Jems 5 - Gooti Toolluro Yogalokwono

A'mwo abolo kuto ivito nuugwiyo bwotonyagokwe ton kirumwallo tovino wako neya kuu'numwalpino tovinokwono

¹ Aga kevu a'mwo abolo kuto ivito bwotonyagokwe togaikul yogalo akavi neya duu'nyulo. Kevu lukomguda'ai tabunyuwuulo ikullumo'nono tonyuno kuudo jaurogaulo. Toro yauropi aki tabunyuwuulo ton yere mimo'nodopure akagada'ai kumdaillo neya mujodumovlavopi kuro'kuro'deko dodairogaulo.

² Kemoro kuto ivito bwotonyago su tooro kaiyako me'no buuropiyodupudorogano. Aki namdo tooro kemoro youro tousai me'no dokuuronopiyodupudorogano.

³ Kemoro nuugwiyo bwotonyago togai biyoma'dupudo gool togai'aro silva togai'aro ton sallukwako me'no luviyoropiyodupudogano. Aki gool togai'aro silva togai'aro su ton a'mwo abolo apoo'nyaiyo tobuurai yado uumwodeyo'mo maikullunodowodogaikikono. Kemoro kaiya'no pasudo su tov Gooti toolluro sumdo tovi kuu'maiyo toru'no me'no bomollolupto'nosodowodokwono. Toro te kemoro goolodeyo oo silvadeyo nuugwiyo bwotonyago su ton kemoro kulako tobuurai duko monaikubweyodowodo to'busuko du'muudo tomuuno mollubworekumokavlapinogano. Iruko aiyowo'mo tollugwo yere nobai'meyo'mo yoduke akaga kevu kuto ivito nuugwiyo bwotonyago su tonyu yasuwa'no kuuno mollu'bworosumovla'mdupudogaikikono.

⁴ Neya duu'nyulo. A'mwo abolo pubuuro nuugwiyo mallo'moneyokwe kemoro wosamuju'womdo tonyu womdo ikullodupudobuurogano. Toro ikullodupudo su tobuurai kevu youkuu'nuudodupu kemi womnuugwiyo pun kuvinono muubiyodupudogaikikono. Kemoro kaiya'no pasudo yodupudo su tooro kevnokwe togaikullu mebweyogalo to'busuko modaikurugolodupudorogano. Aki a'mwo abolo kemoro wosamuju'womdo tonyu womdo ikullodupudo su tobuuro kemino mebweyogalo domuugona'dopure tovi Aguto jurogudo kuunodo tool me'no wuu'nodowodekono.

⁵ Kevu kwako akavi mwalodupudo toga kevnokwe togaikullu ilaiyo igollunyo'mo tovino kuudo to'no you'movla'mdupudogaikikono. Toro togaikul kemi kwako akavida'ai kulako tonyuro kwanyu kinuwiyodupudo tonyu uumjunodupudogaikikono. Kemoro pasudo su tov aro to'busukokwono. Ibesa'aiyo pwol novelanyo'mo toollu sumdomgu yere neya inuuguutowopiyono'moneyokwe wosamujuko bwotonyago togai mollumwojodupudekono. Ibesa'aiyo su tool me'no sunuguutowopiyo'ji toollu yere romiyosodupudekono. Toro to'busuko kubalno kevnokweyogaikulluro poowokalago ton ilaiyo igollunyo'mo pasudo su toorogai inuuguutowopiyodupudogaikikono. Toro togaikullu kirekumwallo'moneyokwe tov aga me'no abai'mo'mwallukokwono.

⁶ Kevu a'mwo abolo idopto'nodo tonyu kooti yogalo aduuwipi toga yere domdukuurosopi kirumwallo tov yasuwa'no uubweyodupudogaikikono. Aki kevu a'mwo abolo idopto'nodo su tonyu yiuno yasuwa'no to'no romiyosodupudogaikikono. Kevu kaiyako su toro igolodopure kuvi kuruv a'mwo abolo idopto'nodo su tobuurono'gwowi ikwonyapino to'no yopi kemi aikomgu molo maikullokweyogano.

