Kooloosi 1 - Gooti Toolluro Yogalokwono

¹ Nuvu Poolonyugono. Toro toonyu Krais Jisasolluro kuurotokwe imo'nyo'moneyokwe Gooti gavnokwe tool ilaiyo wino'no mi me'no ajanubweyokanyugono. Aki a'mwo pwol nemi nellugwai'yago toolbusuko nonekullumo'nodowodo tool nuvuge akawai nomwallo. A'mwo su toolluno yovo tov Timootiyolekono.

² Toro toonal kevu wagwolago Kooloosida'ai Krais toollu me'no uuguro'mwonyodupudo togaikullomno pas akav sokwollapimawolokwono. Kevu Krais toollu uuguro'mwonyodupudo togaikul Gooti toolluro a'mwo abolo kuunodo wimo'nodupudogaikikono. Aki nemi nello'mwo nellugwai'yago togaikulbusuko nekullumo'nodupudogaikikono. Kevu Krais toolluno kuudo guureji uubweyodupudo su togaikullu aro adekwopiyamawolo. Nemi Nellunumiyago Gooti toolluro yasuwa'wino sugumaluko tov nokwo ikubwemwalonekono. Aki kevu sumwoluko kavo to'no wosungovlaiyo'moneyokwe kuruv nokwo ikubwemwalonekono.

Poolol Kooloosida'ai Jisasolluro a'mwo abolo tonyuno Gooti toollu, “Nenyoo,” kuujajuko tovinokwono

³ Oo navu nemi Aguto Jisas Kraisolluro Ganumiyago Gooti toollu subusu'nyogalo wuudodowolo toga kemino kuudo miyallulo'gwonodowolonakono. Yiuwi'nokai toga kemino kuudo yaikuu'dowol Gooti toollu, “Nenoloo,” subusu'nyogalo wuudodowolonakono.

⁴ Namoro, “Nenoloo,” wuudodowolo su tov kavlo aro tovallunokwono. Muudu'nodo tov kevu Krais Jisasolluno kuudo me'no uubweyodupudogaikikono. Aki puruv kevu Gooti toolluro yiuwi'nokai a'mwo abolo tonyuno kalo buuropino kuvinono mollodupudogaikikono. Toro tovalluno me'no wuu'nodowol Gooti toollu, “Nenoloo,” wuudodowolonakono.

⁵ Toro te kemoro ilaiyo mollodupudo su tov yasuwa'no miyodupudogaikikono. Toro kuvi kuruv kevu muudu'no nebal'no yogalo tovi wuu'no'mno kuuguudo sugudo su tovi kuudo me'no kuubweyopogaikikono. Toro kuubweyopo togada'ai Gooti toolluro ago muunyu i'muu aiyo yiunokuudo mujomwekovlaiyo'moneyokwe tovino kevu sogwollo to'no kinodupudogaikikono. Aki Gooti tool kemi ikullabiyo'moneyokwe noonyumwonyu sugudo yovrowosodowodo su tonyuno kevu kuudo noullo maullo miyau'dupudogaikikono. Toro kugaikul kuruv aro kuudo yau'dupudogaikikono. Oo Gooti tool kuvinono nonekullabwonoldeyo. Su toro kuudo yau'dupudo togaikulluno tov pasudo su tollovai kuvinono mollodupudogaikikono.

⁶ Kuudo neya jaullulo. Kuuguudo sugudo tov kemi baiki'mo'mduke tovi kevu me'no kuu'nopogaikikono. Toro wuu'nyuno sumaveyokwe kevu Gooti toolluro yasuwa'wino sugumaluko tovino kavlo tov kuudo pi'mwono souromaropogaikikono. Su toro souromaropo toga sulo tov kemi akuuto toru ai'nokakwono. Aki su toro togada'ai sulo tov kuuno ki'nugelabodowodokwono. Kevu Jisasolluro a'mwo abolo togaikullu akuuto toru sulo ki'nugelabodowodo to'busuko kubalno kuuguudo sugudo avalo su tov yiuwi'nokai kwako akavi aiyowomno bomje'nugoulodawodokwono. Toro bomje'nugouloduke su tovi a'mwo abolo kuudo uubweyodupudo tonyuro akuuto toru sulo aval'no ki'nugelabodowodokwono. Aki su toro tovida'ai a'mwo abolo su tonyuro sugupasudo ton bwotonyo kuuno imo'nugelabodupudogano.

⁷ Toro te Gooti toolluro yasuwa'wino sugumaluko su tokwe a'mwo navuge avaiwomdo yodowodo pwol kemi me'no sodekubwasokaikono. A'mwo su toolluno yovo tov Epafrosolekono. Navu a'mwo su toolluno kalo buuropino nakullunodowodekono. Toro tool kemi ikullo'mwojo'moneyokwe Krais toolluro womdo tovi pi'mwono to'no momjumovla'mdowodekono.

