Hibruu 6 - Gooti Toolluro Yogalokwono

Nevu Gooti toolluro nonekullabwono tonyuno sogwollo kinowa'ji buulo nuugunyumopimwala'jokwe tovinokwono

^1-2 Toro tovino tov nevu Krais toolluno kuuguudo muudu'no me'no kuu'na'ji su tekwojaino to'no nodumwala'jo. Nevu aguto gullo'moneyokwe tov kuuguudo muudu'nodo su tekwojai amdo wuurukuu'dupudo to'busuko kubalno neya wuugollu'movowa'ji kuuguudo jurogudo'mo tonyuno neya ainamjogawano. Toro te kuuguudo muudu'nodo aro tekwojaino aki aiko te miyodekubwasumwalanonogano. Pasudo pworo kuullo tobuurai bolnodo tomuuno me'nomokavla'mdupudorogano. Pasudo su tooraida'ai kuudo youragunyumo'nyo'mo kuuguudo togai'aro, Gooti toollu kuudo muudu'nodo uubweyo'mo kuuguudo togai'aro, wonyo uuvollunyo'mo tovino ibwasokwe kuuguudo togai'aro, Gooti toolluro womdo yo'moneyokwe ato uubogai'nyo'mo kuuguudo togai'aro, bolnodo tomuuda'ai aiyo aiko te nodukapino tovino kuuguudo togai'aro, Gooti tool a'mwo abolo tonyu kooti yogalo ajainyubworo'ji tovida'ai yiunokuudo kirumwallono kuuguudo togai'aro, yiuwi'nokai kavlo muudu'nodo su tekwojaino nevu aki aiko te miyodekubwasumwalanonogano.

³ Toro kuvi kuruv Gooti tool ilaiyo kwino'ji to'gwowi nevu aguto kuvinono nokwo yogullumovla'mwalanonogano.

^4-6 A'mwo pworo sumdomgu Krais toolluro bako tovi bodupu Gooti toolluro ago muunyu kai'muuda'ai yasuwa'wino tollovai me'no wonoma'dupudorogano. Aki toro tooro Gooti toolluro Kuullo toollu aval'no ma'dupudorogano. Aki toro tooro Gooti toolluro yogalo tovino yamju gallainyubwo'dupudo tovida'ai, “Oo ilaiyo'mdeyo,” me'no dodupudorogano. Aki toro tooro Gooti toolluro jurogudo ton lukomgu aiyowo'mo toga kuu'maiyo bomollolupto'nosono su tonyuda'ai pun me'no ma'dupudorogano. A'mwo su tooro yiuwi'nokai toro tonyu me'no wonoma'dupudo kworo kuruv su tooraida'ai pworono'gwowi lukomgu Gooti toollu buulo uugunyumopipinorogano. Toro te a'mwo su tooro Gooti toollu buulo toro kuuguunyumopipi tov Gooti toollomno aki aiko te kuudo ku'nono miyouragunyumo'nupinorogano. Su tov aro tovinokwono. A'mwo Gooti toollu buulo kuuguunyumopipi su tooro Gooti toolluro Kwolaiyo kwollu kuruv buulo aval'no uugunyumopipinorogano. Toro tooro aiyoga Juu tooro Krais toollu buulo uugunyumopiyo'mno i'noguropte tovi amovoromiyoguroptowosopo to'busuko kubalno a'mwo su tooro Krais toollu aki aiko te kaiyako aval'no igolpinorogano. Su toro sugolpi tov Krais toolluno kuu'maiyo toru'no bwolomorumwogapiyapi aki kevnokwe kworo kuruv kaiyako i'nopipinorogano.

⁷ A'mwo abolo punyuno yovekurajo akavi duu'nyulo. Gooti toolluro yogalo sugudo duubweyodowodo to'busuko kubalno buuruko tov kwako tovi bwola'dowodokwono. Buuruko su tov pino pino yodowo'jure tovida'ai kwako su tovi iminyo wosodowodokwono. Kwako su tovi a'mwo pwol wosamuju'womdo ton aburoudoso'ji tov wosamujuko su ton ilaiyo to'no bilapinogano. Toro te wosamujuko ton Gooti toolluro yogullumwojapiyodowo'jure su tonyu a'mwo tool ilaiyo to'no mulomaronekono.

