Hibruu 9 - Gooti Toolluro Yogalokwono

Sumdomguda'ai subuu'yamju togasuro pris tooro sipsip mujako tokwe sel ago tovi amokaullajupo tovinokwono

¹ Sumdomguda'ai subuu'yamju tov kwollajuko toga Gooti toollu ilomoropiyo'moneyokwe tokwe'aro kwako akavi gami ilomoropiyo'moneyokwe sel ago tokwe'aro tovalluno kinamjo'mo loowo ton kwollajupogano.

² Kuudo neya jaullulo. Nemi nellukweyago tooro sel ago su tov sovrowosajupokwono. Sel ago su tovi anakuuto tomuu muudu'no adovarojungiko toru gworeko gudupolallo'moneyokwe tokwe'aro noluuleyo purukwe'aro toval kwollajulorukono. Noluuleyo su tovi muunyu toru bret pun Gooti toollu me'no kwingiko ton sulosajupokwono. Toro te muudu'no adovarojungiko su towai'no yovo tov, Gooti Toolluro Pwekwaptovo, dodupudorukono.

³ Aki Gooti toolluro sel ago su tovi anakuuto tomuu youro kudo'aiko puruv allukurosajupokwono. Youro kudo'aiko allukurosajupo su tovi buulo tomuuno yovo tov, Gooti Toolluro Pwekwapto Kuunodovo, dodupudorukono.

⁴ Gooti Toolluro Pwekwapto Kuunodo su toru wobeya sudo kuunyokwe i'mujako tovi iroudapiyo'moneyokwe dukwagupto tokwe'aro subuu'yamjo'mo bookis tokwe'aro toval wo'dubulorukono. Bookis su tovuro yiuwi'nokai tomuu yiuno gool tokwe suropingikokwono. Aki soospen puruv bret mana tokwe surosungiko tov bookis su tovi anakuuto tomuu aullu'nallajukokwono. Aki Eroonolluro yodeko sodolokwe tokwe'aro aki Gooti toolluro subuu'yamju sokwollosungiko sulbweko tovake'aro su ton bookis tovi anakuuto tomuu aullu'nallajupogano.

⁵ Bookis su tovi muunyu toru bwososo'mo atallo puruv aiyosajupokwono. Atallo su tovino yovo tov, Gooti Tool Kalo Mamwonyo'moneyokwe Atalloveyokwono. Aki atallo su tovi muunyu toru seruubim ensel kula'noka pworal Gooti toolluro mwalodowodo su toru'no wuuduuwallo'moneyokwe sulodaiyajulorakono. Sel ago tovi su toro ton aullajupo kuvi kuruv aga noonyumwonyu su tonyuno yogalo bwotonyo majo'moneyokweyogakono.

⁶ Nemi nellukweyago ton sel ago tokwe'aro yiuwi'nokai sel ago su tovi aulallajupo togai'aro ton me'no yovrowosuno sumaveyokwe yiuwi'nokai toga pris yasuwa'nodo tooro aullajuporogano. Toro tooro sel ago su tovuro muudu'nodo adovarojungiko toru kuulodapu kemi womdo judo'no judo'nodo ton aullajuporogano.

⁷ Toro kuvi kuruv sel ago su tovuro lukomguda'ai adovarojungiko toru'no'gwowi yiuno pris aguto toolno aullajukorukono. Toro kuvi kuruv pris aguto su tool yiuwi'nokai toga maullajukekono. Yiuno kworomo tovuro iruko pullugwonodo toga'no aullajukekono. Aki toro kwol kuruv yasuwa'no maullajukekono. Yiuno sipsip meme tooravuro mujako tokwe to'no amokaullajukekono. Mujako amokaullajuko su tov pris aguto gavnokwe toolluro ma'no ma'nodo togai'aro a'mwo abolo ton kuudo po'dogalo miyouroma'dupu ma'no ma'no yodopure togai'aro su tonyo'mo amokaullajukekono.

⁸ Pris aguto toolluro sumdomguda'ai sel ago tovi womdo amjumovlaiyajuko su tovino Gooti toolluro Kuullo tool aro nekuduuwallodowodekono. Sumdomguda'ai sel ago su tov kuuno da'mduke toga Gooti toolluro ago muunyu kai'muuda'ai pwekwapto kuunodo toru'no kuullo'moneyokwe puuto tov yere mausu'nyajukokwono.

