Galesiya 3 - Gooti Toolluro Yogalokwono

Moosesolluro loowo tovi uumjunyo'mo tokwe'aro Krais Jisasolluno kuudo uubweyo'mo tokwe'aro tovallunokwono

¹ Oo Galesiyada'ai Jisasolluro a'mwo abolo togaikul junorukuudo yau'dupudogaikikonoo! Numoro me'no sodekubwasajo tovida'ai Jisas Kraisol i'noguropte tovi amovoguroptowosopo tovino kuu'maiyo toru'no me'no abomollulupto'naikubweyowokwono. Toro tovi kevnokwe togaikulluro sumdo tokwe me'no kwonomaropogaikikono. Toro kuvi kuruv a'mwo pworavuro kuunano youkuu'naikudodopure tovi kevu kaduko me'no kwimwakopogaikikono.

² Nuu yamuugojo yiuno puru'monodo tov ikudoganmo'mokwono. Kevu Moosesolluro loowo tonyu pi'mwono uumjunodupudo tovida'ai Gooti toolluro Kuullo toollu amaropogaikuldukono oo Krais toolluno me'no wuu'no'mno kuudo kuubweyopo tovida'ai Gooti toolluro Kuullo toollu amaropogaikuldukono? Kevu Gooti toolluro Kuullo su toollu amaropo tov Moosesolluro loowo tonyu pi'mwono uumjunodopure tovida'ai amaroporogaikulmaiyo. Toro kugaikul kuruv yiuno Krais toolluno kuuguudo sugudo tovi wuu'nyuno sumaveyokwe kuudo kuubweyopo tovida'ai to'gwowi Gooti toolluro Kuullo su toollu amaropogaikikono.

³ Sumdomgu kevu Gooti toolluro Kuullo toolluro jurogudo tovi'aro aiyo sumo'nopogaikikono. Toro kuvi kuruv kevu sumdomguda'ai su tovi molluduvolodupu aga'no'gwowi kevnokweyogaikulluro jurogudo tovino kuudo uubweyodupudogaikikono. Kemoro kuudo su tov junorukuudo kuunodokwono.

⁴ Neya duu'nyulo. Kevu Krais toolluno kuudo uubweyodupudo togaikullu a'mwo abolo pun kaiyako yaikullugolodopure tovida'ai danyu'nyuwuulo ton mo'movla'mdupudogaikikono. Toro mo'movla'mdupudo su tov yasuwa'nodo'mo'maiyo. Toro kugaikul kuruv kemoro Krais toolluno kuudo uubweyodupudo tovi yere amolluduvolpi to'gwowi danyu'nyuwuulo ton yiuno yasuwa'no to'no mo'movla'mwalpinogaikikono.

⁵ Kuudo neya jaullulo. Gooti tool gamoro Kuullo toollu ikullabino sumaiyokwe kemi akuuto toru duuwallo jurogudo togai womdo ikullodowodekono. Kemi su toro ikullodowodo tov kevu Moosesolluro loowo tovi uumjunodupudo tovida'aiyo'mdukono? Awiyo. Toro kuvi kuruv kevu kuuguudo sugudo tovi kuudo me'no kuubweyopo togaikulluno tov Gooti tool su toro ikullodowodekono.

⁶ Su tov muudu'nodo toga Eburaiyamollu kwimo'noka to'busukokwono. Eburaiyamol Gooti toolluno kuudo kuubweyokaikono. Toro uubweyoduke toolluno Gooti tool, “Sugudekono,” do'no ilaiyo amollomarokaikono.

⁷ Toro te kevu aro kuudo neya jouromarogaulo. A'mwo abolo ton yiuno Gooti toolluno kuudo uubweyodopure tovida'ai to'no Eburaiyamolluro kwikweyago kwoloraiyo kuunodo wimo'nodupudogano. Su toro kuudo neya jouromarogaulo.

⁸ Aki Gooti tool aiyoga aro me'no ajesokaikono. A'mwo abolo Juu tooravuro miyawosunodupudo ton kuudo kuubwepi tovi'aro to'no gamoro sumdo tovi sugudo wimo'nupinogano. Toro kuudo kuubwepi tovino kuuguudo sugudo su tov Gooti tool aiyoga Eburaiyamollu me'no amoruudokaikono. Toro amoruudoka su tov aro sakwollungikokwono. “Moro sugudo agubwemo akav yiuwi'nokai a'mwo abolo kwako akavi gomno gomno amwakopo kunyudaiyo'mo agubwemono.” Gooti toolluro yogalo tovi toro sakwollungikokwono.

