Galesiya 5 - Gooti Toolluro Yogalokwono

Krais tool loowo tovi dolago tomuuda'ai nemi me'no abomollurolovonekumokalokwoka tovinokwono

¹ Nevu Moosesolluro loowo tovi ki'nato womdo nyumwala'jokweyo'mo Krais tool loowo su tovi dolago tomuuda'ai nemi me'no abomollurolovonekumokalokwokaikono. Toro te a'mwo pworo Moosesolluro loowo tovi ki'nato womdo yo'mo kemi aki aiko te noulomerekumwallumwalpiyo. Su toro nekullupiyokwe tovino kevu jurogudo neya dodavogaulo.

² Neya duu'nyulo. Nuu Poolonyu aro ikudumo'mokwono. Pworekul aro kuudo yau'dupudorekikono. Oo nevu Moosesolluro loowo tovi uumjunowa'ji nemi lakulkulako tov ado'na'ji toonol Gooti toolluro sumdo tovi sugudo imo'nanonogano. Kevu pworekul su toro kuudo saupi tov Krais tool kemi ku'nono maikullo'mwojonekono.

³ A'mwo su toro kuudo saupi toorekullu nuu aki aiko te duudapi yogalo aro ikullumo'mokwono. Kevu kuudo yau'dupudorekikono. Oo nevu Moosesolluro loowo tovi uumjunyo'mo nemi lakulkulako ton ado'na'ji tov Gooti toolluro sumdo tovi sugudo nyumo'nanonogano. Su toro kuudo saupi toorekul Moosesolluro yiuwi'nokai loowo judo'no judo'nodo kunyu kuruv yiunokuudo neya duumjunogaulo.

⁴ Kevu Gooti toolluro sumdo tovi sugudo imo'nyo'moneyokwe Moosesolluro loowo su tonyu uumjunyokwe toorekul Krais toolluda'ai me'no yeru'mdeyapinodupudorekikono. Aki toro toorekul Gooti toolluro yasuwa'wino sugumaluko tovida'ai manyu tomuu me'no bwolo'dapudorekikono.

⁵ Toro kuvi kuruv nevno'gwowi Gooti toolluro Kuullo tool jurogudo danekullumwojodowo'jure tokwe yomjomwekovla'mdowadonogano. Toro te nevu Krais toollu kuudo uubweyodowado tonol lukomgu Gooti toolluro aro anekudoneyokwe tovino sogwollo to'no kinyokwenogano. “Oo kevu moro a'mwo abolo sugudogaikikono.” Su toro anekudoneyokwe tovino sogwollo to'no kinyokwenogano.

⁶ Kuudo neya jaullulo. A'mwo pwol Krais Jisasollu me'no uuguro'mwonyodowodo tool gami lakulkulako tov ado'no'jo'mdeyo oo mado'no'jo'mdeyo kuruv su toval aguto mimo'nodubulovakono. Toro kuvi kuruv aguto to'gwowi arokwono. A'mwo pwol Krais Jisasolluno kuudo uubweyodowodo su tovi'aro a'mwo abolo punyuno kalo buuropino winmwalono to'gwowi agutokwono.

⁷ Muudu'nodo toga kevu Krais toolluro puuto tovi ilaiyo kuumjunyajupogaikikono. Toro kugaikul kuruv aga'no'gwowi a'mwo pworavuro adaikumjukuropo tovida'ai kevu nebal'no yogalo tovi po'dogalo muumjunmwakopogaikikono.

⁸ Neya duu'nyulo. Puuto pumgu'aro uumjunyo'mo kuudo su tov Gooti me'no adekumaroka toolluda'ai bodowodo'maiyo.

⁹ Kuunano kuuguudo yodekubwasodupudo su tov yis to'busukokwono. Yis yiuno kula'nyo kwekwo kuruv yiuwi'nokai bret toollu aiyowomno kuullo'mowopiyowo'ji nomunopiyonokwono. Su toro to'busuko kubalno kuunano kuuguudo yodekubwasodupudo su tekwo yiuwi'nokai Jisasolluro mollu'bwoto tobuurai aiyowomno nobomje'nugoulawo'jo.