⁹ Toro te pris tooravuro womdo amjumovlaiyajupo su tov yovekurajo'mokwono. Yovekurajo su tov agasuro tonollu Krais toolluro womdo yodowodo tovino nekuduuwallodowodokwono. Neya duu'nyulo. Pris tooro sel ago tovi womdo sajupo toga Gooti toollu wiyo'moneyokwe yasuwa'wino pugai'aro sipsiporodeyo romiroudapiyo'mo toorogai'aro toorogai Gooti toolluro mwalodowodo toru'no amokaullajuporogano. Toro kuvi kuruv a'mwo tooravuro amokaullajupo su ton kemi poowokalago tovida'ai kisuvolo me'no wiyodupudo su tonyu ku'nono mamollol'movodukwopinyajuporogano.

¹⁰ Su tov aro tovinokwono. Kemoro noonyumwonyu amokaullajupo pasudo uumdo su tov yiuno wosamujuko togai'aro wonyo nonyo'mo togai'aro kulako tovi yal'mo'nyo'mo togai'aro su tonyuno loowo punyu kinamjo'mo amokaullajuporogano. Aki su tooro yiuno kwa'mgu kulako tonyuno loowo tonyu uumjunyo'moneyokwe amokaullajuporogano. Kwa'mgu kulako tonyuno loowo su ton yiuno subuu'yamju muuduko tov yere mimo'noduke toga'no kwollajupogano. Toro wo'dopure tonyu uumjungelabino uumjungelabino sumaveyokwe Gooti tool muuduko tov sovo'dogaloka toga'no'gwowi loowo uumdo su ton sumwogapiyopogano.

Krais gavnokweyolluro mujako tokwe kwiroudapinoka tovinokwono

¹¹ Aga'no'gwowi Krais tool Pris Aguto me'no imo'nodowodekono. Nemi Pris Aguto Krais su toolluro ato tovida'ai yiuwi'nokai sugudo nemi baneki'mo'mdupudo ton nekullabodowodekono. Aki toro tool Gooti toolluro ago muunyu kai'muuda'ai sel ago to'busuko muunyu toru'aro uuwolo'mdowodo tovino'gwowi me'no aulokaikono. Ago su tov yiuno sugudo to'nodokwono. Gooti toolluro ago auloka su tov kwako akavida'ai a'mwo tooravuro ato tokwe amojungiko'maiyo. Aki kwako akavida'ai mimo'nokakwono.

¹² Toro te Krais tool muunyu kai'muuda'ai Gooti toolluro pwekwapto kuunodo su toru yiuno puru'monodo toga'no aulokaikono. Toro tool meme toorogai'aro buulmokau taiyo toorogai'aro tooravuro mujako tokwe amokaulokalmaiyo. Toro kwol kuruv gavnokweyolluro mujako abwoloka tokwe amokaulokaikono. Gamoro mujako abwoloka su tovi'aro a'mwo abolo tonol aiyo yiunokuudo mujomwekovlaiyo'moneyokwe nemi ma'no ma'nodo tovuro kirumwallo tovida'ai abomollurolovonekumokalokwokaikono.

¹³ Kuudo neya jaullulo. Uumdo togasuro a'mwo abolo pun Gooti toolluro sumdo tovi yovraimwonyo'moneyokwe tov aro sajuporogano. Pris tooro meme toorogai'aro buulmokau kwolo toorogai'aro tooravuro mujako tov buulmokau abolo duko tovi suroudapingiko tovuro kwagupto togai molla'mo'mdupu kulako tovi aluvourokurapiyajupogano. Toro aluvourokurapiyajupo su tov Gooti toolluro sumdo tovi kaiyako mollugolamo'nodupudo tonyu amollol'movodukwopiyajupogano.

¹⁴ Meme toorogai'aro buulmokau toorogai'aro tooravuro mujako tokwe su toro amollol'movodukwopinyajupo kuvi kuruv Krais toolluro mujako to'gwowi meme toorogai'aro buulmokau toorogai'aro tooravuro mujako tovi muunyu toru'aro uuwolo'mdowodokwono. Su tov aro tovinokwono. Gooti toolluro Kuullo yiunokuudo mujomwekovla'mdowodo toolluro jurogudo tokwe Krais tool sipsip meme kaiya'nodomaiyokwe pwolbusuko imo'no'no gavnokwe tool Gooti toollu kwiroudapinokaikono. Toro toolluro mujako su tov nemi mollol'movanekudukwopiyodowodokwono. Mujako su tov nemi poowokalago tovida'ai bolnodo'moneyokwe pasudo me'no kuulanekwo'dupudo toorai mollol'movanekudukwopiyodowodokwono. Nemi toro mollol'movanekudukwopiyodowodo su tov nevu Gooti aiyokwe toollu womdo wimwalano'moneyokwe tovinokwono.

