Filipai 2 - Gooti Toolluro Yogalokwono

Jisasolluro pasudo to'busuko molludo'movla'mwalano tovinokwono

¹ Kevu kuudo neya jaullulo. Krais tool kemi me'no ikuguro'mwonyodowodekono. Toro ikuguro'mwonyodowodo su tov kemi jurogudo yogullumwojekwapiyodowodokwono. Aki gamoro kalo buuropino winodowodo tov kemi jurogudo daikullumwojodowodokwono. Aki Gooti toolluro Kuullo tool kevuge me'no ibwoto'nomwalodowodekono. Aki Jisasolluro a'mwo abolo pubuuraino poowoguro'mwoga ikullumo'nodowodogaikikono. Aki kevu su tobuuraino kalo mamwonyodupudogaikikono. Yiuwi'nokai su ton kemi me'no ikullumo'nodowodogaikikono.

² Toro tovino tov kevu aro neya jogaulo. Kevu yiuwi'nokai Jisasolluro a'mwo abolo tobuurekul kuudo puru'mono neya jou'movlavogaulo. Aki kalo buuropino aval'no neya domollogaulo. Aki kemi poowokallumdo togai guro'mwonyopi kuudo puru'monodo to'no jaurogaulo. Kevu tono tono amjumovlapi tov nuu ilaiyo bwotonyo ibwosunmonyugono. Aki moro ilaiyo subwosunmi su tov moro poowokalago tovi yiuno'no noullo'mowopiyonokwono.

³ Kevu yovo aguto mallo'mo'mdeyo oo ilomoropunyo'mo'mdeyo tovino womdo puru'monodo kuruv nyumwalpiyo. Toro kuvi kuruv kevu kwako tomuu'aro bwolomoropinapi a'mwo abolo pubuuraino aro kuudo neya jaurogaulo. Oo a'mwo abolo su tobuuro nemi nekuuwolo'mdupudogano.

⁴ Aki kevu pwolno puru'monodo togaikul kevnokweyogaikulluro noonyumwonyu tonyuno to'no nomollomwalmwalpiyo. Toro kuvi kuruv a'mwo abolo pubuuravuro noonyumwonyu togai'aro kuruv neya domollomwalogaulo.

⁵ Kevu kevnokweyogaikulluro akuuto toru Krais Jisasolluro kuudo saullajuko to'busuko kubalno aval'no jou'movlavogaulo.

⁶ Krais Jisasol Gooti kuunodo imo'nodowodo kwol kuruv kuudo aro tovi guureji magudupolallajukekono. Oo nuu Gooti kuunodo imo'nodumdo toonyuno tov aval'no neya amwalmo. Toro kuudo tovi guureji magudupolallajukekono.

⁷ Toro kwol kuruv gavnokweyolluno kuudo su tovi modukwopino sumaiyokwe a'mwo ki'nato womdokwe pwekwobusuko imo'no'no kwako akavida'ai a'mwo kula'nokakwe pwollubusuko sumo'nokaikono.

⁸ Aki Jisasol kwako akavida'ai a'mwo pwolbusuko kula'noka imo'nyuno sumaiyokwe gavnokweyol abwolomoropinyajukekono. Toro tool Gooti toollu uumjunyuno uumjunyuno sumaiyokwe noromiyoso'mo yodopure kuga kuruv kuuno kuumjunokaikono. Toro uumjunyuno sumaiyokwe i'noguropte tovi yiuno'no sulabolokaikono.

⁹ Jisasol su toro me'no somjumovlavoka tovino tov Gooti tool Jisasollu muunyu kai'muu kuunodo toru'no sulomorumwallokaikono. Aki toro toollu Gooti tool yovo aguto tov kuubweyokaikono. Gamoro yovo su tov yiuwi'nokai yovo gabovo tonyu uuwolo'mdowodokwono.

¹⁰ Aki Gooti tool Jisasolluno yovo tovi muunyu toru'aro sulomoropiyoka su tov aro tovinokwono. Yiuwi'nokai sulugumdo muunyu akai'muuda'ai mwalodupudo togai'aro aki kwako akavi mwalodupudo togai'aro aki kwako akavi dolago tomuu mwalodupudo togai'aro yiuwi'nokai ton Jisasolluno yovo su tovi kwako tomuu'aro wipureyokwe suduko neya winuguto'numwalpino tovinokwono.

¹¹ Aki yiuwi'nokai su ton kuu'maiyo toru'no aro neya dodowiyoku'bworosunpinogano. “Oo Jisas Kraisol Agutekono.” Toro dodowiyoku'bworosunodopure tovida'ai gami Ganumiyago Gooti tool yovo aguto ma'mwalonekono.

