Luuk 4 - Gooti Toolluro Yogalokwono

Satanyol Jisasollu yamju kwiyoganoka tovinokwono

¹ Toruda'ai Jisasol wonyo Joodanovida'ai aikomgu abokaikono. Toro bino sumaiyokwe Gooti toolluro Kuullo tool Jisasollu kuullo'mowopiyo'no kwako a'mwomaiyo tomuuno amollubworomokavlavokaikono.

² Toro te kwako a'mwomaiyo su tomuu mwaloduke toollu Satanyol iruko 40-pela tobuullu bodowo yamju abuuwiyoganyajukekono. Yiuwi'nokai iruko su tobuullu Jisasol wosamujuko pun manyajukekono. Toro tool iruko su tobuullu me'no uuwolo'nyuno sumaiyokwe toga mujuko bwotonyo kwinokaikono.

³ Toro winoduke toollomno Satanyol bino sumaiyokwe aro kuudokaikono. “Guvu Gooti toolluro kwolaiyekudeyokwe sulo akanyu, “Bret jumo'nyulo,” duudono.” Kuudokaikono.

⁴ Toro kuudoka toollu Jisasol aro kuudokaikono. “Gooti toolluro yogalo tov aro sakwollungikokwono. “A'mwo abolo ton aiyo mujomwekovlaiyo'mo jurogudo tov yiuno bret tovida'ai to'no mama'mwalpinogano.” Sakwollungikokwono.” Kuudokaikono.

⁵ Toruda'ai Satanyol Jisasollu muunyu puru'no amollubworomokailokaikono. Toro mollubworomokailno sumaiyokwe yiuwi'nokai kwako akavida'ai a'mwo aguto kig tooravuro kantri tonyu avalo toga yere amoruuduuwallokaikono.

⁶ Satanyol toro wuuduuwalluno sumaiyokwe kuudokaikono. “Yiuwi'nokai kwako akavida'ai a'mwo aguto kig tooravuro kantri su togai'aro kantri tonyu noonyumwonyu sugudo kuula'dupudo togai'aro tonyuno gujabiyo'mo jurogudo tov mi anuwoso. Toro te nuvnokwenyuro kuudo tovi uumjuno'mi a'mwo pwollu wiyo'mo anyuno'ji tov kuvinono nokwo wimonyugono.

⁷ Toro te guvu mino suduko anyunuguto'nubi tov yiuwi'nokai su ton nogujamonyugono.” Kuudokaikono.

⁸ Toro kuudoka tovi Jisasol aro kuudokaikono. “Gooti toolluro yogalo puruv aro sakwollungikokwono. Yiuno gumi Gooti Aguto toolluno to'no neya julomoropiyawono. Aki yiuno kwolluno to'no uumjunbinekugono, sakwollungikokwono.” Kuudokaikono.

⁹ Toruda'ai Satanyol Jisasollu wagwolago Jeruusalem'no amokailokaikono. Toro mokailno sumaiyokwe toga Jisasollu Gooti toolluro ilomoropiyo'moneyokwe ago tovi muunyu aiyowo'mo mwopto toru sulomorumwallokaikono. Toro uumwalluno sumaiyokwe Satanyol aro kuudokaikono. “Guvu Gooti toolluro Kwolaiyekudeyokwe muunyu akaruda'ai doolodukwopiyawono.

¹⁰ Gooti toolluro yogalo tov aro sakwollungikokwono. “Gamoro ensel toorai gumi yellukuromollogumwalmwalpino'moneyokwe nomodapiyonorogano.

¹¹ Toro te gumoro suvlo tov sulo tonyu kaiyako nyomaro'jokwe tovino nokwo galogumworapinekugono.” Toro sakwollungikokwono.” Kuudokaikono.

¹² Toro kuudoka tovi Jisasol aro kuudokaikono. “Gooti toolluro yogalo puruv aro sakwollungikokwono. Guvu gumi Gooti Aguto toollu yamju wiyogado mwibinono. Toro sakwollungikokwono.” Kuudokaikono.

¹³ Toro te Satanyol yiuwi'nokai yamju su ton me'no wiyoganyuno sumaiyokwe Jisasollu kuugollu'movokaikono. Toro tool puga aki aiko te wiyoganyo'mo tovino kuudo yau'no sumaiyokwe sogwollo to'no ainyajukekono.

Jisasol kwako Galili tomuu womdo muudu'no soka tovinokwono

¹⁴ Toruda'ai Jisasol Gooti Toolluro Kuullo toolluro jurogudo uubweyoduke tokwe Galili tomuuno aikomgu avlavokaikono. Toro toolluno kuuguudo tov yiuwi'nokai su towaida'ai a'mwo abolo ton adolomo'naropogano.

