Hibruu 10 - Gooti Toolluro Yogalokwono

Sumdomguda'ai noonyumwonyu aromiroudapiyajupo ton ma'no ma'nodo tovi ku'nono mamodukwopiyajupo tovinokwono

¹ Lukomgu kuunodo tollovo nyumo'nupinogano. Su toro tollovaino Moosesolluro loowo tov yiuno wakuunonabolo to'busuko to'no nekuduuwallodowodokwono. Toro kuvi kuruv Moosesolluro loowo su tov lukomgu imo'nupino su tollovaino pi'mwono manekuduuwallodowodokwono. Toro tovino tov pris tooro yiuwi'nokai kworomo go'no go'nodo toga yiuno aval'nodo tomgu'aro Gooti toollu kwiroudopimovlaiyajuporogano. Toro kwiroudapiyajupo kuvi kuruv a'mwo abolo su ton Moosesolluro loowo tovi'aro Gooti toolluro sumdo tovi sugudo ku'nono mwimo'nyajupogano.

² A'mwo abolo su ton loowo su tovi'aro Gooti toolluro sumdo tovi yiuno sugudo to'no sumo'nopujuko'mno'juki pris tooro aiko te aiko te maromiroudapiyopujukorogano. Su tov aro tovinokwono. A'mwo abolo Gooti toollu ilomoropiyo'mo wiroudapiyodupudo su ton yiuno sugudo to'no me'no sumo'nopujukogano. Toro ton kemoro poowokalago tovi me'no kuuluuwo'dowodo tonyu kisuvolo wiyopi ma'no ma'no supi tovida'ai jul'nyo mibwosungovlavopujukogano. Sugumaluko kuvinono sumo'nopujuko'mno'juki pris tooro romiroudapiyo'mo womdo yodupudo tov me'no sumwogapiyopujukorogano.

³ Toro kuvi kuruv pris tooro yiuwi'nokai kworomo toga aiko te aiko te aromiroudopimovlaiyajupo su tovi'aro kemoro ma'no ma'no pasudo tonyuno kuudo aiko te aiko te you'movlaiyo'moneyokweyokwono.

⁴ Neya duu'nyulo. Buulmokau kwolo pwolluro mujako'mdeyo oo meme mujako'mdeyo bwolodawodo su tov a'mwo abolo tonyuro ma'no ma'nodo tovuro kirumwallo tovi ku'nono mamodukwopiyonokwono.

⁵ Toro tovino tov Krais tool kwako akavi kwolaboka toga Gooti toollu aro kuudokaikono. “Guu a'mwo abolo tonyuro meme oo buulmokau romiroudapiyodupudo toorogai'aro yasuwa'wino gujabodupudo togai'aro tonyu mallo'mo tovino magujunodowodekugono. Toro kuvi kuruv Gooti guvnokwe tooku nuu toonyo'mo kulako puruv me'no sovrovanubweyodekugono.

⁶ A'mwo abolo ton dukwagupto tovi muunyu toru meme oo buulmokau romiroudapiyodupudo toorogai'aro aki a'mwo abolo tonyuro ma'no ma'nodo tovi bu'duvoloso'moneyokwe yasuwa'wino gujabodupudo togai'aro tonyuno guu ilaiyo mibwosunyokweyekugono.

⁷ Su toro toga nuu toonyu guu Gooti tookuji aro agudonyugono. “Oo Gootoloo, donuu'nono. Nuu gumi ilaiyo gujunodowodo tovi uumjunyo'mo abonyugono. Toro toonyuno Moosesolluro loowokwe buukiyo tovi puukwollo puruv me'no sokwollosungikokwono. Toro sokwollosungiko tomgu'aro kuvinono uumjunmonyugono.” Toro agudonyugono.” Kuudokaikono.

⁸ Krais tool sumdomguda'ai yogalo puruv Gooti toollu aro kuudokaikono. “A'mwo abolo ton dukwagupto tovi muunyu toru meme oo buulmokau romiroudapiyodupudo togai'aro noonyumwonyu gujabodupudo pugai'aro aki sipsiporodeyo dukwagupto tovi muunyu toru yiunokuudo nopiyodupudo toorogai'aro aki a'mwo abolo tonyuro ma'no ma'nodo tovi bu'duvoloso'moneyokwe yasuwa'wino togai'aro tonyuno guu ilaiyo mibwosunodumdekugono. A'mwo abolo su ton Moosesolluro loowo tovi uumjunodupu gumi gujabodopure kuvi kuruv guvno'gwowi ilaiyo mibwosunodumdekugono.”