⁸ Toro te a'mwo su tool nami nakudoduke tovi wuu'nodowol kemino aro kuudo yaikuu'dowolonakono. Oo Gooti toolluro Kuullo tool a'mwo abolo su tonyu kalo buuropino pasudo tov me'no uubweyodowodoldeyo. Toro uubweyodowodo tokwe a'mwo abolo su ton a'mwo abolo punyuno kalo buuropino kuvinono mollodupudodeyo. Kemino su toro kuudo me'no yaikuu'dowolonakono.

Poolol Kooloosida'ai Jisasolluro a'mwo abolo tonyu jurogudo duuwimwojo'moneyokwe subusu'nyogalo kuudoka tovinokwono

⁹ Toro te navu kemino kuuguudo su tovi kuu'numwa'juuwolo tovino tov Gooti tool kemi jurogudo daikullumwojono'moneyokwe subusu'nyogalo wuudodowolonakono. Muudu'no kemino kuu'numwa'juuwolo togada'ai subusu'nyogalo wuudodowolo su tov mimwogapimwakuuwolonakono. Toro kwonal kuruv Gooti toollu subusu'nyogalo aro wuudodowolonakono. Gooti tool gamoro ilaiyo winodowodo tovino yiuwi'nokai kuudo ton kemi nokwo ikubwemwalonekono. Su toro ikubweyodowo'jure tonyuno kevu kuudo souromapi tov kemoro kuudo tovi nokwo kuullo'movaikwopipinogano. Aki Gooti toolluro Kuullo toolluda'ai yiuwi'nokai pi'mwo kuudo lokabodupudo kunyuno kuruv kemoro kuudo tonyu nokwo kuullo'movaikwopipinogano. Kuudo su tollovaino pi'mwono youromallo'moneyokwe tov Gooti gavnokwe tool nokwo ikullabwonekono.

¹⁰ Toro ikullabodowo'jure togai kevu aro tomgu'aro nokwo yomjomwekovla'mwalpinogaikikono. Yiuwi'nokai toga kevu Aguto toolluro sumdo tovi po'dogalo mujumovlavopi ilaiyo to'no igolmwalpinogaikikono. Aki kemoro yiuwi'nokai sugupasudo judo'no judo'no amjumovlapi su ton sulo ilaiyo tollovobusuko nokwo ki'numwalpinogano. Aki Gooti toolluno kuudo pugai'aro youromo'movlavopi aguto nokwo yogullumelamwalpinogaikikono.

¹¹ Aki Gooti tool gamoro yiuwi'nokai jurogudo tokwe kemi adaikullumwojoneyokwe subusu'nyogalo wuudodowolonakono. Jurogudo su tov gamoro bako bwotonyo tovida'ai daikullumwojomwalonekono. Toro te kevu gamoro jurogudo su tovi neya gudupola'mwalpinogaikikono. Toro gudupola'dopure togaikullu tagunyo pun abaiki'mopi toga kevu kavo to'no mollukwovopi kemi poowokalago togai ilaiyo nokwo ibwosunmwalpinogaikikono.

¹² Aki nemi Nellunumiyago Gooti toollu, “Nenoloo,” to'no wuudumwalpinogaikikono. Gooti su tool kemi ikumaro'no me'no amekumwallokaikono. Toro te kevuge'aro nekunogai'aro yiuwi'nokai Gooti gavnokwe toolluro a'mwo abolo tonol gamoro bako tovi anakuuto tomuu kuulomwalodowadonogano. Toro tonol gamoro yiuwi'nokai lukomgu nonekullabwono ton kuvinono nomaranonogano.

¹³ Kuudo neya jaullulo. Nevu dugumwuulo toolluro mido mollomwalo tovi dolago tomuu mwalodowore tonollu Gooti tool me'no abomollurolovonekumokalokwokaikono. Toro bomollurolovonekumokalokwino sumaiyokwe gamoro Kwolaiyo kalo buuropino winodowodo tekwojuro aguto kig mido mollomwalo tovi dolago tomuu me'no aulomonekumwallokanogano.

¹⁴ Gamoro Kwolaiyo su toollu'aro Gooti tool nemi mollurolovonekumokalokwo'no nemoro ma'no ma'nodo tonyu me'no amobiyanekudukwopiyokaikono.

Krais yiuwi'nokai tonyu uuwolo'mdowodo tooke'aro gamoro womdo mujumovla'mdowodo tokwe'aro tovallunokwono

¹⁵ Nevu Gooti toollu mwonodowadekono. Toro kuvi kuruv gamoro Kwolaiyo toolno'gwowi gami Ganumiyago toolluno irol'mowosunodekono. Kwolaiyo su tool nekuduuwalloduke tovi'aro gami Ganumiyago Gooti toolluno kuu'maiyo toru'no bomollolupto'nanekubweyodowodekono. Kwolaiyo su tool yiuwi'nokai Gooti toolluro sokwollosoka tonyuro sumdomguda'aiyekono.

