Juut 1 - Gooti Toolluro Yogalokwono

Juutolluro yogalo muudu'no kuudoka tovinokwono

¹ Mino yovo tov Juutolenyugono. Toro toonyu Jisas Kraisolluro ki'nato womdokwe wimo'nodumdonyugono. Aki nuu Jemsolluro gagwai'yagonyugono. Toro toonyu kemiyomno pas akav sokwollekwopiyamwakono. Toro togaikullu nemi Nellunumiyago Gooti tool kalo buuropino winyokwekono. Toro tool kemi me'no adekumarokaikono. Aki kevu Jisas Kraisolluro a'mwo abolo kuuno wimo'numwalpino'moneyokwe Gooti tool yellukuromollekumwalodowodekono.

² Oo Gooti tool kemino kalo maikumwonyodowodo tokwe'aro gamoro sumwoluko noullo wosunodowodo tokwe'aro aki gamoro kalo buuropino winodowodo tokwe'aro su togai kemi nokwo ikubwemovla'mwalonekono. Aki tono tono ikubwemovlavowo'ji guureji muunyu toru'aro kuruv nokwo ikullamwalonekonoo.

A'mwo kuunano ibwasokwe pworo Jisasolluro a'mwo abolo tobuurai akuuto toru aullumo'nopo tovinokwono

³ Miyobuuravoo, sumdomgu nuu pas puruv kemi yokwollekwopiyabiyo'mo kuudo saullajonyugono. Pas su tov aro tovinokwono. Gooti tool kevuge'aro nevuge'aro yiuwi'nokai tonollu ma'no ma'nodo tovuro kirumwallo tovida'ai abomollurolovonekumokalokwokaikono. Su toro tovino yokwollekwopiyabiyo'mo kuudo guureji saullajonyugono. Toro kuvi kuruv aga'no'gwowi nuu kuuguudo gabovo purukwe daikumul'mwojumo'monyugono. Kuuguudo su tov aro tovinokwono. Krais Jisasolluno kuudo nebal'nodo tovi kevuge'aro nevuge'aro yiuwi'nokai tonol kuudo uubweyodowadokwono. Kuudo su tovi kevu sobanyo neya domollodavogaulo. Kuudo uubweyodowado su tov Gooti tool nevu gamoro a'mwo toonolluro ato tovi yiuno puru'monodo toga'no anekubweyokaikono. Su toro anekubweyoka tov yiunokuudo mujo'movla'mwalonokwono.

⁴ Toro te moro yogalo adaikumul'mwojumwako akav aro tovinokwono. Kevu sumdo mwonoma'dopure toga a'mwo Gooti toollu muumjunodupudo pworo yiulo tomuu'aro aulodukwopiyabiyajuporogano. Toro kuulodukwopiyabodupu kevu Jisasolluro a'mwo abolo togaikulluro mollu'bwoto tovi akuuto tomuu me'no aboullo'mo'nomwaloporogano. A'mwo su toro tooraino aiyoga yogalo puruv aro me'no ajakwollopokwono. “Gooti tool a'mwo su toorai kooti yogalo wiyowo'ji nerumwallonorogano.” Ajakwollopokwono. Toro kuvi kuruv a'mwo su tooravuro kaiya'no yogalo to'gwowi aro dodupudorogano. “Oo Gooti tool gamoro yasuwa'wino sugumaluko tov yiuwi'nokai toga nekullabodowodekono. Toro tovino tov nemoro kulako tovuro noonyumwonyu ilaiyo igollunyo'moneyokwe pasudo toorai neya amjumovlavogawanoo.” Su toro dodupudo tov kuvimaiyo. Neya duu'nyulo. A'mwo su toro dodupudo tooro nemi Mido Mollonekumwalokwe Aguto pwolnodo Jisas Kraisollu buulo me'no uugunyumopiyodupudorogano.

⁵ Kuudo puruv kevu sumdomgu me'no souromallajupo tovi aki aiko te kuudo yaupino'moneyokwe ikudumo'mokwono. Aiyoga Aguto tool Isuraiyolda'ai a'mwo abolo tonyu kwako Ijupda'ai abomollurolovomokalokwokaikono. Toro kuvi kuruv lukomgu avalo su tool Isuraiyolda'ai a'mwo abolo kuudo muubweyodopure tonyu kaiyako amollounapiyokaikono.

