Hibruu 12 - Gooti Toolluro Yogalokwono

Nevu Jisasollu bekonarowa'ji kuudo neya uubwemwalano tovinokwono

¹ A'mwo abolo bwotonyago Gooti toollu kuudo kuubweyajupo su ton sulu'wo to'busuko nemi aiyowomno mwodovonekuma'dupudogano. Kemoro kuudo kuubweyajupo su tov nemi kuu'maiyo toru'no me'no nekuduuwallodupudo tovino tov nevu resis tovibusuko guureji neya yogawano. Nevu resis tovi yo'mo tonol noonyumwonyu pworo nemi nekumjukuto yodupudo toorogai'aro aki ma'no ma'no pasudo nemi nekumgu'mo'nodupudo toorogai'aro su toorai neya arobwotovodukwopiyogawano. Me'no robwotovodukwopiyowa'ji nevu resis tovi kano kano plaiyo'moneyokwe puuto tov nemi sumdollu toru wo'dowodo su tovi neya ainomjumovlavogawano. Puuto su tov Gooti toolluro anekuduuwalloka su tovi'aro guureji neya uumjungovlavogawano.

² Aki toro tonol a'mwo pwol resis tovuro aiyo'wo tomgu kinamjodowodo to'busuko kubalno nevu yiuno Jisasolluno bekonarowa'ji neya ainomjumovlavogawano. Nemoro kuudo uubweyodowado tov yiuno Jisasolluno to'no porugwo'mo'na'dowodokwono. Aki lukomgu yiuno Jisasolno Gooti toolluro ago muunyu kai'muuno nekumokailawonekono. Jisasol aro kuudo me'no souromarokaikono. Oo nuu aiyowo'mo toru ai'mo'mi toga ilaiyo bwotonyo tov noma'monyudeyo. Toro tovino tov mi sumdollu toruda'ai puuto wo'dowodo tovi guureji neya ainamjumo. Kuudo me'no souromarokaikono. Toro souromaroka tool nokwo wonyapino to'no yoduke toga a'mwo kaiya'nodo tooro galomworaro'mno i'noguropte tovi amovoromiyoguroptowosopekono. Aki toro tool aro kuudo miyaullajukekono. Nuu i'noguropte tovi abolmi toonyuno yovo tov nobwolomonumwogapiyapinonyudeyo. Su toro tovino kuudo miyaullajukekono. Toro te Jisasol resis tovi me'no uuwolo'mno sumaiyokwe Gooti toolluro sia kig tovi anato toru sulomwalokaikono. Toro ilomwalno sumaiyokwe aga kuga kuruv kuuno mujomwekovla'mdowodekono.

Gooti tool nemi nekullo'mwojo'moneyokwe kuudo nekuuteyodowodo tovinokwono

³ Kevu Jisasolluno kuudo neya jaurogaulo. A'mwo ma'no ma'nodokwe tooro Jisasollu ikomago pasudo igolodopure kuvi kuruv Jisasolno'gwowi Gooti toolluno to'no avorugwo'mo'nallajukekono. Kevu su toolluno kuudo neya jaurogaulo. Su tov aro tovinokwono. Kevu Gooti toollu guureji uumjungovlaiyo'moneyokwe tovino burawo nyumwalpiyo. Aki kemoro poowokalago togai kuruwiyo to'busuko nobolmovla'mwalpiyo. Su toro tovinokwono.

⁴ Aki kevu ma'no ma'no pasudo toorai uuwoleyo'moneyokwe molo gwai'nodupudogaikikono. Toro kuvi kuruv molo su tovida'ai kemoro mujako tov yere mabwolodawodokwono.

⁵ Gooti tool kevu gamoro kwoloraiyo togaikullu daikumul'mwojo'moneyokwe yogalo puruv me'no sokwollaikubweyokaikono. Yogalo su tovino kevu kuudo me'no sallulo'gwonmwakopogaikikono. Yogalo su tov arokwono. “Mi kwoloraiyobuuravoo, neya duu'nyulo. Aguto toonyuro yogalo modaikurugolodo'mure tovino kevu aro nodumwalpiyo. “Oo su tov kula'nyokwono.” Nodumwalpiyo. Aki Gooti toonyuro kuudo ikuuteyodo'mure tovino kevu biyolo muu'mwojupinono.

⁶ Gooti toolluro su toro adoka tov aro tovinokwono. Aguto tool yiuwi'nokai a'mwo abolo kalo buuropino winodowodo tobuurai yogalo mojurugollokwekono. Aki yiuwi'nokai kwoloraiyo gamiyo'mo molloma'dowodo tobuurai kuudo wuuteyokwekono.” Gooti toolluro yogalo tov su toro sakwollungikokwono.

