Galesiya 6 - Gooti Toolluro Yogalokwono

Buro'nyo buro'nyo ikulwiyo avlollosupi tov no aval'no ai'no'ji to'no mulomapino tovinokwono

¹ Mi avalobuuravoo, kevu Jisasolluro a'mwo abolo pugaikul Gooti toolluro Kuullo tool mollubworekumokavla'mdowo'jure tovi uumjunodupudo su togaikul kemida'ai pubuuro ma'no ma'no pasudo tovuro wuulo tovi awapi tobuurai neya duuwiyo'mwojogaulo. Kevu wiyo'mwojo'mo togaikul a'mwo abolo ma'no ma'no supi su tobuurai kavo neya duubemwojogaulo. Su toro uubemwojopi toga kevnokwe togaikul ilomoropunyu yapi ma'no ma'no pasudo tovuro wuulo tovi nowa'mwalpiyo.

² Aki toro togaikul kemida'ai pubuuro jul'nyo ma'dopure tonyu kevu a'mwo abolo su tobuuravuro jul'nyo tonyu neya domollukwovogaulo. Kevu su toro supi tov Krais toolluro loowo tovi kuvinono uumjunpinogaikikono.

³ Neya duu'nyulo. Kevu yovo maiyokwe imo'nodupudo pugaikul a'mwo abolo pubuuravuro jul'nyo tonyuno aro kuudo nyaupiyo. Oo nuu yovo aguto ma'dumdo tova'nyuno tov a'mwo abolo su tobuuro mi yonuwapi yodupudo tobuuravuro jul'nyo ton ku'nono mamollukwo'mwalmonyugono. Pugaikul su toro kuudo tokwe nyoukuu'najunumwalpiyo.

⁴ Kevu yiuwi'nokai pwolno puru'monodo togaikul kemi womdo go'no go'no yodupudo tonyuno ilaiyo'mdukono oo kaiya'nodo'mdukoneyokwe tovino neya jainyubwo'nogaulo. Aki aro kuudo nyau'mwalpiyo. Oo moro womdo tov a'mwo abolo punyuro womdo yodupudo tovi neya uuwolowono. Kuudo nyau'mwalpiyo. Toro kuvi kuruv kevnokweyogaikulluro womdo go'no go'no yodupudo tonyu neya yainyunopi kemi womdo sugudo tonyuno'gwowi ilaiyo nokwo ibwosunmwalpinogaikikono.

⁵ Su tov aro tovinokwono. Kevu yiuwi'nokai pwolno puru'monodo togaikul kemi pasudo mujumovla'mdupudo tovida'ai lukomgu jul'nyo abai'mopi tonyu kevnokwe togaikul kuvinono mollukwo'mwalpinogano.

⁶ Aki kevu Gooti toolluro yogalo tokwe yodekubwasodopure tovi wuu'nodupudogaikikono. Toro togaikul kemi a'mwo yodekubwasodupudo su tekwojai yonugovlaiyo'moneyokwe sugudo tollovo neya duuwiyogaulo.

⁷ Kevu Gooti toollu ku'nono mamolloguulludapipinogaikikono. Su toro tovino a'mwo pweku, Oo nuu Gooti toollu nokwo molloguulludapimonyugono, kuudo sau'bi su tekwogu guvnokwe tooku nyoukuu'najunbiyo. Kuudo neya jaullulo. Kemoro ikulwiyo avlollosupi tovuro no ton judo pumgu'aro mai'nupinogano. Toro kuvi kuruv ikulwiyo avlollosubi su tov no ai'no'ji toga yiuno aval'nodo to'no ki'nodowo'jure tovi mulomapinogaikikono.

⁸ Su toro to'busuko kubalno a'mwo pwol gami kuudo uumdo tooraino to'no kuumjuno'ji su tool kuudo uumdo su tooravuro no ai'no'ji tov nomulomaronekono. Gamoro no ai'no'ji su tov a'mwo tekwo kaiyako yiunokuudo i'nopiyowo'ji nobolonekono. Toro kuvi kuruv a'mwo pwol Gooti toolluro Kuullo toollu kuumjuno'ji su toolno'gwowi Kuullo su toolluro no ai'no'ji tollovo nomulomaronekono. No su tollovo a'mwo tool aiyo yiunokuudo mujomwekovlaiyo'moneyokwe tov nomaronekono.

⁹ Toro te nevu sugupasudo tollovai molludo'movlaiyo'moneyokwe tovino burawo nyumwala'jo. Aro tovinokwono. Nevu sugupasudo tollovai molludo'movlaiyo'mo mimwogapiya'ji tov lukomgu gamoro no tollovaibusuko kuvinono nomulomaranonogano.