⁶ Aki puruv ensel pworo Gooti toolluro womdo kuubweyoka tovi yo'mo mwinyajuporogano. Toro kworo kuruv kemi ago kuunodo su toru kuugollu'movoporogano. Toro wuugollo'mo'mno sumaveyokwe Gooti tool ensel su toorai aiyowo'mo toga kooti yogalo aguto tokwe yere maduuwiyodowo'jure toga ensel su toorai me'no agalerosokarogano. Toro toorai senyo wuulo yiunokuudo mujo'movla'mdowodo tokwe dugumwuulo tomuu wuulo killo'mo ago tovibusuko aulomeromwallokarogano.

⁷ Aki puruv aiyoga wagwolago Soodoomke Goomoorake tovalluda'ai a'mwo abolo amwallajupo togai'aro wagwolago woboruda'ai a'mwo abolo togai'aro su ton kwonyalpasudo tokwe airoungovlaiyajupogano. Toro tooro kemi kulako tonyuda'ai kwonyalpasudo judo pumgu'aro punyu uumjunodupu a'mwo tooro a'mwo pworogai sumwonyo sajuporogano. Gooti tool wagwolago su tovalluda'ai a'mwo abolo su toro kiroungovla'mdopure tonyu duko manebuulopiyodowodo tokwe kaiyako yiunokuudo airumwallokaikono. Gooti toolluro su toro airumwalloka tovi nevu me'no kwonoma'mwakuuwo tonol aiyogasuro a'mwo su toorobusuko nyumwala'jo.

⁸ Agasuro a'mwo kuunano ibwasokwe tooro kemoro kuudo tonyu molloguurekudapiyo'moneyokwe aiyogasuro tooravuro pasudo to'busuko aval'no yomjumovla'mdupudorogano. Toro tooro aro jokweyorogano. “Oo nemoro pasudo amjumovla'mwakuuwo tov Gooti tool wojo tovi'aro nekuduuwallodowodekono.” Jokwerogano. Toro dodupudo kworo kuruv kwonyalpasudo togai kemi kulako tonyu kaiyako igolamo'nodupudorogano. Aki a'mwo su tooro a'mwo mido mollomwalokwe toorai kisuvolo to'no wiyodupudorogano. Aki a'mwo su tooro Gooti toolluro jurogudo kuunodokwe ensel tooraino kaiya'no yogalo bwolomorumwogapiyodapudorogano.

⁹ Ensel mido mollomwalokwe aguto toolluno yovo tov Maikololekono. Ensel su tooke'aro Satanyeke'aro tooral Moosesolluro bwiyo kulako tovi mallo'moneyokwe yogalo soullajunolorakono. Toro soullajunolo toga Maikolol gavnokwe tool Satanyollu kaiya'no yogalo toorogai mamojurugolokaikono. Toro kwol kuruv yiuno aro to'no kuudokaikono. “Oo Aguto tool gumi nomodagujurogolonekugono.” Kuudokaikono.

¹⁰ Toro kuvi kuruv a'mwo kuunano ibwasokwe su toorono'gwowi noonyumwonyu kuudo miyouroma'dupudo tonyuno kaiya'no yogalo to'no bwolomorumwogapiyodapudorogano. Toro tooro ibesa'aiyo kuudo maiyokwe toorobusuko kubalno a'mwo su tooro kevnokweravuro kuudo kuuluuwo'dowo'jure tovi uumjunodupudorogano. Kemi pasudo uumjunodupudo su toorai'aro kevnokwe tooro kaiyako igolamo'nodupudorogano.

¹¹ Oo Gooti tool a'mwo su toorai kirumwallo'moneyokwe tabunyuwuulo bwotonyo tov nuubweyonorogano. Toro uubweyono tovino kavlo tov arokwono. A'mwo su tooravuro pasudo tov aiyoga Kenolluro pasudo amjumovlaiyajuko to'busuko kubalno aval'no mujumovla'mdupudorogano. Aki toro tooro nuugwiyo ki'nomallo'moneyokwe aiyoga Balamolluro kaiya'no pasudo sajuko to'busuko kubalno kaiya'no pasudo yiuno aval'nodo tonyu guureji mujumovla'mdupudorogano. Aki aiyoga Koora'weke'aro a'mwo pworogai'aro tooro kisuvolo wiyodopure toorai Gooti tool aromiyebuuropiyokarogano. A'mwo su toorai kwimo'noka to'busuko kubalno Gooti tool a'mwo kuunano ibwasokwe kworai kuruv aval'no noromiyebuuropiyonorogano.

