Hibruu 3 - Gooti Toolluro Yogalokwono

Jisasol Moosesollu uuwolo'mdowodo tovinokwono

¹ Krais toolluro mi a'mwo abolo avalobuuravoo, muunyu kai'muuda'ai mwalodowodo Gooti tool mi adonumaroka to'busuko kubalno kevu gavnokweyolluro a'mwo abolo kugaikullu kuruv aval'no me'no dekuma'dowodekono. Kevu Jisasolluno kuudo neya jaurogaulo. Su tool Gooti toolluro yogalo tokwe kuurotokwe imo'nodowodekono. Aki toro tool nemi pris aguto nonekullumo'nodowodekono. Aki toro toolluno kuudo uubweyodowado tonol gamino kuu'maiyo toru'no dodowiyoku'bworosodowadekono.

² Aiyoga Moosesol Gooti toolluro a'mwo abolo gami ago to'busuko wimo'nodupudo tonyu kwiyo'mwojajuko toga womdo pi'mwono amjumovlaiyajukekono. Su toro to'busuko kubalno Jisasol gami ajesoka Gooti toolluro yiuwi'nokai womdo tovi pi'mwono to'no guureji amjumovlaiyajukekono.

³ Toro te kevu neya duu'nyulo. A'mwo pworo ago punyuno ilomodomoropiyodapudo kuvi kuruv a'mwo ago su tovi amodo'ji toolluno yovo to'gwowi sulomodomoropiyapi su tovi nuuwolowonokwono. Su toro to'busuko kubalno a'mwo abolo pun Moosesolluno ilomodomoropiyodapudo kuvi kuruv Jisasolluno yovo tovi sulomodomoropiyapi su to'gwowi neya uuwolo'mwalonokwono.

⁴ Yiuwi'nokai ago go'no go'nodo ton a'mwo pworavuro ato tokwe mododupudogano. Toro kuvi kuruv yiuwi'nokai noonyumwonyu tonyu sokwolludapingiko kuunodo toolno'gwowi yiuno Gooti toolnodokwono.

⁵ Moosesol Gooti toolluro a'mwo womdokwe sumo'nyajukekono. Toro tool Gooti toolluro a'mwo abolo gami ago to'busuko wimo'nodupudo tonyu pi'mwono amollomwallajukekono. Su tov Gooti toolluro yogalo ton gami a'mwo abolo tonyu lukomgu wuujo'moneyokwe su ton Moosesol ma'dowo a'mwo abolo tonyu yiuno kuu'maiyo toru'no kuvinono adodoluwosajukekono.

⁶ Toro te Moosesekwo Gooti toolluro ago to'busuko wimo'nodupudo a'mwo abolo su tonyuro womdokwe kwimo'nyajukekono. Toro kuvi kuruv Krais toolno'gwowi ago amodoka toolluro kwolaiyo kuunodekono. Toro tool Gooti toolluro ago to'busuko wimo'nodupudo a'mwo abolo tonyu pi'mwono to'no guureji mollomwalodowodekono. Neya duu'nyulo. Nevu Krais toolluno guureji neya agudupolarogawano. Aki nevu Krais toolluro nonekullabwono tonyuno sogwollo to'no aingovlavogawano. Nevu su toro sa'ji tov Gooti toolluro ago to'busuko kuvinono wimo'nugovla'mwalanonogano.

A'mwo abolo Gooti toollu kisuvolo kwiyajupo ton gamoro iruko mwallo'moneyokwe toru ku'nono maulomwalopo tovinokwono

⁷ Nevu Gooti toolluro a'mwo abolo tonol Gooti toolluro Kuullo tool nekudowodo'jure tovi neya uumjunogawano. Gooti toolluro Kuullo su tool aro dodowodekono. “Aga toga kevu Gooti toolluro yogaimaguurai ikudodowo'jure tovi kuu'nupi tov

⁸ kemoro poowokalago ton lumdo noulopipiyo. Aiyoga kemi tellukweyago ton kwako a'mwomaiyo yalukullo toru yamju wiyoganoduke toga kisuvolo kwiyajupo tonbusuko nyumwalpiyo.”