⁷ Kevu jul'nyo amapi toga jurogudo neya dodavogaulo. Jul'nyo su ton Gooti tool kemi kuudo ikuuteyo'moneyokwe ma'dupudogaikikono. Gooti toolluro kemi su toro yaikullugolodowodo tov a'mwo pwol gami kwoloraiyo tobuurai igolodowodo to'busukokwono. Yiuwi'nokai kuunumiyago tooro kemi kwoloraiyo kuunodo tobuurai kuudo wuuteyodupudorogano.

⁸ Aki Gooti tool gamoro yiuwi'nokai kwoloraiyo tobuurai kuudo wuuteyodowodekono. Toro te Gooti su tool kemi kuudo maikuuteyo'ji tov aro tovino kuu'maiyo bomollolupto'nosonokwono. Gooti tool kemi Tellunumiyago maikullumo'nodowodekono. Aki kevu Gooti toolluro kwoloraiyo kuunodogaikulmaiyo. Su toro tovino kuu'maiyo toru'no bomollolupto'nosonokwono.

⁹ Toro te kuudo pun jaullulo. Nemoro kwako akavida'ai nellunumiyago tekwojo kuudo nekuuteyodopure kworai kuruv nevu kemoro dolago tomuu ilaiyo amwallajuuwonogano. Su toro to'busuko kubalno nemi muunyu kai'muuda'ai Nellunumiyago kwollu kuruv dolago tomuu guureji neya kuulomwalmwalanonogano. Gooti su tool nemoro kuullo tobuurai Kuunumiyago wimo'nodowodekono. Toro toollu nevu dolago tomuu kuulomwalodowado tovi'aro aiyo mujomwekovlaiyo'moneyokwe tov noma'mwalanonogano.

¹⁰ Nemoro kwako akavida'ai nellunumiyago tooro kevnokweravuro pi'mwo kuudo tomgu'aro uumjunodupu yiuno kula'nyo toga'gwono kuudo anekuuteyajuporogano. Toro kuvi kuruv Gooti toolluro kuudo nekuuteyodowodo to'gwowi yiuwi'nokai toga nemi ilaiyo to'no nekullo'mwojokweyokwono. Nevu Gooti gavnokwe toolluro pasudo tonyu neya amolludowaneyokwe tovino Gooti tool nemi kuudo nekuuteyodowodekono.

¹¹ Toro te Gooti su tool gamoro kwoloraiyo tonollu kuudo anekuuteyo'ji toga'gwono nevu ilaiyo mibwosunowa'ji jul'nyo to'no ibwosunodowadonogano. Toro kuvi kuruv lukomgu toga'no'gwowi sulo ne'nonokwono. Sulo ki'nono su tov arokwono. Gooti tool gami kwoloraiyo pubuurai kuudo me'no kuuteyo'ji toga su tobuuro sumwoluko kavo wosunmwalpinogano. Aki toro tobuuro pasudo idopto'nodo tollovai molludo'movla'mwalpinobuurogano. Sulo su tov toro ki'nonokwono.

Nevu jurogudo neya da'mwalano tovinokwono

¹² Kevu wollainyo imo'nodupudo togaikullu Gooti tool jurogudo yogullumwojekwapiyo'moneyokwe kuudo ikuuteyodowodekono. Jurogudo kuvinono sumo'nupi togaikul kemi ato togai guureji neya dogudupolarogaulo. Aki suvlo togai jurogudo neya dodavogaulo.

¹³ Aki kemi suvlo togai puuto idopto'nodo tovino to'no neya duumjunogaulo. Kevu kuvinono kuumjunpi tov a'mwo suul nomuullugollokwe pwolbusuko mimo'nupinogaikikono. Toro kuvi kuruv pugaikul kemoro poowokalago ton suul nomuullugollokwe pwolbusuko sumo'nupi su togaikulno'gwowi aiko te ikulnopi puuto idopto'nodo tovi neya duumjunogaulo.

¹⁴ Kevu yiuwi'nokai a'mwo abolo togai sumwoluko noullo wosunyo'moneyokwe tovino womdo neya jogaulo. Aki kevu Gooti gavnokwe toolluro sugupasudo tollovai mujumovlaiyo'moneyokwe womdo neya jogaulo. Gooti gavnokwe toolluro sugupasudo su tollovai a'mwo pwol nonaguto sumo'no'ji su toolno'gwowi Aguto toollu ku'nono mwononekono.

