Hibruu 2 - Gooti Toolluro Yogalokwono

Gooti toolluro anekullo'mwojoka tovi nevu muu'nyubusuko to'no nyumwala'jokwe tovinokwono

¹ Gooti toolluro Kwolaiyo tool ensel toorai me'no kuuwolovokaikono. Toro toolluno nevu nebal'no yogalo me'no kuu'nowo tovi kaveno to'no nogudupola'mwala'jo. Toro kunol kuruv nebal'no yogalo su tovi nuugollu'mo'mwala'jokwe guureji neya avorugwo'mo'narogawano.

² Neya duu'nyulo. Aiyoga Gooti toolluro loowo tov ensel toorai'aro nemi nellukweyago toorai kwiyopokwono. Loowo su tov jurogudo adaiyajukokwono. Aki a'mwo abolo ton loowo su tovi yiuwi'nokai kisuvolo wiyodopure toga kemoro ma'no ma'nodo tovuro kirumwallo tov yiuno'no amallajupogano.

³ A'mwo abolo loowo tovi kisuvolo kwiyajupo ton kirumwallo tovi su toro amallajupogano. Loowo su tov jurogudo adaiyajuko kuvi kuruv Gooti tool nemi ma'no ma'nodo tovuro kirumwallo tovida'ai nobomollurolovonekumokalokwono tovino yogalo to'gwowi aguto kuunodokwono. Toro tovino tov yogalo su tovi nevu muu'nyubusuko to'no nyumwala'jo. Nevu yogalo su tovi muu'nyubusuko to'no sa'ji tov kirumwallo tovi mirukuruwolowanonogano. Kuuguudo su tovino muudu'no amoruudoka tool yiuno Aguto toolnodokwono. Aki lukomgu kuuguudo su tovi a'mwo pworo me'no kuu'nyajuporogano. Toro kuu'nyajupo su tooro aro anekujajuporogano. “Oo Aguto toolluro kuuguudo adoka tov yiuno nebal'nodokwono.” Anekujajuporogano.

⁴ Su toro nekudodopure toga nevu kuuguudo su tovino, “Nebalo'mdeyo,” jo'moneyokwe tov Gooti kwol kuruv kuu'maiyo toru'no adodoluwosajukekono. Toro adodoluwosajuko su ton arogano. Duuwallo jurogudo togai'aro morumoukuropiyo'moneyokwe womdo togai'aro nobollo judo'no judo'nodo tonyu sukullajuko togai'aro Gooti toolluro Kuullo toolluro noonyumwonyu kwiyajuko togai'aro ton adodoluwosajukekono. Kuullo toolluro noonyumwonyu kwiyajuko su ton Gooti gavnokwe toolluro ilaiyo winoduke tovi uumjunodowo anekumwodeyajukogano. Toro te Gooti toolluro kuuguudo tovino nevu, “Nebalo'mdeyo,” jo'moneyokwe tov gavnokwe tool kuu'maiyo toru'no su toro adodoluwosajukekono.

Jisasol nemi nekullo'mwojo'moneyokwe kuunodo sumo'noka tovinokwono

⁵ Lukomgu kwako muuduko imo'nono tovino kuudo neya yaurogawano. Kwako muuduko su tovi mido mollomwallo'moneyokwe womdo tov Gooti tool ensel toorai muubweyokaikono.

⁶ Gooti toolluro yogalo sakwollungiko puruv aro dodoluwosodowodokwono. “Gooti tooku nevu yiuwi'nokai a'mwo abolo yasuwa'nodo tobuuronolluno kuudo yau'dumdekugono. Aki nemida'ai a'mwo yasuwa'nodo pwekwojuno pi'mwono mollomwalodumdekugono.

⁷ Gumoro sokwollosodo tovida'ai a'mwo su tekwo ensel toorai kwako tomuu'aro kula'nyo toga'gwono suwapiyokaikono. Aki guvnokwekujuro jurogudo tovuro bako tov gami uuwodowodokwono. Aki guu gami yovo aguto tov wiyododumdekugono.

⁸ Aki a'mwo su tekwo yiuwi'nokai tonyu mido mollomwalmwalono'moneyokwe guu yiuwi'nokai su tonyu gami dolago tomuu amorubweyodekugono.” Gooti toolluro yogalo puruv su toro sakwollungikokwono. Nebalokwono. Gooti tool yiuwi'nokai ton malluno sumaiyokwe a'mwo su tekwojuro dolago tomuu me'no amorubweyokaikono. Aki puru'monodo kuruv a'mwo su tekwojuro dolago tomuuda'ai kwa'mgu tomuu mwoso. Toro kuvi kuruv aga nevu a'mwo su tekwojuro mido mollomwalo tovi yere mwonmwakuuwono.

⁹ Toro mwonmwakuuwo kunol kuruv me'no wonodowado toolluno yovo to'gwowi Jisasolekono. Toro toollu Gooti tool malluno sumaiyokwe ensel toorai kwako tomuu'aro kwolomorumwallokaikono. Toro wolomorumwalloduke tovino tov Jisasol kula'nyo toga'gwo ensel toorai kwako tomuu'aro suwapiyokaikono. Su tov aro tovinokwono. Gooti toolluro yasuwa'wino sugumaluko su tovi'aro Jisasol yiuwi'nokai a'mwo abolo tonolluro kirumwallo tovi aiko toru mallo'moneyokwe abolokaikono. Toro tool nemiyo'moneyokwe bolnodo tovuro dado tov me'no subwosunoka tovino tov aga'no'gwowi Gooti tool Jisasollu muunyu toru'aro me'no ilomorumwallodowodekono. Toro ilomorumwallodowodo su tool Gooti toolluro jurogudo tovuro bako tov pwopiyowodekono. Aki toro toollu Gooti tool yovo aguto wiyodowodekono.

