Hibruu 11 - Gooti Toolluro Yogalokwono

Gooti toollu kuudo uubweyodowado tovino kavlo tov kuu'maiyo bomollolupto'nosodowodo tovinokwono

¹ Gooti toollu kuudo uubweyo'moneyokwe pasudo tovino neya duu'nyulo. Gooti toollu kuudo uubweyodowado tov kavlo aro tovallunokwono. Gooti toolluro subuu'yamju sogwollo kinodowado tonyuno kuudo yau'dowadonogano. Oo kuvinono nyumo'nupinodeyo. Aki kavlo puruv Gooti toolluro noonyumwonyu nonekullabwono tonyu mwonodowado kuvi kuruv aro kuudo yau'dowadonogano. Oo kuvinono, nomaranonoldeyo. Su toro kuudo yau'dowado tovi guureji to'no gudupola'dowadonogano.

² Kuudo pun jaullulo. Aiyogasuro a'mwo abolo tobuuro Gooti toollu kuudo kuubweyajupogano. Kuudo su toro uubweyodopure tovi'aro to'no Gooti tool ilaiyo amollomallajukogano.

³ Nevu Gooti toollu kuudo uubweyodowado tovi'aro kuudo youroma'dowadonogano. Yiuwi'nokai kwako tokwe sulugumdo tokwe tovallu wo'dupudo ton Gooti toolluro yogalo tovida'ai ajokwollosoka ton sumo'nopogano. Noonyumwonyu wonodowado su ton yiuno gamoro yogalo mwonodowado tovida'ai to'no ajokwollosokagano.

Ebelol Inookol Noowal tooro Gooti toollu kuudo kuubweyajupo tovinokwono

⁴ Aiyoga Ebelol Gooti toolluno kuudo kuubweyajukekono. Toro kuubweyajuko su tovi'aro gamoro Gooti toollu kwiroudapiyoka tov Kenolluro kwiroudapiyoka tovino'gwowi kuuwolovokakwono. Ebelol Gooti toolluno kuudo kuubweyoka tovino tov Gooti toolluro sumdo tovi sugudo kwimo'nokaikono. Toro te Gooti tool Ebelollu ilaiyo amollomaroka tovino kuu'maiyo wuuduuwallo'moneyokwe tov Ebelolluro kwiroudapiyoka kuvi kuruv ilaiyo amollomarokaikono. Ebelol me'no abolokaikono. Toro kwol kuruv Ebelolluro kuudo kuubweyoka su tovino aga kuga kuruv kuuno nekudodowodokwono.

⁵ Aki aiyoga Inookol Gooti toolluno kuudo kuubweyajukekono. Toro kuubweyajuko su tovi'aro yere maboloduke toga Gooti tool muunyu kai'muuno amokailokaikono. Toro amokailoka toolluno a'mwo abolo ton a'mgono ino ino sopo kuvi kuruv Gooti tool me'no amokailoka toolluno tov ku'nono mwonyajupekono. Neya duu'nyulo. Gooti tool Inookollu muunyu kai'muuno yere mamokailoduke toolluno gamoro yogalo puruv aro me'no ajokwollosungikokwono. “Gooti tool Inookolluro pasudo tovino ilaiyo kwinyajukekono.” Ajokwollosungikokwono.

⁶ Aki a'mwo pwol Gooti toolluno kuudo muubweyo'ji tov Gooti tool a'mwo su toolluro pasudo tovino ilaiyo mwinonekono. Toro tovino tov a'mwo pwol Gooti toollu wobo toru biyo'mo kwino'ji su tool Gooti toolluno aro kuudo neya yau'mwalonekono. Oo Gooti tool aiyo mujomwekovlaiyokweyoldeyo. Aki Gooti su tool a'mwo abolo gamiyomno biyo'mo winodopure tonyu muunyu kai'muuda'ai mubiyo sugudo pun uubiyodowodoldeyo. Su toro kuudo neya yau'mwalonekono.

