Kooloosi 2 - Gooti Toolluro Yogalokwono

A'mwo abolo Jisasolluno kuudo uubweyodupudo togaikullu a'mwo youkuu'najokwe tooro node'nekuma'mwalpiyokwe tovinokwono

¹ Kevu aro tovino kuudo neya jouromarogaulo. Nuu moro yiuwi'nokai kuullutago tokwe kemino kuudo you'movla'mdumdonyugono. Aki Leyadisiyada'ai Jisasolluro mollu'bwoto togai'aro aki Jisasolluro a'mwo abolo mi mabonyuru'ma'dupudo togai'aro aki kevuge'aro kevu yiuwi'nokai togaikullu nuu ikullo'mwojo'moneyokwe guureji you'movla'mdumdonyugono.

² Toro toonyu aro tovino nyunodowodonyugono. Kevu yiuwi'nokai togaikul Jisasolluro a'mwo abolo pubuurai kalo buuropino neya domollogaulo. Kalo buuropino amollupi su tov wuulo to'busuko kevu imgu amgu togaikullu jurogudo nokwo galogudupolaikwo'mwalonokwono. Toro gudupolaikwo'dowo'jure tovi'aro kemoro poowokalago tonyu jurogudo nokwo daikullumwojumwalonokwono. Aki kevu Gooti toolluro yiulo yogalo apuu'nallajuko su tov aga kuu'maiyo toru'no bomollolupto'naikubweyodowodokwono. Toro tovino kavlo tov me'no youroma'dupudogaikikono. Kavlo su tov Krais tool kwekono. Kevu Krais su toolluno kuudo me'no youromoropiyodupudo tov kuvi kuunogano. Kuudo su tovi youroma'dupudo togaikul Gooti toolluro sumdo tovi kevu gamoro yiuwi'nokai sugumaluko tollovo me'no ma'dupudo tonbusuko wimo'nodupudogaikikono.

³ Aki yiuwi'nokai pi'mwo kuudo togai'aro kuudo aguto togai'aro ton yiuno Krais toollu tomuu yiulo kuulopuu'na'dupudogano. Toro kuulopuu'na'dupudo su ton noonyumwonyu sugumaluko tollovo nuugwiyo bwotonyo togai biyoma'dupudo tollovobusuko Krais toollu tomuu kuulopuu'na'dupudogano.

⁴ Moro kuuguudo aikudadokwo akav aro tovinokwono. A'mwo pworo yogalo pi'mwono youllajunodupudo tooro kemi youkuu'naikudopi node'nekumapiyokwe tovinokwono.

⁵ Neya duu'nyulo. Nuu moro kulako tokwe kemi manyu tomuu mwalodumdonyugono. Toro kuvi kuruv moro poowokalago kuudo to'gwowi kevuge wobo toru me'no mwalodumdonyugono. Toro toonyu kemoro pi'mwono molludo'movla'mdupudo tokwe'aro aki Krais toolluno kuudo me'no kuubwengopo tovi guureji gudupola'dupudo tokwe'aro su tovalluno kuu'numwa'jonyugono. Su toro tovalluno kuudo yaikuu'dum kemino ilaiyo bwotonyo sumwakonyugono.

Nevu Krais toollu kuuguro'mwonya'ji tonollu Gooti tool aiyo aiko te nomonekudukawono tovinokwono

⁶ Toro te kevu muudu'nodo toga Aguto Krais Jisasollu me'no amaropo tomgu'aro aval'no neya duumjungovlavogaulo.

⁷ Aro to'busukokwono. Ipuluko tov kwako tovi guureji gudupola'dowodo to'busuko kubalno kevu Krais toollu guureji gudupolaropi jurogudo neya da'mwalpinogaikikono. Aki ago puruv sulo jurogudo toollu muunyu toru modumelodapudo to'busuko kubalno kemoro nomwallo tov Krais toollu muunyu toru jurogudo neya domodumelogaulo. Aki kevu kuuguudo sugudo yodekubwasodopure tovi neya dogudupolarogaulo. Aki kemoro kuullutago tokwe yiuwi'nokai toga Gooti toollu, Nenoloo, neya duudumovlavogaulo.

⁸ Kevu aro tovino wako neya kuu'numwalpinogaikikono. A'mwo pworo kwako akavida'ai pi'mwo kuudorodeyo oo sulo mai'nyo'moneyokwe kuunano yogalorodeyo toorogai youkuu'naikudodopure tovi kevu nuumjunmwalpiyo. A'mwo su tooravuro kuuguudo su ton kemi kuunumiyago tooraida'ai ma'dupudorogano. Aki kuuguudo su ton kwako akavida'ai kuullo tooraida'ai ma'dupudorogano. Toro kuvi kuruv kwako akavida'ai pi'mwo kuudo su toorogai'aro kuunano yogalo su toorogai'aro tooro Krais toolluda'ai mabodupudorogano.