¹⁵ Toro te Jisasol kemoro i'bwo'nyago tonyu Gooti toolluro kuuguudo tokwe aullodubwasajukekono. Toro kuullodubwasoduke toolluno yiuwi'nokai a'mwo abolo ton sulomoropiyajupekono.

Wagwolago Nasaretda'ai a'mwo abolo ton Jisasolluno surodo kuunopo tovinokwono

¹⁶ Jisasol kuuguudo tokwe toro ibwosomolluno sumaiyokwe toga gami wagwolago aguto sagullumo'noka Nasaret'no abokaikono. Toro bino sumaiyokwe yiuwi'nokai toga yodowodo kubalno Sabat tollugwoji i'bwo'nyago puvi kuula'no kuuguudo mojagillo'mo tool sulodavokaikono.

¹⁷ Toro toollu proofet Aisaiyalluro puukwollikwiyo pweyo aweyogunyugolowosungiko tov kwiyopekono. Toro kwiyopo tovi Jisasol kuusuno sumaiyokwe puukwollo puruv aro sakwollungiko tovi so'mgonomarokaikono.

¹⁸ “Aguto toolluro Kuullo tool numi me'no anubweyokanyugono. Toro toonyu apoo'nyaiyo toorai kuuguudo sugudo tokwe yodubwaso'moneyokwe me'no ajanubweyokaikono. Aki wuulo killo'mo ago tovi kuule'na'dopure toorai bomollurolovomokalokwiyo'moneyokwe kuuguudo tov wuujo'mo amonuwopiyabokanyugono. Aki a'mwo sumnowojokwe toorai aki aiko te sumdo nokwo kinpino'moneyokwe amonuwopiyabokanyugono. Aki a'mwo pwekwojo a'mwo pworavuro jul'nyo uubweyodopure tovi ma'dupudo su tekwojai mollurolowapiyo'mo amonuwopiyabokanyugono.

¹⁹ Aki Aguto toolluro ilaiyo igollo'moneyokwe ajesoka toga me'no abai'mo'mwallukokwono, moruujo'moneyokwe amonuwopiyabokanyugono.”

²⁰ Jisasol puukwollikwiyo pweyo aweyogunyugolowosungiko tovida'ai kuuguudo su tov me'no mojagilno sumaiyokwe buukiyo su tov aki aiko te amoweyogunyugolowosokaikono. Toro pweyogunyugolowosuno sumaiyokwe a'mwo buukiyo su tovi mollomwalokwe toollu wiyo'no kwolomwalokaikono. Toro wolomwalno sumaiyokwe yiuwi'nokai a'mwo abolo Juu tooravuro i'bwo'nyago su tovi aulomwalopo ton kemi sumdo togai guureji amuugonallajupekono.

²¹ Toro muugona'dopure toga Jisasol aro kuudokaikono. “Anuugwo toga kevu kaduko wuu'na'dopure toru Gooti toolluro yogalo sakwollungiko akav suuwiyo kuvinono me'no sumwojumokakwono.” Kuudokaikono.

²² Toro kuudoka toolluno yiuwi'nokai a'mwo abolo ton ilaiyo to'no sulomodomoropiyapogano. Aki gamoro mago tovida'ai yiuwi'nokai yogalo sugumaluko lokaboduke tonyuno kuudo kwolallo yourukwapino sumaveyokwe aro sajunopogano. “A'mwo akal Joosepolluro kwolaiyekono. Toro tovino tov gamoro yogalo pi'mwono anekudadopiko su ton adadomgu'aro kuvinono dukonekudadopiyo?” Sajunopogano.

²³ Toro yajunodopure tonyu Jisasol aro kuudokaikono. “Nuu kemino kuudo me'no yourekuma'dumdonyugono. Kevu mino yovekurajo aro tokwe nyudupinogaikikono. “Oo dookta tooku guvnokweku neya jukulnono. Wagwolago Kapurniyam akuuto tomuu gumoro womdo yodumdo tovino nevu me'no guu'nodowadekugono. Toro te gumoro womdo yodumdo su to'busuko kubalno gumi wagwolago kuunodo akawai kuruv aval'no neya jogawono.” Nyudupinogaikikono.