¹⁶ Kuudo neya jaullulo. Yiuwi'nokai noonyumwonyu ton Gooti tool gamoro Kwolaiyo su toollu'aro to'no sokwollosokagano. Sulugumdo tovi wo'dupudo togai'aro kwako akavi wo'dupudo togai'aro yiuwi'nokai sumdo wonodowado su tonyu sokwollosokagano. Aki sumdo mwonodowado noonyumwonyu ensel kworai kuruv sokwollosokaikono. Su tooravuro yovokwe toorogai'aro jurogudokwe toorogai'aro mido mollomwalokwe toorogai'aro aki aguto wimo'nodupudo toorogai'aro yiuwi'nokai su toorai Gooti tool gami Kwolaiyo toollu'aro to'no sokwollosokarogano. Toro te Gooti toolluro yiuwi'nokai sokwollosoka su ton gami Kwolaiyo toollo'mo sokwollubweyokagano.

¹⁷ Gooti tool gamoro yiuwi'nokai su tonyu yere miyokwollosoduke kuga kuruv gamoro Kwolaiyo toolno'gwowi me'no mujomwekovla'mdowodekono. Aki Gooti toolluro yiuwi'nokai sokwollosoka su ton gamoro Kwolaiyo toolluro jurogudo tovi'aro kuuno mujo'melabodupudogano.

¹⁸ Aki Krais tool gamoro mollu'bwoto tovuro midekono. Mollu'bwoto su tov gavnokwe toolluro kulako to'busuko wimo'nodowodokwono. Toro tool muudu'nodekono. Aki Krais su tool a'mwo abolo me'no abollungopo togai amwaloka kwol kuruv yiuwi'nokai bolodupudo su tonyu uuwolovo'no sumdomgu kwolda'ai aiyo aiko te me'no adukavokaikono. Su tov yiuwi'nokai noonyumwonyu tonyu uuwoleno imo'numwalono'moneyokwe tovinokwono.

¹⁹ Neya duu'nyulo. Gooti gavnokwe tool gami Kwolaiyo toollu anakuuto tomuu yiunokuudo kuullo'mowopiyo'mo tovino ilaiyo to'no winyokwekono. Toro tool gami Kwolaiyo su toollu kuvinono kuullo'mowopiyodowodekono.

²⁰ Aki Gooti su tool yiuwi'nokai kwako akavi mwalodupudo togai'aro sulugumdo tovi mwalodupudo togai'aro yiuwi'nokai su tonyu gami wobo toru aki aiko te momgurowoso'mo winyokwekono. Toro tool gami Kwolaiyo toolluro mujako tov i'noguropte tovi abwoloka su tovi'aro sumwoluko noullo me'no wosunodowodekono. Gooti tool su toro tomgu'aro yiuwi'nokai tonyu gami wobo toru aki aiko te kuvinono momgurowosokwekono.

²¹ Sumdomgu kevu Gooti toollu manyu toru'aro somwallajupo toga kemi kuudo togai Gooti toollu ikomago kwimo'nyajupogaikikono. Aki toro togaikul kirovanyuvanyu pasudo toorai airoungovlaiyajupogaikikono.

²² Kevu su toro sumo'nyajupo kugaikullu kuruv Gooti toolno'gwowi Krais toolluro kulako aboloka tovi'aro gamiyomno wobo toru ikumokabo'no ibwoto'nyo'moneyokwe me'no amollumo'naikubweyokaikono. Su toro amollumo'naikubweyoka tov aro tovinokwono. Kevu Krais toolluro a'mwo abolo togaikul gavnokweyolluro sumdo tovi adapi toga yiuno sugumaluko neya wimo'nupino'moneyokwe tovinokwono. Aki gamoro sumdo tovi kevu kaiya'no kuumwiyo nonagutokwe neya wimo'nupino'moneyokweyokwono. Kevu su toro kwimo'nupi togaikulluno a'mwo pwolnodo kwol kuruv aro nekudumwalpiyo. “Kaiya'no yodupudogaikikono.” Toro nekudumwalpiyokwe tovino'mo Gooti tool kemi gamoro ibwoto'nyo'moneyokwe amollumo'naikubweyokaikono.

