Jagillo 20 - Gooti Toolluro Yogalokwono

Isuraiyolda'ai a'mwo abolo ton wonyo'mo yo'mno Gooti Yawellu mebweyogalo kuudopo tovinokwono

¹ To'no'gwowi lobako naba 1 toollu Isuraiyolda'ai yiuwi'nokai a'mwo abolo ton kwako a'mwomaiyo kuu'maiyo Sen tomuuno plavo'mno Kades towai amwalopogano. Toro towai kuuno mwalodopure toga Mooseseke Erooneke todorallu kwiyo'mwo Miriyamov abolokakwono. Toro aboloka tovi kwako su toru amolsosopokwono.

² Aki kwako su toru wonyo iranyo'moneyokwe puruv nonagutorukono. Toro tovino tov a'mwo abolo ton i'bwo'no'mno Mooseseke Erooneke todorallu kisuvolo wiyo'moneyokwe abwonopogano.

³ Toro bwono'mno Moosesollu mebweyogalo aro kuudopogano. “Puga nevu mebweyogalo dodowore toga Gooti Yawel gami ilomoropiyo'moneyokwe sel ago tovi sumdollu toru nevuge avalo pubuurai aromiyosoka tonyu kwonowonogano. Su toro toga nevu yiuwi'nokai tonollu aromiyonekubweyowo'jujuko'mno'juki ilaiyokwono.

⁴ Toro kuvi kuruv kev todorakul nevuge'aro nemi noonyumwonyu wuulo ki'duvolodowado toorogai'aro tonollu kwako a'mwomaiyo kuu'maiyo akawai'no mollubworonekumokabodubul kwako akavi bolpino'moneyokwe dukekullunadopiyo?

⁵ Kev todorakul Ijupda'ai mollurolovonekumokabodubul kwako kaiya'no kuunodo akawai'no anekumokamwakulo tov buro'nyo kavlo tovino'mdeyo? Kwako akawai noonyumwonyu wosamujuko yoburoudanyo'mo tov sugudo'maiyo. Aki toro towai noonyumwonyu nonyo'mo ikulsulo togai'aro wit sulo togai'aro wain ikulsulo togai'aro ton mwo'dupudogano. Aki kwako su towai wonyo iranyo'mo tov nonagutowaikono.” Kuudopogano.

⁶ Toro kuudopo tovi Mooseseke Erooneke todoral wuu'nyuno sumaleyokwe a'mwo abolo i'bwo'nodopure tonyu wuugollu'movolno Gooti Yawellu ilomoropiyo'moneyokwe sel anoullo toru'no plavolno kwako tovi kwolomuulo'narolorakono. Toro wolomuulo'na'dole toga Gooti Yawelluro bako bwotonyo tov kworallu kuuwokakwono.

⁷ Toro wino sumaiyokwe Gooti Yawel Moosesollu aro kuudokaikono.

⁸ “Guu Subuu'yamjo'mo Bookis tovi woboruda'ai yodeko tov maro'bi guuge'aro Erooneke'aro todorakul a'mwo abolo tonyu doju'bworomallulo. Toro ju'bworomaro'bullu sulo bwotonyo pwollu wobo towai i'bwo'nopi muugona'dopure toga guu sulo su toollu kuuguudo duuwiyo'bi wonyo iranyo'mo tov ilowilovabwonokwono. Toro sulowilovabwo'ji tovida'ai yiuwi'nokai a'mwo abolo togai'aro noonyumwonyu wuulo ki'duvolodupudo toorogai'aro ton nokwo nupinogano.” Kuudokaikono.

⁹ Toro kuudoka tovi Moosesol kuvinono uumjuno'no Gooti Yawellu ilomoropiyo'moneyokwe sel ago tovi kuulno sumaiyokwe yodeko tov aulomarokaikono.

¹⁰ Toro kuuloma'no sumaiyokwe Mooseseke Erooneke todoral a'mwo abolo tonyu ju'bworomarolno sulo toollu sumdollu toru su'bwo'nopogano. Toro i'bwo'nodopure tonyu Moosesol surodo'mo tool aro kuudokaikono. “Mi donuu'nyulo. Kevu kisuvolo yodupudo togaikul wonyo iranpino'moneyokwe nav todoronal sulo akalluda'ai wonyo pun neya ikullabwosunonaldukono?” Kuudokaikono.

