Filipai 4 - Gooti Toolluro Yogalokwono

Poolol Jisasolluro a'mwo abolo tonyu jurogudo duuwimwojo'moneyokwe yogalo pun kuudoka tovinokwono

¹ Toro tovino tov mi avalobuuravoo, kevu Aguto toollu me'no uuguro'mwonyodupudo togaikul jurogudo neya dodavogaulo. Toro togaikulluno kalo buuropino nyunodowodo toonyu kevuge mwallo'mo ilaiyo nyunodowodonyugono. Aki kevu moro mubiyo sugudo to'busuko nonyumo'nodupudogaikikono. Mubiyo sugudo su tov a'mwo aguto kig pwolluro miguto to'busukokwono. Toro togaikulluno ilaiyo yodumdonyugono.

² Kemida'ai abolo puruval yogalo youllajunodubulo tovalluno yovo tov Yiuwodiyakwe'aro Sintikeyokwe'aro tovakono. Nuu abolo su tovakullu yogalo aro modaikurugolmo'monyugono. Kev yiuwi'nokai tovakul Aguto toollu me'no uuguro'mwonyubulo tovino tov sumwoluko puru'mono neya doosunogaulo.

³ Aki a'mwo nuuge avaiwomdokwe kuunodo pwekuji aro gudoganumo'mokwono. Abolo su toval sumwoluko puru'mono wosunbulluno'moneyokwe tovino guu neya duuwiyo'mwojono. Tade, guu neya wiyo'mwojubino'mo tovino agudoganmono. Abolo su toval nuuge kuuguudo sugudo tokwe moruujo'moneyokwe womdo bwotonyo imo'na'dubulovakono. Aki toro toval Klemeneke'aro a'mwo nuuge avaiwomdo yodupudo kworogai'aro su toorogai aval'no yodubulovakono. A'mwo abolo womdo yodupudo su tonyuro yovo ton Aiyo Yiunokuudo Mujomwekovlaiyo'moneyokwe Buukiyo tovi me'no wo'dupudogano.

⁴ Kevu yiuwi'nokai toga Aguto toolluno ilaiyo neya jogaulo. Aki aiko te ikudumo'mokwono. Kevu ilaiyo neya jogaulo.

⁵ A'mwo abolo pun noonyumwonyu pasudo togai saikullugolpi tov kevu kavo to'no duubemwojogaulo. Kevu pasudo su tokwe kuuduuwallunpi tov yiuwi'nokai a'mwo abolo ton kemino aro kuudo yaikuupinogano. Oo a'mwo abolo su ton yiuno kavo to'no uubemwojodupudodeyo. Yaikuupinogano. Kuudo neya jaullulo. Aguto toolluro nobai'mowono tov wobo togakono.

⁶ Aki buro'nyo buro'nyo tagunyodeyo aikullumo'no'ji kunyuno kuruv kevu jul'nyo nyubwosunmwalpiyo. Toro kuvi kuruv yiuwi'nokai toga subusu'nyogalo neya duudogaulo. Buro'nyo buro'nyodeyo ton ikullumo'nodowo'jure kuga kuruv kevu Gooti toollu, “Oo neya donekullo'mwojono,” subusu'nyogalo duudogaulo. Aki su toro kuudoganpi toga Gooti toollu, “Nenyoo,” neya duudumovlavogaulo.

⁷ Aki kemoro subusu'nyogalo su tovi'aro Gooti toolluro kavo wosunyo'moneyokwe tov nekullamwalonekono. Gooti toolluro kavo wosunyo'moneyokwe su tov yiuwi'nokai kwako akavida'ai kuudo youroma'dupudo tonyu uuwolo'mdowodokwono. Aki kevu Krais Jisasollu uuguro'mwonyodopure tovi'aro Gooti toolluro kavo wosunyo'moneyokwe su tov kemoro poowokalago togai'aro kuudo togai'aro tonyu pi'mwono yellukuromollekumwalmwalonokwono.

