Jems 4 - Gooti Toolluro Yogalokwono

A'mwo pwol kwako akavida'ai pasudo toorai ibwoto'nyo kwimo'no'ji su tool Gooti toollu ikomago wimo'nono tovinokwono

¹ Kevnokwe togaikulluro akuuto toru mebweyogalo kuullajunodupudo tokwe'aro molo kuullunodupudo tokwe'aro su tov buro'nyo kavlo tovino'mdukono? Kavlo tov aro tovinokwono. Pasudo su ton kemoro kulako tovuro buro'nyo buro'nyo kirovanyuvanyu pasudo toorai kiroungovlaiyo'mo guureji ikullunodupudo tovida'aiyokwono. Neya duu'nyulo. Kemi kwako akavida'ai kulako tonyu anakuuto tomuu kuudo puruval molo kuullunodubulovakono. Toro te kemoro kirovanyuvanyu kiroungovlaiyo'moneyokwe kuudo tokwe'aro aki sugupasudo mujumovlaiyo'moneyokwe kuudo tokwe'aro su toval molo kuullunodubulovakono.

² Kevu noonyumwonyu punyuno kwanyu sumdo kinuwiyodupudo kuvi kuruv ku'nono mama'dupudogaikikono. Toro tovino tov kevu kuto ivito su tonyu ipolomallo'moneyokwe a'mwo pworai romiyosodupudogaikikono. Aki kevu a'mwo pworavuro kuto ivito tonyuno kwekuullu kuudo yau'dupudo kuvi kuruv kuto ivito su ton ku'nono mama'dupudogaikikono. Toro tovino tov kevu kuto ivito su tonyu ipolomallo'moneyokwe molo inodupudogaikikono. Aki kuto ivito tonyu ipolomallo'mo togaikul molo yogalo kuullajunodupudogaikikono. Toro kuvi kuruv kemoro mama'dupudo tovino kavlo tov arokwono. Kevu Gooti toollu ikullabiyo'moneyokwe tovino muudoganodupudo tovinokwono.

³ Aki kevu Gooti toollu kuudoganpi kuga kuruv mama'dupudogaikikono. Su tovino kavlo tov arokwono. Kevu po'dogalo muudoganodupudogaikikono. Toro togaikul kaiya'no kuudo aro yaullokweyogaikikono. Oo nevnokwenolluno ilaiyo igollunyo'moneyokwe noonyumwonyu pun neya amarano. Toro amara'ji su ton yasuwa'no nokwo anopiyogawano. Kevu kaiya'no kuudo su toro yau'dupudo tovino tov noonyumwonyu ton ku'nono mama'dupudogaikikono.

⁴ Kevu Gooti toollu wuugollu'mo'mdupudo su tov kwonyalabolo puruv gami kwolo toollu wuugollu'mo'mdowodo to'busuko yodupudogaikikono. Kevu aro tovino kuudo nyau'mwakovo. A'mwo pwol kwako akavida'ai pasudo toorai ibwoto'nyo kwimo'no'ji tov a'mwo su tool Gooti toollu ikomago wimo'nyokwekono. Toro tovino tov neya duu'nyulo. Buro'nyo buro'nyo a'mwo abolodeyo pun kwako akavida'ai pasudo toorai ibwoto'nyo'mo kwinpi su ton Gooti toollu ikomago wimo'nupinogano.

⁵ Gooti toolluro yogalo sakwollungiko puruv aro nekudodowodokwono. “Gooti toolluro Kuullo kuulonekumwalodowodo tool buro'nyo buro'nyorodeyo pworo nemi amollubworonekumokavlapi tovino ilaiyo mwinyokwekono. Gooti toolluro Kuullo gavnokwe su toolno nemi mollubworonekumokavlaiyo'mo to'no winyokwekono.” Gooti toolluro yogalo sakwollungiko su tov yasuwa'nodo'maiyo. Toro tovino kevu kuudo neya jaurogaulo.

⁶ Aki Gooti tool gamoro yasuwa'wino sugumaluko tov nemi guureji muunyu toru'aro nekullabiyokwekono. Toro tovino tov Gooti toolluro yogalo sakwollungiko puruv aro dodowodokwono. “Gooti tool a'mwo ilomoropunyokwe toorai nobwolomorumwogapiyokwekono. Toro kuvi kuruv a'mwo pworo a'mwo abolo punyu kwako tomuu'aro abwolomoropinapi su tooraino'gwowi gamoro yasuwa'wino sugumaluko tov nuuwiyokwekwono.” Dodowodokwono.

⁷ Toro tovino tov kevu Gooti toollu kwako tomuu'aro neya duuwiyogaulo. Aki toro togaikul Satanyolluro yogalo tonyu kaduko nuuwimwalpiyo. Aki kevu Satanyolluro yogalo tonyu muu'nyubusuko to'no supi tov Satanyol kemi ikugollu'mowo'ji lukado novlawonekono.

⁸ Kevu Gooti toollu wobo toru kuuru'mapi tov Gooti kwol kuruv kemi wobo toru nobekuru'ma'mwalonekono. Kevu ma'no ma'no amjumovlapi to'gwowi kemi ma'no ma'no pasudo su toorai kevnokwe togaikul neya domollol'movodukwopinogaulo. Aki kevu pugaikul Gooti toollu uumjunyo'mo tovino kuudo noullo maullo saupi kugaikul kuruv kemi poowokalago tovida'ai ma'no ma'no kuudo kuulaikwo'dupudo su tooro neya domodukwopiyogaulo.