⁹ Toro te Gooti tool Eburaiyamol kuudo uubweyoduke toolluno tov sugudo su tov kuubweyokaikono. Su toro to'busuko kubalno Gooti tool yiuwi'nokai a'mwo abolo Gooti toolluno kuudo kuubwepi kunyu kuruv Eburaiyamollubusuko sugudo tov aval'no uubweyonekono.

¹⁰ Neya duu'nyulo. A'mwo abolo pun aro kuudo yau'dupudogano. Oo nevu Moosesolluro loowo tovi kuumjuna'ji tomgu'aro Gooti toolluro sumdo tovi sugudo imo'nanonoldeyo. Yiuwi'nokai su toro kuudo yau'dupudo ton Gooti toolluro jul'nyogalo tovi dolago tomuu mwalodupudogano. Neya duu'nyulo. Gooti toolluro yogalo sakwollungiko puruv aro dodowodokwono. “A'mwo pwol Moosesolluro loowokwe buukiyo tonyuda'ai yiuwi'nokai yogalo judo'no judo'no sakwollungiko su tonyu ku'nono muumjuno'ji tov Gooti tool a'mwo su toollu kaiyako nyugolonekono.” Sakwollungikokwono.

¹¹ Yogalo su tov aro tovino kuu'maiyo toru'no aro abomollolupto'nanekubweyadopiyo. A'mwo pwolnodo kwol kuruv Moosesolluro loowo tovuro puuto tovi'aro kuumjuno'ji tov Gooti toolluro sumdo tovi sugudo mwimo'nonekono. Neya duu'nyulo. Gooti toolluro yogalo puruv aro sakwollungikokwono. “A'mwo pwol Gooti toolluno kuudo uubweyowo'ji Gooti toolluro sumdo tovi sugudo kwimo'no'ji tool aiyo kuvinono mujomwekovla'mwalonekono.” Sakwollungikokwono.

¹² Toro te kuudo neya jaullulo. Moosesolluro loowo tovi uumjunyo'moneyokwe puuto su tov purukwono. Aki Gooti toolluno kuudo uubweyo'moneyokwe puuto su to'gwowi purukwono. Gooti toolluro yogalo puruv Moosesolluro loowo su tovino aro sakwollungikokwono. “A'mwo pwol yiuwi'nokai Moosesolluro loowo tonyu kuumjungovlawo'ji toolno loowo su tonyu'aro aiyo yomjomwekovla'mwalonekono.” Sakwollungikokwono.

¹³ Toro te nevu Moosesolluro loowo su tovi kisuvolo me'no yodowore tonollu Gooti tool kaiyako sanekullugolowo'jujukekono. Toro kuvi kuruv nemino tov kaiyako nomapiyokwe Krais tool aro abiyonekumorabokaikono. Krais su tool nemoro aiko toru malluno sumaiyokwe i'noguropte tovi ilejuku'na'duke toollu Gooti tool kaiyako sugolokaikono. Su toro tovino Gooti toolluro yogalo puruv aro sakwollungikokwono. “Yiuwi'nokai a'mwo iko te sulejuku'napi toorai Gooti tool kaiyako igolodowodorogano.” Sakwollungikokwono.

¹⁴ Krais toolluro abiyonekumoraboka su tov aro tovino'mokwono. Aiyoga Gooti tool Eburaiyamollu sugudo uubweyo'moneyokwe subuu'yamju me'no aduuwiyokaikono. Toro aduuwiyoka su tov a'mwo abolo Juu miyawosunodupudo kunyuda'aiyo'mokwono. Gooti tool Krais Jisasolluro womdo sopiyoka tovi'aro gamoro sugudo su tov kuvinono uubweyodowodekono. Aki nevu Gooti toolluro Kuullo toollu mallo'moneyokwe tovino Gooti tool subuu'yamju me'no ajajukekono. Toro te subuu'yamju su tovi nevu yiuno Krais Jisasolluno kuudo uubweyodowado tomgu'aro to'no Kuullo su toollu kuvinono ma'dowadonogano.