⁹ Aki Krais tool Gooti toollu yogalo puruv aro kuudokaikono. “Donuu'nono. Nuu gumi ilaiyo gujunodowodo tovi uumjunyo'moneyokwe abonyugono.” Kuudokaikono. Toro te Krais tool a'mwo abolo tonyuro sumdomguda'ai kwiroudapiyajupo tovi amodukwopiyokaikono. Me'no modukwopino sumaiyokwe gavnokwe toolluro lukomguda'ai kwiroudapinoka su to'gwowi a'mwo abolo tonyuro sumdomguda'ai tovi aiko toru amarokakwono.

¹⁰ Jisas Kraisol Gooti toolluro ilaiyo winodowodo tovi uumjunyuno sumaiyokwe gavnokwe toolluro kulako tov yiuno puru'monodo toga'no aromiroudapinokaikono. Toro aromiroudapinoka su tovi'aro nevu Gooti gavnokwe toolluro a'mwo abolo kuunodo wimo'nugovla'mdowadonogano.

Krais tool gavnokweyolluro kulako kwiroudapinoka tov ma'no ma'nodo tovuro kirumwallo tovi modukwopiyodowodo tovinokwono

¹¹ Yiuwi'nokai pris tooro yiuwi'nokai iruko toga davopi womdo mujumovla'mdupudorogano. Toro tooro aval'nodo tomgu'aro wiroudapino wiroudapino mujumovla'mdupudorogano. Toro mujumovla'mdupudo kuvi kuruv noonyumwonyu wiroudapiyodupudo su ton ma'no ma'nodo tovuro kirumwallo tovi ku'nono mamodukwopipinogano.

¹² Toro kuvi kuruv Krais toolno'gwowi ma'no ma'nodo tovuro kirumwallo tovi modukwopiyo'moneyokwe yiuno puru'monodo toga'no gavnokwe tool kwiroudapinokaikono. Su toro kwiroudapinoka tov yiunokuudo mujo'movlaiyo'moneyokweyokwono. Toro te Krais tool yiuno puru'monodo toga me'no yopino sumaiyokwe Gooti toolluro anato toru sulomwalokaikono.

¹³ Toro ilomwalno sumaiyokwe Gooti tool Krais toolluro ikomago toorai gamoro suvlo dolago tomuu bomorumwallonekono. Su toro toga'no Krais tool sogwollo kingovla'mdowodekono.

¹⁴ Yiuwi'nokai a'mwo abolo Gooti toolluro kuunodo wimo'nugovla'mdopure su tonyo'mo Krais tool yiuno puru'monodo kwiroudapinoka su tovi'aro yiuno sugudo to'no wimo'nugovla'mdupudogano. Su tov yiuwi'nokai toga mujo'movlaiyo'moneyokweyokwono.

¹⁵ Aki Gooti toolluro Kuullo kwol kuruv nemi kuu'maiyo toru'no aro dodoluvanekubweyodowodekono.

¹⁶ “Gooti Aguto tool adokaikono. “Lukomgu nuu a'mwo abolo togai subuu'yamju yajunmo tov arokwono. Moro loowo ton kemi poowokalago tonyu anakuuto tomuu noulubwemonyugono. Aki moro loowo ton kemoro kuudo tovi nyokwollubwemonyugono.” Adokaikono.”

¹⁷ Aki Gooti toolluro yogalo puruv aro adokaikono. “Nuu kemoro ma'no ma'no pasudo togai'aro moro loowo tovi kisuvolo pasudo togai'aro tonyuno aki aiko te kuudo miyou'movla'mwalmonyugono.” Adokaikono.

¹⁸ Toro te Gooti tool ma'no ma'nodo tonyuro kirumwallo tovi me'no amodukwopiyo'ji toga'no'gwowi ma'no ma'nodo su tonyuno aki aiko te wiroudapiyo'moneyokwe womdo puruv nonagutokwono.

