Hibruu 1 - Gooti Toolluro Yogalokwono

Aga Gooti tool gami Kwolaiyo toollu'aro nekudodowodo tovinokwono

¹ Aiyoga Gooti tool nemi nellukweyago toorai gamoro yogalo tov proofet toorai'aro kuujajukekono. Toro tool bwotonyago toga judo'no judo'nodo tomgu'aro kuujajukekono.

² Toro kuvi kuruv agasuro iruko aiyowo'mo akaga'no'gwowi Gooti tool gami Kwolaiyo toollu'aro me'no anekujungikekono. Gooti toolluro yiuwi'nokai noonyumwonyu tonyu mallo'moneyokwe tov gami Kwolaiyo toollu me'no ajesokaikono. Aki Gooti tool gami Kwolaiyo su toollu'aro yiuwi'nokai kwako akavi sokwollosokaikono.

³ Gooti toolluro Kwolaiyo su tool Gooti jurogudo kuunodo toolluro bako pwopiyodowodo tov nekuduuwallodowodekono. Aki toro tool gami Ganumiyago Gooti toolbusuko irol'mowosunodekono. Toro tool kwako tokwe'aro sulugumdo tokwe'aro tovalluda'ai yiuwi'nokai wo'dupudo tonyu gamoro yogalo jurogudo tokwe kuuno mollomwalodowodekono. Kwolaiyo su tool nemoro ma'no ma'nodo tovuro kirumwallo tovi me'no amollol'movonekudukwopiyokaikono. Toro mollol'movonekudukwopino sumaiyokwe toga muunyu kai'muu mwalodowodo Aguto Kuunodo toolluro anato toru sulomwalokaikono.

Gooti toolluro Kwolaiyo tool ensel toorai uuwolo'mdowodo tovinokwono

⁴ Gooti tool gami Kwolaiyo toollu yovo aguto kwiyokaikono. Yovo su tov ensel tooraino yovo kwiyoka tonyu uuwolo'mdowodokwono. Toro tovino tov Gooti toolluro Kwolaiyo su tool ensel toorai muunyu kai'muu'aro billumo'nodawo uuwolo'mdowodekono.

⁵ Neya duu'nyulo. Gooti tool gami Kwolaiyo toolluno aro ajajukekono. “Guu moro Kwolaiyekugono. Anuugwo toga nuu gumi Junumiyago agujumo'numono.” Aki Gooti toolluro yogalo puruv aro ajajukekono. “Nuu gami Ganumiyago nuuwimo'numwalmonyugono. Aki toro tool moro Kwolaiyo nyumo'numwalonekono.” Gooti toolluro yogalo su tov ensel pwolluno ajajukolmaiyo. Toro kuvi kuruv gami Kwolaiyo toolluno'gwowi kuvinono ajajukekono.

⁶ Gooti tool gamoro Kwolaiyo sujuraiyo su toollu kwako akavi kwolomoropiyaboka toga aro dodowodekono. “Yiuwi'nokai Gooti toolluro ensel tooro Kwolaiyo su toollu neya ilomodomoropimwolapinekono.” Dodowodekono.

⁷ Aki Gooti tool ensel su tooraino aro dodowodekono. “Ensel su tooro dolo to'busuko imo'numwalpino'moneyokwe Gooti tool yokwollosodowodorogano. Aki gamoro womdokwe tooro widuko bomjonugelodawodo to'busuko imo'numwalpino'moneyokwe Gooti toolluro yokwollosodowodorogano.” Gooti gavnokwe tool ensel tooraino su toro dodowodekono.

⁸ Toro kuvi kuruv Gooti tool gami Kwolaiyo toolluno'gwowi aro me'no kuudokaikono. “Oo aguto kig Gooti tookujuro mido mollomwalbino tov yiunokuudo mujo'movla'mwalonokwono. Aki guu mido mollomwallo'moneyokwe womdo tovi subi toga pasudo idopto'nodo tonyuno to'no mujumovla'mwalbinekugono.

⁹ Guu pasudo idopto'nodo tonyuno kalo buuropino gujunodowodekugono. Toro kweku kuruv kirovanyuvanyu pasudo tooraino'gwowi biyolo to'no uu'mwojodumdekugono. Toro tovino tov nuu gumoro Gooti toonyu gumi me'no ajagubweyonyugono. Moro ajagubweyo su tov aiyoga oolip munyupto tokwe aimovobweyajupo to'busukokwono. Toro tookuji moro ilaiyo bwotonyo tov gumi nemovagubwemwalonokwono. Toro aimovagubweyo'ji su tov gumi ibwoto'nyo tobuuravuro tonyu nuuwolo'mwalonokwono.” Gooti tool gami Kwolaiyo toollu toro kuudokaikono.

¹⁰ Aki Gooti toolluro Kwolaiyo toolluno ajakwolloka yogalo puruv arokwono. “Agutoloo, muudu'nodo toga guvnokwe tooku kwako akavi sokwolludapiyodekugono. Aki guvnokwe tookujuro ato tokwe muunyu kai'muu sulugumdo kuruv sokwollosodekugono.

¹¹ Kwako tokwe sulugumdo tokwe toval nyounopibullunovakono. Toro kuvi kuruv guvnokwe tookuno'gwowi yiunokuudo mujomwekovla'mwalbinekugono. Kwako tokwe sulugumdo tokwe toval youro uumdo to'busuko lapullo nyumo'nubullunovakono.

¹² Su toro sumo'nubullu tovallu guu nobwaiyo tovallubusuko nomowologutowosubinekugono. A'mwo abolo ton youro uumdo toorai mollurolodukwopiyopi youro aiyo tousogai iro'nodupudo to'busuko kubalno guu kwako uumdo tokwe sulugumdo uumdo tokwe tovalluro aiko toru mallo'moneyokwe kwako muuduko tokwe sulugumdo muuduko tokwe tovallu nyokwollosubinekugono. Toro kuvi kuruv guvnokwe tookuno'gwowi yiunokuudo aval'no yomjomwekovla'mwalbinekugono. Aki guu yiuwi'nokai toga mujomwekovla'mwalbino su tov ku'nono mimwogapiyonokwono.”

¹³ Gooti tool gamoro ensel pwolnodo kwollu kuruv aro muudokaikono. “Guu moro anato toru bilomwalbinekugono. Toro bilomwalodo'bure toga nuu gumi ikomago toorai molo wiyo'mi nuuwolo'monyugono. Toro uuwolovo'mi toga ikomago su toorai ipolomokabo'mi gumi dolago tomuu bomagubwemorogano.” Gooti tool ensel pwolnodo kwollu kuruv su toro muudokaikono.

¹⁴ Yiuwi'nokai ensel tooro kuullo pworogano. Toro tooro Gooti toolluro womdo tovi yodupudorogano. Ensel su tooro Gooti toolluro a'mwo abolo tonyu mollomwalmwalpino'moneyokwe modapiyodowodorogano. Gooti toolluro a'mwo abolo nomollurolovomokalokwodowo'jure tobuurai mollomwalmwalpino'moneyokwe gamoro ensel su toorai modapiyodowodorogano.