⁸ Mi avalobuuravoo, nuu aiyowo'mo yogalo akav ikudumo'mokwono. Kevu noonyumwonyu nebal'no pasudo togai'aro pasudo punyuno ilaiyodeyo dodupudo togai'aro pasudo idopto'nodo togai'aro kaiya'no nonagutokwe pasudo togai'aro pasudo sugumaluko togai'aro ilaiyo jugollo'mo pasudo togai'aro yiuwi'nokai pasudo su tonyuno kuudo neya jou'movlavogaulo. Aki noonyumwonyu pasudo kuuroollumaluko togai'aro aki ilomodomoropiyo'mo pasudo togai'aro kunyuno kuruv kuudo neya jou'movlavogaulo. Yiuwi'nokai pasudo su tollovo kemoro kuudo tonyu neya aullo'movaikwopiyogapuro.

⁹ Aki kevu moro pasudo tonyuno kuudo nyau'mwakovo. Moro yogalo sodekubwasajo togai'aro numida'ai kuudo souromallajupo togai'aro moro yogalo kuu'nyajupo togai'aro moro pasudo kwonomallajupo togai'aro yiuwi'nokai su tonyu neya duumjunogaulo. Toro uumjungovlavopi aki sumwoluko kavo wosunyo'moneyokwe ikullabodowodo Gooti su tool kevuge nomjomwekovla'mwalonekono.

Filipaida'ai Jisasolluro a'mwo abolo ton Poolollu yasuwa'wino pun kuuwopiyabopo tovinokwono

¹⁰ Neya duu'nyulo. Sumdomgu kevu mi nonyo'mwojo'mo kuudo saullajupo kuvi kuruv puuto nonaguto sumo'nyajupogaikikono. Toro tovino tov manyu toga manyo'mwojajupogaikikono. Toro kugaikul kuruv aga'no'gwowi mi nyo'mwojo'mo aki aiko te kuudo sau'mwakopogaikikono. Toro te kemoro kuudo sau'mwakopo su tovino nuu ilaiyo bwotonyo yodum Aguto toolluno sulomodomoropimwolanyugono.

¹¹ Kevu moro yogalo aikudadokwo akavino aro kuudo nyanuupiyo. Oo Poolol noonyumwonyu tonyuno supto yodowodo tool donekudadopiyo. Kuudo nyanuupiyo. Su tov aro tovinokwono. Nuu noonyumwonyu pun me'no ama'mi tonyuno, “Mekono,” to'no neya dumwalmonyugono. Su toro tovino nuu kuudo me'no souromaronyugono.

¹² Neya duu'nyulo. Nuu apoo'nyaiyo'mdeyo oo kuto ivito bwotonyagokweyo'mdeyo kuruv me'no ibwosungovla'mdumdonyugono. Aki yiuwi'nokai noonyumwonyu anyumo'nupi kuga kuruv nokwo yomjomwekovla'mwalmonyugono. Toro toonyu nyomjomwekovlaiyo'moneyokwe tonyuno aro kuudo me'no youroma'dumdonyugono. Wosamujuko bwotonyago abuuku'no'jo'mdeyo oo mujuko abolmiyo'mdeyo oo kuto ivito bwotonyagokwe sumo'numiyo'mdeyo oo supto sumiyo'mdeyo yiuwi'nokai su tonyuno kuudo me'no youroma'dumdonyugono.

¹³ Toro te neya duu'nyulo. Yiuwi'nokai noonyumwonyu numi anyumo'no'ji kuga kuruv nuu Krais jurogudo nubweyodowodo toollu'aro ilaiyo to'no nokwo yomjomwekovla'mwalmonyugono.

¹⁴ Toro kuvi kuruv numi tagunyo nyumo'noduke tonyu kevu me'no nyo'mwojodupudogaikikono. Toro nyo'mwojodupudo su tov ilaiyo to'no yanyugolodupudogaikikono.