Krais toolluro mujako tov subuu'yamju muuduko tovi jurogudo duuwimwojodowodo tovinokwono

¹⁵ Krais tool Gooti toollu me'no kwiroudapinoka su tov Gooti toolluro subuu'yamju muuduko tovi jurogudo imwojodowodekono. Krais su tool subuu'yamju muuduko su tovi'aro Gooti tooke'aro nevuge'aro akuuto toru momgurovonekubweyodowodekono. Aro tovino'mokwono. Yiuwi'nokai Gooti toolluro a'mwo abolo doma'dowodo ton aiyo yiunokuudo mujomwekovlaiyo'moneyokwe subuu'yamju wiyodowodo su tov kuvinono nomapinogano. Aki a'mwo abolo su ton sumdomguda'ai subuu'yamju tovi dolago tomuu amwallajupo tovida'ai ma'no ma'no pasudo tooraino kirumwallo tovida'ai mollurolowapiyo'moneyokwe Krais tool me'no abolokaikono. Su toro tovino'mokwono.

^16-17 Kuudo pun jaullulo. A'mwo pwol yere mabolo'ji toga gamoro kuto ivito tonyu ala'mwol maronoldukoneyokwe tovino pepa tovi yokwollosonekono. Toro sokwolloso'ji kuvi kuruv a'mwo su tool aiyo kuuno amwalo'ji toga pepa su tov womdo nonaguto imo'numwalonokwono. Toro kuvi kuruv a'mwo pepa sakwollo'ji su tool me'no abolo'ji toga'no'gwowi a'mwo pworo kuvinono me'no abolmokaldukoneyokwe tovino neya wonomapinekono. Su toro me'no kwonomapi toga pepa su tov womdo kurukwe imo'nonokwono.

¹⁸ Toro tovino tov aiyoga sumdomguda'ai subuu'yamju kuruv Gooti tool kwiyoka toga buulmokau meme bolodopure tooravuro mujako abwoloka tokwe amolludovokaikono.

¹⁹ Moosesol a'mwo abolo tonyuro sumdo tovi Gooti toolluro loowo aduuwiyoka tonyuro go'no go'nodo tonyu amojagilokaikono. Toro mojagilno sumaiyokwe toga buulmokau taiyo toorogai'aro meme toorogai'aro tooravuro mujako tov wonyo tokwe molla'movo'no mekwapilo hisoop purukwe'aro sipsip ato muja'jo purukwe'aro toval mujako su tovi ajuulovomarokaikono. Toro juulovoma'no sumaiyokwe Gooti toolluro loowokwe buukiyo tokwe'aro yiuwi'nokai a'mwo abolo togai'aro su tonyu mujako pwekwono pwekwono aluvourokurapiyokaikono.

²⁰ Moosesol toro luvourokurapino sumaiyokwe a'mwo abolo tonyu aro kuudokaikono. “Kevu Gooti toolluro subuu'yamju adaikubwemoka tovi neya uumjunpino'moneyokwe tov mujako abwolmoka akav jurogudo imwojo'mokwono.” Kuudokaikono.

²¹ Aki Moosesol a'mwo abolo togai'aro loowokwe buukiyo tokwe'aro tonyu mujako pwekwono pwekwono aluvourokurapiyokaikono. Toro luvourokurapino sumaiyokwe yiuno aval'nodo su tomgu'aro Gooti toollu ilomoropiyo'moneyokwe sel ago tokwe'aro yiuwi'nokai pris womdo yo'moneyokwe disodeyo togai'aro kunyu kuruv mujako pwekwono pwekono aluvourokurapiyokaikono.

²² Su toro tomgu'aro Moosesolluro loowo tovi dolago tomuu mwalodupudo tonyu mujako tokwe luvourokurapiyodupudorogano. Toro luvourokurapiyodupudo tov yiuwi'nokai loowo tovi dolago tomuuda'ai go'no go'nodo toorai wobo toru mollol'movodukwopiyo'mo yodowodokwono. Mujako su tov mabwolawo'jujuko'mno'juki Gooti tool ma'no ma'nodo tovuro kirumwallo tovi mamodukwopiyowo'jujukekono.