Moosesolluro loowo tov Gooti toolluro sumdomguda'ai subuu'yamju tovi mamodukwopiyono tovinokwono

¹⁵ Mi avalobuuravoo, nuu kwako akavida'ai a'mwo abolo tonyuro yovekurajo tokwe ikuduuwallumo'mokwono. A'mwo pwol aro kuudo yauronekono. Nuu abolmi toga mi muugunyo tooro moro kuto ivito tonyu neya amapuro. Su toro kuudo yaurowo'ji subuu'yamju tov yiuno kuu'maiyo toru'no aro jokwollosonekono. “Nuu abolmi toga mi muugunyo tooro numoro yiuwi'nokai kuto ivito ton neya mapinokwono.” Jokwollosonekono. Subuu'yamju su toro ajokwolloso'ji tovi a'mwo pwolnodo kwol kuruv aro maduullukuronekono. “Kevu a'mwo me'no aboloka su toolluro subuu'yamju ajokwollosoka tovi muumjunpinono.” Maduullukuronekono. Aki subuu'yamju me'no ajokwolloso'ji su tovi a'mwo pwolnodo kwol kuruv gamoro yogalo muuduko pugai'aro muunyu toru mamobwokurosonekono.

¹⁶ Su toro to'busuko kubalno Gooti toolluro subuu'yamju Eburaiyamollu aduuwiyoka kuruv yiuno aval'nodokwono. Gooti toolluro aduuwiyoka su tov yiuno Eburaiyameke'aro gami jukweyago kwolaiyo nyumo'nono pweke'aro toorallu aduuwiyokaikono. Gooti toolluro yogalo su tov gami jukweyago kwolaiyo bwotonyago tooraino madadopiyo. Toro kuvi kuruv aro adadopiyo. “Gumi jukweyago kwolaiyo pwollu,” to'no adadopiyo. Toro te Eburaiyamolluro jukweyago kwolaiyo aboka su tool Krais tool kwekono.

¹⁷ Moro kuuguudo aikudumo akavuro kavlo tov arokwono. Sumdomgu Gooti tool Eburaiyamollu subuu'yamju aduuwiyokaikono. Toro kuvi kuruv lukomgu 430 kworomo tobuul me'no abawoka toga'no'gwowi Gooti tool loowo tov kwiyokaikono. Toro te lukomguda'ai loowo su tov sumdomguda'ai subuu'yamju tovi ku'nono mamodukwopiyonokwono. Sumdomguda'ai subuu'yamju su tov kuvinono neya imo'noneyokwe tovino Gooti tool Eburaiyamollu me'no aduuwiyokaikono. Toro tovino tov subuu'yamju su tov mimwogapiyowo'ji kuruv kuuno mujo'movla'mwalonokwono.

¹⁸ Kevu kuudo neya jaullulo. Gooti toolluro nonekullabwono tollovo nevu loowo tovi'aro uumjunowa'ji mallo'mo'mno'juki subuu'yamju tovida'ai mamarowa'jujukonogano. Toro kuvi kuruv Gooti tool Eburaiyamollu gamoro noonyumwonyu tollovo loowo tovi'aro kwiyokalmaiyo. Yiuno subuu'yamju tovi'aro to'gwowi kuvinono kwiyokaikono.

¹⁹ Toro te pugaikul aro yajunpinogaikikono. “Gooti tool gamoro loowo Moosesollu kwiyoka su tov buro'nyo kavlo tovino'mdukono?” Yajunpinogaikikono. Loowo kwiyoka su tov aro tovino'mokwono. A'mwo abolo ton kemi ma'no ma'nodo tonyuno neya yainyunpino'moneyokwe Gooti tool loowo su tov kwiyokaikono. Toro te Eburaiyamollu jukweyago kwolaiyo subuu'yamju kwiyoka su tool yere maboduke toga loowo su tov womdo kuuno sajukokwono. Loowo su tov Gooti tool ensel pworai kwiyokakwono. Toro wino sumaiyokwe ensel su tooro loowo su tov malluno sumaveyokwe Moosesollu kwiyoporogano. Moosesol Gooti tooke'aro a'mwo abolo togai'aro tonyu akuuto toru momuugurowosokwe sumo'nokaikono. Toro te a'mwo momuugurowosokwe su tool loowo tovi malluno sumaiyokwe Juu a'mwo abolo tonyu kwiyokaikono.

²⁰ Neya duu'nyulo. Gooti tool gamoro sumdomguda'ai subuu'yamju su to'gwowi a'mwo momuugurowosokwe pwollu'aro kwiyokalmaiyo. Toro kuvi kuruv subuu'yamju su to'gwowi yiuno Gooti gavnokwe toolno Eburaiyamollu kwiyokaikono.