¹⁰ Gooti tool yiuwi'nokai ton gamiyo'mo sokwollosokagano. Aki yiuwi'nokai ton yiuno Gooti toolluro ato tovida'ai to'no sumo'nopogano. Gooti su tool gamoro kwoloraiyo kwimo'nupi bwotonyago tobuurai gamoro ago muunyu kai'muuno mokaillo'moneyokwe kwinokaikono. Toro tobuurai ma'no ma'nodo tovuro kirumwallo tovida'ai bomollurolovomokalokwiyo'moneyokwe Jisasol dado ibwosunoduke toga Gooti tool wonyapino to'no sokaikono. Jisasol dado subwosunoka su tovi'aro mollurolovomokalokwiyo'mo womdo su tov amolludovokaikono. Toro te a'mwo abolo tobuurai kuvinono bomollurolovomokalokwono su tool yiuno dado subwosunoka Jisasol kwol kuunogano. Gooti toolluro kwinyajuko su tovi Jisasol kuvinono sopiyokaikono.

¹¹ Toro te Jisaseke'aro Gooti toolluro a'mwo abolo kuunodo wimo'nyo'moneyokwe mollumo'nosodowodo togai'aro yiuwi'nokai su tonyuro Kuunumiyago tool yiuno Gooti pwolnodo tookono. Toro tovino tov Jisasol Gooti gavnokwe toolluro a'mwo abolo kuunodo su tobuuraino, “Mi nyugwai'yagoruvavo nyo'mwovavo,” wuujo'mo tovino wogulo mibwosunodowodekono.

¹² Su toro tovino Jisasol Gooti toollu aro kuudokaikono. “Oo mi nyugwai'yago nyo'mwo su tobuurai gumino yovo tov kuu'maiyo toru'no moruudumwalmonyugono. Aki toro tobuuro gumino ilomogwopiyo'mo i'bwo'nodopure toga nuu kwonyu kuruv akuuto toru kuullu'bwo'numwalo'mi gumino ilomogwopimwolamonyugono.” Kuudokaikono.

¹³ Aki Jisasol yogalo puruv aro adokaikono. “Nuu Gooti toolluno kuudo uubwemwalmonyugono.” Aki yogalo puruv aro adokaikono. “Neya duu'nyulo. Nuu Jisasonyu a'mwo abolo Gooti toolluro nyabodowodo su tobuurogai nomwalmwalmonyugono. Toro tobuuro moro kwoloraiyo tobuurobusuko nyumo'numwalpinobuurogano.” Adokaikono.

¹⁴ Gamoro kwoloraiyo tobuurobusuko su ton a'mwo abolo kulakokwe kuunodo imo'nodupudogano. Toro tovino tov Jisasol kwol kuruv a'mwo kulakokwe kuunodo sumo'nokaikono. Jisasolluro su toro sumo'noka tovino kavlo tov arokwono. Yiuno a'mwo kuunodo toolno nokwo bolonekono. Aki Jisasolluro abolo'ji tovi'aro bolnodo tovuro jurogudo tovi mwora'dowodo Satanyollu kaiyako nomollounapiyonekono.

¹⁵ Aki a'mwo abolo ton yiuwi'nokai toga bolnodo su tovino luko mujumelabodupudogano. A'mwo abolo su tobuuro kula'nyo mwalodopure togada'ai luko yo'mo kuudo su tovi ki'nato womdo to'busuko wimelabodupudobuurogano. Toro tobuurai bomollurolovomokalokwiyo'moneyokwe tovino Jisasol abolokaikono.

¹⁶ Nevu aro kuudo me'no yau'dowadonogano. Jisasol ensel toorai wiyo'mwojo'moneyokwe kwolabokalmaiyo. Toro kwol kuruv Eburaiyamolluro kwikweyago tobuuraino'gwowi wiyo'mwojo'moneyokwe kwolabokaikono.

¹⁷ Toro tovino tov Jisasol gami gagwai'yago jo'mwo tonyu wiyo'mwojo'moneyokwe su tonbusuko aval'no neya imo'nonekono. Toro tool su tonbusuko kuvinono me'no sumo'nokaikono. Su tov aro tovinokwono. Jisasol pris aguto nonekullumo'numwalono tovinokwono. Pris aguto su tool nemino kalo manekumwonyodowodo tovida'ai Gooti toolluro womdo tovi pi'mwono yomjumovla'mwalonekono. Pris aguto su tool womdo aro tovi imwalonekono. A'mwo abolo tonyuro ma'no ma'nodo tovuro kirumwallo tovi modukwopimwalonekono.

¹⁸ Neya duu'nyulo. Jisasol Satanyolluro yamju wiyoganoduke tonyuda'ai jul'nyo pun me'no subwosunyajukekono. Toro me'no subwosunyajuko tovino tov a'mwo abolo pubuuro Satanyolluro yamju wiyoganodowo'jure tobuurai nokwo wiyo'mwojumwalonekono.