²⁴ Aki nuu nebal'no ikudumo'mokwono. Proofet pwol Gooti toolluro yogalo tokwe yiuwi'nokai ago pumuu moruudomollodowo'jure toga a'mwo abolo kuudomollo'ji su ton ilaiyo to'no wuu'nupinogano. Toro kuvi kuruv proofet su tool gami wagwolago kuunodo toru'no bowo'ji kuuguudo tokwe moruudomollodowo'jure toga gavuge iko avalo tono'gwowi yiuno muu'nyubusuko to'no wipinogano.” Kuudokaikono.

²⁵ Jisasol toro wuujuno sumaiyokwe aki aro kuudokaikono. “Nuu nebal'no ikudumo'mokwono. Aiyoga Ilaijal amwallajuko toga Isuraiyolda'ai abekanyo bwotonyago tobuuro amwallajupobuurogano. Toro amwallajupo su toga buuruko maviyajukokwono. Buuruko maviyajuko su tov kworomo pullapullu tobuuke'aro lobako 6-pela tobuuke'aro kuuwolo'nokakwono. Aki su toro toga muju'wuulo bwotonyo puruv yiuwi'nokai kwako tomuu sumo'nokakwono.

²⁶ Muju'wuulo bwotonyo sumo'noka su toga Gooti tool Ilaijallu Isuraiyolda'ai abekanyo pubuuraiyomno mamorapiyokaikono. Toro kwol kuruv kwako Saidoonda'ai wagwolago Sarefat tovi mwalodowodo abekanyo pubuulluno'gwowi amorapiyokaikono.

²⁷ Aki proofet pwolluno yovo tov Elisalekono. Toro tool amwallajuko su toga Isuraiyolda'ai a'mwo wonawiyo nobollokwe bwotonyago tekwojo amwallajuporogano. Yiuwi'nokai su tekwojai Elisal mikullajukekono. Toro kuvi kuruv yiuno kantri Siriyada'ai a'mwo wonawiyo nobollokwe pwekwojuno'gwowi sukulokaikono. Siriyada'ai a'mwo su tekwojuno yovo tov Namanolekono.” Jisasol toro kuudokaikono.

²⁸ Jisasolluro toro kuudoka tovi Juu tooravuro i'bwo'nyago tovida'ai a'mwo abolo aullu'bwo'nopo ton gamoro yogalo kuudoka su tovi wuu'nyuno sumaveyokwe toga surodo bwotonyo kuunopogano.

²⁹ Toro wuunyuno sumaveyokwe kemoro sumwoluko tov duka'bwo'no'mno Jisasollu wagwolago tovi kwa'mgu tomuuno amollo'mwojapiyopekono. Wagwolago su tov muumuudo pwollu muunyu toru amojungikokwono. Toro te Jisasollu muumuudo su toolluro deyo tomuuno mollo'mwojapino sumaveyokwe wolomogalowopiyo'moneyokwe dovado tovi wobo toru abomai'movopogano.

³⁰ Toro kuvi kuruv Jisasol a'mwo abolo su tonyu akuuto tomuu buuwolokalokwino sumaiyokwe kuugollu'movokaikono.

Jisasol kuullo ma'no ma'nodo pwollu amodovomjapiyoka tovinokwono

³¹ Toro te Jisasol wuugollu'mo'mno sumaiyokwe kwako Galili tomuuda'ai wagwolago Kapurniyam'no avlavokaikono. Toro plaino sumaiyokwe iruko Sabat abai'movoka tollugwoji a'mwo abolo tonyu kuuguudo sodubwasajukekono.

³² Toro tool a'mwo yasuwa'nodo pwolbusuko miyodubwasajukekono. Toro kuvi kuruv a'mwo jurogudo kuunodokwe pwolbusuko sodubwasajukekono. Toro yodubwasoduke tovi a'mwo abolo ton wuu'no'mno luko morumoukuropi sopogano.

³³ Jisasol i'bwo'nyago tovi kuuno kuulomwaloduke toga a'mwo kuullo ma'no ma'nodokwe pwol deko aro auladokaikono.

³⁴ “Ai! Nasaretda'ai Jisasoloo, guvu buro'nyo'mo amodekudeyo? Nemi kaiyako mollowuunonekwapiyo'mo amodekudeyo? Nuu gumino kuudo nyaguu'mwakono. Gooti toolluro sugudo kuunodo amonekwopiyaboka tookudeyo, kuudo saguu'mwakono.” Kuudokaikono.