⁸ Toro kuvi kuruv buuruko awo'ji tovida'ai kwako tovi lodokwe togai'aro gwo'gwopto togai'aro to'no abilapi to'gwowi kwako su tov womdo nonaguto imo'nonokwono. Kwako su tovi Gooti tool wobo toga jul'nyogalo nodubweyonekono. Aki kwako su tovida'ai yiuwi'nokai kaiya'nodo su tonyu duko tovi yere mobwokullurowonekono. Yovekurajo tov torokwono.

⁹ Toro kuvi kuruv kevu nemoro kalo buuropino nekullunodowodo togaikulluno'gwowi yogalo jurogudo akav kemino maikudumwakuuwono. Nevu kemino aro kuudo yaikuu'dowadonogano. Oo a'mwo abolo su ton sugupasudo yodupudodeyo. Yaikuu'dowadonogano. Kemoro sugupasudo yodupudo su ton nemi aro tovino nekuduuwallunodupudogaikikono. Oo Gooti toolluro a'mwo abolo tonyu ma'no ma'nodo tovuro kirumwallo tovida'ai me'no bomollurolovomokalokwodowodo ton kevu kugaikuldeyo. Su toro tovino me'no nekuduuwallunodupudogaikikono.

¹⁰ Gooti tool pasudo idopto'nodo to'no yokwekono. Toro tool kemoro womdo ilaiyo mujumovla'mdopure tonyuno kuudo miyallulo'gwonyokwekono. Aki kevu Gooti toolluno kalo buuropino ikullunodowodo tovida'ai gamoro a'mwo abolo su tonyu mollomwalodopure kuvino kuruv miyallulo'gwonyokwekono. Pasudo su tovi kuuno mujumovla'mdupudogaikikono.

¹¹ Toro te nevu kemino tov aro anekullunadopiyo. Aiyowo'mo tov yere mabai'mo'mdowo'jure toga kevu yiuwi'nokai pwolno puru'monodo togaikul Gooti toolluro nekullabwono tonyuno sogwollo kinodupudo su tovi guureji dogudupolarogaulo.

¹² Aki kevu Gooti toolluro womdo mujumovlaiyo'moneyokwe tovino burawo nyumwalpiyo. Toro kugaikul kuruv aiyogasuro a'mwo abolo pun Gooti toolluro subuu'yamju tonyu kuvinono mallo'moneyokwe kuudo guureji uubweyodupu manyu togada'ai sogwollo aingovlaiyajupo tonbusuko kubalno kevu aval'no neya domjumovlavogaulo.

Nevu Gooti toolluro subuu'yamju nonekullabwono tonyuno sogwollo kinodowado tovi neya gudupola'mwalono tovinokwono

¹³ Aiyoga Gooti tool Eburaiyamollu subuu'yamju kwiyoka tovino kuudo neya jaullulo. Gooti toollu muunyu toru'aro aguto uuwolo'mdowodo pwol nonagutomuugono. Toro tovino tov Gooti tool, Nebal'no agudadokwoneyo'mo, tovino subuu'yamju duuwiyo'mo tool muunyu toru'aro uuwolo'mdowodo a'mwo gabovo pwolluro yovo tovi'aro muudokaikono. Toro kuvi kuruv Gooti tool gavnokweyolluro yovo tovi'aro to'gwowi Eburaiyamollu subuu'yamju aduuwiyokaikono.

¹⁴ Subuu'yamju su tov arokwono. “Nuu sugudo pun nogubwemonyugono. Toro agubwemi tovida'ai gumi jukweyago kwolaiyo sawosunpi tooro bwotonyago kuunodo imo'nupinorogano.” Gooti tool gavnokweyolluro yovo tovida'ai Eburaiyamollu subuu'yamju su toro aduuwiyokaikono.