Krais tool yere maboduke toga loowo tov nemi wuulo killo'mo ago tovibusuko ameronekumwallajuko tovinokwono

²¹ Kuudo neya jaullulo. Moosesolluro loowo tokwe'aro Gooti toolluro subuu'yamju kwiyoka tokwe'aro toval ikomago minodubulovakono. Awiyo. Su tov aro tovinokwono. Nevu aiyo mujomwekovlaiyo'moneyokwe tov loowo puvi'aro mama'dowadonogano. Nevu aiyo mujomwekovlaiyo'moneyokwe tov loowo puvi'aro amarowa'jujuko'mno'juki loowo su to kuvi'aro a'mwo abolo ton Gooti toolluro sumdo tovi sugudo nokwo kwimo'nopujukogano. Toro kuvi kuruv loowo puvi'aro mama'dowadonogano.

²² Toro kuvi kuruv Gooti toolluro yogalo tov aro anekudadopiyo. “Yiuwi'nokai a'mwo abolo tonyu ma'no ma'no pasudo tov aiyowomno kirogabolmwallodowodokwono.” Anekudadopiyo. Toro te yiuwi'nokai a'mwo abolo ton ma'no ma'no pasudo tovuro wuulo killo'mo ago tovibusuko kuule'na'dupudogano. Su toro kuule'na'dopure tonyu Gooti tool wonyapino yodowodo tovino kavlo tov arokwono. Gooti tool a'mwo abolo Jisas Kraisolluno kuudo kuubwepi tonyu gamoro subuu'yamju tov kuvinono wiyo'moneyokwe tovinokwono.

²³ Toro te Krais Jisasolluno kuudo uubweyo'moneyokwe tov yere mabai'mo'mduke toga Moosesolluro loowo tov nemi wuulo killo'mo ago tovibusuko ameronekumwallajukonogano. Aki Krais Jisasolluno kuudo uubweyo'moneyokwe su tov kuu'maiyo toru yere mabomollolupto'nosoduke toga wuulo killo'mo ago su tovida'ai ku'nono mabirolo'nugolokwiyajuwonogano.

²⁴ Toro te Krais tool yere maboduke toga Moosesolluro loowo su tov nemi moduvonekumwallokwe toolbusuko anekullumo'nyajukokwono. Su tov aro tovino'mokwono. Nevu Krais toolluno kuudo kuubweya'ji tovi'aro Gooti toolluro sumdo tovi sugudo billumo'nyo'moneyokwe tovinokwono.

²⁵ Toro kuvi kuruv aga'no'gwowi Krais toolluno kuudo uubweyo'moneyokwe tov me'no abai'movokakwono. Toro tovino tov nevu nemi amoduvonekumwallajuko loowo su tovi dolago tomuuda'ai me'no birolo'nugolokwodowadonogano.

Nevu Krais toollu kuudo uubweyodowado tovi'aro Gooti toolluro kwoloraiyo kuunodo wimo'nodowado tovinokwono

²⁶ Kevu Krais Jisasolluno kuudo kuubweyopo togaikul kwollu me'no uuguro'mwonyodupudogaikikono. Toro togaikulluno tov Gooti toolluro kwoloraiyo me'no sumo'nopogaikikono.

²⁷ Aki kevu Krais toollu tomuu wonyo to'busuko uuvollunodupudo togaikul kwollu me'no uuguro'mwonyodupudogaikikono. Toro uuguro'mwonyodupudo togaikul Krais toollu kemi youro to'busuko me'no amollosopogaikikono.

²⁸ Toro togaikulluno tov go'no go'no mimo'nodupudogaikikono. Kevu Juu togaikike'aro Juu miyawosunodupudo togaikike'aro togaikul go'no go'no mimo'nodupudogaikikono. Aki ki'nato womdokwe togaikike'aro me'no birolo'nugolokwodupudo togaikike'aro togaikul go'no go'no mimo'nodupudogaikikono. Aki a'mwo toorekike'aro abolo togaikike'aro togaikul go'no go'no mimo'nodupudogaikikono. Kevu yiuwi'nokai su togaikul Gooti toolluro sumdo tovi go'no go'no mimo'nodupudo su tov aro tovinokwono. Kevu yiuwi'nokai Krais Jisasollu uuguro'mwonyodupudo togaikul a'mwo abolo yiuno puru'mono togaikulbusuko me'no imo'nodupudogaikikono.

²⁹ Aki kevu Krais toolluro a'mwo abolo kuunodo wimo'nodupudo togaikul Eburaiyamolluro jukweyago kwoloraiyo kuunodo togaikulbusuko imo'nodupudogaikikono. Toro togaikul Gooti toolluro noonyumwonyu Eburaiyamollu subuu'yamju kwiyoka su tollovo kevuge'aro Eburaiyameke'aro yiuwi'nokai togaikul aval'no nomapinogaikikono.