⁷ Aki aiyoga Noowal Gooti toolluno kuudo kuubweyajukekono. Noowal Gooti toolluro lukomgu nyumo'nupino tonyuno duudapi yogalo wiyoduke tonyu kaduko kwiyokaikono. Toro wino sumaiyokwe Gooti toollu dolago tomuu amwallajukekono. Toro tool gami julkwolaiyo togai'aro tonumdotai buuru'allako tovida'ai kaiyako nomapiyokwe sip pwollu amodokaikono. Noowalluro su toro soka tovino tov yiuwi'nokai kwako akavida'ai a'mwo abolo Gooti toollu kuudo muubweyodupudo tobuurai kuu'maiyo aro kuuduuwallokaikono. Kevu kemi kirumwallo tov nomapinogaikikono. Aki yiuwi'nokai a'mwo abolo Gooti toollu kuudo kuubwepi tono'gwowi gamoro sumdo tovi sugudo wimo'nupinogano. Su toro to'busuko kubalno Noowal kwol kuruv Gooti toollu kuudo kuubweyoka tovi'aro Gooti toolluro sumdo tovi sugudo kwimo'nokaikono.

Eburaiyameke Sarakwe teyaul Gooti toollu kuudo kuubweyajulo tovinokwono

⁸ Aki aiyoga Eburaiyamol Gooti toolluno kuudo kuubweyajukekono. Toro toollu Gooti tool doma'no sumaiyokwe aro kuudokaikono. “Guu moro kwako nogujamo tomuuno dovlavono.” Toro kuudoka tovi Eburaiyamol Gooti toolluno kuudo kuubweyajuko toolluno tov kuvinono kuumjunokaikono. Toro tool kwako su tomuuno kuudo yere miyouroma'duke kugada'ai nokwo plaino sokaikono.

⁹ Toro plaino sumaiyokwe Gooti toolluro kwako wiyo'mo subuu'yamju kwiyoka su tomuu ai'movokaikono. Toro ki'mo'mno sumaiyokwe toga Eburaiyamol Gooti toolluno kuudo uubweyodowo kwako su tomuu amwallajukekono. Kwako su toru Eburaiyamol a'mwo pumuuda'ai bomwallo toolbusuko imo'nodowo yiuno sel ago to'no amodallajukekono. Aki Aisakeke'aro Jekoopeke'aro kworal kuruv sel ago to'no amodallajulorakono. Toro te Eburaiyameke'aro a'mwo su toorake'aro yiuwi'nokai tooro Gooti toolluro subuu'yamju avalo tovi me'no amallajuporogano.

¹⁰ Neya duu'nyulo. Eburaiyamol sel ago tovi mwalodowodo toga wagwolago jurogudo kuunodo puvino'gwowi sogwollo ainyajukekono. Wagwolago su tov Gooti gavnokwe toolluro kuudo yovo'dogallauro'no amojudapingiko tovino sogwollo ainyajukekono.

¹¹ Eburaiyameke'aro gami abolo Sarakwe'aro teyaul yadaiyo imo'nolno kwolaiyo yawosunyo'moneyokwe kworomo tov me'no kuuwolo'nokaiyaukono. Aki gamoro abolo Sarav kwolluko sumo'nyajukokwono. Toro kuvi kuruv Sarav Gooti toollu kuudo kuubweyajuko tovi'aro kwolaiyo yawosunyo'moneyokwe jurogudo tov malluno sumaiyokwe kwolaiyo pwollu somarokakwono. Sarav aro kuudo saullajukokwono. Oo Gooti tool numi subuu'yamju anyoka tov kuvinono nuumjunonoldeyo. Su toro kuudo saullajuko tovino tov kwolaiyo su toollu kaveno somarokakwono.

¹² Toro te Eburaiyamol yadaiyo kuunodo sumo'noka toga kwolaiyo yawosunyo'moneyokwe tov a'mwo me'no abollungiko pwolbusuko sumo'nyajukekono. Toro kuvi kuruv a'mwo Gooti toolluno kuudo kuubweyajuko yiuno pwolnodo su toolluda'ai kwikweyago kwolaiyo bwotonyago ton alokabopogano. Gami jukweyago kwolaiyo tooro yowosungelabino yowosungelabino sumaveyokwe bwotonyago kuunodo sumo'noporogano. Bwotonyago su tooro muunyu kai'muuda'ai sullugabwo wo'dupudo toorobusuko sumo'noporogano. Aki soolwara wolo tomuuda'ai we'gullugulludo wo'dupudo tonbusuko sumo'noporogano.