⁹ Kuudo neya jaullulo. Gooti gavnokwe tool Krais su toolluro kulako tovi yiunokuudo kuullo'mowopiyodowodekono.

¹⁰ Aki kevu Krais toollu me'no uuguro'mwonyodupudo kugaikullu kuruv Gooti su tool aiyowomno kuullo'movaikwopiyodowodekono. Krais tool yiuwi'nokai jurogudo imo'nodupudo toorai midekono. Krais su tool kuullo mido mollomwalokwe toorogai'aro kuullo yovo agutokwe toorogai'aro su toorai aguto wimo'nodowo mido momjomwekovla'mdowodekono.

¹¹ Aki Krais tool kevu me'no uuguro'mwonyodupudo togaikulluro kuudo uumdo tooravuro jurogudo tonyu modukwopiyo'no abomollurolovekumokalokwokaikono. Kuudo uumdo toorai amodukwopiyoka su tov lakulkulako do'nopi modukwopiyodupudo to'busukokwono. Lakulkulako do'nodupudo su tov kwako akavida'ai kulako tovino to'no wimo'nodowodokwono. Toro kuvi kuruv kuudo uumdo tooravuro jurogudo tonyu amodukwopiyoka su to'gwowi kemoro anakuuto tomuuda'ai poowokalago tovi ikullumo'nodowodokwono.

¹² Aki kevu wonyo kuuvollunopo toga aro tovino me'no kuuduuwallunopogaikikono. Kevu Krais toollu uuguro'mwonyodupudo togaikulluno tov Krais toollu buuso tovi amollusosopo toga Gooti tool kev kugaikullu kuruv aval'no amollusaikubweyokaikono. Toro kuvi kuruv Krais toollu aiyo aiko te amodukavoka Gooti su toolluro jurogudo su tovino kevu kuudo me'no kuubweyopogaikikono. Toro togaikulluno tov Krais tool aiyo aiko te adukavoka toga Gooti tool kev kugaikullu kuruv gavnokweyolluro jurogudo su tokwe aiyo aiko te aval'no amekudukavokaikono.

¹³ Aki muudu'nodo toga kevu ma'no ma'no mujumovla'mdupu kemi kuudo uumdo toorai kuumjungovlaiyajupogaikikono. Toro kuumjugovlaiyajupo toga kevu Gooti toolluro sumdo tovi a'mwo abolo me'no abollungopo tobuurekulbusuko kwimo'nyajupogaikikono. Toro kugaikullu kuruv kevu Krais tooke aguro'mwonyopo toga'no'gwowi Gooti tool Krais toollu aiyo aiko te amodukavoka su tooke kemi aiyo aiko te me'no amekudukavokaikono. Kuudo neya jaullulo. Nemoro yiuwi'nokai ma'no ma'no pasudo tooravuro kirumwallo tov Gooti tool me'no amonekudukwopiyokaikono.

¹⁴ Moosesolluro loowo tov nemi kooti yogalo to'busuko adanekullajukokwono. Toro danekulloduke tovida'ai nemoro ma'no ma'no pasudo su tooravuro kirumwallo tov dinau to'busuko anekwollajukokwono. Toro kuvi kuruv Gooti tool nemoro dinau to'busuko anekwollajuko su tov Krais tooke i'noguropte tovi me'no amovoromiyoguroptowosokaikono. Su toro amovoromiyoguroptowosoka tovi'aro dinau to'busuko anekwollajuko kirumwallo su tov Gooti tool me'no amonekudukwopiyokaikono.

¹⁵ Toro te Gooti tool Krais toollu aromiyoguroptowosoka su tovi'aro kuullo ma'no ma'nodo tooravuro mido mollomwalokwe toorogai'aro jurogudokwe toorogai'aro toorai me'no kuuwolovokaikono. Toro uuwoleno sumaiyokwe kemoro jurogudo tonyu yiunokuudo ipolomaro'no yiuwi'nokai su toorai kuu'maiyo toru wogulo suwo'galokaikono. Su toro tomgu'aro Gooti tool gamoro kuuwolovoka tovino yiuwi'nokai a'mwo abolo tonyu me'no kuuduuwallokaikono.

