Matyuu 11 - Gooti Toolluro Yogalokwono

Wonyo Galuvollokwe Joonol Jisasollu wuudoganyo'moneyokwe gamoro a'mwo pworai amodapiyoka tovinokwono

¹ Jisasol gami uumjunyokwe toorai me'no ibwasuno sumaiyokwe amodapiyokaikono. Toro amodapiyoka su tomuuda'ai Jisasol wuugollu'mo'mno sumaiyokwe wagwolago punyuda'ai a'mwo abolo tonyu yodubwasowo'ji Gooti toolluro yogalo tokwe moruudomollo'moneyokwe avlavokaikono.

² Su toro toga Wonyo Galuvollokwe Joonol wuulo killo'mo ago tovi aule'nallajukekono. Toro kuule'na'dowo yiuwi'nokai Krais toolluro womdo yoduke tonyuno kuu'nyajukekono. Joonol toro wuu'nyuno sumaiyokwe gavnokweyolluro uumjunyokwe pworai Jisasollu wuudoganpino'moneyokwe amodopiyabokaikono.

³ Toro amodopiyaboka su tooro bino sumaveyokwe Jisasollu aro kuudoganoporogano. “Gooti toolluro nekullo'mwojo'moneyokwe ajesoka Krais toolluno sogwollo kinodowado su tool guu kwekudukono? Oo a'mwo pwolluno sogwollo kuuno kinmwalanonoldukono?” Kuudoganoporogano.

⁴ Toro kuudoganopo toorai Jisasol aro kuudokaikono. “Kevu Joonollomno aikomgu plavopi yiuwi'nokai kuu'numwakopo togai'aro aki sumdo amuugona'mwakopo togai'aro tonyuno neya duujulo.

⁵ A'mwo abolo sumnowojokwe ton aki aiko te sumdo kinodupudogano. Aki a'mwo abolo suvlato amuullugolopingikokwe ton kado pla'mdupudogano. Aki a'mwo abolo wonawiyo nobollokwe ton ikulnodupudogano. Aki a'mwo abolo kadu'nollukullokwe ton aki aiko te kaduko wuu'nodupudogano. Aki a'mwo abolo me'no abollungopo ton aiyo aiko te duka'mdupudogano. Aki kuuguudo sugudo tov a'mwo abolo apoo'nyaiyo tobuurai moruudomollodupudokwono.

⁶ Toro te Joonollu aro duujulo. “Yiuwi'nokai a'mwo abolo numino kuudo nubweyodupudo ton numida'ai mabwolorapi su ton ilaiyo nokwo imwalpinogano.” Duujulo.” Jisasol toro kuudokaikono.

Jisasol Wonyo Galuvollokwe Joonolluno adoka tovinokwono

⁷ Joonolluro uumjunyokwe tooro me'no wuugollu'mo'mno sumaveyokwe Jisasol a'mwo abolo kwolallo abi'bwo'nopo su tonyu Joonolluno aro kuudokaikono. “Kevu kuudo pun jaullulo. Kevu a'mwomaiyo kwako yalukullo toru'no avlaiyajupo togaikul burowo'nyo tovi wonpino'moneyokwe avlaiyajupogaikuldeyo? Bevrapto puvi dolo tov mogalolobeyosoduke tovi wonyo'mo avlaiyajupogaikuldukono?

⁸ Aki kevu a'mwo youro sugumaluko yesodowo'jure pwollu wonyo'moneyokwe avlaiyajupogaikuldukono? Awiyo. Kevu kuudo neya jaullulo. A'mwo youro sugumaluko yesodupudo su tooro a'mwo aguto kig tooravuro ago tonyu anakuuto tomuu kuulomwalodupudorogano.

⁹ Toro kuvi kuruv kevu kwako yalukullo toru'no avlaiyajupo tovino kavlo tov kuudo neya jaullulo. Kevu proofet pwollu sumdo wonpino'moneyokwe kwako yalukullo toru'no avlaiyajupogaikikono. Toro te aro ikudumo'mokwono. Proofet su tool Wonyo Galuvollokwe Joonol kwekono. Toro tool yiuwi'nokai proofet gabovo toorai uuwolo'mdowodekono.