⁹ Kevu kemi ma'no ma'no pasudo mujumovla'mdupudo su tooraino jul'nyo neya jubwosunogaulo. Aki pasudo su tooraino kumdaillo neya domjumoulogaulo. Kemi ma'no ma'no pasudo toorai miyainyunodupu kakwo to'no dodupudogaikikono. Toro kugaikul kuruv aga'no'gwowi pumgu'aro moropiyopi kemi ma'no ma'nodo su tooraino kumdaillo to'no dodomwalogaulo. Aki su to'busuko kubalno kemoro ilaiyo yodupudo tov pumgu'aro moropiyopi kumjuju kulako to'no neya jumo'nomwalogaulo.

¹⁰ Kevnokwe togaikul Aguto toolluro sumdo tovi kwako tomuu'aro neya bwolomoropinogaulo. Kevu su toro abwolomoropinapi tov Aguto tool kemi muunyu toru'aro nyulomollekumwallonekono.

Nevu Jisasolluro a'mwo abolo tonol pubuuraino nojainyubwo'mwala'jokwe tovinokwono

¹¹ Mi avalobuuravoo, kevu Jisasolluro a'mwo abolo pubuuraino burolyogalo nodumwalpiyo. Kemida'ai a'mwo pwol Jisasolluro a'mwo gabovo pwolluno burolyogalo ado'ji su tool Krais toolluro loowo kuvino kuruv burolyogalo donekono. Aki a'mwo su tool Jisasolluro a'mwo gabovo pwolluro pasudo tovino, Kaiya'nodokwono, ajainyubworo'ji su tov Krais toolluro loowo kuvino kuruv, Kaiya'nodokwono, jainyubworonekono. Neya duu'nyulo. Guu pweku Krais toolluro loowo tovino, Kaiya'nodokwono, ajainyubwo'bi tov loowo su to kuvi kisuvolo wibinekugono. Aki guu Krais toolluro loowo su tovi jainyubwollo'moneyokwe womdo tov gumoro'maiyo. Toro kuvi kuruv gumoro womdo to'gwowi Krais toolluro loowo su tovi dolago tomuu'aro to'no uumjunyo'moneyokwekugono.

¹² Yiuno Gooti pwolnodo toolno loowo su tov wiyodowodekono. Aki pwolnodo su tool gamoro loowo tokwe a'mwo abolo tonyu jainyubwollokwekono. Toro tool ma'no ma'nodo tovuro kirumwallo tovida'ai bomollurolovomokalokwiyo'moneyokwe jurogudo tov kurukwekono. Aki toro tool a'mwo abolo punyu kaiyako mollounapiyo'moneyokwe jurogudo kuruv kurukwekono. Jurogudo su tov kev togaikulluno'gwowi maikuuwoso. Toro tovino tov a'mwo abolo pun kemi wobo toru mwalodupudo tonyu aro majainyubwopinono. “Oo kemoro pasudo yodupudo tovida'ai nerekumwallo'mogaikikono.” Kevu su toro majainyubwopinono.

Nevu ilomoropunyu nyumwolowa'jokwe tovinokwono

¹³ Neya duu'nyulo. Kevu pugaikul aro dodupudogaikikono. “Anuugwo toga'deyo oo bi'ai toga'deyo nevu wagwolago su tovino plawanonogano. Toro plavowa'ji wagwolago su tomuu kworomo pullu mwalanonogano. Toro tomuu mwalowa'ji nemi bisnis womdo amjumovlawa'ji tovida'ai nuugwiyo bwotonyago ki'nomaranonogano.” Kevu pugaikul su toro dodupudogaikikono.

¹⁴ Kevu su toro dodupudo kuvi kuruv bi'ai yere mabai'mo'mdowo'jure toga kemi ikullumo'nono tovino kuudo yere miyouroma'dupudogaikikono. Kemoro kwako akavida'ai aiyo mujomwekovla'mdupudo tov burowo'nyo to'busuko'mdukono? Neya duu'nyulo. Kemoro kwako akavida'ai aiyo mujomwekovla'mdupudo tov kwa'muujudo to'busukokwono. Kwa'muujudo su tov billalo'nowo'ji yiuno kula'nyo toga'gwono worowo'ji yere younopiyodowodokwono.

¹⁵ Toro te kevu yogalo aro neya dodogaulo. “Oo Aguto tool ilaiyo kwino'ji tov nevu aiyo mujomwekovlavowa'ji womdo nokwo imwalanonogano.” Su toro adupi to'gwowi ilaiyokwono.

¹⁶ Toro kuvi kuruv kevu ilomoropunyu yodapudo tovino tov kevnokweyogaikulluro womdo bwotonyo tovino ilomodomoropinodapudogaikikono. Yiuwi'nokai ilomodomoropinyo'moneyokwe pasudo su tooro ma'no ma'nodorogano.

¹⁷ Toro tovino tov a'mwo pwol sugupasudo yo'moneyokwe puvino kuudo me'no souromaro'ji kwol kuruv sugupasudo su tovi kuvinono miyo'ji to'gwowi ma'no ma'no yonekono.