Nevu Krais tooke me'no abolowo tonollu noonyumwonyu loowo ton ku'nono manekullo'mwojupino tovinokwono

¹⁶ Toro te kevu wosamujukodeyo oo wonyodeyo punyuno kumako mamwalodopure tovino a'mwo pwolnodo kwol kuruv aro nekudo'jo. “Gooti tool nerekumwallonekono.” Nekudo'jo. Aki kevu Juu tooravuro lubullu doto agutollovodeyo oo lobako aiyo biladodowo'jure toolluro irukollovodeyo oo Sabat irukollovodeyo tollovai muumjunpi kuruv a'mwo pwol aro nekudumwalo'jo. “Kevu ma'no ma'no sumwakovo,” nekudumwalo'jo.

¹⁷ Yiuwi'nokai su ton a'mwo lukomgu nyumo'nono pwolluro wakuunonabolo to'busukogano. Toro kuvi kuruv kuunodo toolno'gwowi me'no abai'movokaikono. Kuunodo su tool Krais tookono.

¹⁸ A'mwo pwol kemi aro ikudonekono. “Oo nuu wojo suwo'numwa'jo tovida'ai pasudo muuduko uumjunyo'mo puvino me'no kwonoma'mwa'jonyugono. Su tov arokwono. Kevnokwe togaikul neya bwolomorumwogapinapi ensel toorai julomoropiyogaulo. Moro wojo kwonmwa'jo su tov agutokwono. Toro tovi kevu neya duumjunyulo.” Ikudonekono. A'mwo pwol su toro aikudo'ji kuvi kuruv kevu muumjunpinono. A'mwo su toolluro yogalo aikudo'ji tovi kevu kaduko kwipi tov a'mwo su tool kemoro muunyu kai'muuda'ai mubiyo sugudo tonyu nyupolekumaro'jo. Toro te kevu a'mwo su toollu kaduko nuuwimwalpiyo. Kuudo neya jaullulo. A'mwo su tooro kemi kuudo uumdo toorai uumjunodupudo tovino tov ilomoropunyu bwotonyo yodapudorogano.

¹⁹ Aki a'mwo su tooro nemi mido Krais toollu magudupola'dupudorogano. Krais su tool nevu gamoro kulako to'busuko imo'nodowado tonollu guureji me'no momunyutovonekubweyodowodekono. Kulako tovuro suvlo aru'wago togai'aro wilo togai'aro guureji munyuto'na'dupudo to'busuko kubalno Krais tool gamoro a'mwo abolo tonollu jurogudo danekullumwojodowodekono. Toro te gamoro kulako to'busuko me'no imo'nodowado tonol Gooti toolluro jurogudo danekullumwojodowo'jure tokwe aguto nokwo yogullumovla'mwalanonogano.

²⁰ Kevu Krais tooke me'no abolopogaikikono. Toro togaikul kwako akavida'ai kuullo ma'no ma'nodo tooravuro dolago tomuu amwallajupo kugaikullu kuruv Krais tool me'no abomollurolovekumokalokwokaikono. Toro te kevu kwako akavida'ai a'mwo abolo tonbusuko kuullo ma'no ma'nodo su toorai dolago tomuu kuuno mamwakovo. Toro tovino tov kevu kwako akavida'ai loowo kunyu kuruv uumjunodupudo tov ilaiyo'maiyo.

²¹ Kwako akavida'ai tooro aro daikullodupudorogano. “Wosamujuko punyu mamworapinono. Aki wosamujuko punyu manpinono. Aki wosamujuko punyu ato muubogai'nupinono.”

²² Loowo su toro yekubwasodupudo ton yiuno kwako akavida'aiyogano. Aki loowo wosodupudo wosamujuko su ton kevu me'no anpi toga kaiyako yopiyodupudogano.

²³ Toro te kevu loowo su tonyu uumjunyo'moneyokwe tovino aro kuudo yaupinogaikikono. Oo nevnokwenolluro kuudo tokwe loowo su tonyu guureji kuumjuna'ji tovi'aro lootuu imwalanonogano. Aki nevnokwe tonol bwolomorumwogapinowa'ji nemoro kulako tovuro winodowo'jure tonyu pi'mwono nokwo mollomwalnumwalanonogano. Yaupinogaikikono. Aki kuudo su tovino, Oo pi'mwo kuudokwono, yaupinogaikikono. Toro saupi kuvi kuruv su tov kuvimaiyo. Loowo su ton nemoro kuudo uumdo tooravuro kiroungovlaiyo'mo winodopure tonyu ku'nono muullukupinorogano.