Krais tool ma'no ma'nodo tovuro kirumwallo tovi modukwopiyo'moneyokwe yiuno puru'monodo toga'no aboloka tovinokwono

²³ Toro te Gooti toollu ilomoropiyo'moneyokwe sel ago tokwe'aro yiuwi'nokai sel ago su tovi kuula'dupudo togai'aro ton Gooti toolluro sumdo tovi yiuno sugudo to'no wimo'nyo'moneyokwe pris tooro meme oo buulmokau tooravuro mujako tokwe aulemowosajuporogano. Yiuwi'nokai su ton Gooti toolluro ago muunyu kai'muuda'ai wo'dupudo kuunodo tonyuno duuwallo'moneyokweyogano. Toro kuvi kuruv muunyu kai'muu wo'dupudo su tono'gwowi yiuno meme oo buulmokau kwiroudapingiko tooravuro mujako tovi uuwolo'mdowodo tokwe to'no Gooti toolluro sumdo tovi sugudo kuvinono wimo'nodupudogano.

²⁴ Neya duu'nyulo. Krais tool kwako akavida'ai a'mwo tooravuro ato tokwe ilomoropiyo'moneyokwe ago amojungiko puvuro pwekwapto toru maullokwekono. Buro'nyo buro'nyo ilomoropiyo'moneyokwe ago kwako akavida'ai a'mwo tooravuro ato tokwe mododupudo su ton Gooti toolluro ago muunyu kai'muu ilomoropiyo'moneyokwe ago kuunodo tovino duuwallo'moneyokweyogano. Toro kuvi kuruv Krais tool muunyu kai'muu Gooti toolluro ilomoropiyo'moneyokwe ago kuunodo tovino'gwowi me'no aulomwalokaikono. Krais tool Gooti toollu wobo toru kuulomwalno sumaiyokwe nemi nekullo'mwojumwalono'moneyokwe Gooti toollu wuudogangovla'mdowodekono.

²⁵ Krais gavnokwe tool wiroudapinyo'moneyokwe Gooti toolluro ago muunyu kai'muu aiko te aiko te maullokwekono. Kwako akavida'ai pris aguto tooro noonyumwonyu pworavuro mujako togai momwora'dupu kwako akavida'ai ilomoropiyo'moneyokwe ago tovuro pwekwapto toru yiuwi'nokai kworomo toga amokaullajuporogano.

²⁶ Neya duu'nyulo. Krais tool gavnokweyol aiko te aiko te wiroudapinyo'mo tovino supto miyodowodokwono. Supto sowo'jujuko'mno'juki aiyoga kwako akav muudu'no sumo'noka togada'ai Krais tool aiko te aiko te amujobolmovlavowo'jujukekono. Toro kuvi kuruv Krais tool kwako akavuro aiyowo'mo akaga'no'gwowi ma'no ma'nodo tovi yiunokuudo modukwopiyo'moneyokwe yiuno puru'monodo toga'no abolokaikono.

²⁷ Aki yiuwi'nokai a'mwo abolo kun kuruv yiuno puru'monodo toga'no bolpinogano. Me'no abolpi toga Gooti tool kemoro buro'nyo buro'nyo pasudo tonyu jainyubwollo'moneyokwe kooti yogalo noduuwiyonekono.

²⁸ Toro to'busuko kubalno Krais tool yiuno puru'monodo toga'no abolokaikono. Toro aboloka su tov noonyumwonyu kwiroudapiyajupo pwolbusuko imo'no'no gavnokwe tool a'mwo abolo ma'no ma'nodokwe bwotonyago tonyuro aiko toru maro'no abolokaikono. Lukomgu Krais su tool kwako akavi aki aiko te noolabwonekono. Su toro kwolabwo'ji toga'no'gwowi nemoro ma'no ma'nodo tonyu yovo'dogallo'moneyokwe wolabwonolmaiyo. Toro kuvi kuruv yiuwi'nokai a'mwo abolo gavuge mwallo'moneyokwe tovino sogwollo winodupudo su tobuurai gamoro ago muunyu kai'muuno nomollurolovomokailawonekono.