Nemi poowokalago kuunodo togai Gooti toollu wobo toru neya buuru'ma'mwalano tovinokwono

¹⁹ Nemi avalobuuravoo, Jisasolluro mujako tov me'no abwoloka tovino tov nevu Gooti toolluro ago muunyu kai'muu pwekwapto kuunodo toru'no kuullo'moneyokwe tovino luko nyumwala'jo.

²⁰ Gooti toolluro pwekwapto kuunodo su toru kuullo'moneyokwe tov Jisasol puuto muuduko puruv me'no soulonekubweyokaikono. Puuto soulonekubweyoka su tov aiyo mujomwekovlaiyo'moneyokweyokwono. Aki Gooti toollu ilomoropiyo'moneyokwe ago tovuro youro kudo'aiko allukurosungiko akuuto toru'aro ausanekubweyokaikono. Youro kudo'aiko allukurosungiko su tov Jisasolluro kulako tovino nekuduuwallo'mokwono.

²¹ Su tool nemi Pris Aguto nekullumo'nodowodekono. Toro tool nevu gamoro a'mwo abolo Gooti toolluro ago to'busuko wimo'nodowado tonollu mollonekumwalodowodekono.

²² Toro te Krais toolluro mujako abwoloka tov nemoro poowokalago tobuurai me'no amollol'movanekudukwopiyokakwono. Toro amollol'movanekudukwopiyoka tovida'ai nemoro poowokalago su tobuuro ma'no ma'no nonaguto imo'nodupudobuurogano. Toro tovino tov nemoro poowokalago su tobuuro nemi wogulo madonekwo'gallokweyogano. Aki aiyoga pris tooro Gooti toolluro womdo yo'moneyokwe kemi kulako ton sal'mo'nyajupo to'busuko kubalno nemoro kulako ton wonyo kuunodo tokwe me'no yal'mo'nodowadonogano. Toro tovino tov nemi poowokalago kuunodo togai Gooti toollu kuudo uubweyodowado tovi neya avorugwo'mo'narogawano. Toro porugwo'mo'narowa'ji nemi poowokalago kuunodo togai Gooti toollu wobo toru neya abuuru'marogawano.

²³ Nevu Gooti toolluro nonekullabwono tonyuno sogwollo kinodowado su tovino kuu'maiyo dodowiyoku'bworosodowadonogano. Toro dodowiyoku'bworosodowado su tovi guureji neya agudupolarogawano. Yiunokuudo su toro gudupolarowa'ji aki buulo nuugunyumopimwala'jo. Nevu su toro mujumovla'mwalano tovino kavlo tov arokwono. Subuu'yamju danekullodowodo Gooti tool buro'nyo buro'nyodeyo pun imokwe ado'ji tov yiuwi'nokai toga kuvinono yodowodekono. Toro te nevu noonyumwonyu sogwollo kinodowado su ton kuvinono nonekullumo'nupinogano.

²⁴ Aki yiuwi'nokai toga nevu Jisasolluro a'mwo abolo tonol imgu amgu jurogudo duuwimwoju'nyo'moneyokwe kuudo neya yau'mwalanonogano. Toro te nevu a'mwo abolo pubuuraino kalo buuropino winyo'moneyokwe tokwe'aro sugupasudo mujumovlaiyo'moneyokwe tokwe'aro tovalluno jurogudo neya duuwimwoju'numwalanonogano.

²⁵ Jisasolluro a'mwo abolo pun kevuge avalo pubuurogai mi'bwo'nodupudogano. Kevu su to'busuko aval'no nyumwalpiyo. Toro kuvi kuruv kevno'gwowi neya ju'bwo'nomwalogaulo. Su toro i'bwo'nomwalopi Jisasolluro a'mwo abolo tobuurogai imgu amgu jurogudo doduuwimwoju'nogaulo. Toro togaikul aro wonomapinogaikikono. “Oo Aguto tool aikomgu nobai'mowono'mo tov wobo toga'deyo.” Su toro tovi kwonomapi toga jurogudo duuwimwoju'numwalpino su tov muunyu toru'aro guureji jogaulo.