¹³ Yiuwi'nokai a'mwo Gooti toollu kuudo kuubwemelabiyajupo su tooro me'no abollajuporogano. A'mwo su tooro kwako akavi kuuno mwalodopure toga Gooti toolluro subuu'yamju kwiyajuko tonyu yere mamallajuporogano. Gooti toolluro subuu'yamju su tonyu manyu tomuuda'ai to'busuko amuugonallajuporogano. Toro muugona'dupudo kuvi kuruv subuu'yamju su tonyu wonyo'mo ilaiyo kwinyajuporogano. Aki a'mwo su tooro aro adodoluwosunyajuporogano. “Oo nevu a'mwo pumuuda'ai toonolbusuko kwako akavi kula'nyo toga'gwo bomwalodowadonogano.” Toro adodoluwosunyajuporogano.

¹⁴ A'mwo abolo su toro adodoluwosunyajupo ton kevnokwe tonyuno kuu'maiyo toru aro abomollolupto'nosajupogano. Nevu nemi kwako kuunodo toru mwallo'mo tovino sogwollo kinodowadonogano. Su toro tovino kuu'maiyo toru abomollolupto'nosajupogano.

¹⁵ A'mwo abolo su ton kemi sumdomguda'ai kwako abopo toru'no kuudo sauropujuko'mno'juki kwako su toru'no aikomgu yere nokwo avlavopujukogano.

¹⁶ Toro kuvi kuruv kwako akavi uuwolo'mdowodo Gooti toolluro ago muunyu kai'muu wo'dowodo towai'no'gwowi mwallo'mo kwinyajupogano. Toro kwinyajupo tovino tov a'mwo abolo su ton Gooti toollu, “Oo guu nemi Gooti nonekullumo'nodumdekugono,” kuujajupogano. Toro wuudodopure tonyuno Gooti tool wogulo mibwosunyajukekono. Gooti tool a'mwo abolo gamino kuudo uubweyodopure su tonyo'mo wagwolago puruv me'no sovroubweyokaikono.

¹⁷ Aiyoga Gooti tool Eburaiyamollu yamju tov kwiyoganokaikono. Toro kwiyoganoka su tov Eburaiyamol Gooti toollu kuudo kuubweyoka tovino tov gami kwolaiyo Aisakollu Gooti toollo'mo wiroudapiyo'moneyokwe amollovrowosokaikono. Eburaiyamol Gooti toolluro subuu'yamju me'no aduuwiyajuko tovino kuudo kuubweyajukekono. Toro tool gami kwolaiyo pwolnodo toollu wiroudapiyo'moneyokwe kuvinono amollovrowosokaikono.

¹⁸ Gooti tool kwolaiyo Aisakolluno Eburaiyamollu subuu'yamju aro me'no aduuwiyajukekono. “Gumoro jukweyago kwolaiyo bwotonyago tooro nyawosunbinekugono. Subuu'yamju su toro aduuwiyajuko tov gumoro kwolaiyo Aisakolluda'ai imo'nupinorogano.”

¹⁹ Toro tovino Eburaiyamol aro kuudo saurokaikono. Oo Aisakol me'no abolo'ji kwollu kuruv Gooti tool aiyo aiko te nokwo modukawonoldeyo. Kuudo saurokaikono. Toro te Aisakol me'no abolowo'jujuko su tool a'mwo aiyo aiko te adukavoka pwolbusuko yovekurajo nekullumo'nodowodekono.

Aisakol Jekoopol Joosepol tooro Gooti toollu kuudo kuubweyajupo tovinokwono

²⁰ Aki Aisakol Gooti toollu kuudo kuubweyajukekono. Toro kuubweyajuko tovi'aro gamoro kwolaiyo Jekoopeke'aro Isoo'weke'aro todorallu lukomgu ilaiyo wimo'nyo'mo tovino Gooti tool subuu'yamju aduubweyokaikono.