¹⁵ Aki kevu wagwolago Filipaida'ai togaikul aro kuudo me'no yau'dupudogaikikono. Nuu kuuguudo sugudo tokwe kemi muudu'no amodekumollajo toga nuu proovins Masedooniya tovi kuugollo'movonyugono. Su toro kuugollo'movo toga Jisasolluro mollu'bwoto puruv manyo'mwojokanyugono. Toro kuvi kuruv yiuno kevu judo togaikulno'gwowi nonyo'mwojo'moneyokwe nuugwiyo pun anuwapiyopogaikikono.

¹⁶ Aki nuu wagwolago Tesaloonaika mwalodore kuga kuruv kevu nonyo'mwojo'moneyokwe nuugwiyo pugai'aro aiko te pugasal toga anuwopiyabopogaikikono.

¹⁷ Moro su toro aikudumo tov kevu nuugwiyo pugai'aro nonyo'mwojupino'moneyokwe maikudadokwono. Toro kuvi kuruv kemoro anyo'mwojajupo su to'gwowi Gooti toolluro muunyu kai'muuda'ai mubiyo nomapino tonyu youllosodupudo tovino aikudadokwono.

¹⁸ Aga toga nuvu noonyumwonyu punyuno supto mimwakono. Toro kwonyu kuruv yiuwi'nokai noonyumwonyu nomjonomwekovlaiyo'moneyokwe ton kurukwenyugono. Su tov aro tovinokwono. Kemoro mi nonyo'mwojo'moneyokwe yasuwa'wino anuwopiyamwa'jupo ton Epafroodaitosol miyomno me'no amokamwa'jukekono. Kemoro yasuwa'wino amokamwa'juko su tonyu nuu me'no ama'mwa'jonyugono. Kemoro yasuwa'wino anuwopiyamwa'jupo su ton wobeya sudokwe pun Gooti toollu kwiroudapiyajupo tonbusuko wimo'nodupudogano. Toro te Gooti tool kemoro yasuwa'wino wobeya sudokwe tonbusuko su tonyu ilaiyo molloma'dowodekono. Toro molloma'dowodo su tonyuno ilaiyo winodowodekono.

¹⁹ Aki mi Gooti su tool kemoro yiuwi'nokai supto supi ton nokwo ikullamwalonekono. Gooti su tool aguto kuunodo toolluno tov yiuwi'nokai noonyumwonyu ton bwotonyago kurukwekono. Toro tonyuda'ai pun marowo'ji Krais Jisasollu'aro kemi nokwo ikullamwalonekono.

²⁰ Oo nemi Nellunumiyago Gooti toolluno yovo tov yiuwi'nokai toga muunyu kai'muu ilomodomoropimwolowanonogano. Nebal'nodokwono.

Poololluro aiyowo'mo yogalo kuudoka tovinokwono

²¹ Nuu aro adopiyamono. Yiuwi'nokai a'mwo abolo Krais Jisasollu uuguro'mwonyodupudo ton Gooti toolluro kuunodo wimo'nodupudogano. Toro tonyomno nuu, “Ilaiyokwono,” adopiyamono. Aki Krais toolluro a'mwo mi nyugwai'yago toorobusuko nonyumo'nodupudo pworo nuuge amwakopo kworo kuruv kemi, “Ilaiyokwono,” adekwopiyamavo.

²² Aki yiuwi'nokai Gooti toolluro a'mwo abolo gabovo kun kuruv kemi, “Ilaiyokwono,” adekwopiyamavo. Aki Jisasolluro a'mwo abolo pun a'mwo aguto Sisa toolluro ago tovi womdo wiyodupudo kun kuruv kemi guureji muunyu toru'aro, “Ilaiyokwono,” adekwopiyamavo.

²³ Oo nemi Aguto Jisas Kraisolluro yasuwa'wino sugumaluko tov kemoro kuullo tobuurai nokwo ikubwemovla'mwalonokwono.