¹⁰ Nuu kemino aro kuudo yaikuu'dumdonyugono. Kevu Aguto toollu me'no uuguro'mwonyodupudo togaikul kuudo judo pumgu'aro su toorai ku'nono muumjunpinodeyo. Kemino su toro kuudo yaikuu'dumdo kuvi kuruv a'mwo pwolno'gwowi kemi molloguurekudapiyo'moneyokwe kuuguudo judo pumgu'aro su toorogai me'no sodekubwasadopikekono. A'mwo sodekubwasadopiko tool ala'mwoldukoneyokwe tovino kuudo miyau'mwakono. Toro kuvi kuruv a'mwo su tool gami kirumwallo'moneyokwe tov noma'mwalonekono.

¹¹ Mi avalobuuravoo, aga'no'gwowi a'mwo tooro lakulkulako neya ado'nupureyokwe tovino nuu mamoruudodumdonyugono. Nuu su toro tovino kuuno amoruudo'mujuko'mno'juki a'mwo pworo mi kaiyako miyanyugolopujukonyugono. Aki Krais toolluro i'noguropte tovi aboloka su tovino kuuguudo tokwe nuu mamoruudo'mujuko'mno'juki a'mwo su toorai surodo mi'gwolo'mujukonyugono. Toro kuvi kuruv nuu Krais toolluno kuuno moruudodumdonyugono. Toro moruudodore tovi wuu'nyo'mo mwinodupudo su tooro mi kaiyako yanyugolodupudorogano.

¹² Toro te a'mwo lakulkulako do'nyo'mo tovino jul'nyo ikubweyodupudo su tooro kevnokwero kemi lakulo tooraida'ai yiuwi'nokai kulako ton yiunokuudo adovelowiyodukwopipi tov nuu ilaiyo imonyugono.

¹³ Miyobuuravoo, neya duu'nyulo. Kevu Moosesolluro loowo tovi ki'nato womdo wiyodopure togaikullu Gooti tool nobomollurolovekumokalokwiyo'moneyokwe me'no adekumarokaikono. Kevu ki'nato womdo tovida'ai me'no birolo'nugolokwodupudo togaikulluno tov kaiya'no kuudo aro nyau'mwalpiyo. Oo nevu loowo tovi dolago tomuu mamwalodowado tonolluno tov nemi kuudo uumdo tovuro kaiya'no pasudo toorai nokwo kirounugovla'mwalanonogano. Kevu kaiya'no kuudo su toro nyau'mwalpiyo. Toro kugaikul kuruv kalo buuropino winyo'moneyokwe pasudo su to'gwowi kevu Jisasolluro a'mwo abolo togaikul imgu amgu neya duuwinogaulo.

¹⁴ Yiuwi'nokai Moosesolluro loowo judo'no judo'nodo ton yogalo yiuno puru'monodo tovi wo'dupudogano. Yogalo su tov arokwono. “Guvu yiuwi'nokai a'mwo abolo pwolno puru'mono kuuru'ma'bi su tonyuno kalo buuropino neya domollono. Guvnokwekujuno kalo buuropino gujunodowodo to'busuko kubalno a'mwo abolo tonyuno aval'no neya domollono.” Dodowodokwono.

¹⁵ Toro kuvi kuruv kevnokweyogaikul imgu amgu yogalo youllajunopi tu'mamolo nyunumwalpiyo. Kevu su toro supi tov kaiyako yiunokuudo nyu'nopipiyokwe tovino wako neya dou'nogaulo.

Kuudo uumdo tokwe'aro Gooti toolluro Kuullo tooke'aro tovallunokwono

¹⁶ Moro yogalo tov aro aikudumwakono. Kevu Gooti toolluro Kuullo tool mollubworekumokavla'mdowo'jure tovi neya duumjunogaulo. Kevu kuvinono kuumjunpi tov kemoro kuudo uumdo toolluro noonyumwonyu ikullunodowodo su toorai muumjunpinogaikikono.

