Galesiya 4 - Gooti Toolluro Yogalokwono

Nevu ki'nato womdo sajuuwo tonol Krais toollu'aro Gooti toolluro kwoloraiyo kuunodo wimo'nodowado tovinokwono

¹ Moro kuuguudo tovino po'dogalo ikudumo'mokwono. Kwolaiyo pwekwo gami ganumiyago toolluro yiuwi'nokai tonyu nomaronekwogano. Toro kwekwo kuruv aguto yere magullodowo'jure toga'no'gwowi a'mwo ki'nato womdokwe pwekwobusuko to'no imo'numwalonekwogano.

² Toro tekwo gami mollovi'mwojomokavlaptokwe toorogai'aro a'mwo moduvomwallokwe toorogai'aro su toorai dolago tomuu mwalmwalonekwogano. Toro mwalno mwalno yowo'ji iruko pullugwoji yiuno gami ganumiyago toolluro me'no ajesungiko toga'no abilai'mowo'ji toga'no'gwowi a'mwo moduvomwallokwe su toorai dolago tomuuda'ai birolo'nugolokwonekono. Toro birolo'nugolokwowo'ji gami ganumiyago toolluro yiuwi'nokai tonyu kuvinono nomaronekono.

³ Su toro to'busuko kubalno ne kunol kuruv kwoloraiyo tobuuronolbusuko kwako akavida'ai loowo maluko'nyo su tooro mollubworonekumokavla'mdopure tovi ki'nato womdo kwiyajuwonogano.

⁴ Toro kuvi kuruv Gooti toolluro ajesungiko tov kuvinono abai'movoka toga gamoro Kwolaiyo toollu kwolomoropiyabokaikono. Kwolaiyo kwolomoropiyaboka su toollu abolo puruv somaroka su tool Moosesolluro loowo tovi dolago tomuu abwollumo'nokaikono.

⁵ Su tool nevu Moosesolluro loowo tovi dolago tomuu amwallajuuwo tonollu mobirolovonekumallo'mo abwollumo'nokaikono. Aki Gooti tool gami kwolaiyo toollu kwolomoropiyaboka su tov nevu gamoro kwoloraiyo wimo'nodowa'jure tonollu monekullumwojo'moneyokweyokwono.

⁶ Toro te nevu Gooti toolluro kwoloraiyo me'no wimo'nodowado tonolluno tov Gooti tool gamoro Kwolaiyo toolluro Kuullo tool nemi poowokalago tonyu me'no kuulomonekwopiyabodowodekono. Kuullo su tool nemi me'no kuulonekumwalodowodo tovino tov nevu Gooti toollu guureji aro wuudodowadonogano. “Mi Nyunumiyago Doweloo!” Wuudodowadonogano.

⁷ Toro te kevu ki'nato womdokwe kuuno mimo'nodupudogaikikono. Toro kugaikul kuruv Gooti toolluro kwoloraiyo me'no wimo'nodupudogaikikono. Toro te kevu gamoro kwoloraiyo kuunodo me'no wimo'nodupudo togaikulluno tov kemi Tellunumiyago Gooti toolluro noonyumwonyu subuu'yamju ikudodowodo su ton kuvinono nomapinogaikikono.

Poolol Galesiyada'ai Jisasolluro a'mwo abolo tonyuno kuudo kwolallo sourukwapiyajuko tovinokwono

⁸ Sumdomgu kevu Juu tooravuro miyaikuuwosunodupudo togaikul Gooti toolluno kuudo yere miyouromallajupogaikikono. Su toro toga kevu kuunano gooti toorai ki'nato womdo kwiyajupogaikikono. Kuunano gooti su tooro nebal'no mimo'nodupudo kworai kuruv ki'nato womdo kwiyajupogaikikono.