²¹ Aki Jekoopol Gooti toollu kuudo kuubweyajukekono. Toro kuubweyajuko tovi'aro yadaiyo mwalo'no nobollo'mo soka toga Joosepolluro kwolaiyo toorallu Gooti tool ilaiyo mollomwalmwalono'moneyokwe tovino yogalo sugudo pun aduubweyokaikono. Toro duubweno sumaiyokwe gamoro yodeko tov muunyu toru mujunaro'no gami mido tov kwako tovi kwolomuulo'narokaikono. Toro wolomuulo'na'no sumaiyokwe Gooti toolluno yovo tovi sulomoropiyokaikono.

²² Aki Joosepol Gooti toollu kuudo kuubweyajukekono. Toro kuubweyajuko tovi'aro nobollo'mo soka toga gami Isuraiyolda'ai a'mwo abolo tonyu aro kuudokaikono. “Lukomgu Gooti tool kwako Ijup akavida'ai kwa'mgu tomuuno kemi nobomollurolovekumokalokwonekono.” Aki aro aduuwiyokaikono. “Lukomgu Gooti tool kwako Ijup akavida'ai kemi amollubworekumokavlawo'ji toga kevu moro yogudo tonyu neya domokavlaiyulo.” Aduuwiyokaikono.

Moosesol Gooti toollu kuudo kuubweyajuko tovinokwono

²³ Aki aiyoga Moosesolluro kuunum kwolabolo teyaul Gooti toollu kuudo kuubweyajuleyaukono. Toro kuubweyajulo tovi'aro Moosesollu me'no mulomwora'no sumaleyokwe lobako pworapwol tobuullu yiulo apuurosajulekono. Toro teyaul kemi kwolaiyo sugumaluko su toollu wonolno a'mwo aguto kig toolluro yogalo tovi kisuvolo wiyo'mo tovino luko miyoleyaukono.

²⁴ Aki Moosesol kwol kuruv Gooti toollu kuudo kuubweyajukekono. Toro kuubweyajuko su tovi'aro aguto gulluno sumaiyokwe a'mwono sumo'noka toga Ijupda'ai a'mwo aguto kig Feroo toolluro taiyo tovuro kwolaiyo pwolbusuko mujomwekovlaiyo'mo mwinyajukekono.

²⁵ A'mwo aguto kig toolluro a'mwo abolo ton ma'no ma'no mujeroungovla'mdupu ilaiyo subwosunyajupogano. Ilaiyo subwosunyajupo su tov manyu toga mamjo'movlaiyajukokwono. Toro te Moosesol a'mwo abolo su togai ilaiyo aval'no ibwosunyo'mo tovino mwinyajukekono. Toro kwol kuruv Gooti toolluro a'mwo abolo Isuraiyol tobuurogai Ijup tooravuro ato tovida'ai danyu'nyuwuulo ibwosunyo'mo to'gwowi kwinyajukekono.

²⁶ Moosesol aro kuudo saullajukekono. Nuu Gooti toolluro ajesoka Krais toolluro yovo tovida'ai danyu'nyuwuulo ama'mi tov nokwo'mokwono. Krais su toolluro yovo tovida'ai danyu'nyuwuulo ama'mi su tov yiuwi'nokai kwako Ijupda'ai tovuro kuto ivito nuugwiyo tollovo amaro'mujuko su tonyu nuuwolowonokwono. Su toro kuudo sauroka tov aro tovinokwono. Moosesol Gooti toolluro mubiyo sugudo su tollovo lukomgu wiyodowo'jure tonyu kuvinono mallo'mo tovino sogwollo to'no ainyajukekono.

²⁷ Aki Moosesol Gooti toollu kuudo kuubweyajuko tovi'aro a'mwo aguto kig toolluro surodo wuunoduke tovino luko miyo'no kwako Ijupda'ai abuugollu'mokalokwokaikono. Toro tool Gooti mwiyalo'nyungiko kwollu kuruv gami sumdo tokwe me'no muugona'dowodo pwolbusuko abuugollu'mokalokwokaikono.