¹¹ Toro wuujuno sumaiyokwe Moosesol Gooti toolluro yogalo kuudoka tovi kisuvolo wiyo'no sulo toollu kuuguudo muudokaikono. Toro kwol kuruv yodeko tov bomokaila'no sulo toollu iwago pugasal aromiyokaikono. Toro aromiyoka kuga'gwo kuuno wonyo bwotonyo tov sulo toolluda'ai sulowilovabokakwono. Toro sulowilovaboka tovida'ai yiuwi'nokai a'mwo abolo togai'aro noonyumwonyu wuulo ki'duvolodupudo toorogai'aro ton anopokwono.

¹² Toro anopo kuvi kuruv Gooti Yawel Mooseseke Erooneke todorallu yogalo aro kuudokaikono. “Kev todorakul mino tov, Oo jurogudokwe tool Gooti Yawel kwoldeyo, Isuraiyolda'ai a'mwo abolo tonyu nokwo kuuduuwallo'bullujukorakikono. Toro kworakul kuruv Isuraiyolda'ai tonyuro sumdo tovi mino kuudo manubweyodubul moro yogalo tovi kisuvolo sumalorakikono. Toro tovino tov moro kwako ikullabiyo'mo subuu'yamju adaikullo su toru'no kev todorakul a'mwo abolo tonyu mamollubworomokaulabullunorakikono.”

************ Eroonol aboloka tovinokwono

²² Toruda'ai yiuwi'nokai Isuraiyolda'ai a'mwo abolo ton kwako Kades toru wuugollu'mo'mno sumaveyokwe muumuudo Hooro toollu towai ai'movopogano.

²³ Muumuudo Hooro su tool kwako Idoom'no senagu'nyo toru wo'dowodekono. Toro towai ki'mo'mno sumaveyokwe Gooti Yawel Mooseseke Erooneke todorallu aro kuudokaikono.

²⁴ “Muudu'nodo toga kev todorakul kwako Meriba toru moro yogalo tovi kisuvolo solo tovino tov guu Eroonekuji aro adagubwemono. Isuraiyolda'ai togaikullu ikullabiyo'mo kwako subuu'yamju adaikullo su toru'no maulabinekugono. Toro kweku kuruv kwa'mgu akamuu bolbinekugono.” Adubweyokaikono.

²⁵ Toro dubweno sumaiyokwe Moosesollu kuudokaikono. “Guu Erooneke'aro gamoro muugunyo Eleyasareke'aro tonumdallu momworaro'bi muumuudo Hooro toollu mokailabinekugono.

²⁶ Toro mokaila'bi Eroonolluro pris womdo yo'moneyokwe youro yesodowodo ton irolomaro'bi gamoro muugunyo Eleyasarollu ibwebinokwono. Eroonol muumuudo su toollu muunyu toru bolono toolluno tov toro ibinekugono.” Kuudokaikono.

²⁷ Gooti Yawelluro toro kuudoka tovi Moosesol kuvinono uumjuno'no Erooneke Eleyasareke tonumdalluda'ai momwora'no sumaiyokwe muumuudo Hooro toollomno amokailokaikono. Toro mokailoduke toga yiuwi'nokai Isuraiyolda'ai ton kwonopogano.

²⁸ Toro te Moosesol mokailno sumaiyokwe muumuudo toollu muunyu toru Eroonolluro pris womdo yo'moneyokwe youro tov irolomaro'no gamoro muugunyo Eleyasarollu amollubweyokaikono. Toro mollubweno sumaiyokwe muumuudo su toollu muunyu toru kuuno mwalodopure toga Eroonol abolokaikono. Toro me'no aboloka toga Mooseseke Eleyasareke tooral muumuudo toolluda'ai aikomgu kwolabolorakono.

²⁹ Toro wolabino sumaleyokwe a'mwo abolo tonyu aro abwoluudolorakono. “Eroonol me'no abolmokaikono.” Toro kuudolo tovi wuu'no'mno yiuwi'nokai Isuraiyolda'ai a'mwo abolo ton kumdato juno juno sumaveyokwe 30-pela iruko tobuul kuuwolo'nokagano.