⁹ Toro kuvi kuruv aga'no'gwowi kevu Gooti kuunodo toolluno kuudo me'no youroma'dupudogaikikono. Toro te aro neya dumonyugono. Gooti toolno'gwowi kemino kuudo me'no yaikuu'dowodekono. Toro tovino tov kevu kwako akavida'ai kuudo maluko'nyo su tooraiyomno aki aiko te nyouragunyumo'numwalpiyo. Kwako akavida'ai kuudo maluko'nyo su tooro wollainyorogano. Aki su tooro kemi ku'nono maikullo'mwojupinorogano. Toro tovino tov kevu su toro toorai aki aiko te ki'nato womdo nuuwimwalpiyo.

¹⁰ Kevu Juu tooravuro miyaikuuwosunodupudo togaikul Gooti toollu ilaiyo igollo'mo ikullunodowodogaikikono. Toro togaikul Juu tooravuro iruko aguto tollugwojogai'aro lobako toorogai'aro lubullu doto aguto togai'aro kworomo aguto togake'aro su tollugwojai uumjunodupudogaikikono.

¹¹ Toro togaikulluno nuu kuudo kwolallo aro yourukwapiyodumdonyugono. Oo kemi akuuto toru moro womdo sajo tov yasuwa'no avlaiyajuko'mdukono. Kuudo kwolallo yourukwapiyodumdonyugono.

¹² Mi avalobuuravoo, nuu guureji aro ikudumo'mokwono. Kevu Juu toonolluro miyaikuuwosunodowado togaikul nuvubusuko neya jumo'nogaulo. Su tov aro tovinokwono. Nuu kev kugaikulbusuko loowo tonyuda'ai me'no abirolo'nugolokwonyugono. Toro toonyubusuko kubalno kev kugaikul kuruv aval'no neya jumo'nogaulo. Nuu sumdomgu kemi kuuguudo sugudo tokwe amodekumollajo toga kevu kaiyako puru'monodo kuruv miyanyugollajupogaikikono. Toro kugaikul kuruv yiuno ilaiyo to'no sanyugollajupogaikikono.

¹³ Kevu kuudo nyau'mwakovo. Sumdomgu moro kulako tovi nobollo puruv amaro tovino tov kemi abekuru'maronyugono. Toro bekuru'ma'no sumoneyokwe kuuguudo sugudo tokwe kemi amodekumollajonyugono.

¹⁴ Su toro toga moro kulako tov jurogudo mimo'noduke tovino tov kevu jul'nyo subwosunyajupogaikikono. Toro togaikul mino biyolo anuu'mwojopujuko kuvi kuruv yiuno ilaiyo to'no amollonumaropogaikikono. Toro te kevu Gooti toolluro ensel pwollubusuko mi ilaiyo to'no amollonumaropogaikikono. Aki Krais Jisasol gavnokwe toollubusuko kevu mi ilaiyo to'no amollonumaropogaikikono.

¹⁵ Kevu muudu'no ilaiyo amollonumaropo toga kemi poowokalago tokwe ilaiyo subwosunyajupogaikikono. Toro kuvi kuruv aga'no'gwowi kemoro ilaiyo subwosunyajupo su tov me'no younopiyodowodokwono. Neya duu'nyulo. Nuvno'gwowi kemino kuu'maiyo toru'no aro dodoluwosodumdonyugono. “Oo a'mwo abolo su ton mi nyo'mwojo'mo winodupudogano. Aki toro ton mi nyo'mwojo'moneyokwe kevnokwenyuro sumdo kun kuruv galowojomaropi nokwo anyabopujukogano.” Nuu kemino su toro dodoluwosodumdonyugono.

¹⁶ Toro kuvi kuruv aga yogalo nebal'nodo akakwe kemi amojurogolekumolladokwono. Toro mojurogolekumollodo'mure tovi'aro kevu mino aro kuudo nyanuupiyo. Oo a'mwo su tool nemi ikomago donekullumo'nadopiyo. Kuudo nyanuupiyo.