²⁸ Aki Moosesol Gooti toollu kuudo kuubweyajuko tovi'aro Muunyu Toru'aro Surukuruwolovoka tovino lubullu doto muudu'nodo tov amolludovokaikono. Toro molludo'no sumaiyokwe Isuraiyolda'ai a'mwo tooro sipsip mujako tokwe kemi anoullo tonyuda'ai imgu amgu a'mworainyuko tonyu neya luviyourosupino'moneyokwe aduuwiyokaikono. Su toro aduuwiyoka tov aro tovinokwono. Gooti toolluro noromiyebuuropiyo'moneyokwe ensel tool kemi kwolaiyo sujuraiyo tobuurai noromiyoso'jokwe tovinokwono.

Isuraiyolda'ai a'mwo abolo pugai'aro ton Gooti toollu kuudo kuubweyajupo tovinokwono

²⁹ Aki aiyoga Isuraiyolda'ai a'mwo abolo ton Gooti toollu kuudo kuubweyajupogano. Toro kuubweyajupo tovino tov Soolwara Weyako tovi akuuto toru'aro aga'movopogano. Kwako yalukullo tomuu'aro kado pla'mdupudo to'busuko sumo'noka tovi nokwo aga'movopogano. Toro kuvi kuruv Ijupda'ai a'mwo tooro aval'no uumjunyo'mo sopo kworai kuruv wonyo tov yiuwi'nokai su toorai amomulengoukuurosokarogano.

³⁰ Aki Isuraiyolda'ai a'mwo abolo ton Gooti toollu kuudo kuubweyajupo tovino tov wagwolago Jerikoo tovi 7-pela iruko tobuullu kworomo abomjumoullajupogano. Toro bomjumoulno sumaveyokwe toga wagwolago su tovida'ai sulkuurupto ton abwolowo'dolopiyapogano.

³¹ Aki aiyoga kwonyalabolo Rahapov Gooti toolluno kuudo kuubweyokakwono. Toro kuudo kuubweyoka su tovi'aro wagwolago Jerikoo kuurupto tovi anakuuto tomuu mwalodowodo kuvi kuruv a'mwo abolo Gooti toolluno kuudo muubweyajupo togai mabolokakwono. Su tov aro tovinokwono. Isuraiyolda'ai a'mwo domokwe pworal abuuru'marolo toorallu Rahapov ilaiyo amollomaroka tovinokwono.

³² Aga nuu a'mwo Gooti toollu kuudo kuubweyajupo pworogai'aro tooraino kemi neya ikudumonyudukono? Awiyo, yiuwi'nokai a'mwo su tooraino kuuguudo go'no go'nodo ton bwotonyo kumi'yagogano. Toro tonyuno tov ku'nono maikudumonyugono. A'mwo su tooraino yovo tov Gideyooneke, Barakoleke, Samsooneke, Jefta'woleke, Deviteke, Samweleke aki yiuwi'nokai proofet toorogai'aro toorogano.

³³ A'mwo su tooro Gooti toollu kuudo kuubweyajupo tovi'aro aguto kig pworavuro a'mwo mollurogudo toorai molo wiyodupu kuuwoleyajuporogano. Aki toro tooro pasudo idopto'nodo tonyu molludo'movla'mdupu Gooti toolluro subuu'yamju kwiyajuko tonyu kuvinono amallajuporogano. Aki a'mwo su tooro laiyon tooravuro mago tonyu kuubuteyajuporogano.

³⁴ Aki du'wiyo tov kevnokwe toorai nomoruumgu'no'jokwe aibuulowosajuporogano. Aki ikomago tooro molo'mo kwallu'mopto togai kijutowoso'mo yodopure toga lukado abirolo'nugolokwiyajuporogano. Aki a'mwo su tooro wollainyo imo'nodopure kworai kuruv Gooti tool jurogudo kwimwojajukorogano. Toro tooro iro'molo wiyo'moneyokwe amuuloka jurogudo sumo'nyajuporogano. Toro te kwako pumuuda'ai a'mwo mollurogudo pworai molo wiyodopure toga yiuwi'nokai pumuuda'ai su tooro lukado avlaiyajuporogano.

