Jems 2 - Gooti Toolluro Yogalokwono

Kevu a'mwo abolo yovo agutokwe togai'aro yovomaiyokwe togai'aro tonyu pasudo judo'no judo'nodo tomgu'aro nyugolmwalpiyokwe tovinokwono

¹ Mi avalobuuravoo, kevu nemi Aguto Jisas Kraisol bako bwotonyo tovi anakuuto tomuu mwalodowodo toolluno kuudo me'no uubweyodupudogaikikono. Toro tovino tov pasudo aro togai domolludo'movlavogaulo. Kevu a'mwo abolo yovo agutokwe togai'aro yovomaiyokwe togai'aro tonyu pasudo judo'no judo'nodo tomgu'aro nyugolmwalpiyo. Yiuwi'nokai tonyu yiuno aval'no neya jugologaulo.

² Neya duu'nyulo. A'mwo pwol gool rig pullugwo gami pollo tovi mollosowo'ji youro sugumaluko tousogai yesowo'ji kemoro i'bwo'nyago tovi kuulawonekono. Aki toro kuulodowo'jure avalo toga a'mwo apoo'nyaiyo pwekwo youro uumnorojo toorogai yesowo'ji i'bwo'nyago su tovi noulawonekono.

³ A'mwo su tooral toro aulabullu toga kevu yiuwi'nokai toorallu yainyubworopi aval'no mamollomapinorakono. Toro togaikul a'mwo youro sugumaluko touso seso'ji toollu wuudupinogaikikono. “Oo guu kworado sugudo akai kuwai doulomwalono,” wuudupinogaikikono. Toro kuvi kuruv a'mwo apoo'nyaiyo tekwojuno'gwowi wuudupinogaikikono. “Guu buulo akaimgu dodavono,” oo, “Guu moro suvlo tovi wobo akaibuuwai doolomwolawono,” wuudupinogaikikono. Kevu toro kuudupi tov yiuwi'nokai a'mwo su toorallu aval'no mamollomapinogaikikono.

⁴ Kevu a'mwo su toorallu aval'no mamollomapi tov kevnokweyogaikul imgu amgu yeru'mdeyapinopi kemi ma'no ma'no kuudo kuulaikwo'dupudo tonyu uumjunpinogaikikono. Neya duu'nyulo. A'mwo kooti yogalo mollomwalokwe pworo ma'no ma'no kuudo kuuluuwo'dopure tokwe jainyubwo'dupudo toorobusuko imo'nupinogaikikono.

⁵ Mi avalobuuravoo, neya duu'nyulo. Kwako akavida'ai a'mwo abolo apoo'nyaiyo mwalodupudo tobuuro kuudo uubweyodopure tovida'ai muunyu kai'muuda'ai noonyumwonyu bwotonyagokwe tonbusuko imo'nyo'moneyokwe Gooti tool me'no ajesokagano. Aki a'mwo abolo apoo'nyaiyo su tobuuraino Gooti toolluro subuu'yamju me'no aduuwiyoka puruv arokwono. “Yiuwi'nokai pwolno puru'monodo mino kalo buuropino winyokwe ton nuu aguto kig toonyuro mido mollomwalo toru nuuge noulomwalmwalpinogano.” Adokaikono.

⁶ Toro kuvi kuruv kevu a'mwo abolo apoo'nyaiyo pubuuraino yovo tov bwolomorumwogapiyodapudogaikikono. Kuudo neya jaullulo. A'mwo abolo kuto ivito bwotonyagokwe ton kemi jul'nyo ikullabodupudogano. Aki kuto ivito bwotonyagokwe su ton kemi kooti yogalo daikullo'moneyokwe tomuuno me'nolopuuromokovla'mdupudogano.

⁷ Aki Krais Jisasolluro yovo adekumaroka su tovino bwolomorumwogapiyodapudo ton, a'mwo abolo kuto ivito bwotonyagokwe su ton kugano.

⁸ Aguto kig Gooti toolluro loowo akav gamoro yogalo tovi aro sakwollungikokwono. “Guvu yiuwi'nokai a'mwo abolo pwolno puru'monodo kuuru'ma'bi tonyuno kalo buuropino neya domollono. Guvnokwekujuno gujunodowodo to'busuko kubalno aval'no neya domollono.” Sakwollungikokwono. Yogalo su tovi kuumjunpi tov ilaiyo ipinogaikikono.

⁹ Toro kuvi kuruv kevu a'mwo abolo yovo agutokwe togai'aro yovomaiyokwe togai'aro tonyu pasudo judo'no judo'nodo tomgu'aro amollomapi tov ma'no ma'no ipinogaikikono. Kevu Gooti toolluro loowo tovi kisuvolo wipinogaikikono. Aki loowo tovi kisuvolo kwipi tov a'mwo abolo kisuvolokwe imo'numwalpinogaikikono.