¹⁰ Toro te proofet su toolluno aiyoga Gooti toolluro yogalo puruv aro sakwollungikokwono. “Duu'nono. Nuvu moro a'mwo modomollokwe pwollu morapiyo'mi gumi sumdomgu wanonekono. Toro tool wanowo'ji guvu a'mwo abolo tonyu wuuru'mallo'moneyokwe puuto tovi yovo'dogalagubweyonekono.” Toro sakwollungikokwono.

¹¹ Nebal'no ikudumo'mokwono. Yiuwi'nokai a'mwo abolo tonyuro yowosungelabodopure tovida'ai a'mwo billumo'nodupudo tooro Wonyo Galuvollokwe Joonollu ku'nono muuwolo'mdupudorogano. Toro kuvi kuruv yiuwi'nokai a'mwo tooro muunyu kai'muuda'ai aguto kig toolluro mido mollomwalo tovi kuulomwalodupudo su toorono'gwowi aiyowo'mo bwollumo'nodapudo kworo kuruv Wonyo Galuvollokwe Joonollu me'no uuwolo'mdupudorogano.

¹² Aiyoga Wonyo Galuvollokwe Joonol amwallajuko togada'ai a'mwo pworo muunyu kai'muuda'ai aguto kig mido mollomwalo tovi magu'nyo sugolmelabiyajuporogano. Toro igolmelabino igolmelabino yodupu aga kuga kuruv aval'no kuuno igolmovla'mdupudorogano. Aki a'mwo magu'nyokwe pworo muunyu kai'muuda'ai aguto kig mido mollomwalo tovi kuulomwalodopure tobuurai ipolomallo'moneyokwe guureji munyuro'melabodupudorogano.

¹³ Su tov aro tovinokwono. Joonol yere mimo'noduke toga yiuwi'nokai proofet tooravuro kuuguudo ajakwollajupo togai'aro Gooti toolluro loowo togai'aro ton aguto kig Gooti toolluro mido mollomwalo bai'mowono tovino kuu'maiyo toru'no me'no adodowiyoku'bworosumelabiyajuporogano.

¹⁴ Toro te kevu moro yogalo tovi wuu'nyo'mo ilaiyo aikulluno'ji tov kemi aikuuwoso. Kevu proofet Ilaijalbusuko pwol lukomgu bwono toolluno sogwollo kingelabodupudo su tool Joonol kwekono.

¹⁵ A'mwo pwol kuuguudo akavi kadu'molo so'ji su tool po'dogalo neya wuu'nono.

¹⁶ Nuu agasuro a'mwo abolo mwalodupudo tonyuno yovekurajo tokwe dumo'mokwono. A'mwo abolo su ton nuuge'aro Jooneke'aro toonalluro kuuguudo yodubwosumelabodowole tovi me'no wuu'nodupudogano. Toro wuu'nodupudo kun kuruv kwoloraiyo sumwonyo ipa'nyo yodupudo tonbusuko imo'nodupudogano. Kwoloraiyo ton maket tomuu mwalopi kemi ibwoto'nyo tonyu biyolyogalo aro duu'mwojodupudogano.

¹⁷ Nevu dato ilaiyo pun nogunyo tokwe kirapiyodowore kuvi kuruv kevu kworomo mimapogaikikono. Aki nevu kumdato jo'moneyokwe dato tonyu kirapiyodowore kuvi kuruv kevu kumdato madumapogaikikono. Su toro tomgu'aro biyolyogalo duu'mwojodupudogano.

¹⁸ Yovekurajo su toro to'busuko kubalno Joonol aboka toga wosamujuko togai wain wonyo togai tonyuno kumako mwalodowo boduke toolluno aro ajajupekono. “Oo a'mwo su tool kuullo ma'no ma'nodokwe pwekono.” Ajajupekono.