³⁵ Aki abolo pun Gooti toollu kuudo kuubweyajupo tovi'aro kemoro me'no abollungopo pubuuro aiyo aiko te adukavopo tobuurai aiko te maro'mno amomjomwekovlaiyajupogano. Toro kuvi kuruv a'mwo abolo Gooti toollu kuudo kuubweyajupo puno'gwowi ikomago pworavuro kaiyako igolodopure tovida'ai danyu'nyuwuulo amallajupogano. Kaiyako sugollajupo su tooro aro kuujajuporogano. “Kevu kemi Gooti toollu buulo kuuguunyumopipi tov nevu kemi nokwo irolovekwapiyanonogano.” Toro wuudodopure kuvi kuruv Gooti toolluno kuudo kuubweyajupo su tobuurono'gwowi, “Awiyo,” kuujajupogano. Toro tobuuro kuudo aro tollugwoji agudupolallajupogano. Oo nemi aromiyanekubwepi kuruv lukomgu aiyo yiunokuudo mujomwekovlaiyo'moneyokwe tovi nomaranonogano. Aki nomarano su to'gwowi uuwolo'mdowodokwono. Kuudo su tollugwoji agudupolallajupogano.

³⁶ Aki a'mwo abolo pun Gooti toollu kuudo kuubweyajupo tovino tov jul'nyo aro ton amallajupogano. A'mwo pworo a'mwo abolo su tobuurai burekakwo me'nopiyodupu wuulo tokwe agalogunyukuurumollajuporogano. Aki toro tobuurai senyo wuulo kugai mogalerosodupu wuulo killo'mo ago tonyu aulomerosajuporogano.

³⁷ Aki pworo a'mwo abolo su tobuurai sulo togai aluvoromiyosajuporogano. Aki pworo a'mwo abolo su tobuuravuro kulako tonyu imgu amgu akuuto toru'aro amodovollumowapiyajuporogano. Aki pworo a'mwo abolo su tobuurai molo'mo kwallu'mopto togai adowosajuporogano. A'mwo abolo Gooti toollu kuudo kuubweyajupo su tobuuro sipsip toorogai'aro meme toorogai'aro tooravuro kulako tekwojogai yesodupu kwako akavi somollajupogano. Aki toro tobuuro wosa tokwe wonyo tokwe tovalluno supto sajupogano. Aki a'mwo abolo su tobuuro a'mwo pworavuro ato tovida'ai jul'nyo togai'aro kaiyako igolodopure togai'aro ton amallajupogano.

³⁸ A'mwo abolo Gooti toollu kuudo kuubweyajupo su tobuurai yiuwi'nokai kwako akavida'ai a'mwo abolo mwalodupudo ton supto suwapiyajupogano. A'mwo abolo Gooti toollu kuudo kuubweyajupo su tobuuro kwako yalukullo tomge'aro muumuudo tomge'aro sumago tomge'aro aki kwako akavuro sulpuuto tomge'aro tomuu somollajupogano.

³⁹ Yiuwi'nokai a'mwo abolo su ton Gooti toollu kuudo kuubweyajupo tovino tov Gooti tool ilaiyo to'no amollomallajukogano. Toro kuvi kuruv yiuwi'nokai a'mwo abolo su ton Gooti toolluro subuu'yamju punyuno'gwowi yere mamallajupogano.

⁴⁰ Yere mamallajupo tovino kavlo tov arokwono. Aiyogasuro a'mwo abolo ton Gooti toolluro me'no sovrovanekubwengiko ton yere mapino'moneyokwe mwinyajukekono. Toro kuvi kuruv Gooti tool nemi avalo toga nekullabiyo'moneyokwe yiuwi'nokai tonollu nomollu'bworonekumwallonogano. Aki su toro nonekullabwono su ton aguto kuunodogano. Toro te aiyogasuro a'mwo abolo togai'aro aki agasuro a'mwo abolo kunogai'aro yiuwi'nokai tonollu me'no mollu'bworonekumwallowo'ji avalo toga nomaranonogano. Toro amara'ji su togai ilaiyo to'no imo'numwalanonogano.