¹⁰ Toro tovino tov nevu yiuwi'nokai toga buro'nyo buro'nyo a'mwo abolodeyo tonyu ilaiyo mollo'mo kudo'aiko ausanekubweyo'ji toga ilaiyo kuvinono neya amollogawano. Toro kuvi kuruv nevuge avalo Jisasolluno kuudo uubweyodupudo tonyuno'gwowi ilaiyo pasudo tov muunyu toru'aro guureji neya igologawano.

Poololluro aiyowo'mo yogalo adumul'mwojoka tovinokwono

¹¹ Pas akavuro aiyowo'mo do'gwapiyo toruda'ai puukwollo tov nuvnokwe toonyu sokwollaikubwemono. Kevu doonyulo. Nuvnokwenyuro ato tokwe puukwollo judo'no judo'no sakwollumo akaro bwotonyorogano. Su toro toorogai sokwollaikubwemono.

¹² Neya duu'nyulo. A'mwo pworo lakulkulako do'nyo'mo tovino guureji dumuurolo'mdupudo su tooraino nuu me'no aikudumonyugono. A'mwo su tooro Juu a'mwo abolo punyu ilaiyo igollo'moneyokwe aro dumuurolo'mdupudorogano. “Kevu a'mwo toorekul lakulkulako neya dodo'nogaulo.” Dumuurolo'mdupudorogano. A'mwo su toro dumuurolo'mdupudo tooro aro tovino luko yodupudorogano. “Oo nevu i'noguropte tovi aboloka Krais toolluno kuuguudo tokwe amoruudomolla'ji tov nemi kaiyako nyanekullugolpiyo.” Luko yodupudorogano. Toro tovino tov a'mwo su tooro kev tekwojekullu lakulkulako neya do'numwalpino'moneyokwe daikumuurolo'mdupudorogano.

¹³ A'mwo lakulkulako do'nodupudo kevnokwe su tooro loowo tonyu ku'nono muumjunodupudorogano. Toro kworo kuruv kevu lakulkulako ado'nupi tekwojekullu'aro ilomoropunyu yapi aro dupinorogano. “Oo a'mwo lakulkulako ado'nadokwopo su tekwojo nemi nekumjunodupudorogano.” Su toro tomgu'aro kevnokwe tooro ilomodomoropinyo'mo winodupudorogano.

¹⁴ Nuvnokwe toonyuno'gwowi ilomodomoropunyu miyamonyugono. Toro kwonyu kuruv yiuno nemi Aguto Jisas Kraisol i'noguropte tovi aboloka su toolluno to'no ilomodomoropiyamonyugono. Krais su toolluro i'noguropte tovi aboloka tov noonyumwonyu kwako akavida'ai pasudo tooro me'no amovoromiyoguroptowosungopo toorobusuko nonyumo'nodupudorogano. Aki nuu kwonyu kuruv i'noguropte tovi me'no amovoromiyoguroptovanubwengiko toonyubusuko kwako akavida'ai pasudo su toorai aval'no wimo'nodumdonyugono.

¹⁵ Toro te kevu kuudo neya jaullulo. A'mwo pwol lakulkulako me'no ado'nyungikoldeyo oo mado'nyungikoldeyo kuruv yiuwi'nokai su toval aguto mimo'nodubulovakono. Toro kuvi kuruv Gooti toolluro a'mwo abolo muuduko imo'nanekubweyodowodo su to'gwowi agutokwono.

¹⁶ Toro te yiuwi'nokai a'mwo abolo kuuguudo akavi kuumjunpi tonyu Gooti toolluro sumwoluko kavo wosunyo'mo tokwe'aro gamoro kalo mamwonyodowodo tokwe'aro toval nuubwemwalonekono. Aki a'mwo abolo su ton aiyogasuro Gooti toolluro a'mwo abolo kuunodo Isuraiyol tonbusuko imo'nodupudogano. Toro imo'nodopure kunyu kuruv aval'no nuubwemwalonekono.

¹⁷ A'mwo pworo mi galogunyukuuronumollodopure tovida'ai imuulo pun moro kulako tovi nuwo'dupudogano. Imuulo su ton aro tovino kuu'maiyo wuuduuwallo'mogano. Nuu Krais Jisasolluro kuunodonyugoneyo'mo tovino wuuduuwallo'mogano. Toro kuvi kuruv agada'ai a'mwo pworo jul'nyo kuuno nubweyo'mo yodopure su toorai kevu neya duumjukurogaulo.

¹⁸ Mi avalobuuravoo, nemi Aguto Jisas Kraisolluro yasuwa'wino sugumaluko tov kemoro kuullo tobuurai nokwo ikubwemwalonekono. Nebal'nodokwono.