¹⁹ Toro kuvi kuruv A'mwo Kwolaiyo Kuunodo toonyu wosamujuko togai wain wonyo togai nomwalodum bodore toonyuno aro nyudodupudogano. “A'mwo su tool wosamujuko to'no nyuno nyuno yodowodo kwol kuruv nuugollu'meyo'mo mwinodowodekono. Aki toro tool wain wonyo bwotonyago nodowodo tovida'ai amomo yokwekono. Aki a'mwo su tool takis nuugwiyo mallokwe toorogai'aro a'mwo ma'no ma'nodokwe toorogai'aro toorogai ibwoto'nodowodo tov ilaiyo'maiyo.” Nyudodupudorogano. Toro kuvi kuruv Jooneke'aro nuvuge'aro toonalno'gwowi pi'mwo kuudo tovi uumjunodowolonakono. Aki toro toonal pi'mwo kuudo tovi'aro uumjunodowolo su tov sulo kuvinono ai'no'ji toga nebalo'mdukoneyokwe tovino kuu'maiyo toru'no nobomollolupto'nosonokwono.” Jisasol toro kuudokaikono.

A'mwo abolo Jisasolluno kuudo muubweyodupudo ton jul'nyo nomapino tovinokwono

²⁰ Toruda'ai Jisasol wagwolago tonyu duuwallo jurogudo bwotonyago togai me'no kuuduuwallajukekono. Toro wuuduuwalloduke kuvi kuruv a'mwo abolo kwonyajupo ton Gooti toollomno kuudo miyouragunyumo'nyajupogano. Toro tovino tov Jisasol yogalo aro amojurugolokaikono.

²¹ “Aiyoo, kevu wagwolago Koorasin toruke'aro Betisaida toruke'aro tovalluda'ai mwalodupudo togaikul jul'nyo nomapino tov kula'nyo'maiyo. Bwotonyo kuunodokwono. Neya duu'nyulo. Moro duuwallo jurogudo ikuduuwallodumdo ton wagwolago Tairuke Saidoonke tovallu kuuduuwallo'mujuko'mno'juki a'mwo abolo kirovanyuvanyu kuumwiyo mwalodupudo su ton aiyogada'ai Gooti toollomno kuudo me'no souragunyumo'nopujukogano. Aki toro ton kalo winodopure tovino duuwallo'moneyokwe tov kanyu sa wollo'moneyokwe youro togai mollosopi kemi mido tonyu kwagupto tokwe aluvobwosu'naropujukogano. A'mwo abolo kirovanyuvanyokwe su ton Gooti toollomno su toro tomgu'aro kuudo souragunyumo'nopujukogano.

²² Toro kuvi kuruv kev togaikulluno'gwowi aro ikudumo'mokwono. Gooti toolluro kooti yogalo aduuwiyo'ji iruko su tollugwoji kevu kirumwallo bwotonyo tov nomapinogaikikono. Kemoro kirumwallo mapino su tov wagwolago Tairuke Saidoonke tovalluda'ai a'mwo abolo tonyuro mapino tovi nuuwolowonokwono.

²³ Aki kevu wagwolago Kapurniyamda'ai a'mwo abolo togaikul aro kuudo yau'dupudogaikikono, Oo Gooti tool nemi gamoro ago muunyu kai'muu nonekumokailawonoldeyo, kevu su toro yau'dupudo kuvi kuruv kemi maikumokailawonekono. Gooti tool kemi a'mwo me'no bolodupudo tooravuro tomuuno'gwowi noolomekwopiyawonekono. Toro te neya duu'nyulo. Moro duuwallo jurogudo kemi me'no ikuduuwallodumdo ton wagwolago Soodoom tovi akuuto toru aval'no kuuduuwallo'mujuko'mno'juki wagwolago su tov aga kuga kuruv kuuno kworowo'jujukokwono.

