.”

³⁹ Su toro kuudopo toorai Jisasol aro kuudokaikono. “Kevu agasuro amwakopo ma'no ma'nodokwe toorekul Gooti toollu muumjunodupudorekikono. Toro toorekul mino tov nebal'no kuunodoldukoneyokwe tovino ikuduuwallo'mo aikullunadopiko kuvi kuruv kevu duuwallo puvi mwonpinorekikono. Toro kworekul kuruv yiuno proofet Joona'wollu kwimo'noka to'busuko kubalno ikuduuwallodo'mure tovino to'no wonpinorekikono.

⁴⁰ Joona'wol domwoga toolluro sumwoluko tovi anakuuto tomuu iruko pullapullu surakuuto pullapullu aularoka to'busuko kubalno A'mwo Kwolaiyo Kuunodo toonyu kwako akavi anakuuto tomuu iruko pullapullu surakuuto pullapullu kuula'monyugono.” Kuudokaikono.

⁴¹ Jisasol toro wuujuno sumaiyokwe aki aro kuudokaikono. “Niniveda'ai tooro Joona'wolluro moruudoduke tovi wuu'no'mno Gooti toollomno souragunyumo'noporogano. Toro kuvi kuruv aga nuu Joona'wollu uuwolo'mdumdo toonyuno'gwowi akawai nomwakono. Toro toonyuro yogalo moruudekumollodore tovi kevu muu'nyubusuko sumwakopo tovino tov Gooti tool kooti yogalo adaikullo'ji toga Niniveda'ai tooro nobodapinorogano. Toro bodavopi agasuro togaikulluro ma'no ma'nodo sumwakopo toorai nobomollolupto'naikubwepinorogano.

⁴² Aki Gooti tool agasuro toorekullu kooti yogalo adaikullo'ji toga abolo aguto kwin puruv nobodawonokwono. Kwin su tov kwako imomgu Siba tomuuda'ai aguto imo'nodowo mido amollomwallajukokwono. Toro te aiyoga abolo kwin su tov Sooloomonolluro pi'mwo kuudo tovi wuu'nyo'moneyokwe manyu tomuuda'ai sulabokakwono. Toro kuvi kuruv aga'no'gwowi Sooloomonollu uuwolo'mdumdo toonyu akawai nomwakono. Aki moro yogalo ikudodore tonyu kevu muu'nyubusuko to'no yodupudorekikono. Toro tovino tov lukomgu Gooti tool agasuro toorekullu kooti yogalo adaikullo'ji toga abolo aguto kwin su to kuruv bodavowo'ji kemi jul'nyogalo nodaikubweyonokwono.” Jisasol toro kuudokaikono.

Agasuro a'mwo abolo Jisasolluno kuudo muubweyodupudo tonyu kaiya'nodo tov nuuwimo'numwalono tovinokwono

⁴³ Aki Jisasol aro kuudokaikono. “Kuullo ma'no ma'nodo pwol a'mwo pwollu me'no abuugollu'mokalokwo'ji toga kuullo su tool iruko mwallo'moneyokwe kwako a'mwomaiyo kuu'maiyo yalukullo toru'no yo'mgonomollonekono. Toro yo'mgonomollowo'ji kwol kuruv iruko mwallo'mo puruv ku'nono miyo'mgonomaronekono.

⁴⁴ Toro te kuullo ma'no ma'nodo su tool aro donekono. “Oo nuu mi sumdomguda'ai ago abuugollu'mokalokuumwa'jo tovino aikomgu neya pla'monyugono.” Toro dowo'ji kuullo ma'no ma'nodo su tool gami sumdomguda'ai ago su tovi aki aiko te kuulawo'ji toga aro tonyu wononekono. Ago tovi anakuuto tomuu noonyumwonyu puru'monodo kuruv nonaguto wononekono. Aki ago su tovi ipruullo tokwe me'no abwokuropingiko tovi wonowo'ji aki ago su tovi anakuuto tomuu yiuno ilaiyo to'no sovo'dogalosungiko tovi wononekono.

⁴⁵ Toro wonowo'ji kuullo ma'no ma'nodo su tool 7-pela kuullo pworogai'aro toorai yo'mgonomallo'mo plawonekono. 7-pela kuullo su tooravuro kirovanyuvanyu pasudo tov sumdomguda'ai kuullo ma'no ma'nodo toolluro tovi uuwolo'mdupudorogano. Su toro toorai me'no yo'mgonomarowo'ji yiuwi'nokai kuullo ma'no ma'nodo tooro ago su tovi aval'no kuulomwalpinorogano. Toro te a'mwo su tekwo sumdomgu kuullo ma'no ma'nodo tool mwaloduke toga kaiya'no amwallajukekono. Toro kuvi kuruv lukomgu yiuwi'nokai kuullo ma'no ma'nodo su tooro aulomwalpi toga'no'gwowi a'mwo su tekwo sumdomguda'ai kaiya'no amwallajuko tovi uuwolowo'ji kaiya'no bwotonyo tov wimo'nugovla'mwalonekono. Su toro to'busuko kubalno yiuwi'nokai agasuro kirovanyuvanyokwe a'mwo abolo togaikul moro yogalo ikudodo'mure tonyu muu'nyubusuko to'no yodupudogaikikono. Toro tovino tov kaiya'no bwotonyo pun nekullumo'numwalonogaikikono.”

Jisasollu ganeyago gagwai'yago kuunodo wimo'nodupudo tonyunokwono

⁴⁶ Jisasol a'mwo abolo kwolallo tonyu kuuno moruudoduke toga Jisasolluro ganeyago tokwe'aro gagwai'yago toorogai'aro ton abai'movopogano. Toro ton Jisaseke kuuguudo jo'mo winodopure ton ago tovi kwa'mgu toru abodaiyajupogano.

⁴⁷ Toro da'mdopure tonyu a'mwo pwol wonyuno sumaiyokwe Jisasollu aro kuudokaikono. “Gumi juneyago tokwe'aro jugwai'yago toorogai'aro ton guvuge kuuguudo jo'mo kwa'mgu tomuu abodakwovo.” Kuudokaikono.

⁴⁸ Toro kuudoka kuvi kuruv Jisasol aro kuudoganokaikono. “Mi nyuneyago nyugwai'yago ton ala'mworuvodeyo?”

⁴⁹ Toro wuudoganyuno sumaiyokwe a'mwo abolo gami kuumjunyajupo tonyu gamoro ato tokwe idowosuno sumaiyokwe aro kuudokaikono. “Kevu doonyulo. Mi nyuneyago nyugwai'yago anyumo'nadokwopo su ton akawai amwakopo togaikul kugaikikono.” Kuudokaikono.

⁵⁰ Toro wuujuno sumaiyokwe aki aro kuudokaikono. “Mi nyugwai'yagoldeyo oo mi nyo'mwo'mdeyo oo mi nyuneyago'mdeyo ton yiuno moro Nyunumiyago muunyu kai'muuda'ai toolluro ilaiyo winodowo'jure tovi uumjunodupudo su ton kugano.” Kuudokaikono.