¹⁵ Kevu aro tonyuno wako neya dou'nogaulo. Kemida'ai yiuwi'nokai pwolno puru'monodo togaikul Gooti toolluro yasuwa'wino sugumaluko su tovi buulo nuugunyumopimwalpiyo. Aki kevu aro to'busuko nyumo'numwalpiyo. Puluko puruv kwako tovi anakuuto tomuu wo'dowodo tov sodolo billurovowo'ji iru'wuullokwe sulo tov ki'nonokwono. Su toro to'busuko kubalno kemida'ai a'mwo abolo pun sulo kaiya'nodo to'busuko iru'kuudo tooro abillumo'nupi tov kemi akuuto toru jul'nyo pworo nekullumo'nupiyo. Aki su toro abillumo'nupi tovida'ai a'mwo abolo bwotonyago tonyu kaiyako nomollugolamowo'jo.

¹⁶ Aki kemida'ai pwolnodo kwol kuruv kwonyalo pasudorodeyo oo Gooti toolluda'ai mabodupudo pasudo toorai mamolludo'movlapiyo. Pasudo su toorai amolludo'movlaiyajuko Isoo'wolbusuko nyumo'numwalpiyo. Aiyoga Isoo'wol wosamujuko yiuno puru'monodo toga nonyo'moneyokwe tekwogai gami ganumiyago toolluro kuto ivito yiuwi'nokai lukomgu nomarono ton gami gagwai'yago Jekoopollu sodolovomarokaikono.

¹⁷ Kevu kuudo me'no yau'dupudogaikikono. Isoo'wol gami ganumiyago toolluro yogalo sugudo tov neya adanubweyoneyokwe tovino'mo wosamujuko tekwogai me'no sodolovomarokaikono. Toro yodolovoma'no sumaiyokwe lukomgu ganumiyago toolluro yogalo sugudo tovi adanubweyoneyokweyo'mo abuudoganokaikono. Toro kuvi kuruv gami ganumiyago tool, “Awiyo,” kuudokaikono. Su toro toga Isoo'wol kumdato bwotonyo do'no gami ganumiyago toollu wuudoganyuno wuudoganyuno sokaikono. Toro kuudoganoka kuvi kuruv kuudo muuduko youragunyumo'nyo'moneyokwe toga me'no abawokakwono.

Nevu muunyu kai'muuda'ai wagwolago Jeruusalem tovi me'no kuulai'mo'mdowado tovinokwono

¹⁸ Kevu kwako akavida'ai muumuudo pwol ato togai yowa'no uubogai'nyokwe pwollomno abumwakopogaikulmaiyo. Neya duu'nyulo. Aiyoga Isuraiyolda'ai ton muumuudo Sainai toollu wobo toru abopo toga duko bwotonyo noduke tovi kwonopogano. Aki sulu'wo dugumdo tov bwolobu'duvoloma'duke tovino tov dugumwuulo aimwonyopiyokakwono. Aki dolo bwotonyo tovi kwonopogano.

¹⁹ Aki biugel tov guureji kirapiyoduke tovi au'naropogano. Su toro toga Gooti tool Isuraiyolda'ai a'mwo abolo tonyu kuuguudo wuudoduke tovi kuu'nopogano. Toro wuu'nyuno sumaveyokwe Isuraiyolda'ai a'mwo abolo su ton Gooti toollu duumjukullo'moneyokwe Moosesollu guureji kuudoganopogano.

²⁰ Gooti toolluro yogalo jurogudo aduuwiyoka su tovi ilaiyo mamollomaropo tovino tov Gooti toollu duumjukullo'mo kwinopogano. Gooti toolluro yogalo aduuwiyoka su tov arokwono. “A'mworodeyo oo ibesa'aiyorodeyo kworo kuruv muumuudo akallu kuubogai'nupi toorai sulo togai neya doluvoromiyosulo.” Aduuwiyokaikono.

²¹ Toro te Isuraiyolda'ai su ton Gooti toolluro jurogudo kuuduuwalloka su tonyuno luko bwotonyo amorumoukuropiyopogano. Aki su toro toga Moosesol kwol kuruv luko soka tovino tov aro adokaikono. “Nuu luko bwotonyo yodum bu'buto to'no sumwakono.” Adokaikono.

²² Kevu muumuudo su toollu abai'mo'mwakopogaikulmaiyo. Toro kuvi kuruv kevu muumuudo Saiyoon toolluno'gwowi wobo toru me'no abai'mo'mwakopogaikikono. Aki kevu Gooti aiyo mwallokwe toolluro wagwolago Jeruusalem kuvi kuruv bai'mo'mdupudogaikikono. Wagwolago su tov muunyu kai'muu wo'dowodokwono. Su tomuu tausen tausen ensel tooro i'bwo'nomwalodupu ilaiyo yodupudorogano. Toro i'bwo'nomwalodopure su toorai wobo toru kevu me'no bai'mo'mdupudogaikikono. Aki a'mwo pwolnodo kwol kuruv yiuwi'nokai ensel bwotonyago su toorai ku'nono majagilonekono.