¹⁵ Toro te Eburaiyamol sogwollo to'no ainyajukekono. Toro kinyuno kinyuno sumaiyokwe Gooti toolluro subuu'yamju aduuwiyoka su tovi kuvinono amarokaikono.

¹⁶ Kuudo neya jaullulo. A'mwo abolo ton, Nebal'no agudadokwoneyo'mo, tovino subuu'yamju yajunyo'mo ton kemi a'mwo aguto uuwolo'mdupudo tooro muugona'dopure toga guureji yajunodupudogano. Aki muunyu toru'aro uuwolo'mdupudo su tooro muugona'dopure toga subuu'yamju sajunpi tovino tov lukomgu yogalo miyoullajunpinogano.

¹⁷ Su toro to'busuko kubalno Gooti tool a'mwo abolo subuu'yamju nomarano tonollu aro nekuduuwallo'mo kwinokaikono. “Nuu Gooti toonyu kuudo me'no sovo'dogallau'mi toga kuudo su tovi miyuu'dapiyokwenyugono.” Su toro tovino nekuduuwallo'mo winyuno sumaiyokwe gavnokwe tool Eburaiyamollu aro kuudokaikono. “Guu moro subuu'yamju gudodumdo tonyu kuvinono noma'binokwono.” Gooti tool gavnokweyolluro yovo tovi'aro Eburaiyamollu subuu'yamju su toro aduuwiyokaikono.

¹⁸ Gooti tool nemi jurogudo danekullumwojo'moneyokwe puruval tomgu'aro adanekullokaikono. Su toval arovakono. Gamoro subuu'yamju tokwe'aro aki gavnokweyolluno yovo tovida'ai nebal'no yogalo tokwe'aro tovakono. Yogalo su toval judo pumgu'aro mimo'nodubulovakono. Gooti tool kuunano yogalo puru'monodo kuruv miyoukuu'najokwekono. Toro toollomno nevu wobo toru buuru'ma'dowa yiulo kupuu'na'dowadonogano. Toro tonollu gamoro yogalo tokwe jurogudo nokwo danekullumwojumwalonekono. Jurogudo danekullumwojodowo'jure tokwe nevu Gooti toolluro subuu'yamju nonekullabwono tonyuno sogwollo kinodowado tovi guureji neya agudupolarogawano.

¹⁹ Aki Gooti toolluro nonekullabwono tonyuno sogwollo kinodowado su tovino yovekurajo puruv arokwono. Sip toollu dolo tov nomolobeyomokavlawo'jokwe jul'nyokwe wuulo puruv guureji ki'nomwora'dowodokwono. Toro to'busuko kubalno sogwollo kinodowado su tov nemoro kuullo tobuurai nomolobeyomokavlawo'jokwe guureji ki'nomwora'dowodokwono. Aki yovekurajo su tov Gooti toolluro nonekullabwono tonyuno sogwollo kinodowado tovinokwono. Pris aguto tool Gooti toolluro pwekwapto kuunodo toru'no youro kudo'aiko allukurosungiko tovi anakuuto tomuu aulomwallajukekono. Toro to'busuko kubalno nemoro sogwollo kinodowado su tov Gooti toolluro ago toru me'no nekumokaulodawodokwono.

²⁰ Nevu Gooti toolluro ago mwalodowodo su toru'no yere maulodowado kuvi kuruv Jisasolno'gwowi nemi nekullo'mwojo'moneyokwe sumdomgu wano'no me'no aulomwalokaikono. Melkisodekol pris womdo sajuko su toolbusuko kubalno Jisasol pris aguto sumo'nokaikono. Jisasol toro imo'nyuno sumaiyokwe muunyu kai'muuda'ai Gooti toolluro mwalodowodo toru anakuuto tomuu nemi nonekullo'mwojo'moneyokwe pris womdo tov yiuwi'nokai toga mujumovla'mdowodekono.