¹² Aki kevu Aguto toolluro kalo buuropino pasudo tovino aki aiko te yaullo'moneyokwe lubullu doto i'bwo'nonomwalodopure toga a'mwo kuunano ibwasokwe su tooro kevuge kuullu'bwo'nomwalodupudorogano. Toro tooro Gooti toolluro sumdo tovi kaiya'no pasudo aro kuullodupudorogano. Toro tooro kevnokweraino to'no kuudo yauropi wosamujuko bwotonyago kuuloluvonopiyokwerogano. Aki kemoro pasudo su tovino wogulo mibwosunyokwerogano. Aki a'mwo Gooti toolluno kuudo maiyokwe su tooro sulu'wo puruv buuruko mavodowodo to'busuko imo'nodupudorogano. Dolo tov sulu'wo su tonyu molobeyomokwodowodo kuvi kuruv buuruko ku'nono mavodupudogano. Aki a'mwo su tooro iko pwol ikulsulo mai'nodowodo to'busuko imo'nodupudorogano. Iko su tool ikulsulo ki'nyo'moneyokwe abai'mowo'ji kuga kuruv ikulsulo ku'nono mai'nodowodekono. Aki a'mwo su tooro iko ajowopingiko toorobusuko imo'nodupudorogano. Toro tooro pugasal me'no abollungopo toorobusuko imo'nodupudorogano.

¹³ Aki soolwara tov luwagu luwaguto guureji yodowodo to'busuko imo'nodupudorogano. Kemoro wogulo'mo pasudo tov soolwara luwagu luwaguto su tovuro ibu'muudo to'busuko imo'nodowodorogano. Aki a'mwo su tooro sullugabwo pworobusukorogano. Sullugabwo su tooro sulugumdo tovida'ai kemi puuto tovi mainamjodupu gomuuno gomuuno yasuwa'no yomollodupudorogano. Su toro to'busuko kubalno a'mwo Gooti toolluno kuudo maiyokwe su tooro dugumwuulo kuunodo tomuuno yiunokuudo plapino'moneyokwe Gooti tool me'no sokwollovi'mwojubweyokaikono.

¹⁴ Aki Adamolluro jukweyago pwolluno yovo tov Inookolekono. Inookolluro jukweyago tooro Adamolluda'ai yowosungelabino yowosungelabino sumaveyokwe Inookol naba 7 tousuda'ai abillumo'nokaikono. Inookol a'mwo kuunano ibwasokwe su tooraino proofet yogalo puruv aro me'no ajakwollokaikono. “Kevu duu'nyulo. Aguto tool gavnokweyolluro ensel bwotonyago toorogai nobwonekono. Ensel su toorai ku'nono majagilpinorogano.

¹⁵ Aguto toolluro nobwono su tov aro yo'mo tovino bwonekono. Yiuwi'nokai a'mwo abolo tonyu kooti yogalo jainyubworowo'ji ma'no ma'no pasudo tooraino nerumwallonekono. Aki yiuwi'nokai a'mwo abolo Gooti toollu muumjunodupudo su tonyuro yiuwi'nokai pasudo mujeroungovla'mdupudo tovino Aguto tool nomovagu'mwojonekono. Aki Aguto tool a'mwo abolo tonyuro yiuwi'nokai kaiya'no yogalo gamino bwolomorumwogapiyodapudo su tonyu nomovagu'mwojonekono.” Ajakwollokaikono.

¹⁶ Toro te a'mwo kuunano ibwasokwe su tooro biyekuu'nyogalo duu'mwojodupudorogano. Aki jul'nyogalo tokwe domuugona'dupudorogano. Kevnokwe tooravuro ilaiyo igollunyo'mo pasudo tooraino to'no uumjunodupudorogano. Toro tooro kevnokwero ilomoropunyo'mo yogalo tokwe derounomollodupudorogano. Aki toro tooro a'mwo abolo pubuuravuro kuto ivito tonyu ki'nomallo'moneyokwe jolukuulovoma'dupudorogano.

Nemoro Krais toolluno kuudo uubweyodowado tov jurogudo neya danekullumwojumwalono tovinokwono

¹⁷ Toro kuvi kuruv kevu tobuurekulno'gwowi nemi Aguto Jisas Kraisolluro a'mwo kuurotokwe tooro lukomgu kwako akavi nyumo'nupino tonyuno me'no aikujajuporogano. Kuuguudo aikujajupo su tonyuno kevu aki aiko te kuudo neya jaurogaulo.

