Hibruu 5 - Gooti Toolluro Yogalokwono

Pris Aguto Jisasol nemi bomollurolovonekumokalokwodowodo tovinokwono

¹ Kuudo neya jaullulo. Gooti tool yiuwi'nokai pris aguto toorai jeso'mo tool a'mwo abolo tonyuro akuuto toruda'ai yenyubworomarowo'ji jesodowodekono. Pris aguto ajeso'ji su tooro Gooti toolluro sumdo tovi a'mwo abolo tonyuro aiko toru maropi womdo puruval momjumovla'mdupudorogano. Toro tooro puga dukwagupto tovi muunyu toru Gooti toollu yasuwa'wino pun romiroudapiyodupudorogano. Aki puga a'mwo abolo tonyuro ma'no ma'nodo tovuro kirumwallo tovi modukwopiyo'moneyokwe Gooti toollu romiroudapiyodupudorogano. Pris aguto tooro womdo su tovallu momjumovla'mdupudorogano.

² A'mwo pris aguto gavnokwe su tool wollainyo imo'nodowodekono. Toro toolluno tov a'mwo abolo kuudo maiyokwe togai'aro a'mwo abolo ma'no ma'nodo tovi bwolo'dapudo togai'aro tonyuno kavo nokwo uubemwojumwalonekono.

³ Aki pris aguto su tool wollainyo imo'nodowodo tovino tov gavnokweyolluro ma'no ma'nodo tonyuro kirumwallo tovi modukwopinyo'moneyokwe Gooti toollu neya romiroudapimwalonekono. Pris aguto su tool a'mwo abolo punyo'mo romiroudapiyodowodo to'busuko kubalno gavnokwe toolluno'mo kuruv aval'no neya romiroudapinumwalonekono.

⁴ Aki a'mwo pwolnodo kwol kuruv pris aguto imo'nyo'moneyokwe tov gavnokwe tool ku'nono majesunonekono. Toro kuvi kuruv Gooti toolno'gwowi Eroonollu adomaroka to'busuko kubalno a'mwo pwol pris aguto imo'nyo'moneyokwe Gooti tool domarowo'ji jesonekono.

⁵ Su toro tomgu'aro Krais tool pris aguto imo'nowo'ji yovo aguto mallo'moneyokwe tov gavnokwe tool majesunokaikono. Toro kuvi kuruv pris aguto imo'nyo'moneyokwe ajesoka toolluro yogalo puruv aro sakwollungikokwono. “Guu moro Kwolaiyekugono. Iruko akallugwoji nuu gumi Junumiyago agujumo'numono.” Sakwollungikokwono. Toro kuudoka toolno ajesokaikono.

⁶ Aki yogalo sakwollungiko puruv arokwono. “Melkisodekol pris womdo yiuwi'nokai toga amjumovlaiyajuko toolbusuko kubalno guu pris womdo tovi yiuwi'nokai toga yiunokuudo mujumovla'mwalbinekugono.” Sakwollungikokwono.

⁷ Toro te Jisasol kwako akavi somollajuko toga noromiyoso'mo yodopure tool aro kuudo saullajukekono. Yiuno Gooti toolno moro bolnodo tovida'ai nokwo bomollurolovonumokalokwonoldeyo. Toro kuudo yau'dowo Gooti toollu subusu'nyogalo kuudumovlaiyajukekono. Aki Gooti toollu yamuugojo kuudoganyajukekono. Subusu'nyogalo wuujo'mo tool deko bwotonyo togai'aro kumdato togai'aro togai kuudoganyajukekono. Jisasol Gooti su toollu kwako tomuu'aro kwiyajukekono. Toro tovino tov gamoro subusu'nyogalo wuudoduke tovi Gooti su tool kuvinono kuu'nyajukekono.

⁸ Krais tool Gooti toolluro Kwolaiyo kwol kuruv danyu'nyuwuulo subwosunoka su tovi'aro kuudo souromallajukekono. Oo mi Nyunumiyago su tool gami uumjunyo'moneyokwe tovino mi jonubwasadopiyo. Kuudo souromallajukekono.

^9-10 Aki Krais su tool gamoro yiuwi'nokai womdo tovi sopiyoka toga Gooti tool yogalo aro adubweyokaikono. “Melkisodekol pris womdo sajuko toolbusuko kubalno guu pris aguto imo'numwalbinekugono.” Adubweyokaikono. Krais toolluro womdo sopiyoka su tovi'aro yiuwi'nokai a'mwo abolo kwollu kuumjunpi ton kemi ma'no ma'nodo tovuro kirumwallo tovida'ai birolo'nugolokwopi aiyo yiunokuudo mujomwekovla'mwalpinogano.

Nevu kwoloraiyo muudoga tobuurobusuko nomwalmwala'jokwe tovinokwono

¹¹ Nevu Krais toolluro pris aguto womdo yodowodo tonyuno kuuguudo bwotonyago pugai'aro ikujo'mo anekullunadopiyo. Toro kuvi kuruv kemoro kaduko ton nuu'nyo'moneyokwe biyolo uu'mwojodupudogaikikono. Toro tovino tov nevu kemi kuu'maiyo toru delukuulludapiyo'moneyokwe tov jurogudo nonekullumo'nodowodonogano.

¹² Su tov aro tovinokwono. Aga kevu a'mwo abolo punyu Gooti toolluro yogalo tokwe ibwasokwe me'no sumo'nopujukogaikikono. Toro kuvi kuruv kevnokwe togaikul Gooti toolluro kuuguudo tovida'ai kavlo muudu'nodo tobuuraino to'no aki aiko te wuu'nyo'mo tovino supto kuuno sumwakopogaikikono. Kevu aguto agullopujuko'mno'juki wosamujuko jurogudo tonyu nokwo anopujukogaikikono. Toro kuvi kuruv kevu kwolaiyo muudoga tobuurekulbusuko amuunallo tovino supto kuuno yodupudogaikikono.

¹³ Su tov nebal'nodokwono. A'mwo abolo pun kwoloraiyo tobuurobusuko imo'nodupudogano. Yiuwi'nokai kwoloraiyo tobuurobusuko imo'nodupudo su ton amuunallo kuuno nodupudo tonbusuko imo'nodupudogano. Toro te a'mwo abolo su ton Gooti toolluro yogalo tovida'ai pasudo idopto'nodo tollovai molludeyo'moneyokwe tov kuudo maiyokwe imo'nodupudogano.

¹⁴ Toro kuvi kuruv Gooti toolluro kuuguudo puno'gwowi wosamujuko jurogudo to'busuko imo'nodupudogano. Gooti toolluro kuuguudo jurogudo su ton a'mwo abolo aguto me'no agullungopo tonyo'mogano. A'mwo abolo aguto su ton pasudo sugudo'mdukono oo ma'no ma'nodo'mdukoneyokwe tovalluda'ai nokwo yenyubworoma'dupudogano. Toro tovino tov a'mwo abolo aguto su ton pi'mwono yenyubworomallo'moneyokwe jurogudo imo'nugelabodupudogano.