Kwako akavida'ai a'mwo abolo tonyu akuuto toru nevu bako to'busuko neya wimo'numwalano tovinokwono

¹² Toro tovino tov miyobuuravoo, kevu Gooti toolluro yogalo tovi yiuwi'nokai toga uumjunodupudogaikikono. Nuu kevuge mwalodore toga kevu pi'mwono kuumjunyajupo to'busuko kubalno aga nuu kevuge mamwalodo'mure kuruv pi'mwono neya duumjunogaulo. Aki kevu kaveno to'no nuumjunpiyo. Toro kugaikul kuruv muunyu toru'aro guureji neya duumjunogaulo. Gooti tool kemi ma'no ma'nodo tovuro kirumwallo tovida'ai me'no abomollurolovekumokalokwokaikono. Su toro tovino kevu a'mwo abolo tonyu kuu'maiyo toru wuuduuwallo'moneyokwe womdo guureji neya jogaulo. Womdo guureji supi toga kevu Gooti toollu kwako tomuu'aro kuunodo wiyo'moneyokwe luko yo'mo togai'aro bu'buto togai'aro to'no womdo neya jogaulo.

¹³ Kuudo neya jaullulo. Gooti tool kemi poowokalago tonyu womdo kuulaikullodowodekono. Womdo kuulaikullodowodo su tovi'aro gamoro ilaiyo winodowo'jure tovi kevu nokwo uumjunmwalpinogaikikono. Aki kevu kuvinono uumjunpino'moneyokwe kuudo tokwe'aro jurogudo tokwe'aro yiuwi'nokai su toval ikubwemwalonekono.

¹⁴ Kevu yiuwi'nokai womdo tonyu mujumovlavopi toga burol yogalo maullajunpinono. Aki womdo su tonyuno yogalo nyoullajunmwalpiyo.

¹⁵ Su tov aro tovinokwono. Kevu Gooti toolluro kwoloraiyo togaikul pasudo pworogai kaiyako nomollugolamo'numwalpiyo. Toro kugaikul kuruv kaiya'no nonagutokwe to'no neya jumo'nogaulo. Toro togaikul kwako akavida'ai a'mwo abolo kaiya'nodokwe togai'aro kirovanyuvanyokwe togai'aro tonyu akuuto toru bako pwopiyodowodo to'busuko nokwo wimo'numwalpinogaikikono.

¹⁶ Gooti toolluro yogalo tov aiyo yiunokuudo mujomwekovlaiyo'moneyokwe tov wiyodowodokwono. Yogalo su tovi kevu guureji neya dogudupolarogaulo. Kevu kuvinono agudopolapi tov Krais tool aikomgu kwolabwo'ji toga nuu kemino aro kuudo yau'monyugono. Oo moro dukwogulo sumo'nallajo tokwe'aro womdo bwotonyo sajo tokwe'aro su toval yasuwa'no mavlaiyajulovaldeyo. Kuudo yau'monyugono. Toro kuudo yauro'mi kemino ilaiyo nokwo imwalmonyugono.

¹⁷ Toro te kemoro Gooti toollu kuudo uubweyodupudo tov pris tooravuro Gooti toollu kwiroudapiyajupo to'busuko imo'nodowodokwono. Aiyoga pris su tooro Gooti toollu wiyo'moneyokwe wain wonyo pun aimowosajuporogano. Su toro to'busuko kubalno nuu Gooti toollu womdo wiyodo'mure toga romiyanubweyopi moro mujako tov nokwo kimowosonokwono. Aki su toro aimowoso'ji tovino ilaiyo imonyugono. Aki nuu kevu kuudo me'no uubweyodupudo togaikike ilaiyo aval'no yanonyugono.

¹⁸ Su toro to'busuko kubalno kev kugaikul kuruv nuuge ilaiyo bwotonyo aval'no neya jogaulo.

Poolol Timootiyollu wagwolago Filipai tomuuno morapiyo'mo kwinoka tovinokwono

¹⁹ Nuu aro kuudo sau'mwakono. Aguto Jisasol ilaiyo kwino'ji tov nuvu wobo toga Timootiyollu kemiyomno nomekwopiyamonyugono. Toro amekwopiyami su tool yogalabowo'ji kemoro yomjomwekovla'mdopure tovino kuuguudo nokwo nyudonekono. Toro anyudo'ji tovida'ai mi jurogudo nokwo danyumwojonokwono.

²⁰ Kuudo neya jaullulo. Timootiyol nuuge avaikuudo yau'dowodo su toolbusuko nuu a'mwo gabovo pwol nonagutonyugono. Su tov aro tovinokwono. Timootiyol kemi ikullo'mwojumovlaiyo'moneyokwe kuunodo winyokwekono.

²¹ Yiuwi'nokai a'mwo pworono'gwowi yiuno kevnokweravuro kwako akavida'ai womdo tonyuno to'no kuudo yau'dupudorogano. Aki toro tooro Jisas Kraisolluro womdo tonyuno kuudo neya miyau'dupudorogano.