¹⁷ A'mwo kuunano ibwasokwe tooro kemi ilaiyo yaikullugolodupudo kuvi kuruv nojolukuulovekumallo'mo to'no kuudo yau'dupudorogano. Aki toro tooro kev togaikullu kuurupto tovi kwa'mgu tomuu kirekumwallo'mo to'no winodupudorogano. Su toro winodupudo tov aro tovinokwono. Kevu a'mwo su tooraino to'no neya avorugwo'mo'napureyokwe kuudo yau'dupudo tovinokwono.

¹⁸ A'mwo pworo kavlo sugudo tovida'ai kemi ilaiyo saikullugolpi tov kevu ilaiyo to'no ibwosunmwalpinogaikikono. Toro to'busuko kubalno kevu nuu kwonyuno kuruv yiuwi'nokai toga ilaiyo neya janyugologaulo. Yiuno nuu kevuge mwalodo'mure toga'no ilaiyo nyanyugolmwalpiyo. Toro kugaikul kuruv yiuwi'nokai toga aval'no neya janyugologaulo.

¹⁹ Oo moro kwoloraiyo togaikulbusukobuuravoo, nuu kemi ikullo'mwojo'moneyokwe dado aiko te subwosunmwakono. Moro dado ibwosunodumdo su tov abolo puruv kwolaiyo yomallo'mo toga dado ibwosunodowodo to'busukokwono. Dado ibwosunodumdo su tov aro tovinokwono. Kevu Krais gavnokwe toolbusuko yere mimo'nopiyopiyodopure tovino tov nuu jul'nyo kuuno ibwosungovla'mwalmonyugono.

²⁰ Kalokwono, nuu kemi daikumul'mwojo'mo nyunodowodo kuvi kuruv aga kevuge mamwakono. Nuu kevuge kuvinono amwalo'mujuko'mno'juki yogalo kavenodo togai nokwo adaikumul'mwojo'mujukonyugono. Toro kwonyu kuruv moro yogalo amojurugolekumollumwako tov aro tovinokwono. Nuu kemi adadomgu'aro mollekuvo'dogalmonyudukoneyokwe tovinokwono.

Yovekurajo puruv Hegaiyokwe'aro Sarakwe'aro tovallunokwono

²¹ Kevu a'mwo abolo pugaikul Moosesolluro loowo tovi dolago tomuu kuuno mwallo'mo ikullunodowodogaikikono. Toro ikullunodowodo togaikul loowo su tovuro yogalo tovino kavlo tov kuudo po'dogalo miyouroma'dupogaikikono.

²² Gooti toolluro yogalo sakwollungiko puruv aro tovinokwono. Eburaiyamol kwolaiyo pworalokwekono. Kwolaiyo pwol abolo ki'nato womdokwe tovuro somarokaikono. Aki pwol abolo ki'nato womdo miyajuko tovuro somarokaikono. Abolo ki'nato womdokwe su tovino yovo tov Hegaiyovokwono. Abolo ki'nato womdo miyajuko su tovino yovo tov Saravokwono.

²³ Abolo ki'nato womdokwe su tovuro kwolaiyo somaroka tool kwako akavida'ai tonyuro yawosunodupudo tomgu'aro sumo'nokaikono. Toro kuvi kuruv abolo ki'nato womdo miyajuko tovuro kwolaiyo somaroka toolno'gwowi Gooti toolluro subuu'yamju tovida'ai sumo'nokaikono.

²⁴ Abolo su toval Gooti toolluro subuu'yamju aduuwiyoka tovalluno yovekurajo'movakono. Abolo ki'nato womdokwe Hegaiyov muumuudo Sainai toolluda'ai abokakwono. Abolo su tovuro kwoloraiyo imo'nodupudo ton yiuno ki'nato womdo to'no wimovla'mdupudobuurogano. Aki a'mwo abolo subuu'yamju su tovi dolago tomuu mwalodupudo kun kuruv yiuno ki'nato womdo to'no wiyodupudogano.