¹⁰ A'mwo pwol Gooti toolluro yiuwi'nokai loowo tonyu uumjunowo'ji kwol kuruv loowo yiuno pullugwonodo kullugwoji kisuvolo so'ji su toolno'gwowi yiuwi'nokai loowo tonyu kisuvolo wiyodowodo pwolbusuko imo'nonekono.

¹¹ Neya duu'nyulo. Gooti tool aro adokaikono. “Kevu kwolabolo me'no yoma'nodupudo togaikul a'mwo abolo pugai kwonyalo mipinono.” Aki Gooti avalo su tool yogalo aro adokaikono. “Kevu a'mwo abolo punyu maromiyosupinono.” Adokaikono. Toro te kevu a'mwo abolo pugai kwonyalo mipi kuvi kuruv a'mwo pwollu aromiyosupi to'gwowi a'mwo abolo Gooti toolluro loowo tovi kisuvolokwe imo'nodupudogaikikono.

¹² Toro kuvi kuruv loowo gabovo puru'gwowi a'mwo abolo tonyu ma'no ma'nodo tovuro dolago tomuuda'ai bomollurolovomokalokwodowodokwono. Lukomgu Gooti tool kemi bomollurolovekumokalokwodowodo loowo su tovi'aro nojaikunyubworonekono. Toro togaikulluno tov kemoro yogalo togai'aro pasudo togai'aro ton kemi bomollurolovekumokalokwodowodo loowo su tovi dolago tomuu'aro neya jomjomwekovlavogaulo.

¹³ Neya duu'nyulo. A'mwo pwol a'mwo gabovo pwekwojuno kalo mamamwonyo'ji tov Gooti kwol kuruv kooti yogalo aduuwiyo'ji toga a'mwo kalomaiyo su toolluno kalo mamamwonyonekono. Toro kuvi kuruv a'mwo pweku a'mwo abolo punyu kalo amamwonyubi su tookujuno'gwowi Gooti tool kooti yogalo adagujo'ji toga gumino kalo nomagumwonyonekono.

Kuudo uubweyodupudo tov sugupasudo kugai'aro nonaguto'mno'juki kuudo uubweyodupudo su tov me'no abollungiko to'busuko imo'nono tovinokwono

¹⁴ Mi avalobuuravoo, a'mwo pwol aro donekono. “Nuu Krais toolluno kuudo kuubwemwakono.” Toro dowo'ji kwol kuruv sugupasudo pugai'aro mamolludo'movlawo'ji to'gwowi a'mwo su toolluro yogalo tov yiuno yasuwa'yogalo to'no imo'nonokwono. A'mwo su toolluro, “Oo kuudo kuubwemwakono,” yasuwa'yogalo ado'ji su tov gami ma'no ma'nodo tovuro kirumwallo tovida'ai nokwo bomollurolovomokalokwonoldukono? Awiyo. A'mwo su toolluro yasuwa'yogalo ado'ji tov gavnokweyolluro ma'no ma'nodo tovuro kirumwallo tovida'ai ku'nono mabomollurolovomokalokwonekono.

¹⁵ Kevu kemi tello'mwo tellugwai'yago tobuurobusuko ikullumo'nodupudo Jisasolluro a'mwo abolo pubuurai wonopi wosamujuko'mdeyo oo youro'mdeyo tonyuno supto yodopure su tobuurai kwonpi tov

¹⁶ kevu a'mwo abolo su tobuurai aro wuudupinogaikikono. “Oo kevu nokwo plavopi sumwoluko kavo doosunogaulo. Aki kevnokwe togaikul du'muujudo jumwonyogaulo. Aki wosamujuko neya donyuto'nogaulo.” Su toro kuudupi kuvi kuruv supto yodopure su tobuurai wosamujuko'mdeyo oo youro'mdeyo pun mwipi tov kemoro yogalo kuudupi su tov a'mwo abolo su tobuuravuro kulako tonyu nokwo wiyo'mwojono'mdukono? Awiyo, yiuno yogalo to'no kuudupi tov ku'nono mwiyo'mwojupinogaikikono.

¹⁷ Toro te kuudo uubweyo'moneyokwe pasudo tov yiuno judo to'no kworo'ji tov supto kuuno iwapiyonokwono. Aki kuudo uubweyodupudo su tovida'ai sugupasudo kugai'aro mamolludo'movlapi to'gwowi kemoro kuudo uubweyodupudo su tov me'no abollungiko to'busuko to'no imo'numwalonokwono.