Jul'nyo pworo abaneki'mopi kuga kuruv Aguto toolluno sogwollo kinowa'ji guureji neya gudupola'mwalano tovinokwono

⁷ Mi avalobuuravoo, Aguto tool aikomgu yere mabai'mo'mdowo'jure toga kevu gamoro lukomgu nobai'mowono tovino sogwollo to'no denomwalogaulo. A'mwo wosamuju'womdo kuudosodupudo tooro kwako akavida'ai wosamujuko no tollovo bilapino'moneyokwe tovino sogwollo kinodupudorogano. Toro kuudosodupudo su tooro sumdomguda'ai buuruko tonyuno sogwollo kinodopudorogano. Aki lukomguda'ai buuruko kunyuno kuruv sogwollo kinodupudorogano. Sogwollo me'no kinopi toga no su tollovai kuvinono muloma'dupudorogano. No su tollovai amulomapi tov nuugwiyo bwotonyo biyoma'dupudollovogano.

⁸ Sogwollo kingovla'mdupudo su to'busuko kubalno kev kugaikul kuruv Aguto toolluro lukomgu nobai'mowono tovino sogwollo to'no denomwalogaulo. Aguto toolluro aikomgu nobai'mowono su tov wobo togakono. Toro tovino tov kemoro poowokalago tonyu jurogudo neya daikullumwojumwalonogaikikono.

⁹ Mi avalobuuravoo, Gooti tool kemi nerekumwallo'jokwe kevu Jisasolluro a'mwo abolo pubuuraino burolyogalo nodumwalpiyo. Neya duu'nyulo. Gooti tool a'mwo abolo tonyu kooti yogalo jainyubwollokwekono. Aki kooti yogalo jainyubwollokwe su tool anoullo tovi wobo toru abodapso.

¹⁰ Mi avalobuuravoo, kevu aiyogasuro proofet aikuduuwallajupo toorobusuko kubalno aval'no neya jomjomwekovlavogaulo. Aiyoga proofet su tooro Aguto toolluro yovo tovida'ai gamoro yogalo tokwe amoruujajuporogano. Toro tooro jul'nyo bwi'mo'mdopure tonyu nokwo amokavlaiyajuporogano. Aki Aguto toolluro lukomgu wiyo'mwojono tovino sogwollo to'no aingovlaiyajuporogano. Toro te kevu su toorobusuko aval'no neya jomjomwekovlavogaulo.

¹¹ Neya duu'nyulo. A'mwo jul'nyo bwi'mo'mdopure kworo kuruv Gooti toollu guureji kuuno gudupola'dupudo tooraino nevu aro kuudo yau'dowadorogano. Oo ilaiyo tov uuwo'dowodorogano. Kuudo yau'dowadorogano. Toro tooraida'ai a'mwo pwolluno yovo tov Joopolekono. Kevu a'mwo su toolluno me'no wuu'nodupudogaikikono. A'mwo su tool jul'nyo ma'dowodo kuga kuruv Gooti toollu guureji kuuno agudupolallajukekono. Aki toro agudopolallajuko su toollu Aguto tool ilaiyo sugolokaikono. Aguto tool Joopollu ilaiyo sugoloka su tov aro tovino nekuduuwallodowodokwono. Aguto tool a'mwo abolo tonyuno kalo winodowodekono. Aki Aguto su tool kalo to'no mamwonyodowodekono.

Nevu subuu'yamju aduuwiya'ji tovi muunyu toru yogalo pugai'aro nodumwala'jokwe tovinokwono

¹² Mi avalobuuravoo, yogalo aguto puruv ikudumo'mokwono. Kevu subuu'yamju aduuwipi tovi muunyu toru'aro yogalo pun nodumwalpiyo. Kevu Gooti toolluro ago muunyu kai'muuno yovo'mdeyo oo kwako akavino yovo'mdeyo oo noonyumwonyu punyuno yovo'mdeyo togai dopi subuu'yamju noduuwimwalpiyo. Toro kuvi kuruv kevu, Tade, kuudo saupi tov yiuno, “Tade,” to'no dodogaulo. Aki kevu, Awiyo, kuudo saupi tov yiuno, “Awiyo,” to'no dodogaulo. Gooti tool kemi nerekumwallo'jokweyo'mo tov kevu subuu'yamju aduuwipi tovi muunyu toru'aro yogalo pugai noduuwimwalpiyo.