²³ Toro te kevu kemi kuudo uubweyodupudo tovi kuuno gudupolaropi kuumjungovlapi tov guureji neya dovorugwo'mo'narogaulo. Aki kuuguudo sugudo me'no kuu'nopo su tovi muugollu'movopi aki yiuwi'nokai nomapino tonyuno yiuno sogwollo to'no kingovla'mwalpinogaikikono. Kevu su tomgu'aro somjumovlapi tov Gooti toolluro sumdo tovi kaiya'no nonagutokwe wimo'nupinogaikikono. Kuuguudo sugudo kuu'nopo su tov yiuwi'nokai kwako akavi aiyowomno bomje'nugoulodawodokwono. Nuu Poolol kwonyu kuruv kuuguudo sugudo su tokwe neya moruudomollo'moneyokwe a'mwo womdokwe me'no wimo'nodumdonyugono.

Poolol Kooloosida'ai mollu'bwoto tonyu wiyo'mwojo'moneyokwe womdo guureji amjumovlaiyajuko tovinokwono

²⁴ Aga nuu kemi ikullo'mwojo'moneyokwe tagunyo banyumo'nodopure tovida'ai danyu'nyuwuulo subwosunmwakonyugono. Danyu'nyuwuulo ibwosunodumdo su tonyuno moro poowokalago tokwe ilaiyo sadokwono. Moro ilaiyo yodumdo su tov aro tovinokwono. Krais tool gamoro a'mwo abolo tonyu wiyo'mwojo'moneyokwe danyu'nyuwuulo subwosunokaikono. Su toro subwosunoka toolbusuko kubalno aga nuu kwonyu kuruv gamoro aiko toru ma'dum kevu gamoro kulako to'busuko mollu'bwoto togaikullu ikullo'mwojo'moneyokwe danyu'nyuwuulo subwosunmwakono.

²⁵ Toro te Krais toolluro mollu'bwoto su tovi mollomwallo'moneyokwe womdo tov Gooti tool mi ajanubweyokanyugono. Toro tovino tov Krais toolluro mollu'bwoto togaikullu womdo ikullodumdonyugono. Aki Gooti toolluro kuuguudo tov kemi kuu'maiyo toru'no yiunokuudo bomollolupto'naikubweyo'moneyokwe Gooti tool mi me'no ajanubweyokanyugono. Toro tovino tov nuvu kuvinono moruudekumollodumdonyugono.

²⁶ Kuuguudo su tov aiyoga yiulo apuu'nallajukokwono. Toro kupuu'na'duke tov kworomo bwotonyago abuuwolo'nugwiyajukokwono. Aki aiyogasuro a'mwo abolo bwotonyago ton yowosungelabodopure kuga kuruv kuuguudo su tov yiulo to'no apuu'nallajukokwono. Toro kuvi kuruv aga'no'gwowi kuuguudo apuu'nallajuko su tov Gooti gavnokwe tool gami a'mwo abolo tonyu kuu'maiyo toru'no me'no bomollolupto'nubweyodowodokwono.

²⁷ Gooti tool gami yiuwi'nokai a'mwo abolo su ton aro tovino kuudo youromapino'moneyokwe kwinyajukekono. Krais toolluro noonyumwonyu sugumaluko nonekullabwono tollovogai'aro aki Krais tooke ilomwallo'mo tokwe'aro su ton kevu a'mwo abolo Juu miyawosunodupudo kugaikul kuruv kuvinono nyulomapinogaikikono. Gooti tool gamoro a'mwo abolo togaikulluno su toro kwinyajukekono. Toro toolluro kuuguudo yiulo apuu'nallajuko tov arokwono. Krais tool gamoro a'mwo abolo togaikullu kuulekumwalonekono. Toro te aga kemi kuvinono kuulekumwalodowodo tovino tov lukomgu kevu Krais tooke gamoro bako bwotonyo pwopiyodowodo tovi anakuuto tomuu gavuge nyulomwalpinogaikikono. Su toro tovino sogwollo to'no kingovla'mdupudogaikikono.

²⁸ Toro tovino tov nevu Krais su toolluno kuuguudo tokwe moruudomollodowadonogano. Yiuwi'nokai a'mwo abolo tonyu duudapi kuuguudo togai wuudodowa aki yiuwi'nokai pi'mwo kuudo wo'dupudo togai yodubwosomollodowadonogano. Nemoro su toro yodubwosomollodowado tov aro tovinokwono. Yiuwi'nokai a'mwo abolo ton Krais toollu neya uuguro'mwonyogapuro. Aki toro ton Gooti toolluro sumdo tovi aguto me'no agullungopo tonbusuko neya wimo'nogapureyokwe tovinokwono.

²⁹ Womdo su toro tovi yo'moneyokwe tov Krais tool gavnokweyolluro jurogudo tokwe mi womdo bwotonyo me'no kuulanyodowodekono. Su toro kuulanyodowodo tov mi jurogudo danyumwojodowodokwono. Toro toonyu gamoro yiuwi'nokai jurogudo su tokwe womdo tovi guurejuno momjumovla'mdumdonyugono.