Hibruu 4 - Gooti Toolluro Yogalokwono

Gooti toolluro a'mwo abolo ton gamoro iruko mwallo'moneyokwe toru noulomwalpino tovinokwono

¹ Aiyoga a'mwo abolo Moosesol kwako Ijupda'ai abomokalokwoka tonyu kwimo'noka tovino kuuguudo tov nevu me'no souroma'mwakuuwonogano. Aki Gooti toolluro iruko mujomwekovlaiyo'moneyokwe ago towai kuulai'meyo'mo subuu'yamju kwiyajuko tov kuuno kwoso. Toro tovino tov kevu pwolno puru'monodo togaikul Gooti toolluro iruko mujomwekovlaiyo'moneyokwe ago su towai neya kuulai'mopinogaikikono. Toro kuvi kuruv pugaikul ku'nono maulai'mopinogaikuldeyokwe to'gwowi nemi aval'no nonekullumo'no'jo. Toro tovino nevu luko neya yogawano.

² Neya duu'nyulo. Gooti toolluro kuuguudo sugudo tov aiyoga Isuraiyolda'ai a'mwo abolo tonyu kuu'maiyo toru amoruujajupokwono. Kuuguudo sugudo su tov Gooti toolluro iruko mujomwekovlaiyo'moneyokwe tov kurukwono. Aki kuuguudo sugudo avalo su tov nemi me'no amodonekumollopokwono. Toro kuvi kuruv aiyoga Isuraiyolda'ai a'mwo abolo ton kuuguudo sugudo su tovino Joosuuwaike Kelepeke tooral kuudo kuubweyajulo tooralbusuko kuudo muubweyajupogano. Toro tovino tov kuuguudo sugudo su tov a'mwo abolo tonyu ku'nono mwiyo'mwojajukokwono.

³ Neya duu'nyulo. Yiuno nevnokwenol kuudo kuubweya'ji su tonolno Gooti toolluro iruko mwallo'moneyokwe ago toru nokwo kuulomwalanogano. Toro kuvi kuruv a'mwo abolo kuudo muubweyodupudo tonyuno'gwowi Gooti tool jul'nyogalo aro adubweyokaikono. “Nuu a'mwo abolo su tonyuno surodo nuunodowodo toonyu subuu'yamju aro adubwemono. A'mwo abolo su ton moro iruko mwallo'moneyokwe toru ku'nono maulomwalpinogano.” Gooti tool toro adubweyokaikono. Yogalo su tov nebalokwono. Moosesollu toro kwimo'noka kuvi kuruv iruko mwallo'moneyokwe su to'gwowi aiyoga Gooti tool kwako akavi muudu'no sokwolludapiyoka togada'ai me'no sovrowosokakwono.

⁴ Aki Gooti toolluro yogalo puruv iruko naba 7 tollugwojuno aro sakwollungikokwono. “Gooti tool gamoro yiuwi'nokai womdo tonyu bimwogapino sumaiyokwe iruko naba 7 tollugwoji yiuno iruko to'no amwalokaikono.” Sakwollungikokwono.

⁵ Toro kuvi kuruv Gooti toolluro yogalo puruv aro sakwollungikokwono. “A'mwo abolo su ton moro iruko mujomwekovlaiyo'moneyokwe toru ku'nono maulomwalpinogano.” Sakwollungikokwono.

⁶ Toro te neya duu'nyulo. Aiyogasuro a'mwo abolo ton kuuguudo sugudo tovi me'no kuu'nyajupo su ton Gooti toollu kisuvolo to'no kwiyajupogano. Toro tovino tov gamoro iruko mwallo'moneyokwe su toru ku'nono maulai'movopogano. Toro kuvi kuruv a'mwo abolo puno'gwowi Gooti toolluro iruko mwallo'moneyokwe toru kuvinono noulai'mopinogano.

⁷ Toro tovino tov Gooti tool a'mwo abolo ton gamoro iruko mwallo'moneyokwe toru kuvinono noulomwallo'moneyokwe iruko pullugwojuno me'no ajesokaikono. Iruko ajesoka su tollugwojuno Gooti tool lukomgu manyu togada'ai a'mwo aguto kig Devitolluro mago tovi'aro me'no adokaikono. “Kevu Gooti toolluro yogaimaguurai ikudodowo'jure tovi aga toga neya duu'nyulo. Kevu kuvinono kuu'nupi togaikul kemoro poowokalago ton lumdo noulopipiyo.” Adokaikono. Toro te aga toga Gooti toolluro iruko ajesoka su tollugwoji neya doulomwalogaulo.