²³ Aki kevu Jisasolluro a'mwo abolo togaikul Gooti toolluro kwoloraiyo sujuraiyo tonbusuko wimo'nodupudogaikikono. Toro togaikul Gooti toolluro ago muunyu kai'muu gamoro kwoloraiyo sujuraiyo tobuuro i'bwo'nomwalodupudo toru me'no bai'mo'mdupudogaikikono. Aki Gooti tool gamoro ago muunyu kai'muu tovi anakuuto tomuu kwoloraiyo sujuraiyo su tonyuno yovo tov me'no sokwollosokaikono. Aki toro togaikul Gooti gavnokwe toollu wobo toru me'no bai'mo'mdupudogaikikono. Gooti su tool yiuwi'nokai a'mwo abolo tonyu kooti yogalo jainyubwo'dowodo tookono. Aki kevu a'mwo abolo Gooti toolluro sumdo tovi sugudo me'no wimo'nodupudo tobuuravuro kuullo tonyu wobo toru me'no bai'mo'mdupudogaikikono.

²⁴ Aki kevu Jisasollu wobo toru me'no bai'mo'mdupudogaikikono. Jisasol nevu Gooti toollu wobo toru momuugurovonekubweyo'moneyokwe subuu'yamju muuduko tovi jurogudo imwojodowodekono. Aki kevu Jisasolluro mujako abwoloka tovi wobo toru me'no bai'mo'mdupudogaikikono. Jisasolluro mujako abwoloka su tovida'ai yogalo dodoluwosodowodo to'gwowi Ebelolluro mujako abwoloka tovida'ai yogalo dodoluwosodowodo tovi kuuwolovokakwono.

Nevu wako neya kuu'numwalano tovinokwono

²⁵ Kevnokwe togaikul wako neya dou'nogaulo. Gooti tool kemi yogalo ikudodowo'jure toollu kisuvolo to'no nuuwimwalpiyo. Neya duu'nyulo. Aiyoga kwako akavi Moosesol Gooti toolluro duudapi yogalo tokwe moruudoduke tovi Isuraiyolda'ai a'mwo abolo ton kisuvolo kwiyajupo toga kuudo wuuteyo'moneyokwe tovida'ai mabirolo'nugolokwiyajupogano. Gooti tool Moosesollu uuwolo'mdowodekono. Toro te aga kuga kuruv Gooti tool gami ago muunyu kai'muuda'ai duudapi yogalo nekudodowo'jure tovi nevu kisuvolo kwiya'ji tov muunyu toru'aro guureji kuudo nonekuuteyonekono. Toro tovida'ai ne kunol kuruv ku'nono mabirolo'nugolokwanonogano. Toro te nevu Gooti toolluro yogalo nekudodowo'jure tovi kisuvolo nuuwiya'jo.

²⁶ Aiyoga Isuraiyolda'ai a'mwo abolo ton muumuudo Sainai toollu wobo toru abomwalopo toga Gooti toolluro yogaimaguurai doduke tovida'ai kwako tov yaudo yaudo sokakwono. Toro kuvi kuruv aga Gooti tool subuu'yamju aro to'gwowi me'no adokaikono. “Nuu puga kwako akavi aki aiko te yaudo yaudo nomourokurumwogapimonyugono. Su toro toga'no'gwowi sulugumdo tokwe'aro kwako tokwe'aro yiuwi'nokai tovallu nomourokurumwogapimonyugono.” Adokaikono.

²⁷ Yogalo aro tov, “Puga aki aiko te nomourokurumwogapimo,” adoka su tov aro tovino nekuduuwallo'mokwono. Gooti tool gamoro sokwollosoka tonyu me'no amourokurumwogapiyo'ji toga yiunokuudo nomodukwopiyonekono. Me'no amodukwopiyo'ji toga yiuno yaudo yaudo minodupudo puno kuuno wo'mwalpinogano.

²⁸ Aguto kig Gooti toolluro mido mollomwalo tovi nomarano su tov yaudo yaudo minonokwono. Yiuno jurogudo to'no adapsuko tovino tov Gooti toollu, “Nenoloo,” neya wuudumwalanonogano. Toro tonol Gooti toollu kwako tomuu'aro wiyowa'ji aki gamino luko wiyowa'ji neya ilomoropimwolowanonogano. Nevu su toro tomgu'aro sulomoropiyowa'ji tovino Gooti tool ilaiyo winyokwekono.

²⁹ Nevu Gooti toollu kwako tomuu'aro wimwalano tovino kavlo tov arokwono. Nemi Gooti su tool aro to'busukekono. Duko puruv yiuwi'nokai noonyumwonyu kaiya'nodokwe tonyu yiunokuudo monopiyodowodo to'busukekono. Toro toolluno tov nevu Gooti su toollu kwako tomuu'aro neya wiyogawano.