A'mwo Gooti toolluro sumdo tovi sugudo wimo'nodowodo pwolluro subusu'nyogalo tov jurogudo imo'nodowodo tovinokwono

¹³ Kemida'ai a'mwo pwol jul'nyo kurukweyoldeyokwe Aguto toollu subusu'nyogalo neya wuudogawono. Aki kemida'ai pwol ilaiyo subwosuno'joldeyokwe Gooti toollu ilomoropiyo'moneyokwe dato pun neya dumwalonekono.

¹⁴ Aki kemida'ai pwol nobollo kurukweyoldeyokwe Jisasolluro mollu'bwoto tovida'ai a'mwono moduvomwallokwe toorai neya adomarono. Toro adomaro'ji tooro Aguto toolluro yovo jurogudo tovi'aro oolip munyupto pun gamoro mido tovi muunyu toru aimovobwepuro. Aki toro tooro Gooti tool a'mwo nobollokwe su toollu wiyo'mwojono'moneyokwe subusu'nyogalo neya amadupuro.

¹⁵ Aki Jisasolluro mollu'bwoto tovida'ai a'mwono moduvomwallokwe tooro a'mwo nobollokwe su toolluno subusu'nyogalo wuudopi Aguto toolluro jurogudo tovino kuudo kuubwepi tov Aguto tool kuvinono wikulonekono. Su toro sukulo'ji tovi'aro a'mwo su toollu aiko te nomoduko'bworapiyonekono. Aki a'mwo su tool ma'no ma'no pasudo punyu me'no yodowodoldeyokwe Aguto tool gamoro ma'no ma'no pasudo tovuro kirumwallo tovi nomodukwopiyonekono.

¹⁶ Toro tovino tov Aguto tool kemi ikuloneyokweyo'mo kevu pwolno puru'monodo togaikul kemida'ai a'mwo abolo pubuurai kevnokweyogaikulluro ma'no ma'no pasudo tonyuno dodowiyoku'bworosunogaulo. Aki Gooti tool kemida'ai su tobuurai wiyo'mwojoneyokweyo'mo kevu pwolno puru'monodo togaikul subusu'nyogalo duudogaulo. A'mwo Gooti toolluro sumdo tovi sugudo wimo'nodowodo pwolluro subusu'nyogalo tov womdo bwotonyo yowo'ji aki jurogudo kurukweyokwono.

¹⁷ A'mwo pwolluno yovo tov Ilaijalekono. Toro tool nevubusuko a'mwo pwekono. Ilaijal Gooti toollu subusu'nyogalo aro kuudokaikono. “Buuruko aiko te nowo'jokweyo'mo guu kudo'aiko duumjukurono.” Subusu'nyogalo guureji kuudoka toga yiuwi'nokai kwako akamuu buuruko ton povomuudodavo'mno maviyajupogano. Kworomo pullapullu togai'aro lobako 6-pela togai'aro toga kwako akamuu buuruko maviyajupogano.

¹⁸ Aki lukomgu Ilaijal Gooti toollu subusu'nyogalo aiko te kuudokaikono. Subusu'nyogalo kuudoka tovi'aro buuruko tov sulugumdo tovida'ai aki aiko te avokakwono. Buuruko tov pino pino sumaiyokwe toga wosamujuko ton kwako akamuu aiko te abilallajupogano.

Kevu a'mwo abwolodukwopiyawo'ji toollu puuto tovi aikomgu neya mollubworomokamwalpino tovinokwono

¹⁹ Mi avalobuuravoo, kemida'ai a'mwo pwol Gooti toolluro nebal'no yogalo tovi manyu tomuuno abwolodukwopiyawo'ji tov kemida'ai a'mwo gabovo pwol a'mwo su toollu nebal'no yogalo puuto tovi aikomgu amollubworomokabwono.

²⁰ Toro amollubworomokabwo'ji tov ilaiyokwono. Kevu kuudo neya jaurogaulo. A'mwo abwolodukwopiyawo'ji tool ma'no ma'no pasudo tovi kirounomollodowo'jure tekwoji gami gagwai'yagolbusuko pwol Gooti toolluro nebal'no yogalo tovi aikomgu mollubworomokabwonekono. Toro amollubworomokabwo'ji su tekwojuro kuullo toollu yiunokuudo bolnodo tomuuda'ai nobomollurolovomokalokwonekono. Aki Gooti tool a'mwo su tekwojuro ma'no ma'no pasudo bwotonyago tooravuro kirumwallo tovi nomodukwopiyonekono.