⁸ Kuudo neya jaullulo. Joosuuwal a'mwo abolo tonyu iruko mwallo'mo kuunodo tov ku'nono mwiyajukekono. Joosuuwal a'mwo abolo su tonyu kuvinono kwiyowo'jujuko'mno'juki Gooti tool gamoro iruko mwallo'moneyokwe su toru kuullo'mo tovino iruko muuduko pullugwoji majesowo'jujukekono.

⁹ Toro tovino tov Gooti toolluro iruko mwallo'moneyokwe pullugwo kuuno kwoso. Iruko mwallo'mo su toga Sabat pullugwobusukokwono. Toro te Gooti toolluro a'mwo abolo ton iruko mwallo'moneyokwe su to kuvino noulapinogano.

¹⁰ Kuudo neya jaullulo. Gooti tool womdo bimwogapino sumaiyokwe toga iruko amwalokaikono. Toro to'busuko kubalno a'mwo pwol Gooti toolluro iruko mwallo'moneyokwe su toru me'no aulomwalo'ji tool gamoro womdo kun kuruv me'no imwogapiyodowodekono.

¹¹ Toro te nevu iruko mwallo'moneyokwe su toru kuvinono kuullo'moneyokwe tov guureji neya yogawano. Nevu Isuraiyolda'ai a'mwo abolo tonbusuko nobwolorowa'jokwe tovino tov nevu Gooti toollu kisuvolo nuuwimwala'jo.

¹² Neya duu'nyulo. Gooti toolluro yogalo tov aiyo kurukweyokwono. Aki yogalo su tov womdo bwotonyo yodowodokwono. Gooti toolluro yogalo su tov molo'mo kwallu'mopto puul imgu amgu do'nyo do'nyo avairo'nyungiko tousi uuwolovowo'ji a'mwo abolo tonyuro poowokalago tovi juulowosodowodokwono. Kwallu'mopto su toul a'mwo abolo tonyuro suvlo'aru'wago tokwe'aro yogudo tokwe'aro tovallu do'mdowodo to'busuko kubalno Gooti toolluro yogalo tov a'mwo abolo tonyuro kuudo tokwe'aro kuullo tokwe'aro tovallu anakuuto tomuu kuuluuwo'dowodokwono. Gooti toolluro yogalo su tov nemi me'no kuulanekwo'dowodo tovino tov nemoro poowokalago tonyuro yiulkuudo yau'dowa'jure togai'aro nemoro noonyumwonyu pasudo pun yo'mo nekullunodowo'jure togai'aro su tonyu bomollolupto'nosowo'ji janekunyubwo'dowodokwono.

¹³ Aki yiuwi'nokai Gooti toolluro sokwollosoka ton gamoro sumdo tovida'ai yiulo puru'monodo kuruv miyoupuu'na'dupudogano. Toro kuvi kuruv yiuwi'nokai ton Gooti toolluro sumdo tovi yiuno kuu'maiyo toru'no bomollolupto'nosodupudogano. Toro tonyu Gooti tool pi'mwono youroonodowodekono. Gooti su tool nemoro pasudo tonyuno nojainyubworonekono. Toro ajainyubworo'ji toga nevnokwe tonol nemoro pasudo su tonyuno kavlo ton kuu'maiyo toru nododowiyoku'bworosunanonogano.

Jisasol nemi Pris Aguto kuunodo nekullumo'nodowodo tovinokwono

¹⁴ Nemoro Pris Aguto kuunodo tool Gooti toolluro Kwolaiyo Jisasekono. Nemi Pris Aguto su tool Gooti toolluro ago muunyu kai'muu me'no sulomwalokaikono. Toro tovino tov nevu gamino kuudo uubweyodowado su tovi guureji neya agudupolarogawano.

¹⁵ Nemi Pris Aguto su tool nemoro yiuwi'nokai jul'nyo ibwosunodowa'jure tonyuno kuudo me'no youroma'dowodekono. Su tov aro tovinokwono. Yiuwi'nokai nemi me'nonekumokavlaiyo'mo yamju baneki'mo'mdupudo su tooro Jisasol kwollu kuruv yamju aval'no kwiyoganyajupekono. Toro wiyoganodopure kuvi kuruv Jisasolno'gwowi ma'no ma'no pasudo puru'monodo kuruv miyajukekono.

¹⁶ Nemi Pris Aguto Jisasol tono tono sumo'nyajukekono. Toro toolluno tov nevu luko miyowa'ji nemi aguto kig Gooti toollu wobo toru neya aulluru'marogawano. Nevu kuvinono aulluru'mara'ji toga Gooti yasuwa'wino sugumaluko nekullabodowodo su tool nemino kalo nomanekumwonyumwalonekono. Aki jul'nyo pun abaneki'mopi tov nekullo'mwojo'moneyokwe puvino supto sa'ji toga gamoro yasuwa'wino sugumaluko su tovi nokwo yo'mgonoma'mwalanonogano.