¹⁸ Kuurotokwe su tooro aro aikujajuporogano. “Kwako akavuro aiyowo'mo toga a'mwo pworo Gooti toolluno burekakwo nome'nopipinorogano. Toro tooro Gooti toollu buulo uuguunyumopiyopi kevnokweravuro kulako tovida'ai kirovanyuvanyu kiroungovlaiyo'mo kuudo toorai uumjunpinorogano.” Aikujajuporogano.

¹⁹ A'mwo kuunano ibwasokwe su tooro Jisasolluro mollu'bwoto togaikullu molleru'mdovekwapiyodupudorogano. Toro tooro kwako akavida'ai a'mwo abolo tonyuro kuudo tovino to'no uumjunodupudorogano. A'mwo su toro toorai Gooti toolluro Kuullo tool ku'nono maulomwalodowodekono.

²⁰ Toro kuvi kuruv kevu moro kalo buuropino nyunodowodo tobuurekulno'gwowi Gooti gavnokwe toolluro nebal'no yogalo anekullaboka tovino kuudo me'no uubweyodupudogaikikono. Toro te kemoro kuudo uubweyodupudo su tovi'aro jurogudo neya jogullumovlavogaulo. Aki Gooti toolluro Kuullo tool jurogudo ikubweyodowo'jure tokwe kevu Gooti toollu subusu'nyogalo neya duudumovlavogaulo.

²¹ Aki kevu Gooti toolluro kalo buuropino winodowodo tovi anakuuto tomuu neya dovorugwo'mo'narogaulo. Aki Aguto Jisas Kraisol abwo'ji toga kalo nomaikumwonyonekono. Gamoro kalo maikumwonyono su tov kemi aiyo yiunokuudo mujomwekovlaiyo'moneyokwe tomuuno kuvinono mollubworekumokavlawonokwono. Toro ikullumo'nono su tovino kevu sogwollo to'no neya denugovlavogaulo.

²² Aki kev kugaikul kuruv a'mwo abolo kuudo noullo maullo yau'dupudo punyuno kalo neya domamwonyogaulo.

²³ Toro te a'mwo abolo pun du'muudo tomuu novlaiyo'mo yodopure su tobuurai kevu duko tovi akuuto tomuuda'ai neya domollurolovomokabogaulo. Aki kevu a'mwo abolo punyuno kalo amamwonyupi toga a'mwo abolo tonyuro kulako tovida'ai ma'no ma'no pasudo tooro kemi kaiyako nyaikullugolpiyokwe tovino luko neya jogaulo. A'mwo abolo su tonyuro ma'no ma'no pasudo su tooro youro tovi guru'mopiko yiunokuudo imo'nopiyodupudo to'busukorogano. Toro te kemoro pasudo su tooro kemi nyaiku'mullupiyokwe tovino manyu toru'aro neya jurukuruwolovogaulo.

Nemi Gooti toolluno yovo tov neya ilomoropimwolowano tovinokwono

²⁴ Oo kevu ma'no ma'no pasudo toorai nobwolorapiyokweyo'mo Gooti tool nokwo ikullo'mwojumwalonekono. Aki toro toolluro ikullo'mwojodowo'jure tovida'ai kevu ma'no ma'nodo maiyokwe imo'numwalpinogaikikono. Toro togaikullu gamoro jurogudo tovuro bako bwotonyo pwopiyodowodo tomuu nokwo kuulomekudapiyonekono. Su toro aulomekudapiyo'ji toga kemi poowokalago togai ilaiyo bwotonyo ipinogaikikono.

²⁵ Gooti pwolnodo su tool nemi Aguto Jisas Kraisolluro womdo sopiyoka tovi'aro ma'no ma'nodo tovuro kirumwallo tovida'ai me'no abomollurolovonekumokalokwokaikono. Toro toolluno yovo tovi neya ilomoropimwolowanekono. Gooti su tool Aguto kig kuunodo imo'nodowodekono. Toro tool jurogudo bwotonyokwekono. Aki toro tool yiuwi'nokai tonyu mido momjomwekovlaiyokwekono. Gooti su tool aiyoga sumdomgu me'no amwallajukekono. Aki aga kuga kuruv kuuno mujomwekovla'mdowodekono. Aki lukomgu kuga kuruv yiunokuudo tono mujomwekovla'mwalonekono. Nebal'nodokwono.