²² Toro kuvi kuruv Timootiyolno'gwowi gamoro womdo sopiyajuko tovi'aro gavnokwe toolluno me'no kuuduuwallunyajukekono. Toro kuuduuwallunyajuko su tovi wonomaropi aro kuudo nokwo youroonpinekono. Oo a'mwo akal Krais toolluro womdo tovi yiuno ilaiyo to'no yodowodoldeyo. Youroonpinekono. Aro to'busukokwono. Kwolaiyo pwol gami ganumiyago toollu wiyo'mwojodowodo to'busuko kubalno Timootiyol kuuguudo sugudo tokwe moruudomollo'moneyokwe mi nyo'mwojodowodekono.

²³ Toro te nuvnokwe toonyu adado nyumo'nono'mdukoneyokwe tovino kuudo me'no souroma'mi toga a'mwo su toollu kemiyomno nomekwopiyamonyugono.

²⁴ Aki nuu aro kuudo sau'mwakonyugono. Oo nebalokwono. Aguto tool puuto ausanubweyo'ji tov nuu kwonyu kuruv wobo toga kemi nokwo bekuru'ma'monyugono. Kuudo sau'mwakonyugono.

Poolol Epafroodaitosollu wagwolago Filipai tomuuno morapiyo'mo kwinoka tovinokwono

²⁵ Aki nuu aro kuudo yau'dumdonyugono. Nuu wagwolago Filipaida'ai Jisasolluro a'mwo abolo tonyomno a'mwo Epafroodaitosollu neya moropiyamonyugono. Kuudo yau'dumdonyugono. Jisasolluro a'mwo su tool mi nyugwai'yago toolbusuko nyumo'nodowo nuuge avaiwomdo yodowolekono. Aki a'mwo mollurogudo pi'mwono molloda'mdowodo pwolbusuko a'mwo su tool nuuge womdo pi'mwono molloda'mdowolekono. Sumdomgu kevu a'mwo su toollu miyomno kuurokado'moneyokwe amonuwopiyabopekono. Toro amonuwopiyabopo su tool nuu supto yodore toonyu anyo'mwojajukekono.

²⁶ Toro tool kemi ikwonyo'mo winodowodekono. Toro tovino tov a'mwo su toollu kemiyomno nomekwopiyamekono. Aki kevu a'mwo su toolluro nobollo yoduke tovino me'no kuu'nopo su tovino gavnokwe tool jul'nyo subwosunokaikono.

²⁷ Nebalokwono. Epafroodaitosol nobollo tov malluno sumaiyokwe nobollo'mo wobo toru sokaikono. Toro kuvi kuruv Gooti tool a'mwo su toollu kalo mamwonyuno sumaiyokwe sukulokaikono. Gooti tool yiuno a'mwo su toolluno to'no kalo kwinokalmaiyo. Toro kuvi kuruv nuu kwonyuno kuruv kalo kwinokaikono. Su tov aro tovinokwono. A'mwo su tool abolowo'jujuko'mno'juki nuu kalo kalo'mo to'no nyomjomwekovla'mwalmiyokwe tovino Gooti tool sukulokaikono.

²⁸ Toro te nuu a'mwo su toollu kemiyomno mekwopiyabiyo'mo tovino guureji anyunadopiyo. Su tov aro tovinokwono. Kevu a'mwo su toollu kwonpi toga ilaiyo bwotonyo ipinogaikikono. Aki me'no amekwopiyami toga nuu kemino nomoguurotowosumwalmiyokwe tovino'mokwono.

²⁹ Toro te kevu nemi Aguto toolluno yovo tovida'ai a'mwo su tool abaiki'mowo'ji toollu ilaiyo kuunodo neya domollomallulo. Aki yiuwi'nokai Gooti toolluro a'mwo womdokwe gabovo kworai kuruv a'mwo aguto tooraibusuko ilaiyo aval'no domollomarogaulo.

³⁰ Neya duu'nyulo. Epafroodaitosol Krais toolluro womdo tovi sajuko toga nobollo'mo wobo toru sokaikono. Su toro soka toga gavnokweyolluro kwako akavida'ai kulako tovino kuudo neya miyaullajukekono. A'mwo su tool nobollo'mo soka su toga mi anyo'mwojajukekono. Kuudo neya jaullulo. Kevu mi nyo'mwojodupudo kugaikul kuruv supto kuuno sajupogaikikono. Toro kuvi kuruv Epafroodaitosolno'gwowi womdo su tovi yopiyo'mo tool kuvinono amjumovlaiyajukekono. Toro tool womdo su tovi kuuno mujumovla'mdowo nobollo'mo wobo toru sajukekono.