¹⁷ Kuudo neya jaullulo. Kuudo uumdo toolluro ikullunodowodo su tooro Gooti toolluro Kuullo toollu molo wiyodupudorogano. Aki Gooti toolluro Kuullo tool kuudo uumdo su toollu molo wiyodowodekono. Yiuwi'nokai su tooral imgu amgu molo inodubulorakono. Toro te kuudo uumdo tool ikumjuku'dowodo tovino tov kevu kuudo ilaiyo tollovai uumjunyo'mo ikullunodowo'jure kuvi kuruv ku'nono muumjunodupudogaikikono.

¹⁸ Toro kuvi kuruv kevu Gooti toolluro Kuullo tool mollubworekumokovla'mdowo'jure tovi kuumjunpi to'gwowi Moosesolluro loowo tovi dolago tomuu mamwalpinogaikikono.

¹⁹ Nevu kuudo uumdo toolluro pasudo tooraino nyau'mwakuuwono. Kwonyalo toorogai'aro kaiyako igolamo'nodupudo pasudo toorogai'aro julpasudo toorogai'aro

²⁰ kuunano gooti toorai ilomoropiyo'mo toorogai'aro kuuloka pasudo toorogai'aro molo inyo'mo toorogai'aro yogalo youllajunyo'mo toorogai'aro kwekuullu kuudo toorogai'aro surodo'mo toorogai'aro ga'gaivolo kuudo toorogai'aro molleru'mdovekwapiyo'mo pasudo toorogai'aro yeru'mdeyapinyo'mo toorogai'aro

²¹ kwekuullu kuudo gabovo toorogai'aro imo'wonyo anpi tovida'ai amomo pasudo toorogai'aro lubullu doto deroungovlaiyo'mo pasudo toorogai'aro aki pasudo su toorobusuko pworogai'aro yiuwi'nokai su tooraino nevu kuudo nyau'mwakuuwono. Toro te nuu sumdomgu duudapi yogalo me'no adaikullo tovi aki aiko te aro ikudumo'monyugono. A'mwo abolo kaiya'no pasudo su toorai mujumovla'mdupudo ton aguto Kig Gooti toolluro mido mollomwalo tovi dolago tomuu ku'nono maulomwalpinogano.

²² Toro kuvi kuruv a'mwo pwol Gooti toolluro Kuullo toollu kuumjungovlawo'ji toolluro sulo ki'nono tono'gwowi arogano. A'mwo abolo tonyuno kalo buuropino winyo'mo pasudo tokwe'aro poowokalago kuunodo tovida'ai ilaiyo yo'mo pasudo tokwe'aro sumwoluko kavo wosunyo'mo pasudo tokwe'aro jul'nyo bwi'mo'mdowo'jure kuga kuruv muugollu'meyo'mo pasudo tokwe'aro a'mwo abolo tonyuno ilaiyo mollo'mo pasudo tokwe'aro yanyago wimo'nyo'mo pasudo tokwe'aro sugupasudo tovi gudupolallo'mo pasudo tokwe'aro

²³ aki a'mwo abolo tonyu kavo uubemwojo'mo pasudo tokwe'aro aki kevnokwenyuro kulako tovi pi'mwono mollomwallunyo'mo pasudo tokwe'aro togano. Pasudo su toro tonyu molludo'movla'mdopure tonyu nuumjukullo'moneyokwe loowo puru'monodo kuruv nonagutokwono.

²⁴ Aki nevu Krais Jisasolluro a'mwo abolo tonol kwollu me'no uuguro'mwonyodowadonogano. Toro tonolluro kuudo uumdo toorai i'noguropte tovi me'no amovoromiyoguroptowosunugoporogano. Kuudo uumdo su tooravuro pasudo toorogai'aro kwanyu sumdo kinuwiyodupudo toorogai'aro su toorai Krais tooke i'noguropte tovi me'no amovoguroptowosunugoporogano.

²⁵ Toro te nevu Gooti toolluro Kuullo toollu'aro aiyo me'no imo'nodowadonogano. Toro tonolluno tov Kuullo su toolluro mollubworonekumokavla'mdowo'jure tovi neya uumjungovla'mwalanonogano.

²⁶ Nevu ilomoropunyu nyumwolowa'jo. Aki a'mwo abolo tobuurai surodo nyu'gwolmwala'jo. Aki nevu imgu amgu a'mwo abolo punyuno kwekuullu kuudo nyau'mwala'jo.