Nevu Gooti toolluro Kwolaiyo toollu kisuvolo nuuwimwala'jokwe tovinokwono

²⁶ Neya duu'nyulo. Nevu nebaikuuguudo tovino kuudo me'no youroma'dowado punol muu'nyubusuko yowa'ji ma'no ma'no kuuno amjeroungovlawa'ji tov nemoro ma'no ma'nodo su tovi modukwopiyo'moneyokwe Jisasolluro yiuno puga'nodo togasuro me'no kwiroudapinoka su tovi buulo uugunyumopiyanonogano. Toro kuuguunyumopiya'ji tov nevu ma'no ma'nodo tovi modukwopiyo'moneyokwe Gooti toollu aki aiko te wiroudapiyo'mo puruv nonagutonogano.

²⁷ Toro kuvi kuruv a'mwo pwol Jisasolluro kwiroudapinoka su tovi buulo kuuguunyumopiyo'ji su toolno'gwowi Gooti toolluro nerumwallono tovino sogwollo kinmwalonekono. Toro kingovlavowo'ji aki kuvinono kirumwallono toga'no luko to'no imwalonekono. Aki duko bwotonyo tov Gooti toolluro ikomago toorai monosono kuvino kuruv luko imwalonekono.

²⁸ Nevu kuudo nyau'mwakuuwono. A'mwo pwol Moosesolluro loowo tovi kisuvolo wiyowo'ji ma'no ma'no so'ji tov neya bolonekono. A'mwo su tool ma'no ma'no yodowo'jure toga a'mwo pworaldeyo oo pworapwolorodeyo tooro wonopi kuu'maiyo toru'no aro dodowiyoku'bworosupinorogano. “Oo a'mwo su tool ma'no ma'no yoduke me'no kwonmawekono.” Su toro adodowiyoku'bworosupi toga a'mwo ma'no ma'no so'ji su toolluno kalo mamamwonyupinekono. Toro tool yiuno'no neya bolonekono.

²⁹ Sumdomguda'ai Moosesolluro loowo tovi a'mwo pwol kisuvolo kwiyo'ji toollu kirumwallo tov su toro tomgu'aro amallajukekono. Toro kuvi kuruv a'mwo pwol Gooti toolluro Kwolaiyo toollu suvlo sulomavekuro'ji su toolno'gwowi kirumwallo kula'nyo to'no maronoldukono? Awiyo, kirumwallo bwotonyo tov nomaronekono. Aki Gooti tool gavnokweyolluro a'mwo abolo togai Krais toolluro mujako abwoloka su tokwe subuu'yamju muuduko tov me'no sajunokaikono. Aki a'mwo abolo su ton mujako su tovi'aro Gooti toolluro a'mwo abolo kuunodo wimo'nodupudogano. Toro kuvi kuruv a'mwo pwol ma'no ma'no so'ji tov Krais toolluro mujako su tovi suvlo to'busuko ilomavekuronekono. Aki a'mwo ma'no ma'no so'ji su tool yasuwa'wino sugumaluko tovuro Kuullo nekumokabodowodo toollu kisuvolo bwotonyo wimwalonekono.

³⁰ Toro te kuudo neya jaullulo. Gooti tool aro adokaikono. “A'mwo abolo ma'no ma'no supi tonyuro mido mallo'moneyokwe womdo tov yiuno numi anuwoso. Aki a'mwo abolo tonyuro ma'no ma'nodo tovi mubiyo tov nuvnokwe toonyu kuvinono uubiyo'mi nerumwallumonyugono.” Adokaikono. Gooti adoka su toolluno nevu kuudo nyau'mwakuuwono. Aki Gooti toolluro adoka puruv arokwono. “Aguto tool gamoro a'mwo abolo tobuurai kooti yogalo nojainyubworonekono.” Adokaikono.

³¹ Toro te Gooti aiyo mwallokwe su tool a'mwo pwollu kuudo wuuteyo'moneyokwe agalomworaro'ji tov a'mwo su tool luko bwotonyo neya imwalonekono.