³⁵ Toro kuudoka toollu Jisasol yogalo aro amojurugolokaikono. “Guu yogalo madubinono. Buugollu'mokalokwono.” Toro amojurugoloka tovi kuullo ma'no ma'nodo tool a'mwo su toollu a'mwo abolo tonyuro akuuto toruda'ai kwako tovi amogalowiyemwogapiyokaikono. Toro mogalowiyemwogapino sumaiyokwe kuullo ma'no ma'nodo tool deko bwotonyo do'no a'mwo su toolluda'ai abuugollu'mokalokwokaikono. Toro te a'mwo su tool kuullo ma'no ma'nodo toolluda'ai kaiyako pun mamarokaikono.

³⁶ Yiuwi'nokai a'mwo abolo ton su toro tovi wonyuno sumaveyokwe luko morumoukuropi yo'mno aro sajunopogano. “Awi, a'mwo jurogudokwe akalluro yogalo tov buro'nyove to'mdukono? Aki toro tool kuullo ma'no ma'nodo kworai kuruv kuuwolo'mwallo. Aki toro tool kuullo ma'no ma'nodo toorai yogalo jurogudo tokwe aduuwiyo'ji tooro kuvinono buugollu'mokalokwodupudorogano.” Sajunopogano.

³⁷ Jisasolluro toro soka su tovino kuuguudo tov distrik su tovida'ai yiuwi'nokai ajumiyo tonyu abomje'nugoulokakwono.

Jisasol Pitalluro ganyalum tovi sukuloka tovinokwono

³⁸ Jisasol i'bwo'nyago tovida'ai bolokwo'no Saimoonolluro ago tomuuno avlavokaikono. Saimoonolluro ganyalum tov kula'du'nobollokwe wo'duke toviyomno avlavokaikono. Abolo su tovuro ago tovi kuulomwalodupudo ton Jisasol Saimoonolluro ganyalum su tovi ikulono'moneyokwe kuudoganopogano.

³⁹ Toro wuudoganyuno sumaveyokwe Jisasol abolo su tovino bino sumaiyokwe wobo toru abodavokaikono. Toro boda'mno sumaiyokwe kula'du'nobollo tovi yogalo amojurugolokaikono. Toro amojurugoloka toga kula'du'nobollo su tov kuugollu'movokakwono. Aki kula'du'nobollo su tov kuugollu'movoka toga abolo tov dukaino sumaiyokwe a'mwo tooraiyo'mo wosamujuko pun sovroubweyokakwono.

Jisasol a'mwo abolo bwotonyago tonyu sukullajuko tovinokwono

⁴⁰ Toruda'ai kuujo tool me'no kwolomwoloka sula'dugumdo toga yiuwi'nokai a'mwo abolo nobollokwe go'no go'nodo tonyu Jisasollomno amokabopogano. Yiuwi'nokai nobollokwe su tobuurai Jisasol ato tokwe uubogai'no'no sukullajukekono.

⁴¹ Aki kuullo ma'no ma'nodo bwotonyago toorai amodovomjapiyajukekono. Jisasol toro ikuloduke toga kuullo ma'no ma'nodo tooro Jisasollu deko aro kuujajuporogano. “Oo guu Gooti toolluro Kwolaiyekugono.” Toro wuudodopure kuvi kuruv Jisasol kuullo ma'no ma'nodo su toorai, “Madupinono,” aduullukullajukekono. Su tov aro tovinokwono. Kuullo ma'no ma'nodo su tooro Jisasolluno aro kuudo me'no souromallajupekono, Akal Krais tooldeyo. Toro tovino kuu'maiyo toru'no nodupiyokwe tovino aduullukullajukekono.

Jisasol kuuguudo sugudo tokwe wagwolago punyu amoruudomollajuko tovinokwono

⁴² Toruda'ai iruko sullourosoka toga Jisasol dukavo'no ago su towai wuugollu'mo'mno sumaiyokwe a'mwomaiyo pumuuno avlavokaikono. Toro avlavoka toolluno a'mwo abolo ton a'mgono sopogano. Me'no yo'mgonoma'no sumaveyokwe Jisasol pumuuno novlawo'jokwe tovino duumjukullo'mo kwinopogano.

⁴³ Toro tonyu Jisasol aro kuudokaikono. “Nuu aguto kig Gooti toolluro mido mollomwalo tovi kuulomwallo'moneyokwe kuuguudo sugudo tokwe moruujo'moneyokwe amonuwopiyabokanyugono. Toro tovino tov a'mwo abolo wagwolago pumuuda'ai kunyu kuruv neya moruudomollumonyugono.” Kuudokaikono.

⁴⁴ Jisasol toro wuujuno sumaiyokwe kwako Juudiyada'ai yiuwi'nokai Juu tooravuro i'bwo'nyago go'no go'nodo tonyu kuuguudo sugudo tokwe amoruudomollajukekono.