Joosuuwa 1 - Gooti Toolluro Yogalokwono

Isuraiyolda'ai ton kwako Kenan kuullo'moneyokwe sovo'dogallunopo tovinokwono

¹ To'no'gwowi Moosesol aiyo kuuno mwaloduke toga Nuunolluro muugunyo Joosuuwal kwollu ado'nuwiyajukekono. Toruda'ai lukomgu Gooti Yawelluro womdokwe Moosesol me'no aboloka toga Gooti Yawel Joosuuwallu aro kuudokaikono.

² “Moro womdokwe Moosesol me'no abolokaikono. Toro te aga kevu jovrowosunyulo. Guuge'aro yiuwi'nokai Isuraiyolda'ai a'mwo abolo togai'aro togaikul wonyo Joodanovi igo'mgu iloga'movapi moro kwako nekullamo toru'no kuulapinogaikikono.

³ Kwako su tovi kuulapi yiuwi'nokai avekuromollupi tomuu kemiyo'mo me'no aikullabokwono. Moosesollu kwako su tovino subuu'yamju me'no kwiyajo tovi kuvinono mapinogaikikono.

⁴ Kwako mapino su tovuro senagu'nyo ton arogano. Imomuu kwako a'mwomaiyo kuu'maiyo saut tomuuda'ai i'muu noot tomgu kwako Lebanoon tov wo'dowodo toru'arokwono. Aki senagu'nyo puruv kuujo tool sulopiyamoka tomgu wonyo Yiufretisovi toru'arokwono. Yiuwi'nokai kwako amjo'mabingiko su tov Hitda'ai tooravuro tovi mapinokwono. Aki kuujo tool kwolmoka tomguda'ai senagu'nyo tov Soolwara Meditoreniyenovuro do'gwapiyo toru'arokwono. Kwako su tovuro senagu'nyo ton toro wo'dupudogano.

⁵ Toro te nuu aiyoga Mooseseke amjomwekovlaiyajuuwolo kubalno gumi magugollu'movo'mi yiunokuudo mujomwekovla'mwalmonyugono. Toro te guu aiyo kuuno mwalodo'bure toga kemi yiuwi'nokai ikomago tooro molo tovi ku'nono maikuuwolo'mwalpinorogano.

⁶ Toro te guu luko miyo'bi jurogudo neya dodavogawono. Toro tooku Isuraiyolda'ai a'mwo abolo tonyu kemi tellukweyago toorai subuu'yamju me'no kwiyajo kwako su toru'no mollubworomokaula'bi kuulomapinogano.

⁷ Toro tovino tov guu luko miyo'bi jurogudo neya dodavogawono. Aki moro womdokwe Moosesolluro yiuwi'nokai loowo me'no agujabiyajuko tonyu guu po'dogalo neya duumjunogawono. Toro uumjunyo'moneyokwe kuudo noullo maullo miyauro'bi po'dogalo kuumjunbi tov gumoro yiuwi'nokai yodo'bure ton yiuno sugudo to'no imo'nugovla'mwalonokwono.

⁸ Toro tovino tov guu loowokwe buukiyo tovuro kuuguudo tonyuno kuudo nyallulo'gwonmwalbiyo. Toro kweku kuruv yiuwi'nokai irukoga'deyo oo surakuutoga'deyo toga neya mojagilo'bi duumjunogawono. Guu po'dogalo kuumjunbi tov gumoro yiuwi'nokai yodo'bure ton yiuno sugudo to'no imo'nugovla'mwalpinogano.

⁹ Toro te moro me'no adagujumo tovi aki aiko te gudumo'mokwono. Nuu gumi Gooti Yawel toonyu gumoro yiuwi'nokai yomollodo'bure tomuu guuge nyomollumwalosunonyugono. Toro tovino tov guu luko miyo'bi a'mwo pworaino bu'buto mibinono. Toro kweku kuruv jurogudo to'no neya dodavogawono.” Kuudokaikono.

¹⁰ Toruda'ai Joosuuwal a'mwo abolo tonyuro mido mollomwalokwe toorai doma'no sumaiyokwe aro amodapiyokaikono.

¹¹ “Kevu yiuwi'nokai woromollo'mo sel ago tonyu yomollopi a'mwo abolo tonyu duujulo. “Tomju toga nemi Gooti Yawelluro kwako nekullabwono toru'no wonyo Joodanovi ga'mokailowanokwono. Toro tovino tov kemi puuto tomuu nugovlaiyo'mo wosamujuko togai'aro kuto ivito togai'aro ton neya yomul'mwojosupuro.” A'mwo abolo tonyu toro duujulo.” Amodapiyokaikono.