Nemi kaiyako yanekullugolodopure kuga kuruv nemoro kuudo uubweyodowado tovi nuugollu'mo'mwala'jokwe tovinokwono

³² Kevu Gooti toolluro bako tovi muudu'no aulomwalopo toga'no aki aiko te kuudo pwekwo jaullulo. Kevu bako tovi muudu'no me'no kuulomwalno sumaveyokwe toga danyu'nyuwuulo pun kemi kaiyako saikullugollajupogaikikono. Toro yaikullugolodopure kuvi kuruv kevno'gwowi jurogudo to'no da'mdopure togaikullu jul'nyo su ton kemi maikuuwoleyajupogano.

³³ Go'no go'nodo toga a'mwo abolo punyuro sumdo muugonaikwo'dopure toru kemi burolpakuto mollekuvaku'dupu kaiyako saikullugollajupogano. Aki kevuge avalo pubuurai jurogudo duuwimwojo'moneyokwe kuuguro'mwonyajupogaikikono. Toro kuuguro'mwonyajupo su tobuurai a'mwo pworo kaiyako igolodopure toga kev kugaikullu kuruv kaiyako aval'no saikullugollajuporogano.

³⁴ Aki kevu aro sajupogaikikono. Kemida'ai a'mwo abolo pubuuro wuulo killo'mo ago tovi kuule'na'dopure su tobuuraino kalo aikullunyajukogaikikono. Aki a'mwo pworo kevu Jisasolluro a'mwo abolo togaikulluro kuto ivito tonyu ipolekuma'dopure kuga kuruv kevu ilaiyo to'no amwallajupogaikikono. Kemoro ilaiyo amwallajupo su tovino kavlo tov arokwono. Gooti toolluro noonyumwonyu kemi ikullabwono ton kwako akavida'ai tonyuno'gwowi uuwolo'mdupudogano. Aki Gooti toolluro ikullabwono su ton yiuwi'nokai toga kevuge yiunokuudo mujo'movla'mwalpinogano. Kevu su toro tonyuno sogwollo to'no kingovla'mdupudogaikikono. Su toro kuudo me'no youroma'dupudo tovino tov kemoro noonyumwonyu ton ipolekuma'dopure kuga kuruv kevu ilaiyo to'no amwallajupogaikikono.

³⁵ Kevu sumdomgu togada'ai Aguto toolluno kuudo guureji uubwemovla'mdupudogaikikono. Toro togaikul aga kuga kuruv kemi Aguto toolluno kuudo guureji uubwemovla'mdupudo su tovi nuugollu'mo'mwalpiyo. Kuudo neya jaullulo. Kemoro kuudo uubwemovla'mdupudo su tovuro mubiyo ikubiyo'moneyokwe tov kevu Gooti toolluro ago muunyu kai'muuda'ai sugumaluko tollovai kuvinono nomapinogaikikono.

³⁶ Neya duu'nyulo. Buro'nyo buro'nyo jul'nyodeyo pun kemi aikullumo'no'ji toga kevu jurogudo to'no neya dodavogaulo. Su tov aro tovino'mokwono. Kevu Gooti toolluro ilaiyo winodowo'jure tovi kuvinono kuumjunpi toga Gooti toolluro ato tovida'ai noonyumwonyu subuu'yamju daikullodowodo tollovai nokwo mapino tovino'mokwono.

³⁷ Gooti toolluro yogalo puruv aro sakwollungikokwono. “Gooti toolluro aikomgu wolomonekwopiyabwono tool manyu toga sogwollo mainonekono. Toro kwol kuruv wobo toga nobai'mowonekono.

³⁸ Aki a'mwo pwol moro sumdo tovi sugudo imo'nodowodo su tool gamoro kuudo uubweyodowodo tovi'aro aiyo mujomwekovla'mwalonekono. Toro kuvi kuruv a'mwo gabovo pwol mino buulo anuugunyumopiyo'ji to'gwowi nuu ilaiyo mimwalmekono.” Sakwollungikokwono.

³⁹ A'mwo buulo uugunyumopiyopudo su tooro kaiyako i'nopiyodupudorogano. Nevu a'mwo su toorobusuko nyomjumovla'mwala'jo. Toro kunol kuruv nevu Gooti toolluno to'no kuudo uubweyokwenogano. Aki kuudo uubweyodowado su tovi'aro nevu ma'no ma'nodo tovuro kirumwallo tovida'ai birolo'nugolokwodowadonogano.