²⁴ Toro te nuvu aro ikudumo'mokwono. Gooti toolluro kooti yogalo aduuwiyo'ji iruko su tollugwoji kevu kirumwallo bwotonyo nomapinogaikikono. Kemoro kirumwallo mapino su tov wagwolago Soodoomda'ai a'mwo abolo tonyuro mapino tovi nuuwolowonokwono.” Jisasol yogalo toro amojurugolokaikono.

Jisasol Gooti toollu, “Nenyoo,” subusu'nyogalo kuudoka tovinokwono

²⁵ Su toro toga Jisasol subusu'nyogalo aro kuudokaikono. “Mi Nyunumiyagoloo, guu muunyu kai'muuda'ai togai'aro kwako akavida'ai togai'aro tonyu Agutekugono. Toro tookuji, “Nenyoo,” agudumono. Su tov aro tovinokwono. A'mwo kwako akavida'ai pi'mwo kuudokwe tooravuro sumdo tovi yiulo kupuurubweyodumdekugono. Toro kuvi kuruv gumoro sumdo tovi kwoloraiyo tobuurobusuko gujumo'nodupudo tonyuno'gwowi yiuwi'nokai su tonyuno kavlo tov kuu'maiyo toru'no bomollolupto'nubweyodumdekugono.

²⁶ Mi Nyunumiyagoloo, guvnokwekujuro ilaiyo gujunodowodo tovi kuvinono uumjunodumdekugono. Ilaiyokwono.” Jisasol subusu'nyogalo su toro kuudokaikono.

²⁷ Aki Jisasol a'mwo abolo tonyu aro kuudokaikono. “Nuu yiuwi'nokai tonyu mido mollomwallo'moneyokwe tov mi Nyunumiyago tool me'no anubweyokanyugono. Yiuno mi Nyunumiyago su toolno mino kuudo kuunodo yanuu'dowodekono. Aki yiuno nuvnokwe toonyu mi Nyunumiyago su toolluno kuudo kuunodo youroma'dumdekono. Aki yiuno gamoro Kwolaiyo nuvnokwe toonyuno aro kuudo yau'dumdonyugono. Oo a'mwo abolo punyu mi Nyunumiyago su toolluno neya bomollolupto'nubwemonyugono. Nuu a'mwo abolo tonyu kuu'maiyo toru'no kuvinono bomollolupto'nubweyodo'mure tovida'ai mi Nyunumiyago su toolluno kuudo nokwo youromapinogano.” Kuudokaikono.

²⁸ Jisasol toro wuujuno sumaiyokwe toga aki a'mwo abolo tonyu aro kuudokaikono. “Kevu yiuwi'nokai womdo imo'na'dupu burawo yodupudo togaikike'aro tagunyo mollukwo'mdupudo togaikike'aro togaikul miyomno dobilo. Toro abupi togaikullu nuvu iruko mwalmwalpino'moneyokwe tov nekubwemonyugono.

²⁹ Su tov aro to'busukokwono. Buulmokau pworo nome'nomokavlaiyo'moneyokwe womnyuko tagwo tovi dolago tomuu da'mdupudorogano. Toro to'busuko kubalno kevu mi dolago tomuu boulodavopi donumjunogaulo. Su tov aro tovinokwono. Nuvnokwe toonyu moro poowokalago kuunodo tokwe bwolomorumwogapinodamdonyugono. Toro toonyu kemi kavo nokwo ikubemwojumwalmonyugono. Toro toonyuno kuudo me'no souronumapi togaikul kemoro poowokalago kuunodo tokwe iruko nokwo mwalmwalpinogaikikono.

³⁰ Kevu kuudo neya jaullulo. Moro womnyuko tagwo to'busuko ikubwemo tov mi numjunyo'mo tokwono. Toro aikubwemi kuvi kuruv kevu kavo to'no nokwo numjunmwalpinogaikikono. Aki yiuno paiko to'busuko to'no nokwo mollukwo'mwalpinogaikikono.” Jisasol toro kuudokaikono.