²⁵ Toro te Hegaiyov kwako Arebiyada'ai muumuudo Sainai tooke'aro kwako akavida'ai wagwolago Jeruusalem tokwe'aro tovalluno nekuduuwallodowodokwono. Su tov aro tovinokwono. Muumuudo su toolluda'ai Moosesolluro loowo amaroka tovi dolago tomuu mwalodupudo ton ki'nato womdo yodupudogano. Su toro to'busuko kubalno kwako akavida'ai wagwolago Jeruusalem tovi kuulomwalodupudo kun kuruv Moosesolluro loowo tovi ki'nato womdo wiyodupudogano. Hegaiyov su toro tovino nekuduuwallodowodokwono.

²⁶ Toro kuvi kuruv Eburaiyamolluro abolo ki'nato womdo miyajuko Sara'gwowi Gooti toolluro muunyu kai'muuda'ai wagwolago Jeruusalem gabovo tovino nekuduuwallodowodokwono. Su tov aro tovinokwono. Wagwolago su tovi kuulomwalodupudo ton ki'nato womdo miyodupudo to'busuko kubalno abolo su tov ki'nato womdo miyajukokwono. Toro te abolo Sarav nevu ki'nato womdo miyodowado tonollu nemi nelluneyago to'busuko nekullumo'nodowodokwono.

²⁷ Gooti toolluro yogalo puruv aro sakwollungikokwono. “Oo abolo pu'guu kwolluko'guugono. Toro tobuuku kwolaiyo miyawosunodumdo ku'guu kuruv gumi poowokalago tokwe ilaiyo neya jogawono. Guvu kwolaiyo yomallo'mo yiuno puga'nodo kuruv guno mibwosunodumdo to'guu ilaiyo de'dato dodogawono. Su tov aro tovinokwono. Abolo kwolluko sumo'nyajudo tobuukujuro kwoloraiyo ton bwotonyago imo'nupinogano. Gumoro kwoloraiyo su ton yiuwi'nokai abolo kwolo kurukwe tonyuro kwoloraiyo tonyu uuwolovopi bwotonyago kuunodo imo'nupinogano.” Sakwollungikokwono.

²⁸ Mi avalobuuravoo, kevu Eburaiyamolluro kwolaiyo Aisakolbusuko imo'nodupudogaikikono. Su tov aro tovinokwono. Aisakol Gooti toolluro subuu'yamju Eburaiyamollu aduuwiyoka tovida'ai sumo'nokaikono. Su toro to'busuko kubalno kev kugaikul kuruv Gooti toolluro subuu'yamju aduuwiyoka tovida'ai bodupudo togaikulluno tov gamoro kwoloraiyogaikikono.

²⁹ Kuudo neya jaullulo. Kwolaiyo Isumaiyolol kwako akavida'ai tonyuro yawosunodupudo tomgu'aro sumo'nokaikono. Toro tool Gooti toolluro Kuullo toolluro jurogudo tovida'ai sumo'noka kwolaiyo Aisakollu kaiyako sugollajukekono. Su toro to'busuko kubalno aga a'mwo abolo Moosesolluro loowo tovi gudupola'dupudo su ton kevu Gooti toolluro Kuullo toolluro jurogudo tovida'ai gamoro kwoloraiyo imo'nodupudo togaikullu kaiyako yaikullugolodupudogano.

³⁰ Su toro tovino Gooti toolluro yogalo tov aro dodowodokwono. “Abolo ki'nato womdokwe su tokwe'aro gami kwolaiyo tooke'aro tonallu domovomjapiyono. Guu lukomgu abolbi toga abolo su tovuro kwolaiyo tool gumoro kuto ivito tonyuda'ai pun nomaro'jo. Toro kuvi kuruv yiuno gumoro abolo ki'nato womdo miyodowodo tovuro kwolaiyo toolno'gwowi gumoro aiko toru marowo'ji yiuwi'nokai kuto ivito ton neya maronekono.” Gooti toolluro yogalo tov su toro dodowodokwono.

³¹ Toro te miyobuuravoo, nevu abolo ki'nato womdokwe tovuro kwoloraiyonolmaiyo. Toro kuvi kuruv abolo ki'nato womdo miyajuko su to'gwowi nevu gamoro kwoloraiyonogano.