⁹ Aki Gooti tool aro ikudodowodekono. “Aiyoga kemi tellukweyago su ton kwako a'mwomaiyo yalukullo toru moro duuwallo jurogudo sajo tonyu wonyuno wonyuno yo'mno 40-pela kworomo tobuul kuuwolo'nokagano. Moro duuwallo jurogudo su tonyu me'no kwonyajupo kun kuruv moro jurogudo tovi yamju kuuno kwiyoganyajupogano.

¹⁰ Su toro yanyugolodopure tovino tov nuu a'mwo abolo su tonyuno surodo nuunodowo aro ajajonyugono. A'mwo abolo su ton kemoro poowokalago togai mi buulo anuugunyumopiyajupogano. Aki moro puuto tovi neya uumjunpureyokwe yogalo wuudodore tovi kuvinono muumjunyajupogano.

¹¹ Su toro yodopure tovino tov nuu surodo nuunodowo jul'nyogalo uubweyo'moneyokwe subuu'yamju aro aduuwiyonyugono. Nebal'no ikudumo'mokwono. A'mwo abolo su ton moro iruko mwallo'moneyokwe kwako Kenan toru ku'nono maulapinogano. Aduuwiyonyugono.”

¹² Toro te miyobuuravoo, kevu wako neya dou'nogaulo. Kevnokweyogaikulluro poowokalago ton kirovanyuvanyu kuudo tooro noullo'movaikwopimwalpiyo. Aki kemoro poowokalago su togai Gooti toolluno kuudo uubweyodupudo tovi nomolluduvolmwalpiyo. Aki kemoro poowokalago su ton Gooti aiyokwe toollu buulo uugunyumopiyo'moneyokwe nomollubworekumokavla'mwalpiyo.

¹³ Toro kuvi kuruv yiuwi'nokai iruko tollovaino, “Oo anuugwo toga'deyo,” su toro kuuno adupi toga kevnokwe togaikul imgu amgu jurogudo aro neya doduuwimwoju'nogaulo. Ma'no ma'no pasudo tovuro youkuu'naikudodowo'jure tovida'ai kevu yiuwi'nokai togaikul Gooti toollu dogaipo'nyo kuumwiyo nuuwimo'numwalpiyo.

¹⁴ Kuudo neya jaullulo. Nevu Krais toolluno kuudo muudu'no kuubweyowo toga guureji agudupolarowo to'busuko kubalno aga kuga kuruv aval'no agudupolarogawano. Nevu Krais toolluno gudupola'no gudupola'no yowa'ji yiuno aiyowo'mo toga'no agudupolara'ji tov yiuwi'nokai Gooti toolluro nonekullabodowo'jure tonyu Krais tooke ne kunol kuruv aval'no nomaranonogano.

¹⁵ Toro tovino Gooti toolluro yogalo puruv aro sakwollungikokwono. “Aga toga kevu Gooti toolluro yogaimaguurai ikudodowo'jure tovi kuu'nupi tov kemoro poowokalago ton lumdo noulopimwalpiyo. Aiyoga Isuraiyolda'ai ton kisuvolo kwiyajupo to'busuko kubalno kev kugaikul kuruv aval'no nyumwalpiyo.” Sakwollungikokwono.

¹⁶ Kevu kuudo pun jaullulo. A'mwo abolo Gooti toolluro yogaimaguurai tovi wuu'no'mno kisuvolo kwiyajupo su ton ala'mwovodukono? A'mwo abolo su ton Moosesol kwako Ijupda'ai abomokalokwoka togano.

¹⁷ Aki a'mwo abolo su ton Gooti toollu surodo i'gwolno i'gwolno yo'mno 40-pela kworomo tobuul kuuwolo'nokagano. A'mwo abolo ma'no ma'no pasudo sajupo su tonyuro kulako bwiyo ton kwako a'mwomaiyo yalukullo toru kwollajupogano.

¹⁸ Aki a'mwo abolo su tonyu Gooti tool jul'nyogalo duubweyo'moneyokwe subuu'yamju aro kwiyokaikono. “Kevu moro iruko mwallo'moneyokwe kwako Kenan toru ku'nono maulapinogaikikono.” Aduuwiyokaikono. Nebalokwono. A'mwo abolo su ton Gooti toollu kisuvolo kwiyajupogano.

¹⁹ Toro te nevu aro kuudo souroma'mwakuuwono. Oo a'mwo abolo su ton Gooti toolluno kuudo muubweyajupo tovino tov gamoro iruko mwallo'moneyokwe toru maulapodeyo. Kuudo souroma'mwakuuwono.