¹⁸ A'mwo pworo aro dupinorogano. “Oo a'mwo abolo pun kuudo uubweyokweyogano. Aki a'mwo abolo puno'gwowi sugupasudo mujumovlaiyokweyogano.” Pasudo puruvalluno su toro dupinorogano. Toro kuvi kuruv nuvno'gwowi aro ikudumo'mokwono. “Kevu pugaikul sugupasudo mimovlapi tov kemoro kuudo uubweyodupudo tovino ku'nono manyuduuwallupinogaikikono. Kevu su toro supi kuvi kuruv nuvno'gwowi moro sugupasudo mujumovla'mdumdo tovi'aro nuvnokwenyuro kuudo uubweyodumdo tovino kuu'maiyo ikuduuwallumwalmonyugono.”

¹⁹ Toro te guu pweku, Gooti tool yiuno pwolnodekono, kuudo uubweyodumdekugono. Gumoro su toro kuudo uubweyodumdo tovino, “Tarevono,” to'no agudumono. Neya duu'nyulo. Kuullo ma'no ma'nodo kworo kuruv kuudo aval'nodo su tovi uubweyodupudorogano. Aki kuudo uubweyodupudo su tooro luko bu'buto morumoukuropiyodupudorogano.

²⁰ Guu kuudo maiyekugono. Aro tovino kuudo neya jouromarogawono. Gumoro kuudo uubweyodumdo su tovida'ai sugupasudo togai neya domjumovlavogawono. Guu kuvinono mamjumovla'bi to'gwowi gumoro kuudo uubweyodumdo su tov yasuwa'no plawonokwono. Neya duu'nono.

²¹ Sumdomgu togasuro nemi nellukweyago Eburaiyamol Gooti toolluno kuudo kuubweyajuko tool gami muugunyo Aisakollu romiroudapiyo'moneyokwe dukwagupto tovi muunyu toru sulomoga'bworosokaikono. Eburaiyamolluro womdo soka su tovi Gooti tool wonyuno sumaiyokwe Eburaiyamolluno, “Oo a'mwo sugudoldeyo,” adokaikono.

²² Toro te kuudo neya jaullulo. Eburaiyamol Gooti toollu kuudo me'no kuubweyokaikono. Toro kuubweyoka toga sugupasudo kurukwe'aro sokaikono. Toro te gamoro kuudo kuubweyoka su tov gamoro sugupasudo soka su tovi'aro yiuno'no amollopiyokakwono.

²³ Toro te Eburaiyamol Aisakollu su toro soka toga Gooti toolluro yogalo puruv suuwiyo sumwojokakwono. Yogalo su tov arokwono. “Eburaiyamol Gooti toolluro yogalo kuudoka tovi wuu'no'no, Oo nebalo'mdeyo, kuudo kuubweyokaikono. Toro kuudo kuubweyoka toolluno tov Gooti toolluro sumdo tovi sugudo kwimo'nokaikono.” Aki Gooti toolluro yogalo aka kuruv Eburaiyamolluno aro dodowodokwono. “Eburaiyamol Gooti toolluro ibwoto'nyo kwimo'nokaikono.” Dodowodokwono.

²⁴ Toro te kuuguudo su tov aro tovino nekuduuwallodowodokwono. Agasuro a'mwo pwol, “Oo nuu kuudo kuubwemwakono,” yiuno mago tokwe to'no su toro ado'ji tov Gooti toolluro sumdo tovi sugudo ku'nono mwimo'nonekono. Toro kuvi kuruv yiuno a'mwo pwol kuudo nebal'no uubweyowo'ji sugupasudo kurukwe'aro amjumovlawo'ji su toolno'gwowi Gooti toolluro sumdo tovi sugudo kuvinono wimo'nonekono.

²⁵ Aki Gooti toolluro sumdo tovi sugudo wimo'nyo'moneyokwe puuto su tovino aiyogasuro kwonyalabolo puvuro soka tov yovekurajo'mo nekuduuwallodowodokwono. Abolo su tovino yovo tov Rahapovokwono. Abolo su tov Joosuuwalluro a'mwo domokwe amorapiyoka toorallu ilaiyo to'no amollomarokakwono. Toro molloma'no sumaiyokwe a'mwo su tooral aikomgu plaiyo'mo toorallu puuto gabovo puvi'aro amorapiyokakwono. Gamoro kuudo kuubweyajuko tovino su toro tomgu'aro anekuduuwallokakwono.

²⁶ Toro te kuudo neya jaullulo. A'mwo pwolluro kulako tov kuullo nonaguto'mdeyokwe kulako su tov bwiyo me'no abollungiko to'busuko imo'nonokwono. Su toro to'busuko kubalno a'mwo pwol kuudo uubweyowo'ji kwol kuruv sugupasudo mamjumovlawo'ji to'gwowi gamoro kuudo uubweyodowodo tov me'no abollungiko to'busuko imo'nonokwono.